Organizasio ya Bambangi ya Yehowa ke zitisaka banswa ya bantu na yina me tala kubumba kinsweki ya bantu na kuwakana ti bansiku yina Biblia ke tubila. Organizasio yai ke bakisaka nde kusolula mbote na masonga yonso mpi kubaka bansangu ya kinsweki ya bantu sambu na kulungisa bampusa ya Bambangi ya Yehowa mpi kisalu ya kusadisa bantu yina bo ke salaka kele mfunu, mpi bo ke bakisaka mfunu ya kulanda kubumba kinsweki mpi kuzikisa nde bo ke bumba mbote bansangu ya bantu. (Bingana 15:22; 25:9) Kubumba kinsweki kele mfunu mingi kibeni.—Bingana 20:19.

Bansi mingi me tulaka bansiku sambu na kubumba mbote bansangu ya kinsweki ya bantu. Organizasio ya Bambangi ya Yehowa me monisaka na nsungi ya bamvula mingi nde bo ke zitisaka banswa ya bantu na yina me tala kubumba kinsweki mpi yo ke landaka kuzitisa yo, nkutu yo yantikaka kusala yo na ntwala nde bansi kutula bansiku yina. Organizasio ya Bambangi ya Yehowa ta landa kutanina bansangu yina bo ke pesaka bo mutindu bo ke salaka yo banda ntama, mutindu bansiku yai ke monisa yo.

Organizasio ya Bambangi ya Yehowa yina babiro ya bafiliale ke monisaka na ntoto ya mvimba, ke sadilaka bansiku yai.

Organizasio ya Bambangi ya Yehowa ke sadilaka bansangu yonso ya bantu na kuwakana ti bansiku yai:

1. Bo ta tadila bansangu ya bantu na mutindu ya mbote mpi yina nsiku ke pesa nswa.

2. Bo ta baka bansangu ya bantu, ta tadila yo mpi ta sadila yo kaka na kiteso yina organizasio kele na yo mfunu sambu na kusala mambu ya me tala dibundu ya Bambangi ya Yehowa mpi kisalu ya kusadisa bantu.

3. Bansangu ya bantu ta vanda ya siki-siki mpi bo ta tomisaka yo. Kana organizasio me zaba kifu mosi buna bo ta yidika yo.

4. Bo ta bumba bansangu ya bantu konso ntangu yina organizasio ta vanda ti mfunu na yo sambu na balukanu na yo.

5. Bo ta tula dikebi ya mingi sambu na kuzitisa banswa ya bantu na yina me tala bansangu na bo.

6. Beto ta baka bangidika ya me fwana sambu bantu yina kele ve ti nswa mpi bayina nsiku me pesa ve nswa kuzaba ve bansangu ya bantu. Konso ordinatere yina kele ti bansangu ya muntu ke vandaka ti nimero ya kukangudila yo (mot de passe) mpi kaka muntu yina ke sadilaka nimero yina lenda sadila. Kana kisalu me mana, beto ke kangaka babiro mpi kaka bantu yina bo me pesaka nswa lenda kota diaka.

7. Bo ta tinda ve bansangu ya bantu na bafiliale ya nkaka katula kaka kana organizasio ke sala mambu ya me tala lusambu to kisalu ya kupesa lusadisu na bampangi, mambu yina Bambangi yonso ya Yehowa me ndimaka kukonda nde bo futa bo mbongo mpi lukanu yina bo me bakaka na luzolo yonso ya kukuma Bambangi ya Yehowa mpi ya kuzabana buna.

1. Nswa ya muntu ya kutanina bansangu na yandi mosi ti bansangu na yandi ya kinsweki mpi ya kuyidika to ya kuvwansa mambu ti bansangu na yandi ya kinsweki, bo fwete pesa yandi yo na kuwakana ti mambu yina Bambangi ya Yehowa ke salaka dezia yina bo me tubila na bansiku yai.

2. Konso muntu yina ke lomba na kusala kima mosi buna na kitini yai fwete monisa mbote-mbote kana yandi kele nani.

3. Kana muntu ke lomba na kumona mambu na yandi to bansangu na yandi ya kinsweki, ke lomba na kuyidika to na kuvwansa yo, organizasio ta tadila yo mbote-mbote mpi ti bukati-kati sambu na kuzaba sambu na nki muntu yango ke zola kumona mambu yina, kuyidika yo to kuvwansa yo mpi mambote ya organizasio na yina me tala mambu ya lusambu. Organizasio ta tala kana kupesa nswa yina ta tula na kigonsa nswa ya organizasio na yina me tala kimpwanza na mambu ya lusambu.

4. Organizasio fwete tanina ntangu yonso bansangu ya konso Mbangi ya Yehowa. Kuvwansa bansangu yina ta bebisa balukwikilu ya organizasio mpi mambu ya me tala lusambu.

Kana muntu mosi ke mona nde bo me zitisa ve banswa na yandi, yandi lenda sonikila Komite ya Filiale mukanda sambu bo tadila diaka diambu yina. Yandi fwete tinda mukanda yina bamposo zole na nima ya kuzaba diambu yina yandi ke zola nde bo tadila diaka.