Kumonisa Mawete Kele Kuvanda Mayele
Toñi ke salaka kisalu ya kukeba minunu. Yandi bulaka na kielo mosi mpi nkento mosi ya bamvula kiteso ya 50 kwisaka kukangula. Nkento yango fingaka Toñi mpi nganinaka yandi nde yandi kwisaka ve na ntangu ya mbote sambu na kukeba mama na yandi ya mununu. Kansi, Toñi kwisaka na ntangu ya mbote. Ata mpidina, yandi vandaka kaka pima mpi lombaka ndolula na nkento yango sambu na kifu yina.
KILUMBU ya nkaka, nkento yango nganinaka diaka Toñi. Toñi salaka inki? Yandi tubaka nde: “Yo vandaka diambu mosi ya mpasi mingi. Yandi vandaka ve ti kikuma ya kufinga mono.” Ata mpidina, Toñi lombaka diaka ndolula mpi songaka nkento yango nde yandi vandaka kubakisa mpasi na yandi.
Kana nge vandaka Toñi, nge ke yindula nde nge zolaka kusala inki? Keti nge zolaka kusala yonso sambu na kumonisa mawete? Keti yo zolaka kuvanda mpasi sambu nge kudiyala? Ya kieleka, yo ke vandaka ve pete na kuvanda kaka pima kana nge me kutana ti diambu mosi ya mpasi bonso yai ya beto me tubila awa. Kana muntu mosi me pesa beto makasi, yo ke vandaka mpenza mpasi na kulanda kumonisa kikalulu ya mawete.
Kansi Biblia ke siamisa Bakristu na kuvanda bantu ya mawete. Nkutu, Ndinga ya Nzambi ke wakanisa kikalulu yai ti mayele. Yakobo ke yula nde: “Nani kele mayele mpi kele ti mayele ya kubakisa mambu na kati na beno? Na nsadisa ya bikalulu na yandi ya mbote, yandi monisa bisalu ya me salama ti mawete yina ke katukaka na mayele.” (Yak. 3:13) Inki mutindu mawete ke monisaka mayele yina ke katukaka na zulu? Inki lenda sadisa beto na kuyedisa kikalulu yai ya ke katukaka na Nzambi?
MAYELE YINA KIKALULU YA MAWETE KE MONISAKA
Kikalulu ya mawete lenda lembika makasi. “Mvutu ya pima ke manisaka nganzi, kansi ngogo ya nku ke tedimisaka makasi.”—Bing. 15:1.
Makasi lenda kumisa diambu mosi ya mpasi mbi kuluta sambu yo ke pedisaka diaka tiya. (Bing. 26:21) Kansi, mbala mingi mvutu ya mawete ke lembikaka makasi. Nkutu yo lenda lembika muntu yina kele na makasi ya ngolo.
Toñi monaka nde yo kele kieleka. Ntangu nkento yina monaka mutindu Toñi vandaka mawete, yandi yantikaka kudila. Nkento yango songaka yandi nde bampasi na yandi ti ya dibuta na yandi vandaka kuyangisa yandi mingi. Toñi taka kimbangi mosi ya mbote na nkento yina mpi bo yantikaka kulonguka Biblia. Yandi zwaka mabaku yai yonso sambu yandi vandaka muntu ya pima mpi ya ke tulaka ngemba.
Kikalulu ya mawete lenda pesa beto kiese. “Kiese na bantu ya mawete, sambu bo ta baka ntoto.”—Mat. 5:5.
Sambu na nki bantu ya mawete kele bantu ya kiese? Bantu mingi yina vandaka ntete makasi-makasi me kumaka ntangu yai na kiese sambu bo me kumaka bantu ya mawete. Luzingu na bo me tomaka, mpi bo me zaba nde bo ta baka luzingu mosi ya mbote na bilumbu ke kwisa. (Bakol. 3:12) Adolfo, nkengi mosi ya nziunga na Espagne, ke yibuka mutindu luzingu na yandi vandaka na ntwala nde yandi zaba kieleka.
Adolfo ke tuba nde: “Luzingu na mono vandaka na mfunu ve. Mono vandaka kuwa makasi mpamba-mpamba, yo yina ata banduku na mono ya nkaka vandaka kuwa mono boma. Nsuka-nsuka, diambu mosi ya nene salamaka. Kilumbu mosi ya bitumba ya ngolo, bo lwadisaka mono bamputa sambanu na mbele. Menga basikaka mono mingi mpi mono zolaka kufwa.”
Kansi bubu yai, na kutuba na yandi mpi na mbandu yina yandi ke pesaka, Adolfo ke longaka bantu na kuvanda bantu ya mawete. Bantu mingi ke sepelaka na yandi sambu yandi kele ti bikalulu ya mbote. Adolfo ke tuba nde yandi kele na kiese sambu na bansoba yina yandi me salaka. Yandi ke monisaka mpi ntonda mutindu Yehowa me sadisaka yandi na kukuma muntu ya mawete.
Kikalulu ya mawete ke pesaka Yehowa kiese. “Mwana na mono, vanda mayele mpi pesa ntima na mono kiese, sambu mono pesa mvutu na muntu yina ke sosila mono.”—Bing. 27:11.
Diabulu, mbeni ya nene ya Yehowa, ke sosilaka yandi. Nzambi kele ti bikuma ya mbote ya kuwa makasi sambu na mafingu ya Diabulu, kansi Biblia ke tuba nde Yehowa “ke waka makasi nswalu ve.” (Kub. 34:6) Kana beto ke sala kikesa sambu na kulanda mbandu ya Nzambi na yina me tala kuwa ve makasi nswalu mpi kumonisa mawete, beto ta kuma ti mayele yina ke sepedisaka Yehowa mingi.—Baef. 5:1.
Nsi-ntoto yai ya beto ke zinga kele kisika ya bantu ke waka makasi mingi. Beto lenda kutana ti “bantu ya ke kudikumisaka, bantu ya lulendo, bantu ya ke vwezaka, . . . bantu ya ke kusilaka bankaka makambu, bantu ya me konda kudiyala, bantu ya nku.” (2 Tim. 3:2, 3) Kansi diambu yai fwete kanga ve Mukristu nzila ya kuyedisa kikalulu ya mawete. Ndinga ya Nzambi ke yibusa beto nde “mayele yina ke katukaka na zulu ke vandaka . . . ngemba, makambu ngolo ve.” (Yak. 3:17) Kana beto kele bantu ya ke kotisaka ngemba mpi ya makambu ngolo ve, beto ta monisa nde beto kele ti mayele ya ke katukaka na Nzambi. Mayele ya mutindu yai ta pusa beto na kusala mambu na mawete kana bo me pesa beto makasi, mpi yo ta nata beto diaka pene-pene ya Yehowa, Nto ya mayele ya kukonda ndilu.
