Na bambanza yina bitumba kele ngolo mu mbandu na Marioupol, kura kele ve mpi kima ya tulaka mwa mupepe ya tiya na nzo (chauffage) kele ve. Mpila mpi ya kusolula ti bantu na telefone mpi na nzila ya Internet kele ve sambu bo me zenga yo. Bavitre ya banzo mingi me pasuka. Masa mpi bima ya kudia kele na kumana. Bampangi-babakala mpi bankento kuluta 2500 kele kaka ya kukangama na Marioupol. Na bambanza ya nkaka bonso Boutcha, Tchernihiv, Hostomel, Irpine, Kiev mpi Soumy, bo kangulaka “banzila” sambu bantu kumona mpila ya kutina. Yo yina bampangi na beto mingi ya bankento mpi ya babakala zwaka dibaku ya kutina mpi ya kukwenda na bisika yina bitumba kele ve.

Mpangi-bakala mosi ya bamvula 36 kele mupasudi-nzila mpi nkuluntu. Yandi me tina ti nkento na yandi mpi bibuti na yandi. Yandi vandaka kuzinga na Hostomel. Yandi ke tuba mambu yina yandi monaka ntangu bitumba vandaka kusalama na mbanza. Yandi ke tuba nde:

“Ba hélicoptères vandaka kupumbuka na zulu ya nzo na beto. Bakamio ya basoda vandaka kukengila-kengila banzila. Na ntangu beto vandaka ya kubumbana na nsi ya ntoto, basoda kotaka na nzo na beto. Bo bulaka masasi mingi na nsi ya ntoto. Masasi yina simbaka saki (sac de survie) ya mama kansi yo lwadisaka beto ve. Beto lutisaka bangunga tatu to iya kukonda kunikana mpi kukonda kutula ata makelele ya fioti. Na ntangu yina babombe mpi masasi vandaka kubula na zulu ya ba-ntu na beto. . . . Kilumbu ya kulanda na suka na ntangu beto vandaka kutina na kamio, bitumba yantikaka pene-pene na beto. Bakamio ya bitumba (blindés) vandaka na banzila. . . . Kigonsa vandaka ya nene, kansi kubikala mpi pana vandaka diaka kigonsa ya nene kuluta.

“Mambu yai yonso sobaka ngolo kibeni luzingu na beto. Beto zabaka mutindu ya kusadila bandongisila mingi ya Biblia. Mu mbandu, ndongisila ya kukonda kudiyangisa sambu na kilumbu ya mbasi, kusepela ti bima ya mfunu ya beto kele ti yo mpi kutudila Yehowa ntima na bantangu ya mpasi.”

Beto ke zaba nde Yehowa Nzambi na beto me zaba mbote-mbote bampasi ya ngolo yina bampangi na beto ya babakala mpi ya bankento ya Ukraine ke kutana ti yo. Yandi ta konda ve kusadisa bo.—2 Piere 2:9.

Bantalu ya kele awa na nsi kele bantalu yina beto tangaka na Kiya 10 mars 2022:

• Bansamuni 2 me fwa

• Bansamuni 8 me lwala

• Bansamuni 25 407 me yambula banzo na bo mpi me kwenda na bisika yina bitumba kele ve

• Banzo 25 ya bampangi me bwa

• Banzo 59 ya bampangi me beba ngolo

• Banzo 222 ya bampangi me beba ve ngolo

• Banzo ya Kimfumu 7 me beba ngolo

• 27 Komite ya Ke Sadisaka Bantu Yina Me Bwila Mpasi ke sadisa bampangi na Ukraine

• Bansamuni 10 566 me baka lusadisu ya Bakomite yina sambu na kuzwa bisika ya kuvanda na bisika yina bitumba kele ve

• Bansamuni 9 635 me tina na bansi ya nkaka. Bampangi na bo Bambangi ya Yehowa ke sadisa bo kuna