1. Inki mutindu beto me zaba nde kisalu ya kukumisa bantu balongoki ke gulusaka luzingu ya bantu?

KISALU ya kukumisa bantu balongoki ke gulusaka luzingu ya bantu. Inki mutindu beto me zaba yo? Ntangu Yezu pesaka nsiku yina kele na Matayo 28:19, 20, yandi tubaka nde: “Beno kwenda . . . beno kumisa bantu . . .  balongoki, beno botika bo.” Sambu na nki yo kele mfunu nde muntu kubaka mbotika? Muntu fwete baka mbotika kana yandi ke zola kuguluka. Muntu yina ke zola kubaka mbotika fwete kwikila nde yandi ta baka dibaku ya kuzinga mvula na mvula sambu Yezu fwaka sambu na beto mpi yandi futumukaka. Yo yina ntumwa Piere songaka Bakristu nde: ‘Mbotika ke gulusa beno ntangu yai, na nzila ya lufutumuku ya Yezu Kristu.’ (1 Pie. 3:21) Kana longoki me baka mbotika, yandi lenda baka dibaku ya kuzinga mvula na mvula.

2. Mutindu 2 Timoteo 4:1, 2 ke monisa yo, beto fwete vanda balongi ya nki mutindu?

² Sambu na kukumisa bantu balongoki, beto fwete yedisa “mayele ya kulonga.” (Tanga 2 Timoteo 4:1, 2.) Sambu na nki? Sambu Yezu songaka beto nde: “Beno kwenda . . . beno kumisa bantu . . . balongoki, . . .  beno longa bo.” Ntumwa Polo tubaka nde “kwamina” na kisalu yai “sambu kana nge ke sala yo, nge ta kudigulusa mpi ta gulusa bantu yina ke widikila nge.” Yo yina, yo fwanaka kibeni nde yandi tuba nde: “Keba ntangu yonso . . . na malongi na nge.” (1 Tim. 4:16) Sambu na kukumisa bantu balongoki, beto fwete longa mbote.

3. Inki beto longukaka na disolo ya me luta na yina me tala kulonguka Biblia ti bantu?

³ Beto ke longaka mbala na mbala bantu mingi kibeni kieleka ya Biblia. Mutindu beto monaka yo na disolo yina me luta, beto fwete  zaba mutindu beto lenda sadisa bantu mingi na kati na bo na kubaka mbotika mpi kukuma balongoki ya Yezu Kristu. Na disolo yai, beto ta tubila mambu tanu ya nkaka yina konso nsamuni fwete sala sambu na kusadisa longoki yina ke yela na kubaka mbotika.

4. Sambu na nki nsamuni fwete tuba ve mingi ntangu yandi ke longuka Biblia ti muntu? (Tala mpi noti na nsi ya lutiti.)

⁴ Beto ke zolaka malongi ya Ndinga ya Nzambi yina beto ke longaka. Yo yina, beto lenda bwa na mutambu ya kutubila mingi mambu yango. Yo vanda beto ke twadisa Kulonguka ya Nzozulu ya Nkengi, Kulonguka ya Biblia ya Dibundu to beto ke longuka Biblia ti muntu, beto fwete tuba ve mingi. Sambu na kubika nde Biblia yo mosi kulonga muntu, nsamuni fwete sosa ve kutendula mambu yonso yina yandi me zaba na yina me tala verse mosi ya Biblia to diambu mosi buna. * (Yoa. 16:12) Ntangu nge bakaka mbotika nge zabaka ve mambu yonso yina nge me zaba bubu yai. Mbala ya nkaka nge zabaka kaka malongi ya ntete-ntete ya Biblia. (Baeb. 6:1) Nge salaka bamvula mingi sambu na kuzaba mambu yonso yina nge ke zaba bubu yai. Yo yina, kusosa ve kulonga longoki mambu yonso yina nge ke zaba na mbala mosi.

5. (a) Mutindu 1 Batesalonika 2:13 ke monisa yo, nki beto ke zolaka nde longoki kubakisa na mambu yina yandi ke longuka? (b) Inki mutindu beto lenda siamisa longoki na kutubila mambu yina yandi ke longuka?

