DISOLO YA KULONGUKA 41
Mutindu Beto Lenda Longuka Biblia ti Muntu Tii na Mbotika—Kitini I
“Beno ke monisa nde beno kele mukanda ya Kristu yina beto bansadi me sonikaka.”—2 BAK. 3:3.
NKUNGA 78 ‘Longa Ndinga ya Nzambi’
MAMBU YINA DISOLO YAI KE TUBILA *
Yo ke pesaka kiese mingi na kumona longoki ya Biblia me yela na kimpeve mpi ke baka mbotika (Tala paragrafe 1)
1. Inki mutindu 2 Bakorinto 3:1-3 ke sadisa beto na kubaka na mbalu mukumba na beto ya kulonguka Biblia ti bantu tii na mbotika? (Tala kifwanisu ya lutiti ya zulu.)
INKI mutindu nge ke kudiwaka kana longoki mosi ya Biblia ya dibundu na beno me baka mbotika? Yo kele pwelele nde nge ke waka kiese mingi kibeni. (Mat. 28:19) Kana nge muntu longukaka ti yandi, nge ta wa diaka kiese mingi kuluta na kumona mutindu yandi ke baka mbotika. (1 Bate. 2:19, 20) Kuyela ya longoki tii na mbotika ke monisa bikesa yina mpangi yina longukaka ti yandi mpi dibundu ya mvimba me sala. Yo yina, beto lenda tuba nde balongoki yina ke baka mbotika kele ‘mikanda ya ke monisa nde beto me fwana.’—Tanga 2 Bakorinto 3:1-3.
2. (a) Inki ngiufula ya mfunu beto fwete kudiyula mpi sambu na nki? (b) Nani beto lenda binga longoki ya Biblia? (Tala noti na nsi ya lutiti.)
2 Rapore ya bamvula iya ya me luta ke pesa kiese. Yo ke monisa nde na ntoto ya mvimba, konso ngonda, bansamuni longukaka Biblia ti bantu kiteso ya 10 000 000. * Na bamvula yina, konso mvula bantu kuluta 280 000 vandaka kubaka mbotika sambu na kukuma Bambangi ya Yehowa mpi balongoki ya Yezu Kristu. Inki mutindu beto lenda sadisa bamilio ya balongi yai ya Biblia na kubaka mbotika? Mutindu Yehowa ke monisila bantu ntima-nda sambu na kupesa bo dibaku ya kukuma balongoki ya Kristu, beto fwete sala yonso yina beto lenda sala sambu na kusadisa bo na kuyela mpi kubaka mbotika nswalu kana mpila kele. Ntangu ya me bikala kele fioti.—1 Bak. 7:29a; 1 Pie. 4:7.
3. Inki beto ta tadila na disolo yai na yina me tala kulonguka Biblia ti bantu?
3 Sambu kisalu ya kukumisa bantu balongoki kele mfunu mingi ntangu yai, Nto-Kimvuka lombaka Babetele na kubaka bansangu yina ta sadisa bansamuni na kuzaba mambu yina bo lenda sala sambu na kusadisa balongoki mingi ya Biblia na kuyela mpi kubaka mbotika. Na disolo yai mpi na yina ke landa, beto ta mona malongi yina beto lenda baka na bapasudi-nzila, bamisionere mpi bankengi ya nziunga yina me salaka bamvula mingi na kisalu na bo. * (Bing. 11:14; 15:22) Masolo yai ta tendula mambu yina bansamuni mpi balongoki na bo ya Biblia lenda sala sambu na kulonguka mbote. Na disolo yai, beto ta tubila mambu tanu yina konso longoki fwete sala sambu na kuyela mpi kubaka mbotika.
LONGUKA TI LONGOKI YA BIBLIA KONSO MPOSO
Lomba longoki ya Biblia kana mpila kele, beno vanda sambu na kulonguka Biblia (Tala baparagrafe 4-6)
4. Inki beto fwete vila ve kana longoki ya Biblia ke longuka ve mingi mpi ke sala ve bikesa?
4 Bampangi mingi ke yantikaka kulonguka Biblia ti muntu ya kutelema na ntwala ya kielo na yandi. Ata yo kele mutindu ya mbote ya kuyantika kuyedisa mpusa ya muntu na Biblia, masolo yina ke vandaka nkufi mpi bantangu ya nkaka yo ke salamaka ve konso mposo. Sambu na kuyedisa diaka mingi mpusa ya muntu, bampangi ya nkaka ke lombaka nimero ya telefone ya muntu yina me monisa mpusa sambu na kubinga yandi to kusonikila yandi message ya kele ti dibanza mosi ya Biblia. Bo lenda landa kusolula mutindu yai ti muntu yango bangonda mingi kansi yandi lenda kuma ve longoki ya Biblia yina ke yela. Kana longoki ya Biblia ke sala ve bikesa mpi ke longuka ve mbala na mbala, yandi ta yela ve, ta kudipesa ve na Yehowa mpi ta baka ve mbotika.
