Bo me songa beto nde bampangi na beto zole ya bankento me fwa na Marioupol na bombe yina basoda losaka. Yo me pesa beto mpasi mingi kibeni. Na ntangu yai, bampangi-babakala mpi bankento ya kele kaka na Marioupol kele kuluta 2 000. Mpila ya kutina kele ve sambu bitumba kele ngolo kuna. Bilumbu yai, Bambangi ya Yehowa kiteso ya 150 me tina dezia mbanza yai. Bampangi yina ke sala ti Komite Yina Ke Sadisaka Bantu Yina Me Bwila Mpasi me sala yonso sambu na kunatila bampangi ya Marioupol bima yina bo kele na yo mfunu, kansi bo vutukilaka na nzila ntangu basoda bulaka bo ti bantu ya nkaka ya ke natila bantu bima ya bo kele na yo mfunu masasi. Bombe mosi me bwa na nzo mosi ya nene yina ke vandaka ti Nzo mosi ya Kimfumu mpi Nzo mosi ya Balukutakanu ya Nene. Ntangu bombe yina bwaka, bampangi-babakala mpi bankento kiteso ya 200 vandaka na nsi ya ntoto ya Nzo ya Kimfumu yina. Ata mpangi mosi ve lwalaka, kansi bakamio yonso bebaka. Yo me sala nde bampangi kumona ve mpila ya kutina.

Nkuluntu mosi (na foto ya kele awa na nsi) ti dibuta na yandi monaka mpila ya kutina mbanza Marioupol. Yandi ke tuba nde: “Beto me vidisa nzo na beto, beto kele diaka ve ti kisalu mpi beto lenda solula diaka ve ti banduku na beto. Kana bitumba vandaka ve, nzietelo na beto zolaka kusala kilumbu mosi, kansi yo me sala bilumbu sambanu. Beto katukaka na mbanza na kamio. Na nzila, beto monaka bima ke basisa midinga. Yo vandaka babombe yina panzanaka ve. Na nzietelo na beto ya mvimba, bampangi vandaka kusadisa beto sambu na kuzwa kisika ya kulala mpi kima ya kudia. Beto monaka kibeni nde Yehowa ke lungisa bampusa na beto mpila tata ke salaka . . . Yo ke pusa beto na kutudila Yehowa ntima na beto ya mvimba.”

Bambangi ya Yehowa ya Ukraine me tina na bansi ya nkaka ya Eropa. Mu mbandu, mpangi-bakala mosi ya kele nsadi ya kisalu, nkento na yandi ti bana na bo tatu ya bamvula 7, 11 mpi 16 tinaka na Portugal. Kuna bo kele ti bampangi ya dibuta ya kele Bambangi ya Yehowa. Bo vingilaka ntete bangunga 11 na ndilu ya insi na ntwala ya kukota na insi ya nkaka. Na nima bo salaka nzietelo ya bakilometre kuluta 4 000 na bilumbu iya mpi bo kumaka na dibuta na bo. Bo kumaka mwa minuta na ntwala nde lukutakanu mosi ya dibundu kuyantika. Bo ke tubaka ve Ki-portuguais, ata mpidina bo yambulaka ve mambu ya bo ke salaka mbala na mbala na kimpeve mpi bo landaka lukutakanu yango na nzila ya video. Dibundu yai yitukaka na kumona nde dibuta yai kele kaka na kiese ata bo me kutana ti mambu ya mpasi mingi kibeni.

Mpangi-nkento mosi ya me tina na Allemagne ti dibuta na yandi ke tuba nde: “Kutanga Biblia, kuyindula mambu ya mbote, mpi kuyindula kivuvu ya mbote ya beto kele ti yo pesaka beto kibeni ngolo mpi kikesa. . . . Beto me mona mutindu diboko ya Yehowa me twadisa beto mpi me sadisa beto na nzila ya bampangi na beto. Bo me yamba beto mbote kibeni mpi bo me sadisa beto na Ukraine, na Hongrie mpi sesepi yai, awa na Allemagne.”

Yo kele kieleka nde Yehowa ke sadisa bampangi na beto yonso ya babakala mpi ya bankento na insi Ukraine.—Nkunga 145:14.

Bantalu ya kele awa na nsi kele bantalu yina beto tangaka na Kitatu 16 mars 2022. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula ti bampangi ya kele na babwala yonso ya insi Ukraine kele mpasi.

• Bansamuni 4 me fwa

• Bansamuni 19 me lwala

• Bansamuni 29 789 me yambula banzo na bo mpi me kwenda na bisika yina bitumba kele ve

• Banzo 45 ya bampangi me bwa

• Banzo 84 ya bampangi me beba ngolo

• Banzo 366 ya bampangi me beba ve ngolo

• Banzo ya Kimfumu 16 me beba ngolo

• 27 Komite ya Ke Sadisaka Bantu Yina Me Bwila Mpasi ke sadisa bampangi na Ukraine

• Bansamuni 25 981 me baka lusadisu ya Bakomite yina sambu na kuzwa bisika ya kuvanda na bisika yina bitumba kele ve

• Bansamuni 11 973 me tina na bansi ya nkaka. Bampangi na bo Bambangi ya Yehowa ke sadisa bo kuna