Na bangonda ya luyantiku ya mvula yai, Betele ya Zimbabwe zwaka mikanda yina banzo-nkanda zole tindilaka bo: nzo-nkanda ya Dorothy Duncan ya ke longaka bifwa-meso mpi bantu yina kele ti bifu na nitu mpi Iniversite ya Zimbabwe. Betele ya Zimbabwe tindilaka banzo-nkanda yai zole Babiblia Mbalula ya Nsi-Ntoto ya Mpa ya bifwa-meso mpi mikanda ya nkaka ya bisono ya bifwa-meso, yo yina bo sonikilaka Betele mikanda sambu na kupesa mersi. Mukanda ya Iniversite ya Zimbabwe vandaka ti bangogo yai: “Mikanda ya beno me kabila beto ta sadisa beto na kulonga bana ya nzo-nkanda na kuvanda ti bikalulu ya mbote. Beno ke sadisa bantu mingi mpenza mpi beto me sepela mingi.”

Yai kele ve mbala ya ntete ya Betele ya Zimbabwe ke kabula mikanda yai, kansi na mbala yai bo salaka bikesa ya kukabula yo na bifwa-meso mpi bantu yina ke monaka mbote ve kuluta 10 000 na Zimbabwe. Na 2017, Betele ya Zimbabwe salaka kampagne ya kulonga bifwa-meso. Bo lombaka mpi bampangi zole ya Bapasudi-Nzila ya Nene ti bankento na bo na kuvukana ti bansamuni sambu bo longa mbote-mbote bifwa-meso mpi bantu yina ke monaka mbote ve. Bubu yai, bansamuni ke longuka Biblia ti bifwa-meso 46 mpi tatu me bakaka mbotika.

Mpangi-nkento Mavies Chaya vandaka na kati ya bantu yina bakaka mbotika. Bampangi yantikaka kulonga yandi nsangu ya mbote na 2021 na telefone. Mavies vandaka kusosa kibeni bantu yina lenda belula yandi sambu yandi kuma kumona. Kansi sambu yandi zwaka ve bantu yina lenda belula yandi, yandi vandaka diaka ve ti kivuvu nde kilumbu kele yandi ta beluka. Ntangu bampangi monisaka yandi lusilu ya Biblia ya ke tuba nde bifwa-meso ta mona na nsi-ntoto ya mpa, yo pesaka yandi kiese mingi. Yandi yantikaka kulonguka Biblia mbala zole na mposo mpi na Avril 2022, yandi bakaka mbotika.

Na ntangu yai ya beto ke vingila nde Yehowa kulungisa lusilu na yandi ya kubelula bifwa-meso, beto kele na kiese na kumona mutindu Yehowa “ke nataka nsemo” mpi ke pesa bantu yonso ya ke sosa yandi “mayele ya kubakisa mambu.”—Nkunga 119:130.