1. Inki pusaka Yehowa na kuganga bima yonso?

YEHOWA vandaka kuzinga ntete yandi mosi. Kansi yandi vandaka ve mawa-mawa. Yandi vandaka ve na mfunu nde muntu mosi kuvanda na lweka na yandi sambu yandi vanda na kiese. Ata mpidina, Yehowa zolaka nde bantu ya nkaka mpi kuzinga mpi bo vanda na kiese. Zola pusaka yandi na kuganga bima yonso.—Nk. 36:9; 1 Yoa. 4:19.

2. Inki Yezu mpi bawanzio salaka ntangu Yehowa salaka bima yonso?

² Yehowa salaka ntete Mwana na yandi Yezu. Na nima, Mwana na yandi yai ya ntete sadisaka yandi na ‘kuganga bima yonso ya nkaka,’ mpi bamilio ya bawanzio. (Bakol. 1:16) Yezu vandaka na kiese ya kusala ti Tata na yandi. (Bing. 8:30) Bawanzio mpi vandaka na kiese. Bo vandaka pana ntangu Yehowa ti Kapita na yandi ya kisalu, Yezu salaka zulu mpi ntoto. Inki mutindu bawanzio monisaka kiese na bo? Bo “yantikaka kutula milolo ya kiese” ntangu Yehowa salaka ntoto mpi ntembe kele ve nde bo landaka kusepela ti bima yonso yina Yehowa salaka; mingi-mingi bantu yina Yehowa salaka na nsuka ya bima yonso. (Yobi 38:7; Bing. 8:31, noti na nsi ya lutiti.) Bima yonso yina Yehowa me gangaka ke monisaka nde yandi kele zola mpi mayele.—Nk. 104:24; Bar. 1:20.

3. Mutindu 1 Bakorinto 15:21, 22 ke monisa yo, nki mambote kimenga ya Yezu ke natila bantu?

³ Yehowa zolaka nde bantu kuzinga mvula na mvula na ntoto ya kitoko yina yandi salaka. Kansi ntangu Adami mpi Eva kolamaka na Tata na bo ya zola, disumu mpi lufwa kotaka na  ntoto. (Bar. 5:12) Inki Yehowa salaka? Mbala mosi, yandi yidikaka mambu sambu na kugulusa bantu. (Kuy. 3:15) Yehowa bakaka lukanu ya kupesa nkudulu, disongidila kimenga ya Mwana na yandi sambu na kukatula bana ya Adami ti Eva na kimpika ya disumu mpi ya lufwa. Yandi ta pesa luzingu ya mvula na mvula na muntu yonso yina ke pona kusadila yandi.—Yoa. 3:16; Bar. 6:23; tanga 1 Bakorinto 15:21, 22.

4. Inki bangiufula beto ta tadila na disolo yai?

⁴ Lukanu ya Yehowa ya kufutumuna bantu ke basisaka bangiufula mingi. Mu mbandu, nki mutindu lufutumuku ta salama? Ntangu bantu yina beto ke zolaka ta futumuka, keti beto ta zaba bo? Inki mutindu lufutumuku ta pesa beto kiese? Mpi nki lufutumuku ke longa beto na yina me tala zola, mayele mpi ntima-nda ya Yehowa? Beto tadila bangiufula yango.

5. Sambu na nki yo me fwana na kundima nde bantu yonso ta futumuka ve na mbala mosi?

⁵ Ntangu Yehowa ta futumuna bantu mingi kibeni na nzila ya Mwana na yandi, mbala ya nkaka bo yonso ta futumuka ve na mbala mosi. Sambu na nki? Sambu kana bantu mingi kufutumuka na mbala mosi, mambu ta vanda kisaka-saka. Yehowa ke salaka mambu yonso na ndonga. Yandi ke zaba nde mambu fwete vanda na ndonga sambu bantu kuzinga na ngemba. (1 Bak. 14:33) Yehowa Nzambi vandaka mayele mpi ntima-nda ntangu yandi vandaka kusala ti Yezu sambu na kuyidika ntoto malembe-malembe na ntwala ya kuganga bantu. Yezu mpi ta vanda mayele mpi ntima-nda na Luyalu ya Bamvula Funda ntangu yandi ta sala ti bantu yina ta guluka na Armagedoni sambu na kuyidika ntoto sambu na kuyamba bantu yina ta futumuka.

