Kuyobisa maboko vandaka na kati ya mambu yina bambeni ya Yezu vandaka kubokutila yandi ti balongoki na yandi. Nsiku ya Moize tendulaka mambu yina lenda kumisa muntu mvindu, mu mbandu kana bakala me basisa masa ya kibakala to nkento me mona menga, maladi ya lepre, to kana muntu me simba mvumbi to mbisi ya kufwa. Nsiku monisaka mpi mambu yina muntu ya me kuma mvindu fwete sala sambu na kukuma diaka bunkete. Mu mbandu, kupesa kimenga, kuyobila, to kumwanga menga.—Levi, kapu 11 tii na kapu 15; Kutanga, kapu 19.

Barabi, disongidila balongi ya Bayuda, yikaka bansiku na bo mosi. Mukanda mosi ke tuba nde, barabi yikaka bansiku mingi sambu na mambu yina lenda kumisa muntu bunkete mpi mvindu. Bo tubilaka nkutu bisadilu ti bima yina lenda kuma mvindu, yina lenda kuma ve mvindu mpi mambu yina bantu ya me kuma mvindu fwete sala sambu na kukuma diaka bunkete.

Bambeni yulaka Yezu nde: “Sambu na nki balongoki na nge ke zitisaka ve bansiku ya bantu ya ntangu ya ntama, kansi bo ke dia ti maboko ya mvindu?” (Marko 7:5) Bunkete yina bafarize yai vandaka kutubila vandaka ve kaka ya kuyobisa maboko na ntwala ya kudia. Bo tulaka nsiku mosi nde, na ntwala ya kudia, bo fwete losila muntu masa na diboko ya mvimba. Mukanda yina beto tubilaka na zulu ke yika nde, barabi “tulaka mpi nsiku sambu na dilonga yina bantu fwete tula masa, masa yina bo fwete sadila, muntu yina fwete losila muntu ya nkaka masa na maboko, mpi kisika yina masa fwete suka na diboko.”

Inki Yezu tubaka sambu na bansiku yina bo yikaka? Yandi songaka bamfumu ya dibundu ya Bayuda nde: “Beno bantu ya luvunu, Yezaya vandaka ti kikuma ya mbote ya kubikula sambu na beno, mutindu bo me sonikaka nde: ‘Bantu yai ke kumisa mono [Yehova] kaka na bikobo, kansi bantima na bo kele ntama kibeni ti mono. Bo ke landa na kusambila mono sambu na mpamba, sambu malongi na bo kele bansiku ya bantu.’ Beno ke yambula nsiku ya Nzambi mpi ke kangama na bansiku ya bantu.”—Marko 7:6-8.