1. Inki mutindu bisalu ya Nzambi ke salamaka banda na luyantiku?

YEHOWA mpi Yezu ke salaka na bumosi banda na luyantiku ya lugangu. Yehowa gangaka Yezu na ntwala ya bima yonso ya nkaka. Na nima, Yezu salaka ti Yehowa mpi “vandaka na lweka na yandi bonso kapita ya kisalu.” (Bingana 8:30) Bansadi ya Yehowa ke salaka mpi na bumosi bisalu yina Nzambi ke pesaka bo. Mu mbandu, Noa tungaka maswa ti dibuta na yandi. Bantu ya Izraele salaka na kimvuka sambu na kutunga nzo-tenta, kukatula yo mpi kunata yo na kisika ya nkaka. Na tempelo, bo vandaka kuyimba mpi kubula miziki kumosi sambu na kukumisa Yehowa. Bansadi ya Yehowa salaka mambu yai yonso sambu bo vandaka na bumosi mpi bo vandaka kusadisana.—Kuyantika 6:14-16, 22; Kutanga 4:4-32; 1 Bansangu 25:1-8.

2. (a) Inki kikalulu ya mbote Bakristu ya mvu-nkama ya ntete vandaka na yo? (b) Inki bangiufula beto ta tadila?

 ² Bakristu ya mvu-nkama ya ntete vandaka mpi kusadisana. Ntumwa Polo tendulaka nde bo vandaka na bumosi ata bo vandaka ti makabu mpi bisalu ya kuswaswana. Bo yonso vandaka kulanda Yezu Kristu, Ntwadisi na bo. Polo fwanisaka bo ti nitu ya kele ti bitini mingi yina ke salaka na bumosi. (Tanga 1 Bakorinto 12:4-6, 12.) Ebuna beto bubu yai? Inki mutindu beto lenda sadisana na kisalu ya kusamuna, na dibundu mpi na dibuta?

3. Ntumwa Yoane monaka nki na mbona-meso ?

³ Na mvu-nkama ya ntete ntumwa Yoane monaka na mbona-meso, bawanzio nsambwadi ke bula mpungi. Ntangu wanzio ya tanu bulaka mpungi, Yoane monaka “mbwetete mosi ke katuka na zulu mpi ke kwisa kubwa na ntoto.” Mbwetete yango vandaka ti nsapi mpi kangulaka kielo ya dibulu mosi ya nda mpi ya mudidi. Ntete, midinga basikaka na dibulu yina; na nima, bampasu mingi basikaka na midinga. Na kisika ya kubebisa banti mpi matiti, bampasu yina salaka mbi na ‘bantu yina vandaka ve ti kidimbu ya Nzambi na bambunzu na bo.’ (Kusonga 9:1-4) Yoane bakisaka nde bampasu kele ti ngolo ya kubebisa bima mingi; sambu yo bebisaka bima mingi na Ezipte na bilumbu ya Moize. (Kubasika 10:12-15) Bampasu yina Yoane monaka ke tendula Bakristu yina bo me tulaka mafuta, yina ke longa nsangu mosi ya lukebisu sambu na mabundu ya luvunu. Bantu mingi ya kele ti kivuvu ya kuzinga na ntoto me vukanaka ti bo sambu na kusala kisalu yai. Bo yonso ke samunaka na bumosi. Kisalu yai me sadisaka bantu mingi na kubasika na mabundu ya luvunu mpi kukatuka na nsi ya bupusi ya Satana.

4. Inki kisalu bansadi ya Nzambi fwete sala, mpi beto fwete sala nki sambu na kununga na kusala yo?

⁴ Beto kele ti mukumba ya kulonga ‘nsangu ya mbote’ na ntoto ya mvimba na ntwala nde nsuka kukwisa. Yo kele kisalu mosi ya nene! (Matayo 24:14; 28:19, 20) Beto fwete zabisa konso muntu yina kele na “nzala ya masa” na kukwisa kunwa “masa ya luzingu”; disongidila, beto fwete longa kieleka na bantu yina kele na mfunu ya kuzaba yo. (Kusonga 22:17) Kansi beto lenda sala yo kaka kana beto ‘ke vukana mbote-mbote’ mpi ke sala na bumosi ti bampangi na dibundu.—Baefezo 4:16.

