Na Yuli 20 ti 21 2019 Bampangi ya Slovaquie salaka lukutakanu ya distrike na mbala ya ntete na ndinga ya Romani na Winter Stadium na Michalovce. Bantu vandaka 1 276 na lukutakanu yango mpi bantu 19 bakaka mbotika.

Bampangi yina vandaka na lukutakanu yango katukaka na Belgique, République Tchèque Grande-Bretagne mpi Ukraine. Bo vandaka na kiese ya kutala filme, Disolo ya Yoziasi: Zola Yehowa Kansi Menga Mambu ya Mbi na ndinga na bo ya kisina.

Bo salaka lukutakanu yai ya distrike na nima ya bamvula tanu banda ntangu yina bo kangulaka dibundu ya ntete na ndinga ya Romani na Slovaquie na Novembri 2014. Bubu yai, mabundu na ndinga ya Romani kele 9, bimvuka 10 mpi bimvuka yina kele ve ti bantwadisi 14 na teritware ya betele ya Tchèque-Slovaquie.

Peter Tirpak yina kele mfumu ya Winter Stadium tubaka nde: “ Kuwakana ti Bambangi ya Yehowa vandaka diambu mosi ya mbote kibeni. Beno lungisaka mambu yonso yina beno tubaka. Beto ta vanda na kiese kana beno sala diaka lukutakanu awa.”

Peter Varga yina vandaka ntwadisi ya lukutakanu yango tubaka nde: “Mono me monaka ntete ve lukutakanu ya mutindu yai. Bampangi na beto yina ke tubaka ndinga Romani ta vilaka ve ata fioti diambu yai ya mfunu. Na nima ya kuyimba nkunga ya nsuka, bo yambanaka ata bo me kutanaka ntete ve mpi bantu mingi dilaka.”

Bubu yai, beto ke sepela kumosi ti bansamuni 1 010 yina ke tubaka ndinga Romani na Slovaquie. Balukutakanu yai ya distrike ke monisaka nde bansadi ya Yehowa ke vandaka na zola ya kimpangi.—Yoane 13:34, 35.