Na babwala ya nkaka ya Ukraine, banzo mingi me bukana to yo me beba ngolo sambu na babombe. Kansi bampangi na beto ya babakala mpi ya bankento ke landa kusala balukutakanu ya dibundu mpi mambu ya nkaka ya kimpeve ata mbala mingi bo kele ve ti kura.

Anastasia ti Debora ke longaka mingi nsangu ya mbote (bapasudi-nzila) na Kiev. Bo ke tuba nde, bo ke salaka bangunga 12 kana fioti konso kilumbu kukonda kura. Bo ke tulaka charge na ba-apareyi na bo kana dibaku me monana mpi bo ke sadilaka yina bo ke bingaka données cellulaires sambu na kulanda balukutakanu ya dibundu. Mbala mingi connexion ya Internet ke tinaka kaka ntangu balukutakanu ke manaka.

Mpasi ya nkaka yina bampangi na beto ke monaka mutindu kura ke zengana-zenganaka kele nde apareyi yina ke tulaka tiya na nzo (chauffage) ke zenganaka. Bampangi ya nkaka ke sadilaka motere sambu na kuzwa kura mpi kutula mupepe ya tiya na nzo. Bampangi ya nkaka ke kwendaka na banzo ya bampangi na bo ya dibuta ya kele ti bima yina ke tulaka mupepe ya tiya na nzo. Bankaka kele ve ti kima ya kusala. Bo ke kanga kaka ntima na madidi yina. Kima ya kiese kele nde, bampangi na beto mingi ya babakala mpi ya bankento kele ti banzo yina kele bo ke sadilaka gaze sambu na kutula mupepe ya tiya. Yo ke sala nde nzo kuvanda kaka tiya ata kura ke zengana-zengana.

Iryna ke longaka mingi nsangu ya mbote (mupasudi-nzila) na Ivano-Frankivsk. Yandi ke salaka ngolo sambu na kulanda kuvanda ti mabanza ya mbote. Yandi ke tuba nde: “Mono bakaka lukanu ya kutula ve dikebi na mambu yina mono ke bakisa ve. Yo yina mono ke zingaka ngunga mosi mbala mosi. Mono ke yindulaka kima ya mono lenda sala kana kura me zengana mpi mono ke salaka yonso sambu na kubaka na ntwala na Internet mikanda yina mono ta vanda ti yo mfunu.”

Ata bampangi na beto ya babakala mpi ya bankento ya Ukraine ke kutana ti mambu mingi ya mpasi, bo ke landa kuvanda ti mambu mingi ya kusala na kisalu ya Yehowa. Beto ke tula ntima nde Yehowa ta landa kusakumuna bikesa na bo sambu na “kusala mambu ya mbote.”—Bagalatia 6:9.

Na Kizole 6 décembre 2022, bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bampangi 47 ya ke longaka nsangu ya mbote (bansamuni) fwaka

• Bansamuni 97 lwalaka

• Bansamuni 11537 me kwenda kuzinga bisika ya nkaka

• Banzo 590 bukanaka

• Banzo 645 bebaka ngolo

• Banzo 1722 bebaka ve ngolo

• Banzo 7 ya Kimfumu bukanaka

• Banzo 19 ya Kimfumu bebaka ngolo

• Banzo 68 ya Kimfumu bebaka ve ngolo

• Bakomite 27 ya Ke Sadisaka Bantu Yina Me Bwila Mpasi ke sadisa bampangi na Ukraine

• Bakomite Yina Ke Sadisaka Bantu Yina Me Bwila Mpasi me sadisa bampangi 54212 ya ke longaka nsangu ya mbote (bansamuni) na kuzwa bisika ya kuvanda na babwala yina bitumba kele ve

• Bansamuni 26811 me tina na bansi ya nkaka mpi kuna bampangi na bo Bambangi ya Yehowa ke sadisa bo