Yehowa ke sadisa mpangi-nkento Lioudmyla Mozoul ti mpangi-nkento Kateryna Rozdorska na kukanga ntima na bampasi yina bitumba yai me natila bo. Babakala na bo Petro Mozoul ti Dmytro Rozdorskyi vandaka na kati ya Bambangi ya Yehowa yina fwaka ntangu bitumba ya Ukraine yantikaka. Kima ya ke pesa mpasi kele nde, banda bitumba yai yantikaka tii bubu yai, bampangi na beto ya babakala mpi ya bankento 34 me fwa na bitumba yango.

Mpangi Petro mpi Lioudmyla bakaka mbotika na 1994. Bo salaka bamvula 43 na makwela.

Mpangi-nkento Lioudmyla ke tuba nde: “Konso kilumbu bampangi ke tubaka mambu ya ke pesaka mono kikesa. Bo ke bingaka mono kaka na telefone. Mono dilaka mpi ntangu mono tangaka mambu ya ke pesa kikesa na mukanda yina filiale ya Ukraine sonikilaka mono.”

Bitumba yantikaka na Kiya 24 février 2022. Mpangi Petro vandaka nsadi ya kisalu na dibundu ya ndinga ya bidimbu. Na Kizole 1^er mars 2022, yandi fwaka ntangu yandi ti dibuta na yandi vandaka kutina babombe mingi yina vandaka kubwa na mbanza Kharkiv.

Na kilumbu yina, babombe bwaka mingi, baavio ya bitumba vandaka kuluta na zulu mpi yo yantikaka kulosa babombe na mbanza na beto. Na nima ya minuta 30, dibuta vukisaka bima yina beto vandaka na yo mfunu mpi beto kwendaka. Mpangi Petro ti nkento na yandi Lioudmyla vandaka na kati ya vwatire mosi. Mwana na bo ya bakala Oleksii ti nkento na yandi Maryna vandaka na vwatire ya nkaka. Mpangi-nkento Lioudmyla ke tuba nde: “Ntangu beto vandaka kuluta na nzila ya kartie mosi, avio yango yantikaka kulosa babombe pene-pene ya kisika ya beto vandaka. Kupanzana ya babombe salaka nde vwatire na beto kunikana ngolo.”

Mpangi Petro, yina vandaka ti bamvula 67, balulaka kamio na mbala mosi sambu kamio na bo kututana ve ti kamio ya Oleksii ata mpidina yandi lwalaka ngolo. Bo nataka yandi mpi Lioudmyla na lupitalu, kuna Petro fwaka na nima. Bima ya bombe ya bo ke bingaka obus lwadisaka Lioudmyla na dikulu mpi na divumu. Kansi Oleksii ti Maryna lwalaka ve. Bilumbu tatu na nima ya kubasika na lupitalu, bo songaka Lioudmyla nde Petro me fwa.

Mpangi-nkento Lioudmyla ke tuba nde: “Ntangu mono ke yindulaka mingi ntima ya mbote ya Yehowa mpi mambu yina yandi ke kana na kusala, mono ke kumaka mpenza ti ngemba ya ntima. Mono ke ndima mpenza nde na nsi-ntoto ya mpa, mono ta mona diaka bakala na mono mpi mono ke vingila kibeni ti nzala ya ngolo ntangu yina mono ta mona yandi diaka.”

Mpangi-bakala Dmytro mpi mpangi-nkento Kateryna salaka bamvula nana na makwela. Ntangu bakala na yandi vandaka na kisalu, yandi songaka Kateryna mambu yai ya vandaka mpi bangogo ya nsuka yina yandi songaka Kateryna: “Mono ta vutuka na nzo ntama ve.”

Mwa ntangu fioti na nima, na Kizole 8 mars 2022, nduku mosi bingaka mpangi-nkento Kateryna mpi songaka yandi nde mpangi Dmytro niataka mine mpi nde bo nataka yandi na lupitalu. Bo salaka yandi operasio mpi bangunga tanu na nima, yandi fwaka.

Ntangu bo songaka mpangi-nkento Kateryna lufwa ya Dmytro, Kateryna tubaka nde: “Na mpimpa yina Yehowa simbaka mono kaka ve na diboko, kansi yandi nataka mono mpi na maboko na yandi. Mono bakisaka nde Yehowa vandaka kibeni pene-pene ti mono.”

Mpangi Dmytro vandaka ti bamvula 28 mpi yandi bakaka mbotika na 2006. Yandi vandaka nkuluntu na dibundu mosi na Donetsk na Ukraine.

Ntangu fioti na nima ya mafwa ya Dmytro, Kateryna salaka nzietelo ya bangunga 12 sambu na kukwenda na kisika mosi ya Ukraine yina bitumba vandaka ve. Yandi ke tuba nde: “Bampangi ya Ukraine ya mvimba mpi ya bansi ya nkaka pesaka mono kikesa. Zola ya mingi ya bo monisilaka mono simbaka kibeni ntima na mono mpi yo lembikaka mpasi na mono.”

Yandi ke tuba diaka nde: “Kulonga nsangu ya mbote ke pesaka mono mpi kikesa . . . Ntangu basusi ke kwisilaka mono mingi, mono ke vutukilaka mbala na mbala mambu ya kele na baverse ya Biblia, mu mbandu Bafilipi 4:6, 7.”

Beto ke ndima nde Yehowa ta landa kupesa ngolo mpi kikesa na bampangi na beto yina bantu ya bo vandaka kuzola me fwa na bitumba ya Ukraine.—Nkunga 61:1-3.