Na Februari 19, 2018, bazuzi yantikaka kusambisa mambu ya Dennis Christensen na Tribinale ya Zheleznodorozhniy na Orel (to Oriol). Bantu mingi ya kwisaka sambu na kupesa M. Christensen kikesa vandaka mpi pana na nzo yina bo vandaka kusambisa yandi. Jeanne Christina Demirci, mumonisi ya Ambassade Royal ya Danemark, katukaka na Moscou mpi kwendaka kulanda mutindu bo ke sambisa Christensen. Na nima ya kusala kaka ngunga mosi, zuzi Aleksey Rudnev pesaka M. Christensen mpi ba avocats na yandi ntangu ya kutadila mambu yina vandaka na badosie. Na ntwala nde zuzi kuyantika kusambisa, tribinale soviétique ya distrike yina piminaka M. Christensen banswa ya nkaka. Bo pesaka yandi kaka bamposo zole sambu na kuzaba mambu yina vandaka na dosie mosi ya balutiti 2500 yina bo sonikaka na ndinga Ki-Russe. Zuzi Rudnev tulaka dati ya Aprili 3, 2018 na ngunga ya 10:30 sambu na kusambisa diaka mambu yina. Na ntangu yai yonso, M. Christensen kele ntete kaka na boloko sambu na mwa ntangu.