Bambangi ya Yehowa kiteso ya 47 000 tinaka bitumba na Ukraine. Mingi na kati na bo tinaka na bisika ya nkaka ya nsi kisika yina bitumba vandaka ve. Kuna, bampangi ya nkaka ke pesa bo bilele, madia, bisika ya kulala mpi bima ya nkaka yina bo kele na yo mfunu. Ata bampangi ya ke yamba bo kele mpi na mpasi ya mbongo kansi bo kele na kiese ya kusadisa bampangi na bo ya me tina bitumba.

Olha ti bakala na yandi ya kele ve Mbangi ya Yehowa ke zingaka na mbanza Ouman na Ukraine. Bo yambaka bampangi 300 na ngonda ya ntete mpi ya zole ntangu bitumba yantikaka. Bampangi mingi vandaka kulala kaka mpimpa mosi na ntwala ya kukwenda na bisika ya nkaka. Mbala mingi na ntwala nde bampangi kuma na midi ya mpimpa bo vandaka kusonga Olha kaka ntangu fioti nde bo ke kwisa na nzo na yandi. Kilumbu mosi, Olha yambaka bampangi 22 na mbala mosi. Mambu yai pesaka mwana na yandi ya bakala Stanislav ya kele ti bamvula 18 dibaku ya kumonisa kikalulu ya kukaba. Mbala mingi yandi vandaka kulala na ntoto sambu bampangi yina tinaka bitumba kulala na chambre na yandi.

Olha ke tuba nde: “Mono ke wa kiese mingi na mpila mono ke sadisa bansadi na Yehowa na ntangu yai ya mpasi. Yo ke sala nde mono kuma na kiese ya mingi.”

Andriy ti nkento na yandi Liudmyla yambaka bambangi ya Yehowa 200 na nsungi ya bamposo 5. Kilumbu mosi bo yambaka bampangi 18 kaka na mpimpa mosi. Andriy ke tuba nde: “Beto landaka mambu yina betele songaka beto. Beto vandaka kubumba bima ya kudia sambu na bampangi. Beto pesaka bampangi bima yango mposo mosi ti ndambu. Bampangi ya beto vandaka kuyamba vandaka kubikila beto mikanda ti mbongo sambu beto sumba bima sambu na bampangi yina beto ta yamba na nima. Komite ya Kusadisa Bampangi ya Me Bwila Mpasi pesaka beto mpi madia, yo yina beto kondaka kima ve.”

Na mars, mpangi-nkento Vita ya mbanza Ivano-Frankivsk bikilaka bampangi ya vandaka kutina bitumba nzo na yandi mpi yandi kwendaka kuzinga ti mpangi na yandi ya nkento. Vita ke tuba nde: “Mono ke mona yo ve bonso bibansa kansi mutindu ya kumonisila bampangi na mono zola. Mambu yina mono ke sala sambu na bampangi ke natila mono kiese mingi. Beto yonso kele dibuta mosi.”

Natalia ti bakala na yandi mpi mwana na bo ya nkento Habriela ke zingaka na mbanza Ternopil. Bisalu na bo yonso fwaka ntangu bitumba yantikaka mpi bo sadilaka mbongo ya bo vandaka kubumba sambu na kulungisa bampusa na bo. Ata mpidina, bo yambaka mpangi mosi ya nkento ti mwana na yandi ya nkento ya kikata.

Natalia ke tuba nde: “Mono yindulaka mbandu ya mpangi-nkento mosi na Afrika. Ata yandi vandaka nsukami, yandi yambaka bampangi 14 na nzo na yandi sambu na lukutakanu ya distrike mpi ata muntu mosi ve kondaka madia.” Yandi ke tuba nde mambu yai ya yandi me kutana ti yo me sadisa yandi na kusosa ntete mambote ya bantu ya nkaka.

Ata bampangi ya Ukraine ke kutana ti mambu ya mpasi, bo ke tudila Yehowa ntima mutindu bo kele “ti kikalulu ya kuyamba banzenza.”—Baroma 12:13.