Bo ta banda kusambisa mambu ya Dennis Christensen na Februari 19, 2018. Dennis Christensen kele muntu ya insi Danemark mpi Mbangi ya Yehowa. Banda bo me kangaka yandi na Mayi 2017, bo me tulaka yandi ntete na boloko na mbanza Orel (to Oriol) na Russie.

Na Yanuari 31, 2018, Procureur Adjoint ya Orel fundaka Christensen mpi pesaka mukanda mosi ya balutiti 76 ya ke tubila mambu ya Christensen sambu bo tadila yo. Procureur fundaka yandi na kutadila artikle 282-22(1) ya Code pénal ya insi Russie yina ke buyisaka bantu na kuvukana ti kimvuka mosi buna ya lusambu yina leta ke monaka nde yo ke salaka mambu ya nku. Ndola yina leta ke pesaka sambu na diambu yai ke vandaka ya bamvula kumi ya boloko.

Christensen me fwa ve ata nsiku mosi. Bo kangaka yandi ntangu yandi vandaka ti nkento na yandi mpi bantu ya nkaka ya yandi ke sambilaka ti bo na lukutakanu mosi ya me tala mambu ya lusambu mpi bo vandaka kusala yo na ngemba. Bo ta banda kusambisa mambu yai na Februari 19, 2018 na 14 h 30, na tribinale ya distrike ya Jeleznodorojny na Orel.