5, 6. Inki mutindu kulonga nsangu ya mbote ke sadisaka beto na kuvanda na bumosi?

⁵ Sambu na kusolula ti bantu mingi, beto fwete samuna na ndonga. Bantuma ya beto ke bakaka na dibundu ke sadisaka beto na kusala mambu na ndonga. Beto ke salaka ntete lukutakanu ya kisalu ya bilanga; na nima, beto ke kwendaka kulonga bantu nsangu ya mbote ya Kimfumu. Beto ke kabulaka mpi mikanda ya ke  tendulaka Biblia. Beto me kabulaka yo mingi na ntoto ya mvimba. Bantangu ya nkaka beto ke salaka bakampanye ya kusamuna. Ntangu nge ke salaka kisalu yai, nge ke vukanaka ti bampangi yonso ya ntoto ya mvimba, yina ke longa mpi bonso nge! Nge ke salaka mpi ti bawanzio, sambu bo ke sadisaka bansadi ya Nzambi na kulonga nsangu ya mbote.—Kusonga 14:6.

⁶ Beto ke vandaka na kiese mingi ya kutanga na Annuaire mbuma yina kisalu ya kusamuna ke butaka na ntoto ya mvimba! Bumosi na beto ke monanaka mpi ntangu beto yonso ke salaka bakampanye ya kubingisa bantu na balukutakanu ya nene. Na lukutakanu ya nene, beto ke waka malongi ya mutindu mosi beto yonso. Badiskure, badrame, mpi bansonga ke pesaka beto kikesa ya kusadila Yehowa mbote-mbote. Beto ke vandaka mpi na bumosi ti bampangi ya ntoto ya mvimba ntangu beto ke vukanaka konso mvula na Lusungiminu. (1 Bakorinto 11:23-26) Na nkokila yina ya Nisani 14, beto ke vukanaka beto yonso sambu na kutonda Yehowa na mambu yina yandi me sadilaka beto, mpi kuzitisa ntuma ya Yezu. Mwa bamposo na ntwala, beto ke salaka mpi kumosi sambu na kubingisa bantu mingi na kukwisa na lukutakanu yai ya mfunu.

7. Kusala na kimvuka ke sadisaka beto na kusala nki?

⁷ Mpasu mosi lenda bebisa ve bima mingi. Mutindu mosi, nsamuni mosi mpamba lenda longa ve bantu yonso. Kansi kusala na kimvuka ke sadisaka beto na kulonga bantu mingi kibeni mambu ya Yehowa mpi kusadisa bo na kupesa yandi lukumu.

8, 9. (a) Inki mbandu Polo pesaka sambu na kulonga Bakristu mfunu ya bumosi? (b) Inki mutindu beto lenda sala na bumosi na dibundu?

⁸ Polo tendudilaka Bakristu ya Efezo nde dibundu kele ya kuyidika mbote; na nima yandi songaka bo nde bo fwete ‘yela na mambu yonso.’ (Tanga Baefezo 4:15, 16.) Polo pesaka mbandu ya nitu sambu na kutendudila bo nde konso Mukristu lenda sadisa dibundu na kuvanda na bumosi mpi kulanda Yezu, Ntwadisi ya dibundu. Yandi tubaka nde, “konso kitini ke sadisaka kitini ya nkaka na kupesa konso kima yina kele mfunu.” Yo yina, nki beto yonso fwete sala, yo vanda bambuta to baleke, bantu yina kele nitu ngolo to ve?

⁹ Yezu me ponaka bankuluntu sambu na kutwadisa mabundu; yandi ke zolaka nde beto zitisa bo mpi beto landa mambu yina bo ke songa beto. (Baebreo 13:7, 17) Kansi bantangu ya nkaka, yo ke vandaka ve pete. Ata mpidina, beto lenda lomba Yehowa na kusadisa beto. Mpeve santu na yandi lenda sadisa beto na kulanda bantuma yina bankuluntu ke pesa beto. Yindula mambote yina dibundu ya mvimba lenda baka kana beto ke kudikulumusa mpi ke wakana mbote ti bankuluntu. Dibundu na beto ta  vanda na bumosi mpi zola na beto sambu na bampangi ta kuma ngolo.

