Banda bitumba me yantikaka na Ukraine na février 2022, kiteso ya banzo 3000 ya Bambangi ya Yehowa me bebaka to yo me bukanaka. Banda na ngonda ya août, bampangi-babakala mpi bankento ya Ukraine ke yidika banzo yina bebaka na bisika yina bo lenda sala yo kukonda kutula luzingu na bo na kigonsa. Bo ke sala kisalu yai na lutwadisu ya bampangi yina ke tadilaka bisalu ya kusadisa bantu mpi ya bampangi ya ke salaka kisalu ya kutunga. Bo ke tula baludi ti bafenetre ya nkaka mpi bo ke yidika bima ya fioti-fioti. Bantangu ya nkaka, kana nzo mosi bukanaka, bo ke yidika kisika yina bakamio vandaka to tubisika ya nkaka sambu yo kuma banzo ya kukonda mindondo. Tii pana, bo me sala dezia banzo 37 mpi bo kele na kusala 48 ya nkaka.

Kusala kisalu yai ya kuyidika banzo na ntangu yai ya mpasi kele mpasi. Kansi yo ke kanga ve bampangi nzila ya kuyidika bisalu ya kusadisa bampangi yina me bwila mpasi. Svitlana kele mpangi-nkento mosi ya bamvula 70. Yandi ke zingaka na Velyka Dymerka na Kiev. Yandi ke buta nde: “Mono vandaka ve ti mbongo sambu na kuyidika ludi y nzo na mono mpi ntwala na yo. Kansi Yehowa bumbilaka mono kima mosi ya kuyituka: bampangi na mono kwisaka mpi bo yidikaka bima yonso kaka na bilumbu tatu mpamba.”

Mpangi-nkento Nadiia ke zingaka na Horenka na Kiev. Yandi ke tendula nde bisalu ya kusadisa bampangi yina me bwila mpasi vandaka lusakumunu ya nene sambu na kisalu na beto ya kulonga bantu. Yandi ke tuba nde: “Bisalu ya kuyidika banzo taka kimbangi ya nene. Yo vanda bantu yina mono me zaba ve ke tubila zola ya masonga yina Bambangi ya Yehowa ke vandaka ti yo. Bo ke yituka na kumona ve nde bampangi na mono ya babakala mpi bankento kwisaka kusadisa mono.”

Yo vanda bayina me vidisa banzo na bo ke kwisa kusadisa mu mbandu, Ievhen ti Tetiana. Missile (bombe) mosi bukaka nzo na bo. Kansi na kisika nde bo vanda mpi bo kudiyangisa sambu na bima yina bo vidisaka, bo salaka ngolo sambu na kusadisa bampangi na bo ya babakala mpi ya bankento. Ievhen ke tuba nde: “Kima ya ke vandaka mfunu mingi sambu na beto kele kusadisa bantu ya nkaka. Yo ke sadisaka beto na kukanga ntima na bampasi na beto.”

Bampangi yidikilaka mpi mpangi-nkento Lidiia nzo na yandi. Yandi ke zingaka na Hostomer na Kiev. Yo pusaka yandi mpi na kudipesa na luzolo yonso sambu na kusadisa bantu yina me bwila mpasi. Yandi ke tuba nde: “Bampangi yidikaka nzo na mono na bangonda zole, mpi bilumbu ya nkaka bampangi 16 ya babakala mpi ya bankento vandaka kukwisa na shantie. Mono vandaka kumona bonso nde mono me kuma dezia na nsi-ntoto ya mpa. Sesepi yai, mono mpi, mono kele ti nzala ya kusadisa bantu ya nkaka.”

Mpangi-bakala mosi ya Komite ya Filiale ya Ukraine kwendaka na bisika yina bampangi ke sala bisalu ya kusadisa bantu yina me bwila mpasi sambu na kupesa bampangi yina vidisaka banzo na bo kikesa. Yandi ke tuba nde: “Bampangi ya kele na Ukraine ke sadilanaka ntangu yonso mambu ti zola. Kansi bitumba yai me sala nde beto zolana diaka ngolo. Yo ke pesa beto kiese mingi na ntima na kumona nde lusadisu yina bo ke pesa bampangi na beto ya babakala mpi ya bankento ke pesa bo nzala ya kusala diaka mingi na kisalu ya kulonga nsangu ya mbote mpi yo ke pusa ‘bantu mingi na kupesa Nzambi matondo’ mutindu 2 Bakorinto 9:12 ke tuba.”

Na Kizole 20 décembre 2022, bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bampangi 47 ya ke longaka nsangu ya mbote (bansamuni) fwaka

• Bansamuni 97 lwalaka

• Bansamuni 11 477 me kwenda kuzinga bisika ya nkaka

• Banzo 590 bukanaka

• Banzo 645 bebaka ngolo

• Banzo 1 722 bebaka ve ngolo

• Banzo 7 ya Kimfumu bukanaka

• Banzo 19 ya Kimfumu bebaka ngolo

• Banzo 68 ya Kimfumu bebaka ve ngolo

• Bakomite 26 ya Ke Sadisaka Bantu Yina Me Bwila Mpasi ke sadisa bampangi na Ukraine

• Bakomite Yina Ke Sadisaka Bantu Yina Me Bwila Mpasi me sadisa bampangi 54 212 ya ke longaka nsangu ya mbote (bansamuni) na kuzwa bisika ya kuvanda na babwala yina bitumba kele ve

• Bansamuni 26 892 me tina na bansi ya nkaka mpi kuna bampangi na bo Bambangi ya Yehowa ke sadisa bo