5. Inki mambu Yezu tubaka na Luka 14:27-33, yina beto lenda sadila sambu na kusadisa balongoki na beto ya Biblia?
5 Yezu pesaka mbandu mosi sambu na kumonisa mambu yina muntu fwete sala sambu na kukuma longoki na yandi. Yandi tubilaka muntu yina ke zola kutunga nzo mpi ntotila yina ke zola kukwenda na bitumba. Yezu tubaka nde muntu yina ke zola kutunga nzo fwete ‘vanda ntete sambu na kutadila mbongo yina yo ta lomba’ sambu na kumanisa yo. Ntotila yina ke zola kukwenda na bitumba fwete ‘vanda ntete sambu na kusala lukutakanu’ sambu na kutala kana basoda na yandi ta kuka kunwana bitumba. (Tanga Luka 14:27-33.) Mutindu mosi, Yezu zabaka nde muntu yina ke zola kukuma longoki na yandi fwete tadila mbote-mbote sambu na kubakisa mambu yina yo ke lombaka nde balongoki ya Yezu kusala. Yo yina, beto fwete siamisa balongoki na beto ya Biblia yina ke yela, na kulonguka konso mposo. Inki mutindu beto lenda sala yo?
6. Inki beto lenda sala sambu balongoki na beto ya Biblia kuyela?
6 Yantika kukumisa nda bantangu yina beno ke sala na kulonguka ti longoki na ntwala ya kielo. Katula masolo yina yo lombaka nde beno solula, nge lenda tubila diaka dibanza ya verse ya nkaka ntangu yonso yina nge ke vutukila yandi. Kana yandi ke sepela nde beno solula ti yandi ntangu ya nda, kana mpila kele nge lenda lomba yandi nde beno vanda sambu beno solula mbote. Mvutu yina yandi ta pesa ta monisa kana yandi ke mona nde kulonguka ya Biblia kele mfunu to ve. Sambu na kusadisa yandi na kuyela nswalu, nge lenda yula yandi kana yandi ta ndima kulonguka mbala zole na mposo mosi. Katula kulonguka ti yandi mbala mosi to mbala zole na mposo mosi, kele diaka ti mambu ya nkaka yina nge fwete sala.
KUDIBONGISA NA NTWALA YA KULONGUKA BIBLIA TI MUNTU
Yidika na ntwala kulonguka ya Biblia mpi songa longoki mutindu ya kudibongisa (Tala baparagrafe 7-9)
7. Inki mutindu nsamuni lenda kudibongisa na ntwala ya kulonguka ti longoki?
7 Nsamuni, kudibongisa mbote na ntwala ya kulonguka Biblia ti muntu. Tanga na ntwala mambu yina beno ta longuka mpi baverse. Sosa kubakisa bangindu ya mfunu. Tadila mbote ntu-diambu ya disolo yina beno ta longuka, tubantu-diambu, bangiufula ya baparagrafe, baverse yina bo me sonika nde “tanga,” bifwanisu mpi bavideo yina lenda sadisa nge na kutendula mbote disolo yina beno ta longuka. Na nima, yindula longoki mpi yindula mpila ya kutendudila yandi mambu na mutindu ya pete mpi ya pwelele sambu longoki kubakisa mpi kusadila yo kukonda mpasi.—Neh. 8:8; Bing. 15:28a.
8. Mambu yina ntumwa Polo tubaka na Bakolosai 1:9, 10 ke longa beto nki na yina me tala kusamba sambu na balongoki na beto ya Biblia?
8 Ntangu nge ke kudibongisa na ntwala sambu na kulonguka ti longoki na nge, samba Yehowa na kusadisa longoki mpi kulungisa bampusa na yandi. Lomba Yehowa na kusadisa nge na kulonga mambu yina ke katuka na Biblia sambu na kusimba ntima ya longoki. (Tanga Bakolosai 1:9, 10.) Sosa kuyindula na ntwala diambu yina lenda vanda mpasi sambu longoki kubakisa to kundima. Kuvila ve nde lukanu na nge kele ya kusadisa yandi na kuyela mpi kubaka mbotika.
