Banda na Mposo 23 tii na Lumingu 31 juillet, bansamuni yina vandaka na Ukraine mpi bayina tinaka na bansi ya nkaka bakaka mbotika na Lukutakanu ya Distrike yina vandaka ti ntu-diambu: “Beno Landa Kuvanda na Ngemba”! Na Kizole 2 août, ntalu ya bantu ya bakaka mbotika kumaka 1 113. Mpangi mosi ya Ukraine tubaka nde: “Ata bitumba lenda kanga ve kisalu ya kukumisa bantu balongoki, sambu Yezu tubaka nde: ‘mono kele ti beno bilumbu yonso.’”—Matayo 28:20.

Beto kele na kiese ya kusonga beno mambu yai ya salamaka.

Natalia kele ti bamvula 63. Yandi ke zingaka na mbanza Kreminna na provense ya Louhansk. Yandi ti bana na yandi zole ya bankento yantikaka kulonguka Biblia ti Bambangi ya Yehowa na bamvula 1990. Bana na yandi yelaka na kimpeve mpi bo bakaka mbotika kansi yandi ve. Ntangu bitumba yantikaka, dibuta mosi ya Bambangi ya Yehowa tinaka ti Natalia na kisika yina bitumba vandaka ve. Yandi kumaka kulala na Nzo ya Kimfumu mosi na Ivano-Frankivsk.

Natalia ke tuba nde: “Ntangu babombi bulaka imene, mono vandaka diaka ve na kiese. Bampangi monisilaka mono zola ya kieleka. Mono vandaka kundima ve nde bo ta tudila mono dikebi mutindu yai. Yo salaka nde mono kuma kuzola diaka Yehowa. Mono bandaka kutanga Biblia mingi mpi mpangi-nkento mosi yantikaka kulonguka Biblia ti mono na mukanda Zinga Mvula na Mvula! Yandi vandaka dikabu ya Yehowa sambu na mono.” Natalia ke tuba diaka nde: “Ntangu yai mono kele na kiese sambu mono me baka mbotika mpi mono me kuma Mbangi ya Yehowa. Mono ke zola kuzitisa nsiku yai ya kuluta nene: Kuzola Yehowa Nzambi na mono ‘na ntima na mono ya mvimba, na moyo na mono ya mvimba, mpi na mabanza na mono yonso.’”—Matayo 22:37.

Olia yina vandaka kuzinga na bwala Tcherkassy vandaka nsamuni ya me bakaka ntete ve mbotika ntangu bitumba yantikaka. Na Lumingu 6 mars yandi tinaka na insi Pologne ti mwana na yandi ya nkento mpi ntekolo na yandi. Yandi ke tuba nde: “Beto kumaka kuna kaka ti basaki yina beto ke tulaka kaka bima ya mfunu. Kansi bampangi na beto Bakristu sadisaka beto tatu. Mambu yai yonso ndimisaka mono nde dibundu ya Yehowa kele na bumosi mpi mpeve na yandi ke twadisaka beto. Mambu yai ya me kutana ti yo me sadisa mono na kupesa luzingu na mono ya mvimba na Yehowa. Yandi sadisaka mono na ntangu ya mpasi, yo yina mono ke zola kusadila yandi mpi kumonisila yandi ntonda.”

Youlia kele ti bamvula 18. Yandi vandaka kuzinga na mbanza Donetsk. Yandi me butukaka na dibuta ya Bambangi ya Yehowa kansi yandi vandaka kuyela ve na kimpeve sambu na kubaka mbotika. Yandi ke tuba mambu yina salamaka na ntwala nde bitumba kuyantika. Yandi ke tuba nde: “Mono vandaka ya kulala na ntoto. Mono vandaka kuzaba nde mono lenda fwa konso ntangu yina. Balabala yina dibuta na beto vandaka kuzinga bebaka yonso kansi beto gulukaka. Na nima ya kukutana ti mambu yai yonso, mono sambaka mpi yindululaka mingi bikalulu ya mbote ya Yehowa. Yo pusaka mono na kukuma nduku na yandi mpi mono kudipesa na yandi. Yehowa pesaka mvutu na bisambu na mono mpi mono bakisaka nde yandi kele kibeni nduku na mono. Ntete mono vandaka kaka kuzaba yandi kansi ntangu yai mono ke zolaka yandi mingi.” Na Mposo 23 juillet Youlia bakaka mbotika.

