Yantika na Kintete 26 décembre 2022, bapasudi-nzila ya ntangu yonso mpi bapasudi-nzila ya nene landaka malongi na nzo-nkanda sambu na kisalu ya kimupasudi-nzila na bisika yina nzo-nkanda yai lenda salama kukonda kigonsa. Na kutadila mutindu mambu ke salama na konso kisika, bapasudi-nzila ke landa malongi yina kimuntu-kimuntu to na nzila ya Zoom. Ata mambu ya nkaka lenda kanga yo nzila mu mbandu babombe, mutindu kura ke zengana-zengana, bampasi ya mbongo mpi mutindu Internet ke zengana, bampangi na beto ya babakala mpi ya bankento me sala yonso sambu na kulanda malongi yai ya mfunu. Bo me bakila yo mambote mingi ya kimpeve.

Natalia ke zingaka na Kryvyï Rih. Yandi ke tuba nde: “Nzo-nkanda yai vandaka bonso kima yina muntu ke simbaka na masa sambu yandi dinda ve (bouée de sauvetage). Yo me sadisa mono na kudinda ve na basusi na mono mpi na mambu ya ke pesaka mono boma.” Kiteso mosi, Anastasia, mpangi yina ke zingaka na Tchernivtsi ke tuba mpi nde: “Nzo-nkanda yai me ndimisa mono nde Yehowa ke zolaka mono ngolo. Mvula ya me luta fulukaka ti mambu mingi ya mpasi, mpi nzo-nkanda yai me vanda kibeni kima yina mono vandaka ti yo mfunu. Yo me pesa mono kikesa ya kulanda kusala yonso yina mono lenda sala sambu Yehowa kusakumuna mono.”

Svitlana ke longaka mingi nsangu ya mbote (mupasudi-nzila) na Kitsman. Yandi kudiyangisaka mingi ntangu yandi bakaka emvitasio sambu na kukota nzo-nkanda yina. Yandi ke tuba nde: “Mono songaka Yehowa basusi na mono, yo vanda mpasi na mono ya mbongo. Mono tudilaka yandi ntima mpi mono bakaka ve nsoni. Mono monaka nde Yehowa ke zolaka mono mpi nde yandi ke kebaka mono.” Bikesa yina mpangi Svitlana salaka simbaka ntima ya bakala na yandi ya kele ve Mbangi ya Yehowa. Bakala na yandi me kumaka kukwenda kufidisa yandi na balukutakanu ya dibundu.

Mbala zole ya mvimba, yo lombaka nde bana ya nzo-nkanda ya Jytomyr kutina na kisika mosi ya kubumbana ya vandaka na nsi ya ntoto sambu na kuditanina na babombe. Bo sadilaka kima mosi (poêle à bois) sambu na kusala nde kisika ya bo kele kuvanda tiya mpi bo landaka kusala nzo-nkanda. Ata bo kutanaka ti bampasi yina, Valentyna mpangi yina kwisaka kuzinga na Jytomyr, ke tuba nde: “Mono ta vilaka ve nzo-nkanda yai. Yo vandaka bonso nde mono vandaka na nsi ya mapapu ya ngolo ya Yehowa.”

Kaka bonso na bansi mingi, bapasudi-nzila ya Ukraine vandaka na kiese ya mingi ntangu bo bakaka nsangu nde bo me kulumusa ntalu ya bangunga yina bapasudi-nzila ta kuma kupesa. Na nima ya luzayisu yina, Yulia tubaka nde: “Ntima na mono me fuluka na zola sambu na Yehowa. Na suka yina, mono bondilaka Yehowa sambu yandi pesa mono nzila ya kulanda kuvanda mupasudi-nzila. Mono vandaka ve kuzaba inki mutindu Yehowa ta pesa mvutu, kansi mono zabaka nde yandi ta pesa kaka mvutu. Ntangu mono waka nde bo me kulumusa ntalu ya bangunga, mono vandaka diaka na ntonda ya mingi sambu na mambu yina Yehowa me salaka sambu na mono. Nsangu yina vandaka bonso kakima ya kitoko ya kudia na nsuka ya nzo-nkanda.”

Na Kizole 24 janvier 2023, bo pesaka beto rapore ya bantalu yai ya katukaka na Ukraine. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bampangi 47 ya ke longaka nsangu ya mbote (bansamuni) fwaka

• Bansamuni 97 lwalaka

• Bo me nata bansamuni 8 953 na bisika ya nkaka

• Banzo 590 bukanaka

• Banzo 645 bebaka ngolo

• Banzo 1 722 bebaka ve ngolo

• Banzo 8 ya Kimfumu bukanaka

• Banzo 17 ya Kimfumu bebaka ngolo

• Banzo 76 ya Kimfumu bebaka ve ngolo

• Bakomite 26 ya Ke Sadisaka Bantu Yina Me Bwila Mpasi ke sadisa bampangi na Ukraine

• Bo yidikaka banzo 46

• Bo yidikaka Banzo 5 ya Kimfumu

• Bakomite Yina Ke Sadisaka Bantu Yina Me Bwila Mpasi me sadisa bampangi 54 445 ya ke longaka nsangu ya mbote (bansamuni) na kuzwa bisika ya kuvanda na babwala yina bitumba kele ve

• Bansamuni 27 655 me tina na bansi ya nkaka mpi kuna bampangi na bo Bambangi ya Yehowa ke sadisa bo