Bambangi Yehowa ya mbanza Tetiiv me sala bamvula iya na tribinale sambu na kusamba mambu ya me tala Nzo na bo ya Kimfumu. Nsuka-nsuka, bo me pesa bo nswa ya kusadila Nzo na bo yina ya Kimfumu sambu na kusambila. Bampangi na beto manisaka kutunga Nzo yina ya Kimfumu na décembre 2014. Kansi kimvuka mosi (Conseil d’urbanisme et d’architecture d’État) salaka yonso sambu bo sadila yo ve. Kimvuka yai buyaka mbala sambanu ya mvimba na kupesa bo mukanda mosi (certificat de confromité). Kimvuka yango lombaka bo na kupesa baamande ya mingi mpi yo buyaka nkutu kupesa bo mukanda yina ke pesaka bantu nswa ya kutunga ata nkutu bampangi na beto vandaka bo me manisa dezia kutunga.

Na Kitatu 10 octobre 2018, Tribinale ya nene ya Ukraine zengaka nde bampangi na beto salaka mambu na kuwakana ti bansiku yina leta ke lombaka bantu na kuzitisa sambu na kutunga. Tribinale yai monisaka mpi diaka nde mambu yina bansi ya Eropa wakanaka sambu na banswa ya bantu (Convention européenne des droits de l’homme) ke tanina nswa ya kutunga kisika ya kusambila Nzambi. Na Kiya 28 mars 2019, ntwadisi ya nkaka ya bo tulaka na kimvuka yina bo ke bingaka Conseil d’urbanisme et d’architecture d’État pesaka bampangi mukanda yina (certificat de confromité) ya bo vandaka ti yo mfunu. Dibundu ya bampangi na beto yai salaka lukutakanu na yo ya ntete mwa bilumbu na nima kaka na ngonda yina.

Na kilumbu ya Mposo 2 novembre 2019, bampangi yidikaka mambu mpi lombaka bantu na kukwisa kutala Nzo ya Kimfumu yina. Bantu ya leta ya mbanza yina mpi ya distrike yina kwisaka, yo vanda mpi bantu yina ke zingaka pene-pene ti kisika yina Nzo ya Kimfumu yango kele. Anatoliy Fedorovytch Zavalniouk, muntu mosi ya me zaba mbote kisalu ya kutunga (architecte) mpi mfumu ya biro ya ke twadisaka mambu na distrike yina tubaka nde: “Beno me zitisa bansiku yina leta ke lombaka na kuzitisa sambu na kutunga mpi bapula yina bo ndimaka. Kisika yai ya lusambu me kumisa bala-bala yai mpi kartie yai Kitoko. Mono ke pesa beno mersi sambu na kisalu na beno.”

Mambu yai ya beto me nunga na ntwala ya leta ke pesa beto kiese mingi. Beto kele na kiese mutindu bampangi na beto ya mbanza Tetiiv me kuma kuvukana na Nzo na bo ya Kimfumu sambu na kusambila Yehowa mpi kukumisa yandi.—Nkunga 69:30.