6. Mutindu Bisalu 24:15 ke monisa yo, banani ta vanda na kati ya bantu yina Yehowa ta futumuna?

 ⁶ Kima ya kuluta mfunu kele nde, yo ta lomba nde bantu yina ta guluka na Armagedoni kulonga bantu yina ta futumuka mambu ya Kimfumu ya Nzambi mpi bansiku ya Yehowa. Sambu na nki? Sambu bantu mingi na kati ya bantu yina ta futumuka, ta vanda “bantu ya kukonda lunungu.” (Tanga Bisalu 24:15.) Yo ta lomba nde bo sala bansoba mingi sambu bo bakila kimenga ya Kristu mambote. Kulonga bamilio ya bantu yina ke zaba ve ata kima na yina me tala Yehowa, ta lomba kisalu mingi. Keti konso muntu ta vanda ti muntu yina ta longukaka ti yandi mutindu beto ke longukaka ti bantu Biblia bubu yai? Keti bo ta tinda bantu yina ta futumuka na mabundu mpi bo ta pesa bo formasio sambu bo longa mpi bantu yina ta futumuka na nima na bo? Beto ke zaba ve, beto vingila kaka. Kansi beto ke zaba kaka nde na nsuka ya Luyalu ya Kristu ya Bamvula Funda, “ntoto ta fuluka kibeni ti nzayilu ya Yehowa.” (Yez. 11:9) Beto ta vanda kibeni ti kisalu mingi na Luyalu ya Bamvula Funda mpi beto ta vanda na kiese!

7. Sambu na nki bansadi ya Nzambi ta vanda ti kikalulu ya kuditula na kisika ya bankaka ntangu bo ta longa bantu yina ta futumuka?

⁷ Na Luyalu ya Kristu ya Bamvula Funda, bana yonso ya Yehowa yina ta vanda awa na ntoto, ta landa kusala bansoba sambu na kusepedisa yandi. Yo yina, bo yonso ta vanda ti kikalulu ya kuditula na kisika ya bantu ya nkaka ntangu bo ta sadisa bantu yina ta futumuka na kunwana ti bangindu mpi banzala ya mbi mpi na kuzitisa bansiku ya Yehowa. (1 Pie. 3:8) Ntembe kele ve nde bantu yina ta futumuka ta kangama ti bansadi ya kudikulumusa ya Yehowa, yina ta landa mpi ‘kusala ngolo sambu na luguluku na bo mosi.’—Bafil. 2:12.

8. Sambu na nki yo me fwana na kundima nde bantu yina ta yamba bampangi na bo yina ta futumuka ta zaba bo?

⁸ Beto kele ti bikuma mingi ya ke pusa beto na kundima nde bantu yina ta yamba bampangi na bo yina ta futumuka ta zaba bo. Mu mbandu, balufutumuku yina salamaka na ntangu ya ntama ke monisa nde Yehowa ta futumuna bantu mutindu bo vandaka, mutindu bo vandaka kutuba mpi mutindu bo vandaka kuyindula ntangu fioti na ntwala nde bo fwa. Kuvila ve nde Yezu fwanisaka lufwa ti mpongi mpi lufutumuku ti kutelama na mpongi. (Mat. 9:18, 24; Yoa. 11:11-13) Ntangu bantu ke telemaka na mpongi, bo ke sobaka ve. Beto baka mbandu ya Lazare. Ntangu yandi fwaka, bilumbu iya lutaka mpi nitu na yandi yantikaka kubeba. Kansi, ntangu Yezu futumunaka yandi, mbala mosi bampangi na yandi zabaka yandi mpi Lazare zabaka bampangi na yandi.—Yoa. 11:38-44; 12:1, 2.

