Na insi Ukraine ya mvimba, bampangi na beto ya babakala mpi ya bankento vandaka na kiese ya kuvutukila kisalu ya kuta kimbangi na bisika ya bantu yonso mpi kisalu yai butaka mbuma ya mbote. Bankengi ya nziunga mpi bankuluntu ke tuba nde bantu mingi kele na kiese mutindu bo me mona diaka bashario na beto ya mikanda mpi bo me ke tuba nkutu nde bo vandaka kuwa ve mbote mutindu Bambangi ya Yehowa vandaka kuluta diaka ve na bakartie na bo.

Tatiana kele mpangi-nkento mosi ya dibundu ya Serhiïvka na Odessa. Yandi bakaka lukanu ya kukwenda kutala bantu yina yandi kutanaka ti bo ntwala nde maladi ya coronavirus kuyantika. Yandi ke tuba nde: “Banda na luyantiku, mono monaka nde Yehowa ke sakumuna bikesa yonso ya beto ke sala sambu na kuvutukila kisalu ya kulonga.” Kilumbu mosi, yandi kwendaka kutala nkento mosi ya vandaka ve kuzola kulonguka Biblia na ntwala nde coronavirus kuyantika. Kansi, sesepi nkento yango vandaka na kiese na kutubila mambu ya kimpeve mpi yandi ndimaka na luzolo yonso kulonguka Biblia. Na mbala mosi, Tatiana kuditubilaka nde: “Mono fwete kwenda kutala bantu yonso yina mono vandaka kukwenda kutala na ntwala sambu na kulomba bo na kulonguka Biblia.”

Ievheniy ti Lilia ke longaka nsangu ya mbote (bansamuni). Bo tinaka Marioupol sambu na kukwenda na kisika yina bitumba vandaka ve kusalama. Bo ke salaka kisalu ya kulonga nsangu ya mbote mbala na mbala. Bo ke tubaka nde kulonga nsangu ya mbote ke sadisaka bo na kuyindula ve bampasi na bo. Bo ke tuba nde: “Beto vandaka kuzaba nde luzingu na beto ta vanda diaka ve ata fioti mutindu yo vandaka. Yo kele mpasi na kuyantika diaka mambu banda na luyantiku, kansi beto ke vila ve nde diboko ya Yehowa kele ve nkufi. Yandi ke pesa beto mpeve na yandi, mpi bampangi-babakala ti bankento kele pana sambu na kusadisa beto na kuyantika luzingu ya mpa na kisika ya mpa.”

Na bisika ya nkaka ya insi yai, bampangi na beto ke pesa mpi mbandu ya mbote na mambu ya mbote yina bo ke sala. Mu mbandu na Mykolaïv, bampangi-babakala sadisaka kimvuka mosi ya ke ntoto ya mvimba ya ke sadisaka bantu na kuyidika depo mosi ya kubumbila bima mpi na kutula bima na ndonga. Bo yidikaka batiyo ya masa, bo tulaka baetazere mpi bo ponaka batone ya bima. Ntangu mumonisi mosi ya nkento ya kimvuka yina kwendaka kutala kisalu, yandi yitukaka mingi mpi yandi dilaka. Yandi tubaka nde: “Mono yindulaka ve nde kisalu ta salama mbote mutindu yai.”

Ata bampangi na beto ya babakala mpi ya Ukraine ke lutisaka bantangu ya mpasi, bo ke wa kiese ya mingi yina ke katukaka na kisalu ya kulonga nsangu ya mbote mpi ya “kusala mambu ya mbote.”—Bagalatia 6:9.

Na Kitatu 13 juillet 2022 bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bampangi 42 ya ke longaka nsangu ya mbote (bansamuni) fwaka

• Bansamuni 97 lwalaka

• Bansamuni 28 683 yambulaka banzo na bo mpi kwendaka kuzinga bisika yina bitumba vandaka ve

• Banzo 524 bwaka

• Banzo 588 bebaka ngolo

• Banzo 1 554 bebaka ve ngolo

• Banzo ya Kimfumu 5 bwaka

• Banzo ya Kimfumu 10 bebaka ngolo

• Banzo ya Kimfumu 36 bebaka ve ngolo

• Bakomite 27 ya Ke Sadisaka Bantu Yina Me Bwila Mpasi ke sadisa bampangi na Ukraine

• Bakomite Yina Ke Sadisaka Bantu Yina Me Bwila Mpasi me sadisa bampangi 52 947 ya ke longaka nsangu ya mbote (bansamuni) na kuzwa bisika ya kuvanda na babwala yina bitumba kele ve

• Bansamuni 23 863 me tina na bansi ya nkaka mpi kuna bampangi na bo Bambangi ya Yehowa ke sadisa bo