9. Inki mutindu nsamuni lenda sadisa longoki na yandi na kudibongisa na ntwala?
9 Beto ke ndima nde kana beto ke longuka ti longoki ya Biblia mbala na mbala, yo ta sadisa yandi na kumonisila Yehowa mpi Yezu ntonda sambu na mambu yina bo me salaka mpi yandi ta zola kulonguka mambu mingi. (Mat. 5:3, 6) Sambu kulonguka ya Biblia kunatila longoki mambote, yandi fwete tula dikebi ya mingi na mambu yina yandi ke longuka. Sambu na kusadisa yandi, monisa yandi mfunu ya kuyidika na ntwala kulonguka na yandi ya Biblia. Lomba yandi na kutanga na ntwala dilongi yina beno ta longuka mpi na kuyindula mutindu ya kusadila yo na luzingu na yandi. Inki mutindu nge lenda sadisa yandi? Beno yidika ti yandi dilongi mosi mpi songa yandi mutindu ya kudibongisa. * Tendudila yandi mutindu ya kuzwa mbala mosi bamvutu na bangiufula mpi songa yandi mutindu ya kutenda kaka bangogo to bansa ya mfunu yina ta sadisa yandi na kuyibuka mvutu. Na nima, songa yandi na kupesa mvutu na bangogo na yandi mosi. Kana yandi sala mutindu yina, yo ta sadisa nge na kuzaba kana yandi ke bakisa mbote mambu yina beno ke longuka. Kele diaka ti diambu ya nkaka yina nge lenda siamisa longoki na nge na kusala.
LONGA LONGOKI MUTINDU YA KUSOLULA TI YEHOWA KONSO KILUMBU
Longa longoki na nge ya Biblia mutindu ya kusolula ti Yehowa (Tala baparagrafe 10-11)
10. Sambu na nki kutanga Biblia konso kilumbu kele mfunu mpi nki longoki fwete sala sambu mambu yina yandi ke tanga na Biblia kusadisa yandi?
10 Katula kulonguka konso mposo ti nsamuni, longoki ya Biblia ta baka diaka mambote na kulonguka na yandi kana yandi ke sala diaka mambu ya nkaka yandi mosi konso kilumbu. Yandi fwete solula ti Yehowa konso kilumbu. Inki mutindu? Yandi fwete widikila Yehowa mpi kusolula ti yandi. Yandi ta widikila Yehowa kana yandi ke tanga Biblia konso kilumbu. (Yoz. 1:8; Nk. 1:1-3) Songa yandi mutindu ya kusadila “Manaka ya Lutangu ya Biblia” yina kele na jw.org, * yandi lenda basisa yo mpi na papie. Ya kieleka, sambu na kusadisa longoki na kubaka mambote na lutangu na yandi ya Biblia, siamisa yandi na kuyindula mbote-mbote mambu yina Biblia ke longa yandi na yina me tala Yehowa mpi mutindu yandi lenda sadila mambu yina yandi ke longuka na luzingu na yandi.—Bis. 17:11; Yak. 1:25.
11. Inki mutindu longoki ya Biblia lenda zaba mutindu ya kusamba mbote mpi sambu na nki yo kele mfunu nde yandi samba Yehowa mbala na mbala?
11 Siamisa longoki ya Biblia na kusamba konso kilumbu sambu na kusolula ti Yehowa. Na luyantiku mpi na nsuka ya kulonguka ti longoki, sala kisambu yina ke katuka na ntima mpi samba sambu na yandi. Ntangu yandi ke wa mutindu nge ke samba, yo ta sadisa yandi ntangu yandi ke samba na kutuba mambu yina ke katuka na ntima na yandi mpi na masonga yonso. Yandi ta samba Yehowa Nzambi na zina ya Yezu Kristu. (Mat. 6:9; Yoa. 15:16) Kutanga Biblia konso kilumbu (kuwidikila Yehowa) mpi kusala kisambu (kusolula ti Yehowa) ta sadisa longoki na nge ya Biblia na kukuma nduku ya Yehowa. (Yak. 4:8) Kana yandi ke sala yo konso kilumbu, yo ta sadisa yandi na kuyela, na kudipesa na Yehowa mpi kubaka mbotika. Inki ta sadisa yandi diaka?
