Na Ukraine, insi yina bitumba yantikaka na Kizole 24 février 2022, Bambangi ya Yehowa mingi kele na babwala yina bitumba kele ngolo. Bampangi-babakala 21 ya Krementchouk mpi Poltava, bambanza ya Ukraine, me kudipesa na luzolo yonso sambu na kukwenda na bisika yina bitumba ke salama sambu na kusadisa bampangi na bo na kukatuka kuna to sambu na kukabudila bo bima ya mfunu ya luzingu. Kima me pusa bo na kusala mpidina kele zola ya masonga ya kimpangi.

Na bamposo sambanu, bampangi me sala dezia banzietelo 80 mpi bo me sala bakilometre 50 000 sambu na kukwenda na bisika yina bitumba me bebisa bima mingi mu mbandu na Kharkiv, mpi bo me sadisa bampangi-babakala mpi bankento kiteso ya 400.

Tii na kilumbu ya bubu, bo me pesa dezia bampangi batone 23 ya bima ya kudia, bankisi, carburant mpi bima ya nkaka. Na ntwala ya kuyantika konso nzietelo, bampangi ke sonikaka banzila ya kukwendila yina ta tula ve luzingu na bo na kigonsa, mpi bo ke salaka bikesa sambu bo kuma ve na bisika yina bitumba kele ya ngolo. Nzietelo mosi lenda sala bangunga 19 sambu bampangi fwete telama na bisika yina basoda ke sala kontrole sambu na kutala bima ya kele na bakamio na bo.

Ntangu bampangi vandaka kukwenda, bo vandaka kuwa baavio ya basoda ke luta na zulu. Bampangi vandaka kuluta na ntwala ya banzo yina me beba, ya bakamio ya kubeba mpi ya bakamio ya bitumba ya kubeba. Bantangu ya nkaka, bo ke waka ntoto ke nikana ntangu babombe ke bwa pene-pene ti kisika yina bo kele.

Na Mposo 2 avril 2022, mpangi Roman vandaka kudibongisa sambu na kukwenda kubikila bampangi-babakala mpi bankento ya Kharkiv madia. Kaka na ntangu yina bamisile mingi yantikaka kubwa na kartie. Yandi kwendaka kubumbana na nzo mosi ya nene na kartie. Ntangu yandi basikaka, minuta 30 na nima, yandi monaka nde nzila yina yandi zolaka kubaka sambu na kukwenda bebaka sambu na babombe.

Volodymyr kele mosi na kati ya bantu yina ke nataka kamio ya kudipesaka sambu na kusadisa. Yandi ke tubila bigonsa ya kele na nzila. Yandi ke tuba nde: “Beto ke sambaka Yehowa mbala na mbala sambu yandi pesa beto mayele ya me fwana sambu na kubaka balukanu ya mbote.”

Oleksandr ti nkento na yandi Valentyna vandaka kuzinga na Kharkiv ti bibuti na bo ya me kuma bambuta. Ntangu bitumba vandaka ngolo, bo monaka babombe ke bwa na kitamina ya bametre 100 ti fenetre na bo. Kansi mutindu bo vandaka ve ti vwatire, dibuta na bo vandaka ve ti mpila ya kutina.

Kaka na ntangu yina, bampangi kwisaka sambu na kukatula bo kisika yina.

Oleksandr ke tuba nde: “Beto sambaka Yehowa sambu na kupesa yandi mersi sambu na lusadisu yina bampangi na beto pesaka beto.”

Vassyl ti nkento na yandi Natalia mpi bana na bo tatu bumbanaka bilumbu mingi na nsi ya ntoto ya nzo na bo. Na Kizole 28 février 2022, bombe mosi bwaka pene-pene ti nzo na bo mpi yo bebisaka nzo. Vassyl ke yibuka nde bombe yina tulaka makelele ya ngolo mpi kura zenganaka.

Ntangu bitumba lembamaka, dibuta na bo kwendaka kubumbana na nsi ya ntoto ya nzo ya nkaka ya nene ya kartie na bo. Na Kiya 3 mars 2022, bampangi kutanaka diaka ti dibuta mpi bo nataka dibuta na kisika mosi ya bitumba vandaka ve.

Vassyl ke tendula mutindu yandi kudiwaka ntangu bo sadisaka dibuta na bo mpi ntangu yandi kumaka na kisika yina vandaka kibeni ve ti kigonsa. Yandi ke tuba nde: “Beto ke pesa Yehowa mersi mingi. Na nima ya kusala bilumbu mingi ya beto vandaka kumona bonso bamposo mingi, beto zwaka mpila ya kudia na ngemba, kukonda kudiyangisa sambu na lutaninu ya bana na beto.”

Oleksandr vandaka na kati ya bantu yina nataka bakamio. Yandi ke tendula mutindu bisalu ya kusadisa bantu ke monisa nde bantu ya Yehowa kele na bumosi. Yandi ke tuba nde: “Yo me sadisa mono na kubakisa nde Yehowa ke kudibanzaka kibeni sambu na bantu na yandi. Mono ke waka kiese ya mingi ntangu mono ke monaka luse ya kufuluka na ntonda ya bampangi na mono ya babakala mpi ya bankento.”

Beto ke pesa mersi na bampangi na beto ya babakala mpi ya bankento ya kikesa mpi beto ke samba Yehowa na kusakumuna bo sambu na zola na bo mpi kikesa na bo.