⁵ Beto ke zolaka nde longoki kubakisa mambu ya Biblia yina yandi ke longuka. (Tanga 1 Batesalonika 2:13.) Inki mutindu beto lenda sala yo? Siamisa longoki na kutubila mambu yina yandi ke longuka. Na kisika ya kutendudila yandi ntangu yonso baverse ya Biblia, lomba yandi na kutendudila nge baverse ya nkaka. Sadisa longoki na kutala mutindu yandi lenda sadila Ndinga ya Nzambi na luzingu na yandi. Yula yandi bangiufula yina ta pusa yandi na kutuba mambu yina yandi ke yindula mpi mutindu yandi ke kudiwa sambu na baverse yina yandi ke tanga. (Luka 10:25-28) Mu mbandu, yula yandi nde: “Inki mutindu verse yai ke sadisa nge na kumona kikalulu ya Yehowa?” “Inki mutindu mambu ya Biblia yina nge ke longuka lenda sadisa nge?” “Keti nge ke sepela mpenza ti mambu yina nge ke longuka?” (Bing. 20:5) Diambu ya kuluta mfunu kele nde longoki fwete zola mpi kusadila mambu yina yandi ke longuka na kisika ya kuzaba kaka mambu mingi.

6. Sambu na nki yo lenda vanda mbote na kunata nsamuni yina me sala bamvula mingi na longoki ya Biblia?

⁶ Keti nge me nataka bansamuni yina me salaka bamvula mingi na longoki na nge ya Biblia? Kana nge ke sala yo, nge lenda yula bo na kusonga nge kana nge ke longa mbote, kana nge ke sadila mbote Biblia ntangu nge ke longuka ti  muntu mpi bo songa nge bisika yina nge lenda yidika. Kana nge ke zola kukuma longi ya mbote, nge fwete vanda muntu ya kudikulumusa. (Tala mpi Bisalu 18:24-26.) Na nima, yula nsamuni yina na kusonga nge kana longoki ke bakisa mbote mambu yina yandi ke longuka. Kana nge ta vanda ve mposo mosi to bamposo mingi, nge lenda lomba nsamuni yina na kulonguka ti longoki na nge. Yo ta sala nde longoki kulonguka mbala na mbala mpi yo ta sadisa yandi na kubakisa nde kulonguka kele mfunu mingi. Kuyindula ve ata fioti nde yandi kele longoki na “nge” mosi mpamba mpi muntu ya nkaka lenda longuka ve ti yandi. Na kutuba mbote, nge ke zolaka nde longoki na nge kuyela mbote yo yina, yandi fwete landa kulonguka mambu mingi na yina me tala kieleka.

7. Inki lenda sadisa longoki na kusepela ti mambu yina yandi ke longuka?

⁷ Longoki fwete mona nde nge ke longa ti kikesa mpi nge ke kwikila na mambu yina Biblia ke longaka. (1 Bate. 1:5) Kana nge sala mutindu yina, ntembe kele ve nde yandi ta sepela mingi ti mambu yina yandi ke longuka. Kana mpila kele, songa yandi mambote yina nge zwaka ntangu nge sadilaka minsiku ya Biblia. Yo ta sadisa yandi na kubakisa nde Biblia kele ti bandongisila ya mfunu yina lenda sadisa yandi mpi.

8. Inki nge lenda sala diaka sambu na kusadisa longoki ya Biblia mpi sambu na nki yo kele mfunu nde nge sala yo?

⁸ Ntangu nge ke longuka Biblia ti longoki, tela yandi masolo ya bampangi yina kutanaka ti bampasi bonso yina yandi ke kutana ti yo mpi mutindu bo nungaka bampasi yango. Nge lenda nata mpangi mosi ya dibundu yina mbandu na yandi lenda sadisa longoki na nge. To nge lenda sosa masolo ya Bambangi ya Yehowa yina lenda pesa longoki kikesa, yo kele na jw.org na masolo, “Biblia Ke Sobaka Luzingu ya Bantu.” * Masolo yai mpi bavideo ta sadisa longoki na nge na kubakisa nde yo kele mbote kibeni na kusadila minsiku ya Biblia.

9. Inki mutindu nge lenda siamisa longoki ya Biblia na kusonga bantu ya dibuta mpi banduku na yandi mambu yina yandi ke longuka?