9. Sambu na nki bantu yina ta futumuka, ta futumuka ve ti mabanza mpi nitu ya kukuka?

⁹ Yehowa ke sila nde ata muntu mosi ve yina ta zinga na nsi ya luyalu ya Kristu ta tuba nde: “Mono ke bela.” (Yez. 33:24; Bar. 6:7) Yo yina, bantu yina me fwaka ta futumuka ti sante ya mbote. Kansi, bo ta kuma ve ti nitu ya kukuka mbala mosi. Sambu kana bo kuma ti nitu ya kukuka, bampangi na bo ta zaba bo diaka ve. Yo ke monana nde bantu ta kuma ya kukuka malembe-malembe na Luyalu ya Kristu ya Bamvula Funda. Na nsuka ya Luyalu ya Bamvula Funda, Yezu ta vutula Kimfumu na Tata na yandi. Na nima, Kimfumu ya Nzambi ta sala mbote kisalu na yo. Bantu yonso ta kuma ti nitu ya kukuka.—1 Bak. 15:24-28; Kus. 20:1-3.

10. Lufutumuku ta pusa nge na kusala nki?

¹⁰ Yindula kiese yina nge ta wa ntangu nge ta kutana diaka ti bampangi na nge yina me fwaka yina nge vandaka kuzola mingi. Keti kiese yina nge ta wa ta pusa nge na kuseka to na kudila? Keti nge ta yimbila Yehowa bankunga sambu na kupesa yandi lukumu? Ntembe kele ve nde yo ta pusa nge na kuzola diaka mingi Tata na beto ya zulu mpi Mwana na yandi yina kele ve bwimi sambu na lufutumuku ya kele dikabu mosi ya kitoko kibeni.

11. Mambu yina Yezu tubaka ya kele na Yoane 5:28, 29 ke monisa nde, nki ta kumina bantu yina ta lemfukila Nzambi?

¹¹ Bantu yina ta futumuka ta wa kiese mingi sambu bo ta katula kimuntu ya ntama mpi ta lemfuka na minsiku ya lunungu ya Nzambi. Bantu yina ta sala bansoba yai, ta baka luzingu ya mvula na mvula na Paladisu. Kansi, bantu yina ta lemfuka ve na minsiku ya Nzambi ta kota ve na Paladisu. —Yez. 65:20; tanga Yoane 5:28, 29.

12. Inki mutindu Yehowa ta sakumuna bantu awa na ntoto?

¹² Ntangu Kimfumu ya Nzambi ta yala, bansadi yonso ya Nzambi ta mona kieleka ya mambu yina kele na Bingana 10:22. Yo ke tuba nde: “Lusakumunu ya Yehowa ke kumisaka muntu mvwama, mpi yandi ke yikaka ve mpasi na zulu na yo.” Mpeve ya Yehowa ta sadisa bansadi na yandi na kulanda kukuma bamvwama na kimpeve, disongidila bo ta landa kukuma bonso Kristu mpi bo ta landa kukuma bantu ya kukuka. (Yoa. 13:15-17; Baef. 4:23, 24) Konso kilumbu bo ta vanda na sante ya mbote mpi bo ta landa kuvanda bantu ya mbote. Bo ta vanda ti luzingu ya kiese kibeni! (Yobi 33:25) Kansi, nki mutindu kuyindulula lufutumuku ta sadisa nge bubu yai?

13. Mutindu Nkunga 139:1-4 ke monisa yo, nki mutindu lufutumuku ke monisa nde Yehowa ke zabaka beto mbote?

¹³ Mutindu beto tubilaka yo na luyantiku, ntangu Yehowa ta futumuna bantu, yandi ta futumuna bo ti mabanza mpi kimuntu na bo. Yo ke tendula nki? Yehowa ke zolaka nge mingi yo yina yandi ke vilaka ve mambu yonso yina nge ke yindulaka, mawi na nge, mambu ya nge ke tubaka mpi mambu ya nge ke salaka. Yo yina, kana yandi ke zola kufutumuna nge, yandi ta futumuna nge ti mabanza na nge yonso, bikalulu na nge mpi kimuntu na nge. Ntotila Davidi bakisaka nde Yehowa ke zabaka mbote konso muntu na kati na beto. (Tanga Nkunga 139:1-4.) Inki mutindu beto ke waka ntangu beto ke bakisaka nde Yehowa ke zolaka beto?