10. Inki mutindu bansadi ya kisalu ke sadisaka dibundu na kuvanda na bumosi? (Tala kifwanisu ya luyantiku ya disolo.)

¹⁰ Bansadi ya kisalu ke sadisaka mpi dibundu na kuvanda na bumosi. Bo ke sadisaka mingi bankuluntu, mpi beto ke bakaka na mbalu bisalu yonso yina bo ke salaka. Mu mbandu, bo ke zikisaka kana dibundu kele ti mikanda ya kufwana sambu na kisalu ya kusamuna mpi bo ke yambaka bantu yina ke kwisaka na balukutakanu. Bo ke yidikaka Nzo ya Kimfumu mpi ke tulaka bunkete. Kana beto ke wakana mbote ti bampangi yai, bumosi ta vanda mpi beto ta sadila Yehowa na mutindu ya mbote.—Fwanisa ti Bisalu 6:3-6.

11. Inki batoko lenda sala sambu na kusadisa dibundu na kuvanda na bumosi?

¹¹ Bankuluntu ya nkaka me sadisaka mpenza dibundu banda bamvula mingi. Kansi sambu bo me kuma bambuta, ziku bo ke kukaka diaka ve kusala mambu mutindu bo vandaka kusala ntete. Bampangi yina kele batoko lenda sadisa bo. Kana bo me baka formasio, bo lenda sala bisalu mingi na dibundu. Kana bansadi ya kisalu ke kudipesa mingi na bisalu, bo lenda kuma mpi bankuluntu na bilumbu ke kwisa. (1 Timoteo 3:1, 10) Bankuluntu ya nkaka ya batoko me salaka bikesa mpi bo me yelaka mingi na kimpeve. Bubu yai, bo kele bankengi ya nziunga mpi ke sadisa mabundu mingi. Beto kele na kiese ya kumona batoko ke kudipesa na luzolo yonso sambu na kusadisa bampangi.—Tanga Nkunga 110:3; Longi 12:1.

12, 13. Inki lenda sadisa bantu ya dibuta na kuzinga na bumosi?

¹² Inki mutindu beto lenda sadisa bantu ya dibuta na beto na kuvanda na bumosi? Kusala lusambu ya dibuta konso mposo lenda sadisa beto. Ntangu bibuti ti bana ke lutisaka ntangu kumosi sambu na kulonguka mambu ya Yehowa, zola na bo ke kumaka ngolo. Na bantangu ya mutindu yina, bo lenda yidika mambu yina bo ta tuba na kisalu ya kusamuna; mpidina konso muntu ta vanda ya kuyilama mbote. Ntangu bo yonso ke tubila mambu ya Yehowa, mpi ke mona nde dibuta ya mvimba ke zolaka yandi, bangwisana na bo ke kumaka diaka ngolo.

¹³ Inki mutindu bankwelani lenda zinga na kuwakana? (Matayo 19:6) Kana bo zole ke zola Yehowa mpi ke sadila yandi kumosi, bo ta vanda na kiese na makwela mpi bo ta zinga na bumosi. Bo fwete zolana mpi ngolo bonso Abrahami ti Sara, Izaki ti Rebeka, mpi Elkana ti Ana. (Kuyantika 26:8; 1 Samuele 1:5, 8; 1 Piere 3:5, 6) Kana bankwelani ke zolana mutindu yai, bo ta zinga na bumosi mpi bangwisana na bo ti Yehowa ta kuma ngolo.—Tanga Longi 4:12.

