Beto ke samba ngolo sambu na bampangi na beto ya babakala mpi ya bankento ya ke zingaka na Marioupol, mbanza yina bitumba ke landa kusalama mpi babombe ke landa kubwa. Diambu ya mawa kele nde babombe yina me fwa bampangi na beto sambanu. Ntalu ya bampangi na beto yonso ya me fwa na insi Ukraine kele kumi. Diaka, mutindu beto landaka yo na bansangu, babombe bebisaka nzo mosi ya bo ke salaka teyatre yina bantu kuluta 1 000 kwendaka kubumbana na kati. Ata mpangi na beto Mbangi ya Yehowa mosi ve fwaka, kansi Bambangi ya Yehowa ya nkaka lwalaka mwa fioti.

Bampangi na beto ya babakala mpi ya bankento kiteso ya 750 me tina mbanza Marioupol. Kansi bampangi kiteso ya 1 600 kele kaka kuna, bamingi kele na ndambu ya esti ya Mbanza, kwa basoda ya Russie me botula.

Mutindu beto me zaba, bampangi-babakala mpi bankento 200 me bumbana na nsi ya ntoto ya nzo mosi ya nene yina kele ti Nzo mosi ya Kimfumu mpi Nzo mosi ya Balukutakanu ya Nene. Ntangu beto zwaka mwa fioti dibaku ya kusolula ti bo, bampangi yina tubaka nde:

“Ntangu babombe vandaka kubwa, bampangi mingi na kati na beto vandaka na boma ya ngolo. Bankaka yantikaka kudila. Ntangu beto waka makelele ya bima ya ke panzana na nganda, beto yindulaka nde kana beto fwa ve na bima yina ke panzana, beto ta fwa na tiya. Nkuluntu mosi lombaka beto na kuyimba bankunga ya Kimfumu. Beto yimbaka bankunga kana 10 ve 15. Mutindu bima ya vandaka kupanzana vandaka kutula makelele mingi mpi nzo ya beto vandaka vandaka kunikana, beto vandaka mpi kuyimba ngolo. Na nima, beto tangaka mukanda ya Nkunga 27 mpi beto pesaka bakomantere. Na nima, konso muntu kumaka kutuba baverse yina yandi ke zolaka mingi mpi beto vandaka kumonisa sambu na nki yo vandaka kupesa beto ngolo. . . . Beto waka nde Yehowa kele kibeni ‘Tata ya mawa mingi mpi Nzambi yina ke lembikaka bantu yonso,’ yandi ke lembikaka beto na ntangu ya mpasi.”—2 Bakorinto 1:3, 4.

Bankuluntu mpi bampangi ya Bakomite yina ke kudipesaka mingi na kusadisa bampangi, ke kwenda kusosa bampangi na bo Bambangi ya Yehowa mpi ke natila bo bima ya kudia mpi bankisi kana yo kele mfunu. Bantangu ya nkaka, bampangi yai ke tula luzingu na bo na kigonsa. Bantangu ya nkaka, ntangu bampangi yai ke kwendaka kusosa bampangi na mbanza, bo ke tambulaka divumu na ntoto bonso banioka sambu masasi kubaka bo ve. Beto kele na kiese sambu na bampangi na beto yai ya ke “tulaka luzingu na bo na kigonsa” sambu na kusadisa bampangi na bo na lukwikilu.—Baroma 16:4.

Mutindu kima yina bo ke lambilaka (gaz) mpi kura kele ve, bampangi na beto ya bankento ya kikesa ke lamba na nganda bisika yonso ya bo kele. Na nima, bo ke kabula bima ya kudia na bampangi yina me kuma minunu mpi na bayina kele ti bifu na nitu. Bampangi na beto mingi ya babakala mpi ya bankento me vidisa banzo na bo, bakamio na bo mpi bima na bo. Ata mpidina, bo ke pesa bampangi ya nkaka mersi sambu na zola na bo mpi mutindu bo ke tudila bo dikebi.

Bampangi-bankento ke lamba na nganda na ntwala ya kisika ya kukotila na kisika yina bo me bumbana na nsi ya ntoto

Bantalu ya kele awa na nsi kele bantalu yina beto tangaka na Kizole 22 mars 2022. Beto me pesa bantalu yai na kutadila bansangu ya kieleka ya me katuka na bampangi yina kele kisika mambu yango ke salama. Kansi, bantalu ya kieleka lenda vanda ya kumata sambu kulanda kusolula it bampangi ya kele na babwala yonso ya insi Ukraine kele mpasi.

• Bansamuni 10 me fwa

• Bansamuni 27 me lwala

• Bansamuni 33 180 me yambula banzo na bo mpi me kwenda na bisika yina bitumba kele ve

• Banzo 78 ya bampangi me bwa

• Banzo 102 ya bampangi me beba ngolo

• Banzo 484 ya bampangi me beba ve ngolo

• Nzo ya Kimfumu 1 me bwa

• Banzo ya Kimfumu 4 me beba ngolo

• Banzo ya Kimfumu 18 me beba ve ngolo

• 27 Komite ya Ke Sadisaka Bantu Yina Me Bwila Mpasi ke sadisa bampangi na Ukraine

• Bansamuni 25 069 me baka lusadisu ya Bakomite yina sambu na kuzwa bisika ya kuvanda na bisika yina bitumba kele ve

• Bansamuni 14 308 me tina na bansi ya nkaka. Bampangi na bo Bambangi ya Yehowa ke sadisa bo kuna