SADISA LONGOKI NA KUSALA KINDUKU TI YEHOWA
12. Inki mutindu nsamuni lenda sadisa longoki na yandi na kusala kinduku ti Yehowa?
12 Mambu yina longoki ya Biblia ke longuka fwete bikala na mabanza mpi na ntima na yandi. Sambu na nki? Sambu beto ke zolaka nde longoki ya Biblia kulonguka mambu ya Yehowa mpi mambu yina yandi ke longuka kusimba ntima na yandi sambu yandi sadila yo. Yezu longaka bantu mambu mingi mpi bo vandaka kuzola nde Yezu kulonga bo. Kansi bantu vandaka kulanda mpi Yezu sambu malongi na yandi vandaka kusimba bantima na bo. (Luka 24:15, 27, 32) Longoki na nge ya Biblia fwete mona nde Yehowa kele Muntu ya kieleka, Muntu yina yandi lenda sala kinduku ti yandi kukonda mpasi mpi kubakisa nde yandi kele Tata na yandi, Nzambi na yandi mpi Nduku na yandi. (Nk. 25:4, 5) Ntangu beno ke longuka Biblia, benda dikebi ya longoki na bikalulu ya kitoko ya Yehowa. (Kub. 34:5, 6; 1 Pie. 5:6, 7) Na konso disolo ya beno ke longuka, benda dikebi na yandi na kikalulu ya kitoko ya Yehowa. Sadisa longoki na kusepela ti bikalulu ya kitoko ya Yehowa. Mu mbandu zola, ntima-mbote mpi kikalulu na yandi ya kuwila bantu mawa. Yezu tubaka nde “nsiku ya kuluta nene mpi ya ntete” kele ‘kuzola Yehowa Nzambi na nge.’ (Mat. 22:37, 38) Yo yina, kuna zola ya Yehowa na ntima ya longoki na nge.
13. Pesa mbandu ya ke monisa mutindu nsamuni lenda sadisa longoki ya Biblia na kuzaba bikalulu ya Yehowa.
13 Ntangu nge ke solula ti longoki na nge ya Biblia, tendudila yandi sambu na nki nge ke zolaka Yehowa. Yo lenda sadisa yandi na kubakisa nde yandi fwete sala mpi kinduku ti Yehowa mpi kuzola yandi. (Nk. 73:28) Mu mbandu, kana nsa mosi na mukanda yina beno ke longuka to verse mosi ke monisa zola, mayele, lunungu to ngolo ya Yehowa mpi yo ke simbaka ntima na nge, songa yo longoki na nge mpi monisa yandi nde yo kele na kati ya bikuma mingi yina ke pusaka nge na kuzola Tata na beto ya zulu. Longoki ya Biblia fwete sala diaka diambu ya nkaka sambu na kuyela mpi kubaka mbotika.
SIAMISA LONGOKI NA KUKWENDA NA BALUKUTAKANU YA DIBUNDU
Siamisa longoki na nge ya Biblia na kukwenda na balukutakanu mbala mosi ntangu beno me yantika kulonguka! (Tala baparagrafe 14-15)
14. Inki mutindu Baebreo 10:24, 25 lenda sadisa longoki ya Biblia na kuyela?
14 Beto yonso ke zolaka nde balongoki na beto ya Biblia kuyela mpi kubaka mbotika. Kusiamisa bo na kukwenda na balukutakanu ya dibundu kele mutindu mosi ya mbote ya kusadisa bo na kuyela. Bansamuni yina me salaka bamvula mingi ke tubaka nde balongoki ya Biblia yina ke kwendaka na balukutakanu mbala mosi ntangu bo me yantika kulonguka, ke yelaka nswalu. (Nk. 111:1) Bansamuni ya nkaka ke tendudilaka balongoki na bo nde bo ta longuka mambu mingi na kulonguka na bo ya Biblia mpi na balukutakanu. Tanga Baebreo 10:24, 25 ti longoki na nge mpi monisa yandi mambote yina yandi ta baka kana yandi ke kwenda na balukutakanu. Songa yandi video Inki Ke Salamaka na Nzo ya Kimfumu? * Sadisa longoki na nge na kubaka lukanu ya kutina ve ata lukutakanu mosi.