14. Kana beto ke yindulula mutindu Yehowa ke zabaka beto mbote, nki beto fwete sala ve?

¹⁴ Ntangu beto ke yindulula mutindu Yehowa ke zabaka beto mbote beto fwete kudiyangisa ve. Sambu na nki? Sambu Yehowa ke tudilaka beto dikebi ya mingi mpi konso muntu kele mfunu mingi na meso na yandi. Yandi ke tulaka dikebi na mambu yonso ya luzingu na beto. Mambu yai ke pesa beto kikesa kibeni! Beto fwete yindula ve nde beto kele beto mosi. Ntangu yonso Yehowa kele ti beto mpi yandi ke sosaka mutindu ya kusadisa beto.—2 Bans. 16:9.

15. Inki mutindu lufutumuku ke monisa nde Yehowa kele mayele?

¹⁵ Boma ya lufwa kele mutambu mosi ya ngolo. Bantu yina Satana ke twadisaka, ke sadilaka yo sambu na kupusa bansadi ya Nzambi na kuteka bampangi na bo to na kusala kima yina bo ke zaba nde yo kele mbi. Kansi beto lenda sala yo ve. Beto ke zaba nde kana  bambeni kufwa beto, Yehowa ta futumuna beto. (Kus. 2:10) Beto ke ndima nde ata kima mosi ve lenda kanga beto nzila ya kusadila Yehowa. (Bar. 8:35-39) Kivuvu ya lufutumuku ke monisa kibeni nde Yehowa kele mayele. Yo yina, beto ke waka ve boma kana bantu yina Satana ke twadisaka ke sosa kufwa beto sambu beto ke sala ve mambu yina bo ke zola, nkutu yo ke pesaka beto kikesa ya mingi ya kulanda kusadila Yehowa na kwikama yonso.

16. Inki bangiufula nge fwete kudiyula mpi nki mutindu bamvutu na bangiufula yina ta sadisa nge na kuzaba kana nge ke tudilaka Yehowa ntima?

¹⁶ Kana bambeni ya Yehowa me tuba nde bo ke fwa nge, keti nge ta tula ntima nde Yehowa ta futumuna nge? Inki mutindu nge lenda zaba nde nge ta tudila Yehowa ntima? Nge lenda kudiyula nde: ‘Keti balukanu ya fioti-fioti yina mono ke bakaka konso kilumbu ke monisaka pwelele nde mono ke tudilaka Yehowa ntima?’ (Luka 16:10) Nge lenda kudiyula diaka nde: ‘Keti mutindu na mono ya kuzinga ke monisaka nde mono ke tulaka ntima na lusilu ya Yehowa ya kulungisa bampusa na mono kana mono ke sosa ntete Kimfumu na yandi?’ (Mat. 6:31-33) Kana mvutu na bangiufula yai kele nde ee, pana yo ke monisa nde nge ta tudila Yehowa ntima mpi yo ta sadisa nge na kuyilama na konso mpasi yina nge ta kutana ti yo na bilumbu ke kwisa.—Bing. 3:5, 6.

17. (a) Inki mutindu lufutumuku ke monisa nde Yehowa kele ntima-nda? (b) Inki mutindu beto lenda monisa ntonda sambu na ntima-nda ya Yehowa?

