Kubika fioti, a tribinale mosi ya basoda na insi Tadjikistan ta zenga mambu ya mpangi-bakala Roustamjon Norov. Yo ke monana nde bo lenda zengila mpangi na beto yai ndola ya bamvula banda na zole tii na tanu ya boloko kaka sambu kansansa na yandi ke buyisa yandi na kusala kisalu ya kisoda. Bo kangaka yandi banda na Oktobri 1, 2020.

Roustamjon Norov

• Mvula mpi Kisika Yina Yandi Butukaka: 1998 na mbanza Douchanbé

• Disolo ya Luzingu na Yandi: Yandi ke yidikaka banzo ya nene-nene (appartements) mpi bakiti, bamesa, baarmware ti bambeto (meubles) sambu na kulungisa bampusa na yandi mpi kusadisa dibuta na bo. Yandi ke zolaka kubula balo

• Yandi bakaka mbotika na 2016 ntangu yandi vandaka ti bamvula 17. Bamvula zole na nima, yandi katukaka na dibundu ya ndinga Russe yina dibuta na bo vandaka kukwenda mpi yandi kwendaka kusadisa bantu ya ke tubaka ndinga ya Tadjikistan na kulonguka Biblia

Na 2016, mpangi Roustamjon Norov kwendaka yandi mosi na biro yina bo vandaka kusonika bazina ya bantu yina fwete sala kisalu ya kisoda. Yandi songaka bo sambu na nki yandi vandaka ve kuzola kusala kisalu ya kisoda mpi yandi lombaka bo na kupesa yandi kisalu ya nkaka yina bantu kele ve basoda ke salaka. Na mvula yina landaka, yandi salaka mpi mutindu mosi. Mambu yina yandi tubaka yitukisaka kilandi ya mfumu ya basoda ya biro yina vandaka kusonika bazina ya bantu yina fwete sala kisalu ya kisoda mpi mfumu yango zitisaka kibeni mpangi Norov. Yo yina na bamvula tatu yina landaka, bo bingisaka ve mpangi Norov sambu na kusadisa yandi kisalu ya kisoda na kingolo-ngolo.

Kansi na Septembri 24, 2020, bo bingisaka yandi na biro ya distrike yina vandaka kusonika bazina ya bantu yina fwete sala kisalu ya kisoda. Bamfumu yulaka yandi bangiufula bangunga tatu mpi bo tubaka nde yandi kele ti sante ya mbote sambu na kusala kisalu ya kisoda. Na nima, bamfumu pusaka yandi na ngolo na kukwenda kusadisa ekzame na munganga. Papa na yandi vandaka pana mpi yandi lombaka nde bo nata mambu ya mwana na yandi na biro ya prokirere.

Na Oktobri 1, mpangi Norov ti papa na yandi kwendaka na biro ya prokirere. Prokirere songaka polisi mosi na kunata bo na biro ya distrike yina vandaka kusonika bazina ya bantu yina fwete sala kisalu ya kisoda. Ntangu bo kumaka kuna, bo buyisaka papa ya mpangi Norov na kukota na biro yina bo kotisaka mwana na yandi mpi bo tulaka mpangi Norov na kasho bilumbu zole. Tii pana bo fundaka yandi ve ata na kima mosi mpi bo sambisaka yandi ntete ve. Kuna na kasho, bamfumu pesaka yandi ve nswa ya kusolula ti avocat na yandi.

Na Oktobri 3, bo nataka mpangi Norov na camp mosi ya basoda na mbanza Khodjent na bakilometre kiteso ya 300 ti kisika yina dibuta na bo vandaka kuzinga na mbanza Douchanbé. Na bilumbu zole yina landaka, bo vandaka kunata yandi na bacamp ya mutindu na mutindu kaka na mbanza Khodjent.

Na Oktobri 6, bo pesaka mpangi Norov nswa ya kusolula ti dibuta na bo na telefone mpi ya kulomba nde avocat na yandi kukwisa kutala yandi. Kansi na Oktobri 17, tribinale mosi ya basoda ya insi Tadjikistan tulaka mpangi Norov na boloko sambu na mwa ntangu. Bo tubaka nde yandi ta bikala kuna tii ntangu anketi ta salama mpi tii kuna tribinale ta zenga mambu na yandi. Bo fundaka mpangi Norov nde yandi salaka mikanda ya luvunu sambu na kumonisa nde yandi ke belaka mpi sambu yandi sala ve kisalu ya kisoda.

