Bampangi na beto ya babakala mpi ya bankento ya insi Ukraine ke landa kusadisana mpi kudipesa ya mvimba na bampangi na bo.

Mpangi-nkento Olena kele ti bamvula 81. Na Kintete 6 juin 2022, misile mosi bwaka pene-pene ya nzo na yandi. Yo bebisaka nzo ya muntu mosi ya ke zingaka pene-pene ti yandi mpi yo timunaka dibulu mosi ya bametre nsambwadi. Eksplozio vandaka kibeni ya ngolo. Yo yina nzo ya mpangi Olena bebaka ngolo.

Yandi ke tuba nde: “Ntangu beto vandaka na mpongi, kibaka mosi bwaka pene-pene ya ntu na mono. Dituti mosi ya ndombe ya pusiere salamaka. Bitini ya bavere mpi matadi vandaka bisika yonso. Mono pesaka Yehowa mersi sambu mono fwaka ve.” Mwa minuta na nima ya eksplozio yina, bampangi-babakala mpi bankento ya dibundu ya Olena kwendaka kutala yandi. Mpangi-bakala mosi yina nzo na yandi mpi bebaka ngolo vandaka na kati ya bampangi yina kwendaka kutala yandi. Olena ke tuba diaka nde: “Ntangu bampangi-babakala mpi bankento kumaka, bo waka kibeni mpasi mpi bo zabaka ve kima ya kutuba. Mono bakaka kikesa ya mingi ntangu mono monaka bo. Yo vandaka kibeni mbote mutindu bo vandaka na lweka na mono.”

Serhiy kele nkuluntu mpi yandi ti batoko ya nkaka ya dibundu, bo ke vandaka ti kikalulu ya kukwenda kutala mpangi Olena. Yandi ke tuba nde: “Ntangu mono waka nde eksplozio mosi salamaka na pene-pene ya nzo ya Olena, mono waka boma mpi mono kudiyangisaka mingi kibeni. Mono waka mbote ntangu mono monaka nde yandi me lwala ve ata mputa mosi ya ngolo kaka tubamputa. Kima ya ntete yina Olena zolaka kubaka ntangu nzo yandi bebaka vandaka mikanda yina ke tendulaka Biblia yina bo pesaka yandi mwa bilumbu ya ntwala. Diambu ya mbote kibeni.”

Diambu ya mbote kele nde, dibuta ya Olena zwaka nzo ya nkaka sambu na yandi. Bampangi-babakala mpi bankento ya dibundu na bo ke landa kusadisa yandi, mpi bankuluntu ke zwaka bansangu na yandi konso kilumbu. Bo pesaka yandi ba-apareyi yina ke sadisaka bantu na kuwa sambu yandi landaka mbote balukutakanu ya dibundu. Olena ke tuba nde: “Bantangu ya nkaka, mono ke kudiwaka kukonda ngolo, kansi balukutakanu ke pesaka mono diaka ngolo. Bampangi-babakala mpi bankento ke bingaka mono mbala mingi, mpi mono ke pesa bo mersi mingi sambu na yo.”

Bakala mosi ti nkento na yandi bumbanaka na nsi ya ntoto ya Nzo mosi ya Kimfumu ti bampangi 200 ya ke longaka nsangu ya mbote. Bo tubaka mambu yina bo monaka. Mpangi-nkento sonikaka nde: “Kima ya yitukisaka mono mingi kele dikebi ya zola yina bankuluntu monisilaka mono. Bo sadisaka mono na kuyindula Davidi. Davidi nwanaka ti ntambu mpi Urse sambu na kutanina mameme na yandi. Yo zolaka kufwa yandi. Bankuluntu yina vandaka ti beto na nsi ya ntoto tulaka luzingu na bo na kigonsa sambu bo vandaka kukwenda kusosa madia, masa mpi petrole sambu beto vanda ti mwinda. Na nzila na bo, beto vandaka kusala balukutakanu ya dibundu mpi ya kisalu ya kulonga nsangu ya mbote. Ata ntangu babombe vandaka kubwa, bankuluntu yai vandaka kukwenda kutala bampangi-babakala mpi bankento yina bikalaka na banzo na bo. Bo vandaka kunatila bo masa mpi madia. Bo vandaka mpi kupesa bo kikesa. Mono kumaka kuzitisa bo mingi. Na ntwala ya bitumba yai, mono vandaka kubaka bo balongi mpi bansamuni. Kansi sesepi mono me kuma kumona bo bangungudi ya kutudila ntima. Mono kele ti ntonda ya mingi sambu na bampangi-babakala yai ya kikesa, ya ke tudilaka bantu dikebi mpi ya me fwana kutudila ntima.”

Bampangi ya ke longaka nsangu ya mbote ya kele na dibundu mosi ya Ukraine sonikilaka Betele ya insi yai sambu na kusonga bo mambu yina bo ke yindula sambu na bampangi yina ke twadisaka kisalu ya kusadisa bampangi yina me bwila mpasi. Bo sonikaka nde: “Bantima na beto me fuluka na ntonda. Beto ke yituka kibeni sambu beto ke mona mutindu Yehowa ke sadila bampangi na beto ya babakala mpi ya bankento sambu na kulungisa bampusa na beto. Beto me mona na meso na beto mosi mambu yai ya Yezu tubaka: ‘Na diambu yai, bantu yonso ta zaba nde beno kele balongoki na mono—kana beno ke zolana beno na beno.’”—Yoane 13:35.

Na kizole 21 juin 2022, bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bampangi 42 ya ke longaka nsangu ya mbote (bansamuni) fwaka

• Bansamuni 83 lwalaka

• Bansamuni 31 185 yambulaka banzo na bo mpi kwendaka kuzinga bisika yina bitumba vandaka ve

• Banzo 495 bwaka

• Banzo 557 bebaka ve ngolo

• Banzo 1 429 bebaka ve ngolo

• Banzo ya Kimfumu 5 bwaka

• Banzo ya Kimfumu 8 bebaka ngolo

• Banzo ya Kimfumu 34 bebaka ve ngolo

• Bakomite 27 ya Ke Sadisaka Bantu Yina Me Bwila Mpasi ke sadisa bampangi na Ukraine

• Bakomite Yina Ke Sadisaka Bantu Yina Me Bwila Mpasi me sadisa bampangi 52 348 ya ke longaka nsangu ya mbote (bansamuni) na kuzwa bisika ya kuvanda na babwala yina bitumba kele ve

• Bansamuni 21 786 me tina na bansi ya nkaka mpi kuna bampangi na bo Bambangi ya Yehowa ke sadisa bo