14. Kana nkwelani na nge kele ve Mbangi ya Yehowa, nki nge lenda sala sambu na kutomisa makwela?

 ¹⁴ Biblia ke tuba pwelele nde beto fwete kwela ve muntu yina ke sadilaka ve Yehowa. (2 Bakorinto 6:14) Kansi bampangi ya nkaka me kwelaka bantu yina kele ve Bambangi ya Yehowa. Bankaka kumaka Bambangi ya Yehowa na nima ya kukwela kansi bankwelani na bo kele ve Bambangi ya Yehowa. Bankaka diaka kwelaka Bambangi ya Yehowa, kansi bubu yai, bankwelani na bo me yambulaka dibundu. Kana mpangi mosi ke kutana ti mambu yai, yandi fwete landa bandongisila ya Biblia sambu na kutomisa bangwisana na bo ya makwela, ata yo lenda vanda pete ve. Beto baka mbandu ya Mari ti bakala na yandi David. Bo vandaka kusadila Yehowa kumosi. Na nima, David vandaka kukwenda diaka ve na balukutakanu. Kansi Mari vandaka kaka kuzinga mbote ti David mpi kutanina bikalulu na yandi ya mbote. Yandi vandaka mpi kulonga bana na bo sambanu mambu ya Yehowa mpi kulanda kukwenda na balukutakanu ya dibundu mpi balukutakanu ya nene. Bamvula mingi na nima, ntangu bana na bo kumaka bambuta mpi kwendaka konso muntu na nzo na yandi, Mari landaka kusadila Yehowa ata yo vandaka mpasi. Kansi na nima, David kumaka kutanga mikanda yina Mari vandaka kupesa yandi. Nsuka-nsuka, David kumaka diaka kukwenda na balukutakanu. Ntekolo na yandi ya bamvula sambanu vandaka kubumbila yandi kisika; kana David me kwenda ve na lukutakanu, ntekolo yango vandaka kusonga yandi nde, “Nkaka, mu va na nzala ya kumona nge bubu na lukutakanu!” Na nima ya bamvula 25, David vutukilaka Yehowa; bubu yai, yandi kele na kiese ya kusadila diaka Yehowa kumosi ti nkento na yandi.

15. Inki mutindu bankwelani ya ntama lenda sadisa bankwelani ya mpa?

¹⁵ Bubu yai, Satana ke nwanisa mabuta. Yo yina bankwelani yina ke sadilaka Yehowa  fwete zingaka na bumosi. Ata nge me kwelaka banda ntama to ve, yindulula mambu yina nge lenda tuba to yina nge lenda sala sambu na kutomisa makwela na nge. Kana beno me kwelanaka banda ntama, beno fwete pesa bankwelani ya mpa mbandu ya mbote. Beno lenda bingisa bo na lusambu na beno ya dibuta. Mpidina bo ta bakisa nde, ata bantu me kwelanaka banda ntama, bo fwete landa na kuzolana mpi kuzinga na bumosi.—Tito 2:3-7.

16, 17. Bansadi ya Nzambi yina ke salaka na bumosi ke vingila nki na bilumbu ke kwisa?

¹⁶ Ntangu bantu ya Izraele vandaka kukwenda kusala bankinsi na Yeruzalemi, bo vandaka kusala mambu na bumosi. Bo vandaka kuyidika bima yonso yina bo fwete sadila na nzietelo. Na nima, bo vandaka kukwenda kumosi mpi kusadisana. Na tempelo, bo vandaka kukumisa Yehowa mpi kusambila yandi kumosi. (Luka 2:41-44) Bubu yai, beto ke kudibongisa sambu na kukota na nsi-ntoto ya mpa; yo yina, beto fwete vanda na bumosi mpi kusadisana kibeni. Keti nge lenda sosa mutindu ya kusadila bandongisila yai?

¹⁷ Mambu mingi ke kabulaka bantu ya nsi-ntoto yai, nkutu yo ke basisaka mpi bamvita. Kansi beto ke tonda Yehowa mutindu yandi me sadisaka beto na kuzinga na ngemba mpi kuzaba kieleka! Na ntoto ya mvimba bansadi ya Yehowa ke sambilaka yandi na mutindu yina yandi ke zolaka. Na bilumbu yai ya nsuka, bumosi na beto kele diaka ngolo mingi kuluta. Kaka bonso Yezaya mpi Mika tubaka, beto ke tombukaka kumosi na “ngumba ya Yehowa.” (Yezaya 2:2-4; tanga Mika 4:2-4.) Na bilumbu ke kwisa, beto ta vanda na kiese kibeni ntangu bantu yonso na ntoto ‘ta vukana mbote-mbote’ mpi ta sambila Yehowa na bumosi!