⁹ Kana longoki na nge me kwelaka, keti nkwelani na yandi mpi ke longukaka? Kana yandi ke longukaka ve, lomba yandi mpi na kulonguka ti beno. Siamisa longoki na nge ya Biblia na kusonga mpi bantu ya dibuta mpi banduku na yandi mambu yina yandi ke longuka. (Yoa. 1:40-45) Inki mutindu nge lenda sala yo? Nge lenda yula  yandi nde: “Inki mutindu nge lenda tendudila bantu ya dibuta na beno mambu yai ya nge ke longuka?” to “Inki verse nge lenda sadila sambu na kumonisa nduku na nge nde mambu yina nge ke songa yandi kele kieleka?” Kana nge sala mutindu yina, nge ta sadisa longoki na nge na kukuma longi. Kana yandi me lungisa mambu yina bo ke lombaka nde muntu kulungisa sambu na kukuma nsamuni, yandi lenda kuma nsamuni ya me bakaka ntete ve mbotika. Nge lenda yula longoki na nge kana yandi me zaba muntu ya nkaka yina ke zola kulonguka Biblia. Kana yandi me songa nge muntu yango, solula ti muntu yina mbala mosi mpi lomba yandi na kulonguka Biblia. Songa yandi video, Inki Mutindu Kulonguka ya Biblia Ke Salamaka? *

10. Mutindu 1 Batesalonika 2:7, 8 ke monisa yo, nki mutindu nsamuni lenda landa mbandu ya ntumwa Polo?

¹⁰ Bansamuni fwete monisa nde bo ke tudilaka balongoki na bo dikebi mingi. Bo fwete baka bo bonso bampangi na bo ya kimpeve. (Tanga 1 Batesalonika 2:7, 8.) Yo ke vandaka ve pete sambu balongoki ya Biblia kufwa kinduku ti banduku na bo yina kele ve Bambangi ya Yehowa mpi kusoba kibeni sambu na kusadila Yehowa. Beto fwete sadisa bo na kuzwa banduku ya mbote na dibundu. Lutisa mpi ntangu ti longoki na mabaku ya nkaka yina beno ke longuka ve sambu na kusala kinduku ti yandi. Kana nge ke binga yandi na telefone, nge ke tindila yandi ba message to nge ke tala yandi na bantangu yina beno ke longuka ve, yandi ta bakisa nde nge ke tudilaka yandi kibeni dikebi.

11. Inki beto ke zolaka nde balongoki na beto kuzwa na dibundu mpi sambu na nki?

¹¹ Kingana mosi ke tubaka nde: “Yo ke lombaka bwala ya mvimba sambu na kusansa mwana.” Beto lenda tuba mpi nde: “Yo ke lombaka dibundu ya mvimba sambu na kukumisa muntu longoki.” Yo yina, bansamuni ya mbote ke songaka balongoki na bo ya Biblia na bampangi ya nkaka na dibundu, bayina lenda sadisa bo na kukuma banduku ya Yehowa. Bampangi lenda sadisa longoki na kimpeve mpi ntangu yandi ke kutana ti mambu ya mpasi. Beto ke zolaka nde longoki kubakisa nde bampangi na dibundu ke zolaka yandi mpi yandi kele na dibuta na beto ya kimpeve. Beto ke zolaka mpi nde balongoki kusepela ti zola yina beto ke vandaka ti yo na dibuta ya bampangi ya ntoto ya mvimba. Yo ta sadisa bo na kufwa kinduku kukonda mpasi ti bantu yina ta sadisa bo ve na kuzola Yehowa. (Bing. 13:20) Kana banduku na bo yina kele ve Bambangi ya Yehowa me buya bo, bo ta zwa banduku ya mbote na dibundu ya Yehowa.—Mar. 10:29, 30; 1 Pie. 4:4.

12. Sambu na nki beto fwete solula ti longoki na beto ya Biblia mbala na mbala lukanu ya kudipesa na Yehowa mpi ya kubaka mbotika?

¹² Solula ti longoki na nge na pwelele yonso lukanu ya kudipesa na Yehowa mpi ya kubaka mbotika. Sambu beto ke longukaka Biblia ti bantu sambu na kusadisa bo na kubaka mbotika mpi kukuma balongoki ya Yezu. Na nima ya kulonguka mbala na mbala mwa bagonda, mpi mingi-mingi kana longoki me yantika kukwenda na balukutakanu, yandi fwete bakisa nde beto ke longuka ti yandi sambu beto ke zola kusadisa yandi na kukuma Mbangi ya Yehowa.

