MAMBU YINA BANTU YA NKAKA KE TUBAKA

Bantu ya Izraele vandaka kusambila “nzambi [mosi ya mubulu mpi] ya bitumba yina vandaka kukotila dikanda mosi.”

MAMBU YINA BIBILA KE TUBAKA

Makanda yina bantu ya Izraele bedisaka kudipesaka mingi na mambu ya mubulu mpi ya mansoni, mu mbandu bo vandaka kuvukisa nitu ti bambisi mpi ti bantu ya mabuta na bo, mpi bo vandaka kutambika bana na bo. Na nima ya kubikila bo bamvula mingi sambu bo soba bikalulu na bo, Nzambi tubaka nde: “Makanda yina mono ke kula na ntwala na beno me kudikumisaka mvindu na nzila ya mambu yai yonso.”—Levi 18:21-25; Yeremia 7:31.

“Yo kele sambu na mbi ya makanda yai, yo yina Yehowa Nzambi na nge ke kula bo na ntwala na nge.”—Kulonga 9:5.

MBALA YA NKAKA NGE ME MONAKA

Na bitumba mingi, bamfumu ya mabundu ya bandambu yonso zole ke tubaka nde Nzambi kele ti bo. Mukanda mosi (The Causes of War) ke tuba nde: “Ntangu yonso mabundu ke kudikotisaka na bitumba yonso yina bantu ke nwanaka.”

MAMBU YINA BIBLIA KE TUBAKA

Bakristu kele ve ti nswa ya kunwanisa bambeni na bo. Ntumwa Polo sonikilaka Bakristu nde: “Kana mpila kele, beno sala yonso sambu na kuzinga na ngemba ti bantu yonso. . . . Beno vutula ve mbi sambu na mbi.”—Baroma 12:18, 19.

Na kisika ya kutinda balongoki na yandi na bitumba, Yezu songaka bo nde: “Beno landa na kuzola bambeni na beno mpi na kusamba sambu na bantu yina ke monisa beno mpasi, na mpila nde beno kudimonisa bana ya Tata na beno yina kele na zulu.” (Matayo 5:44, 45) Bakristu fwete kudikotisa ve na bitumba ata kana insi yina bo ke zingaka me kwenda na bitumba, sambu bo “kele ve bantu ya nsi-ntoto.” (Yoane 15:19) Kana Nzambi ke zolaka nde bansadi na yandi ya bansi yonso kuzola bambeni na bo mpi kukabwana ti nsi-ntoto, inki mutindu yandi lenda kotila bantu yina ke nwana bitumba ya mubulu bubu yai?

“Kimfumu na mono kele ve ya nsi-ntoto yai. Kana Kimfumu na mono vandaka ya nsi-ntoto yai, bansadi na mono zolaka kunwana sambu bo pesa mono ve na maboko ya Bayuda. Kansi, Kimfumu na mono kele ve ya nsi-ntoto yai.”—Yoane 18:36.

MAMBU YINA BANTU YA NKAKA KE TUBAKA

Bitumba ta manaka ve ata fioti. Mukanda mosi (War and Power in the 21st Century) ke tuba nde: “Bitumba ta salamaka ntangu yonso. Ata kima mosi ve ke monisa nde yo ta mana na bilumbu na beto.”

MAMBU YINA BIBLIA KE TUBAKA

Bitumba ta mana ntangu ata muntu mosi ve ta vanda ti nzala ya kunwana. Yo yina, ntama mingi ve Kimfumu ya Nzambi, yina kele luyalu ya kieleka ya ke yala na zulu, ta katula binwaninu yonso na ntoto mpi yo ta longa bantu na kulanda ngemba. Biblia ke ndimisa beto nde Nzambi ta “tula mambu na ndonga sambu na makanda ya ngolo yina kele ntama. Bo ta kumisa bambele na bo ya bitumba bima ya kubundudila ntoto mpi bo ta kumisa makonga na bo bakupu-kupu. Dikanda mosi ta nangula ve mbele ya bitumba sambu na kunwanisa dikanda ya nkaka, bo ta longuka mpi diaka ve bitumba.”—Mika 4:3.

Biblia ke tuba nde na nsi ya Kimfumu ya Nzambi mambu yai ta vanda ve: baluyalu ya bansi yina ke nwana sambu na mambote na bo mosi, mpi bansiku ya mbi yina ke pusaka bantu na kukolama to bangindu ya mbi ya kupona-pona yina ke kabulaka bantu. Yo ke monisa nde bitumba ta mana. Nzambi ke sila nde: “Bo ta sala ata mbi mosi ve mpi ta bebisa ata kima mosi ve . . . , sambu ntoto ta fuluka kibeni ti nzayilu ya Yehowa mutindu bamasa ke fulusaka nzadi-mungwa.”—Yezaya 11:9.

“Yandi ke sukisa bitumba na ntoto ya mvimba. Yandi ke buka munduki ya tolo-tolo mpi dikonga; yandi ke yoka bapusu-pusu ya basoda na tiya.”—Nkunga 46:9.