15. Inki beto lenda sala sambu na kusiamisa longoki ya Biblia na kukwenda mbala na mbala na balukutakanu?
15 Inki nge lenda sala kana longoki na nge ya Biblia me kwenda ntete ve na balukutakanu to ke kwendaka ve mbala na mbala? Na kiese yonso, songa longoki na nge mambu yina nge me longuka na lukutakanu yina me katuka kusalama. Kana yandi me bakisa nde nge ke sepelaka ti balukutakanu, yo lenda pusa yandi na kukwenda na balukutakanu. Pesa yandi Nzozulu ya Nkengi to Mukanda ya Lukutakanu Luzingu mpi Kisalu ya kulonguka ya mposo yina. Songa longoki mambu yina beno ta longuka na lukutakanu ya ke landa mpi yula yandi kitini ya lukutakanu yina ke sepedisa yandi mingi. Mambu yina longoki ta mona na mbala ya ntete na balukutakanu ta sepedisa yandi mingi kuluta mambu yonso yina ke salamaka na dibundu na yandi. (1 Bak. 14:24, 25) Yandi ta kutana ti bampangi yina kele ti bikalulu ya mbote yina yandi lenda landa mpi bo ta sadisa yandi na kuyela mpi kubaka mbotika.
16. Inki beto fwete sala sambu na kulonguka Biblia ti bantu tii na mbotika mpi nki beto ta longuka na disolo ya ke landa?
16 Inki mutindu beto lenda longuka Biblia ti bantu tii na mbotika? Beto lenda sadisa bo na kumona mfunu ya kulonguka Biblia. Beto siamisa bo na kulonguka konso mposo mpi na kuyidika na ntwala kulonguka na bo. Beto siamisa bo mpi na kusolula ti Yehowa konso kilumbu mpi na kusala kinduku ti yandi mpi na kukwenda na balukutakanu ya dibundu. (Tala lupangu “ Mambu Yina Longoki Fwete Sala Sambu na Kuyela mpi Kubaka Mbotika.”) Disolo ya ke landa ta tubila mambu tanu ya nkaka yina bansamuni lenda sala sambu na kusadisa balongoki na kubaka mbotika.
NKUNGA 76 Nge Ke Kudiwaka Nki Mutindu?
^ par. 5 Kulonga muntu kima mosi ke tendula kukotisa na mabanza na yandi kima mosi ya mpa yina ta sadisa yandi na kukuma “kuyindula to kusala mambu na mutindu ya mpa.” Mukapu na beto ya mvu 2020, Matayo 28:19, me yibusa beto mfunu ya kulonguka Biblia ti bantu mpi kusadisa bo na kubaka mbotika sambu bo kuma balongoki ya Yezu Kristu. Na disolo yai mpi na yina ke landa, beto ta mona mambu yina beto lenda sala sambu na kusala diaka mbote kisalu yai ya mfunu mingi.
^ par. 2 NTENDULA YA BANGOGO: Kana nge ke solula ti muntu mbala na mbala mambu ya Biblia yina kele na mukanda mosi yina ke tendulaka Biblia, yo ke tendula nde nge ke longuka Biblia ti yandi. Kana nge me wakana ti muntu nde nge ta longukaka ti yandi Biblia, nge me monisa yandi mutindu beno ta longukaka mpi na nima nge me longuka ti yandi mbala zole mpi nge ke ndima nde beno ta landa kulonguka ti yandi, nge lenda tanga yandi longoki ya Biblia.
^ par. 3 Masolo yai ke tubila mpi bangindu ya mfunu ya kele na masolo ya kulandana, “Kutwadisa Balongoki ya Biblia Yina Keyela” yina basikaka na Kisalu na Beto ya Kimfumu banda na Yuli 2004 tii na Mayi 2005.
^ par. 9 Tala video, Kulonga Balongoki Mutindu ya Kudibongisa. Na jw.org. bweta na BIBLIOTEKE mpi na BAVIDEO na nima bweta na BALUKUTAKANU MPI KISALU NA BETO YA KUSAMUNA mpi na BETO YEDISA MAYELE NA BETO.
^ par. 10 Kota na jw.org, bweta na MALONGI YA BIBLIA mpi na BISADILU YA KULONGUKA BIBLIA na nima bweta na MANAKA YA LUTANGU YA BIBLIA.
^ par. 14 Kota na jw.org. mpi bweta na MAMBU YA ME TALA BETO mpi na BALUKUTAKANU.