Mpangi Norov kele kaka kikesa mpi yandi ke landa mpenza kutudila Yehowa ntima ata yandi kele kaka na boloko. Yandi ke pesa Yehowa mersi mingi sambu yandi me sadisaka yandi na kukumisa lukwikilu na yandi ngolo mpi sambu yandi me pesa yandi kikesa yina yandi kele na yo mfunu. Yandi kele mpi na kiese sambu na diambu ya mpasi mpi ya kukonda kukana yina yandi kutanaka ti yo na 2013. Na mvula yai, ntangu yandi ti leke na yandi ya bakala Ravshan vandaka na nzo-nkanda, bapolisi kangaka bo mpi bo nataka bo na ngolo na biro mosi ya ke sonikaka bazina ya bantu yina fwete sala kisalu ya kisoda. Bo nataka bo kuna sambu na kusadisa bo ekzame na munganga. Roustamjon vandaka kaka ti bamvula 15 na ntangu yina. Yandi vandaka leke mingi mpi yo lombaka nkutu ve nde bo binga yandi sambu na kusonikisa zina sambu na kusala kisalu ya kisoda. Yandi vandaka nsamuni ya me bakaka ntete ve mbotika. Ntangu mambu yai salamaka imene, mpangi Batyr papa ya bana yai bakaka lukanu nde na lusambu ya dibuta, yandi ta kuma kubaka ntangu mingi sambu na kusadisa bana na yandi na kudibongisa sambu na kusonga bantu sambu na nki bo ke kotaka ve na mambu ya nsi-ntoto. Mbala na mbala, mpangi Batyr vandaka kusala bonso nde yandi muntu ke sonika bazina ya bantu yina fwete sala kisalu ya kisoda mpi bana na yandi vandaka kusala bonso nde bo kele bantu yina ke samba sambu na kunwanina lukwikilu na bo.

Mpangi Roustamjon ke tuba nde: “Na ntwala nde beto yantika kudibongisa na lusambu ya dibuta, mono vandaka kuyindula nde mono ta kuka kunwanina lukwikilu na mono. Kansi ntangu beto vandaka kusala barepetisio, mono yitukaka mutindu mono vandaka kutekita mpi kuwa boma ntangu mono vandaka kutuba. Yo sadisaka mono na kubakisa nde sambu na kuvanda ti lukwikilu ya ngolo, mono fwete samba mpi kulonguka mingi sambu na kukumisa ngolo lukanu na mono ya kukota ve na mambu ya nsi-ntoto yai. Malembe-malembe, mono vandaka diaka ve kuwa boma. Na 2016 na nsungi ya printemps, mono kudipesaka na Yehowa mpi mono bakaka mbotika.”

Mpangi Roustamjon vandaka mpi kulutisa ntangu ti bampangi ya bambuta mpi ya kuyela na kimpeve yina bo tulaka na boloko sambu na lukwikilu na bo. Yandi ke tuba nde: “Mono ke bakisa mbote mambu yina ta kumina mono kana mono me buya kukota na mambu ya nsi-ntoto. Kana bo tula mono na boloko, yo ta vanda dibaku ya mbote ya kusantisa zina ya Yehowa na ‘teritware mosi ya mpa.’”

Papa ya mpangi Roustamjon ke tuba nde: “Dibuta na beto ke pesa Yehowa mersi mingi sambu yandi me pesa beto dibaku ya kusala luzolo na yandi mpi ya kuvanda bisadilu na maboko na yandi. Diaka beto ke songa bampangi na beto yonso mambu yai: ‘Beto ke pesa beno mersi mingi sambu na zola na beno, bisambu na beno mpi sambu beno ke sadisa beto na kuvanda na ngemba mpi ti kinduku ya ngolo ti Yehowa.’ Beto ke kudiyangisa ve. Ngemba ya Nzambi me fuluka na bantima na beto kaka mutindu Yehowa yandi mosi ke silaka beto na Ndinga na yandi Biblia!”—Bafilipi 4:6, 7.