13. Inki mambu longoki fwete sala sambu na kuyela mpi kubaka mbotika?

¹³ Kele ti mambu yina longoki ya Biblia yina ke zola kibeni kusadila Yehowa fwete sala sambu na kubaka mbotika. Ya ntete, yandi fwete zaba Yehowa, kuzola yandi mpi kukwikila na yandi. (Yoa. 3:16; 17:3) Yo ta sadisa longoki na kukuma nduku ya Yehowa mpi ya bampangi na dibundu. (Baeb. 10:24, 25; Yak. 4:8) Yandi fwete yambula bikalulu ya mbi mpi kubalula ntima. (Bis. 3:19) Lukwikilu na yandi fwete pusa yandi na kusonga mpi bantu ya nkaka mambu yina yandi ke longuka. (2 Bak. 4:13) Na nima, yandi ta kudipesa na Yehowa mpi ta baka mbotika. (1 Pie. 3:21; 4:2) Yo ke vandaka kibeni kilumbu ya kiese sambu na bantu yonso! Kana longoki ke sala mambu yai sambu na kubaka mbotika, landa kusikisa yandi mpi kusiamisa yandi na kulanda kusala mambu yango.

14. Inki mutindu nsamuni lenda tala kana longoki ke yela?

¹⁴ Beto fwete vanda ntima-nda ntangu beto ke sadisa longoki ya Biblia na kuyela mpi kubaka mbotika. Kele ti mambu ya nkaka yina beto fwete tadila sambu na kuzaba kana longoki kele kibeni ti mpusa ya kusadila Yehowa Nzambi. Keti longoki ke monisa nde yandi ke sala yonso sambu na kulemfuka na mambu yina Yezu tubaka? To yandi ke sepela kaka kulonguka Biblia?

15. Inki mambu ta sadisa nsamuni na kubakisa nde longoki ke yela?

¹⁵ Tala mbala na mbala kana longoki ke yela. Mu mbandu, keti yandi ke sala mambu yina ke monisa nde yandi ke zolaka Yehowa? Keti yandi ke sambaka Yehowa? (Nk. 116:1, 2) Keti yandi ke tangaka Biblia? (Nk. 119:97) Keti yandi ke kwendaka na balukutakanu mbala na mbala? (Nk. 22:22) Keti yandi me yambula bikalulu na yandi ya mbi? (Nk. 119:112) Keti yandi ke songaka bantu ya dibuta na yandi mpi banduku na yandi  mambu yina yandi ke longukaka? (Nk. 9:1) Diambu ya kuluta mfunu, keti yandi ke zola kibeni kukuma Mbangi ya Yehowa? (Nk. 40:8) Kana longoki ke sala ve bikesa na mambu yai, nge lenda sosa kuzaba sambu na nki mpi na nima, solula ti yandi na mawete mpi na masonga yonso. *

16. Inki mambu lenda sadisa nge na kuyambula kulonguka Biblia ti muntu?

¹⁶ Kudiyula mbala na mbala kana nge fwete landa kulonguka Biblia ti longoki to ve. Kudiyula nde: ‘Keti longoki ke yidika na ntwala kulonguka ya Biblia? Keti yandi ke zolaka kukwenda na balukutakanu? Keti yandi me yambulaka bikalulu na yandi ya mbi? Keti yandi kele kaka na dibundu ya luvunu?’ Kana bamvutu na bangiufula yai kele nde ee, kulanda kulonguka Biblia ti muntu ya mutindu yai kele bonso nde nge ke longa muntu kukasa kansi yandi ke zola ve kubwa na masa. Kana longoki ke zola ve mambu yina yandi ke longuka mpi ke zola ve kusoba, yo ta vanda ve mbote na kulanda kulonguka ti yandi.

17. Mutindu 1 Timoteo 4:16 ke monisa yo, nki bansamuni yonso fwete sala?

¹⁷ Kukumisa bantu balongoki kele mukumba mosi ya mfunu yina beto fwete lungisa mpi beto fwete sadisa balongoki ya Biblia na kuyela mpi kubaka mbotika. Yo yina, beto fwete sadila Biblia sambu na kulonga, beto fwete longa ti kikesa mpi kukwikila na mambu yina beto ke longa. Beto fwete siamisa balongoki na kusala kinduku ti bampangi na dibundu. Beto fwete tubila mbala na mbala lukanu ya kudipesa mpi ya kubaka mbotika mpi beto fwete tala mbala na mbala mambu yina ke monisa nde longoki ke yela. (Tala lupangu, “ Mambu Yina Nsamuni Fwete Sala Sambu na Kusadisa Longoki na Kubaka Mbotika.”) Beto kele na kiese mingi ya kusala kisalu yai ya ke gulusaka luzingu ya bantu. Yo yina beto baka lukanu ya kusala bikesa sambu na kusadisa balongoki ya Biblia yina ke yela na kubaka mbotika.