Na Kiya 24 février 2022, basoda ya Russie kotaka na Ukraine mpi yantikaka kunwanisa insi yai. Bambangi ya Yehowa kuluta 129 000 ke zingaka na Ukraine ti bana na bo. Betele yidikaka bimvuka 27 ya Bakomite ya Ke Sadisaka Bantu Yina Me Bwila Mpasi sambu na kupesa bampangi na beto ya Ukraine bima ya kinsuni. Katula yo, sambu na kumonisa zola yina beto ke vandaka ti yo na kati na beto, bampangi-babakala mpi bankento ke sala bikesa sambu na kusadisana na kinsuni mpi kupesana kikesa. Bo ke sadisa mpi bantu yina kele pene-pene ti bo na ntangu yai ya bitumba.

Bampangi na beto mingi ya babakala mpi ya bankento me bikala na insi Ukraine, kansi bankaka me baka lukanu ya kukatuka na insi na bo yai. Bayina vandaka kutina vandaka na kati ya bandonga ya nda, ya nkaka vandaka nda bakilometre 30, mpi bo vingilaka bilumbu tatu to iya na ntwala ya kuluta. Bampangi ya bisika yina bo vandaka, vandaka kusosa bampangi na bo Bambangi ya Yehowa. Bo vandaka kukinga na ndonga mpi bo pesaka bampangi bima ya kudia, masa ya kunwa mpi bima ya nkaka ya mfunu. Nsuka-nsuka ntangu bampangi-babakala mpi bankento kumaka na bandilu ya bansi ya nkaka, Bambangi ya Yehowa ya bansi yina simbaka bidimbu ya kusonika jw.org mpi bo vandaka kupesa bo mbote. Bampangi yai vandaka ya kuyilama sambu na kupesa bampangi kikesa mpi bima yina bo vandaka ti yo mfunu.

• Diambu ya mawa kele nde na Kitatu 1 mars 2022, mpangi na beto mosi ya bakala fwaka na babombi yina basoda vandaka kulosa na mbanza Kharkiv. Nkento na yandi lwalaka ngolo

• Bampangi-bankento ya nkaka 3 lwalaka

• Bampangi na beto kuluta 5 000 me tina mpi me yambula banzo na bo

• Banzo 2 ya bampangi na beto me bukana

• Banzo 3 me beba ngolo

• Banzo 35 kele diaka ve ti kura

• Banzo ya Kimfumu 2 me beba

• Bampangi mingi kele diaka ve ti kura, masa, bima ya kudia, mpi bo lenda ve kubinga bantu na telefone

• Bo salaka Bakomite 27 ya Ke Sadisaka Bantu Yina Me Bwila Mpasi na Ukraine

• Bakomite yango me sadisa bampangi 867 na kuzwa bisika ya kuvanda na bateritware ya kele na lutaninu

• Bakomite yina ke sala yonso sambu na kupesa bampangi bima ya mfunu ya luzingu bonso madia mpi masa

Yai kele rapore ya mambu ya ntete yina bampangi me sala.

Beto ke samba Yehowa sambu bampangi na beto ya babakala mpi ya bankento kulanda kuvanda ti mayele mpi kuzaba mutindu bo lenda kanga ntima na mambu yai na ntangu bo ke monisa zola ya kimpangi.—Bingana 9:10; 1 Batesalonika 4:9.