Na Februari 13, 2019, bo basisaka Bahram Hemdemov na boloko na Turkménistan. Yandi lutisaka bamvula iya na boloko na Seydi (LB-E/12). Ntangu yai, yandi ke zinga diaka kisika mosi ti nkento na yandi, Gulzira mpi bana na bo iya. Bo kangaka M. Hemdemov na Marsi 14, 2015 kaka sambu yandi vukanaka ti bantu ya nkaka na nzo na yandi sambu na kusambila Nzambi na Turkmenabat. Tribinale ya Lebap zengilaka yandi nkanu na Mayi 19, 2015. Ntangu M. Hemdemov vandaka na boloko, luyalu ya Turkmenabat vandaka kubasisa bantu na boloko kiteso ya mbala tatu konso mvula. Kansi yandi me bakaka ve dibaku ya kubasika na kutadila lukanu yina, kansi bo vandaka kubasisa ata bantu yina bo kangaka sambu bo fwaka bantu. Na Augusti 15, 2016, M. Hemdemov nataka mukanda na yandi na Komite ya ONU yina ke talaka banswa ya bantu (CCPR) sambu bo tadila yo. Tii bubu yai, yandi ke vingilaka kaka nde bo tadila mambu yina. Bambangi ya Yehowa 11 kele kaka na boloko na Turkménistan sambu bo buyaka kusala kisalu ya kisoda ata Komite yina ya ONU bakaka balukanu kumi mpi lombaka baluyalu na kubika kuniokula batoko yina kele Bambangi ya Yehowa mpi kukotisa bo ve na boloko mutindu bo vandaka kusala mambu na kuwakana ti kansansa na bo.