¹⁷ Yehowa me tulaka kilumbu mpi ntangu yina yandi ta fwa nsi-ntoto yai. (Mat. 24:36) Yandi ta kuma ve ntima tiya-tiya mpi yandi ta fwa ve ntoto yai na ntwala ya ntangu yina yandi me tulaka. Yandi kele na nzala ya ngolo ya kufutumuna bantu yina me fwaka kansi yandi kele ntima-nda. (Yobi 14:14, 15) Yandi ke kinga tii kilumbu yina yandi me tulaka kulunga sambu yandi futumuna bo. (Yoa. 5:28) Beto kele ti bikuma mingi yina ke pusa beto na kupesa Yehowa mersi sambu na ntima-nda na yandi. Yindula fioti: Sambu Yehowa kele ntima-nda, beto yonso kele ti ntangu ya “kubalula ntima.” (2 Pie. 3:9) Yehowa ke zola nde bantu mingi kubaka luzingu ya mvula na mvula. Yo yina, beto fwete monisa nde beto ke sepela ti ntima-nda na yandi. Inki mutindu? Kana beto ke sosa bantu yina kele ti “nkadilu ya mbote sambu na kubaka luzingu ya mvula na mvula” mpi beto ke sadisa bo na kuzola Yehowa mpi na kusadila yandi. (Bis. 13:48) Kana beto sala mutindu yina, beto ta sadisa bo na  kubakila ntima-nda ya Yehowa mambote bonso beto.

18. Sambu na nki beto fwete monisila bantu ya nkaka ntima-nda?

¹⁸ Yehowa ta vingila ti ntima-nda yonso tii na nsuka ya Luyalu ya Bamvula Funda ntangu beto ta kuma bantu ya kukuka mutindu yandi ke zolaka. Kansi, bubu yai Yehowa ke lolulaka masumu na beto na luzolo yonso. Ya kieleka, beto mpi fwete tula dikebi na bikalulu ya mbote ya bantu ya nkaka mpi kumonisila bo ntima-nda. Beto tala mbandu ya mpangi-nkento mosi yina bakala na yandi kumaka kubela maladi ya basusi ya ngolo mpi yambulaka kukwenda na balukutakanu. Yandi ke tuba nde: “Yo vandaka diambu mosi ya mpasi sambu na mono. Luzingu na beto sobaka na mbala mosi mpi beto kukuka diaka ve kusala mambu yina beto vandaka na mfunu ya kusala.” Ata mpidina, nkento yai landaka kuzola bakala na yandi mpi monisilaka yandi ntima-nda. Yandi tudilaka Yehowa ntima mpi landaka kusansa bakala na yandi. Bonso Yehowa, yandi tulaka dikebi na bikalulu ya mbote ya bakala na yandi. Yandi ke tuba nde: “Bakala na mono kele ti bikalulu ya mbote mpi yandi ke sala bikesa malembe-malembe sambu na kubeluka.” Yo kele mfunu kibeni na kumonisa ntima-nda na bantu ya dibuta to na bantu ya dibundu na beto yina ke nwana ti bampasi.

19. Inki kele lukanu na beto?

¹⁹ Yezu ti bawanzio waka kiese mingi ntangu Yehowa gangaka ntoto. Yindula kiese yina bo ta vanda ti yo ntangu bo ta mona ntoto me fuluka ti bantu ya kukuka, bantu yina ke zolaka Yehowa mpi ke sadilaka yandi. Yindula kiese yina bantu yina ta kwenda na zulu sambu na kuyala ti Kristu ta wa ntangu bo ta mona bantu ke baka mambote ya kisalu na bo. (Kus. 4:4, 9-11; 5:9, 10) Yindula diaka mutindu bantu ta sepela sambu maladi, mawa mpi lufwa ta vanda diaka ve. (Kus. 21:4) Yo yina banda bubu yai, baka lukanu ya kulanda mbandu ya Tata na nge ya zola, ya mayele mpi ya ntima-nda. Kana nge sala mutindu yina, yo ta sadisa nge na kutanina kiese na nge ntangu nge ta kutana ti mambu ya mpasi. (Yak. 1:2-4) Beto ke pesa Yehowa mersi mingi sambu na lusilu na yandi ya ‘kufutumuna bantu.’—Bis. 24:15.