Bo me kotisa batoko 16 ya Bambangi ya Yehowa boloko na Singapour sambu bo me buya kusala kisalu ya kisoda mpamba ve kansansa na bo ke buyisa bo na kusala yo. Yai mbala ya zole ya bo ke kotisa batoko 10 na kati na bo boloko sambu batoko yai me soba ve lukanu na bo na nima ya mbala ya ntete yina bo basisaka bo na boloko. Batoko yai kele ve ti nswa ya kulomba nde bo sambisa bo diaka, sambu na insi Singapour, batoko fwete sala kisalu ya kisoda mpi luyalu ya insi yai ke ndimaka ve nswa yina bantu kele ti yo ya kusala kisalu ya nkaka kana kansansa na bo ke buyisa bo kusala kisalu ya kisoda.

Kana toko me lungisa bamvula 18, nsiku ya insi Singapour ke tubaka nde yandi fwete sala na kisalu ya kisoda. Kana yandi me buya sambu kansansa na yandi ke buyisa yandi na kusala yo, yandi fwete kota boloko mpi kusala bangonda 15 na camp ya basoda. Kana yandi me lungisa bangonda yina na boloko, bo fwete basisa yandi mpi kulwatisa yandi mbala mosi lele ya basoda sambu yandi sala mpi bangalasisi yina basoda ke salaka. Kana yandi buya diaka, bo fwete sambisa yandi na tribinale ya basoda mpi tribinale yai fwete zengila yandi boloko ya bangonda 30.

Yo yina, batoko ya kele Bambangi ya Yehowa yina kansansa na bo ke buyisaka bo na kusala kisalu ya kisoda lenda kota boloko mbala zole ya kulandana, disongidila nde bo lenda sala bangonda 45 na boloko.

Banda ntama, ONU ke lombaka bansi yina me kotaka na kimvuka na yo na “kuzaba nde kana kansansa ya muntu ke buyisa yandi na kusala kisalu ya kisoda, yo kele nswa ya muntu na mambu ya me tala kimpwanza ya mabanza, ya kansansa mpi ya mambu ya dibundu, na kutadila Mambu Yina Ntoto ya Mvimba Tubaka na Yina Me Tala Banswa ya Bantu.” Insi Singapour kele na kati ya bansi yina me kotaka na ONU banda 1965. Kansi insi yai me buyaka diambu ya me tala kuzitisa kansansa ya bantu. Na mukanda yina muntu mosi ya luyalu ya insi Singapour tindaka na Kimvuka ya Ke Tadilaka Mambu ya Banswa ya Bantu ya ONU (Commission des droits de l’homme de l’ONU) na kilumbu ya 24 avril 2002, yandi tubaka nde: “Kana mambu yina muntu ke kwikilaka to mambu yina yandi ke sala ke wakana ve ti mambu ya yandi fwete sala sambu na kutanina insi, nswa ya insi na yina me tala kutanina insi fwete luta na kisika ya ntete.” Yandi tubaka na pwelele yonso nde: “Beto ke sadilaka ve nswa yina konso muntu kele ti yo ya kubuya kusala kisalu ya kisoda kana kansansa na yandi ke buyisa yandi.”

1. 21 mars 2022

   Bambangi ya Yehowa 16 me kota boloko sambu bo me zitisa kansansa na bo

2. 24 avril 2002

   Bamfumu ya luyalu me tuba nde insi Singapour me zaba ve nswa ya kuzitisa kansansa ya bantu.

3. Février 1995

   Bo ke landa kukanga Bambangi ya Yehowa ya Singapour mpi bo ke pesa bo bandola.

4. 8 août 1994

   Tribinale ya Nene ya Singapour me buya mukanda yina Bambangi ya Yehowa kotisaka sambu bazuzi kutadila diaka diambu yai.

5. 12 janvier 1972

   Luyalu ya insi Singapour me katula zina ya kimvuka ya Bambangi ya Yehowa na mikanda ya leta.