Na Augusti 6, 2020, tribinale mosi ya insi Turkménistan zengilaka mpangi Eldor ti mpangi Sanjarbek Saburov bamvula zole ya boloko sambu kansansa na bo buyisaka bo kusala kisalu ya kisoda. Eldor kele ti bamvula 21 mpi Sanjarbek kele ti bamvula 25 mpi bo zole kele bampangi ya dibuta mosi. Bampangi yai lombaka nde tribinale kutadila diaka lukanu yai kansi tribinale buyaka. Yai mbala ya zole ya tribinale ke bedisa bo sambu bo ke buya kusala kisalu ya kisoda.

Na 2016, mpangi Sanjarbek Saburov buyaka na luzitu mpenza kusala kisalu ya kisoda. Yo yina bo bedisaka yandi mpi bo zengilaka yandi bamvula zole ya boloko. Kansi bo tubaka nde yandi ta kota ve boloko.

Na mvula yina landaka, Eldor leki ya Sanjarbek buyaka mpi kusala kisalu ya kisoda. Bo pesaka yandi ndola ya kusala bisalu ya ngolo bamvula zole mpi na bamvula yai zole, Leta vandaka kubotula mbongo 20% ya salere na yandi.

Nsiku ya insi Turkménistan ke tubaka nde tribinale lenda landila sambu na mbala zole muntu yina ke landa kubuya kusala kisalu ya kisoda. Na Aprili 2020, biro yina vandaka kusonika bazina ya bantu yina fwete sala kisalu ya kisoda bingisaka diaka bampangi yai sambu na kusonika bazina na bo. Kansi bampangi yai zole buyaka kupesa bazina na bo sambu na kisalu ya kisoda. Bamfumu landilaka bo mpi bo bedisaka bo, yo yina bo tulaka bo na boloko.

Ndola yai ya boloko ke pesa bibuti ya bampangi yai zole mpasi mpi yo ke sala nde bo kudiyangisa sambu na bana na bo. Papa na bo ke belaka mukongo mpi yo ke salaka nde yandi kuka ve kusala bisalu. Bana na yandi yai zole ke salaka bilanga ya coton sambu na kusadisa dibuta na bo. Mutindu bo me tula bo na boloko, bibuti na bo ta vanda diaka ve ti mbongo ya kusumba bima ya bo kele na yo mfunu. Nkutu bo nde bantu ke kuma kusadisa bana na bo ya kele na boloko.

Insi Turkménistan ke pesaka ve bisalu ya nkaka ya kusala na bantu yina ke buyaka kusala kisalu ya kisoda. Yo yina bampangi na beto ya ke buyaka kusala kisalu ya kisoda sambu bo kansansa na bo ke buyisaka bo, tribinale ke zengilaka bo bamvula banda na mosi tii na bamvula iya ya boloko. Bampangi na beto yai zole kele na kati ya Bambangi ya Yehowa ya baleke 10 yina kele bubu yai na boloko kaka sambu bo me buya kusala kisalu ya kisoda.

Beto ke ndima nde Yehowa ta sakumuna bampangi na beto yai ya baleke ya insi Turkménistan sambu na kikesa yina bo ke monisa. Bika bo yonso kuyibuka mambu yai ya Yehowa songaka ntotila Aza: “Beno, beno vanda kikesa mpi beno lemba ve nitu, sambu bo ta pesa beno matabisi sambu na kisalu na beno.”—2 Bansangu 15:7.