Ntangu bitumba yantikaka, David yina kele ti bamvula 11 tinaka ti dibuta na bo na Allemagne. Yandi kumaka nsamuni ya me baka ntete ve mbotika ti bamvula 9. Yandi ke sala yonso sambu na kulungisa balukanu na yandi na kisalu ya Yehowa. Yandi ke tuba nde: “Mono bakaka lukanu ya kubaka mbotika sambu mono ke zolaka Yehowa mpi mono ke zolaka kukuma nduku na yandi. Ntangu mono vandaka kubaka mbotika, mono dilaka na kiese sambu mono kotaka na dibuta ya kitoko ya Yehowa. Mono ke zolaka kusonga bantu mambu ya me tala Yehowa mpi lukanu na yandi sambu na bantu. Yo yina lukanu na mono kele ya kukuma mupasudi-nzila. Mono ke zola mpi kusadila bampangi na mono ya babakala mpi ya bankento na dibuta na beto mpi mono ke tula ntima nde kilumbu kele, mono ta kuma nsadi ya kisalu. Lukanu na mono ya kuluta mbote kele ya kukwenda na Betele. Mono kuditudilaka lukanu yai banda beto kwendaka kusala viziti ya Betele na mbanza Lviv na 2018.”

Mpangi-nkento Olena ya mbanza Kiev kumaka nsamuni ya me baka ntete ve mbotika na 2011. Kansi yandi salaka bamvula 10 kukonda kusala mambu ya kimpeve. Na 2020, bankuluntu solulaka ti yandi mpi pesaka yandi kamukanda Vutuka na Yehowa. Yandi ke tuba nde: “Mono vutukilaka kulonguka Biblia mpi kukwenda na balukutakanu. Kansi ntangu fioti na nima, mono bikaka diaka. Ntangu bitumba bandaka, Yehowa pesaka mvutu na bisambu na mono, mono bakisaka nde Yehowa taninaka mono, yandi monisilaka mono zola mpi yandi pesaka mono ngemba ya ntima. Mono tinaka na Roumanie mpi mono kutanaka diaka ti Bambangi ya Yehowa. Zola mpi dikebi yina bampangi monisilaka mono vandaka bonso kuvertire yina Yehowa fikaka mono sambu mono wa diaka ve madidi.” Olena bakaka mbotika na Lumingu 24 juillet. Yandi ke tuba diaka nde: “Mono ke pesa Yehowa mersi sambu yandi monisilaka mono ntima-nda. Sesepi mono me bakisa nde ‘sambu na mambu yonso, mono kele ti ngolo na nzila ya muntu yina ke pesaka mono ngolo.’”—Bafilipi 4:13.

Na Kizole 2 août 2022 bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bansamuni 43 fwaka

• Bansamuni 97 lwalaka

• Bansamuni 22 568 tinaka na bisika ya nkaka

• Banzo 586 bukanaka

• Banzo 613 bebaka ngolo

• Banzo 1 632 bebaka ve ngolo

• Banzo ya Kimfumu 5 bukanaka

• Banzo ya Kimfumu 10 bebaka ngolo

• Banzo ya Kimfumu 37 bebaka ve ngolo

• Bakomite 27 ya Ke Sadisaka Bantu Yina Me Bwila Mpasi ke sadisa bampangi na Ukraine

• Bakomite Yina Ke Sadisaka Bantu Yina Me Bwila Mpasi me sadisa bampangi 53 836 ya ke longaka nsangu ya mbote (bansamuni) na kuzwa bisika ya kuvanda na babwala yina bitumba kele ve

• Bansamuni 24 867 me tina na bansi ya nkaka mpi kuna bampangi na bo Bambangi ya Yehowa ke sadisa bo