1. Inki dibaku beto kele na yo?

KUVANDA na dibundu ya Yehowa kele kibeni dibaku ya nene! Beto kele na Paladisu ya kimpeve yina me fuluka ti bantu yina ke zinga na ngemba mpi na kiese. Inki mukumba nge kele ti yo na dibundu?

2. Inki mbandu ntumwa Polo sadilaka na mikanda mingi yina yandi sonikaka na nsadisa ya mpeve santu?

² Beto ta baka malongi mingi na yina me tala mukumba na beto na dibundu, na mbandu yina ntumwa Polo sadilaka na mikanda mingi yina yandi sonikaka na nsadisa ya mpeve santu. Na konso mukanda, Polo fwanisaka dibundu ti nitu. Yandi fwanisaka diaka konso muntu na dibundu ti bitini ya nitu.—Bar. 12:4-8; 1 Bak. 12:12-27; Baef. 4:16.

3. Inki malongi tatu beto ta tadila na disolo yai?

³ Konso muntu kele mfunu na dibundu ya Yehowa. Beto yonso lenda pesa bampangi kikesa; yo vanda beto kele bantu ya mpusu ya nkaka, ya dikanda ya nkaka, yo vanda beto kele ti mbongo to ve, yo vanda beto kele na nki dibuta mpi yo vanda beto me tangaka to ve. Na disolo yai, beto ta tadila malongi tatu ya mfunu yina beto lenda baka na mbandu ya ntumwa Polo. Ya ntete, beto ta mona nde konso muntu kele mfunu na dibundu ya Yehowa. Ya zole, beto ta tubila mambu yina beto lenda sala kana beto ke yindula nde beto kele ve mfunu na dibundu. Ya tatu, beto ta mona sambu na nki beto fwete sala mingi sambu na kulungisa mukumba na beto na dibundu.

4. Inki Baroma 12:4, 5 ke longa beto?

⁴ Dilongi ya ntete yina beto lenda baka na mbandu ya ntumwa Polo kele yai: Konso muntu kele mfunu na dibundu ya Yehowa. Na luyantiku ya mbandu na yandi, ntumwa Polo ke tuba nde: “Mutindu nitu mosi kele ti bitini mingi, kansi bitini yina yonso ke salaka ve kaka kisalu mosi, mutindu mosi beto mpi, ata beto kele mingi, beto kele nitu mosi na bumosi ti Kristu, kansi mosi-mosi beto kele bitini ya nitu yina kele ya kuvukana ti ya nkaka.” (Bar. 12:4, 5) Inki ntumwa Polo zolaka kutuba? Konso muntu kele ti mukumba na yandi na dibundu ya Yehowa kansi beto yonso kele mfunu.

5. Inki “makabu” Yehowa me pesaka na dibundu?

⁵ Kana bo ke tubila bampangi yina kele ti mikumba na dibundu, nge lenda yindula mbala mosi bampangi yina ke twadisaka dibundu. (1 Bate. 5:12; Baeb. 13:17) Ya kieleka na nzila ya Kristu, Yehowa me pesaka “bantu bonso makabu” na dibundu na yandi. (Baef. 4:8) Na kati ya ‘bantu yai ya kele bonso makabu’ beto lenda tanga, bampangi ya Nto-Kimvuka, bampangi yina ke sadisaka Nto-Kimvuka, bampangi ya komite ya filiale, bankengi ya nziunga, bampangi yina ke longaka na banzo-nkanda ya Kimfumu, bankuluntu mpi bansadi ya kisalu. Bo ke ponaka bampangi yai yonso na nsadisa ya mpeve santu sambu na kutanina mameme yina kele mfunu na meso ya Yehowa mpi kupesa dibundu kikesa.—1 Pie. 5:2, 3.

6. Mutindu 1 Batesalonika 2:6-8 ke monisa yo, bampangi yina bo ke ponaka na nsadisa ya mpeve santu ke salaka ngolo sambu na kusala nki?

⁶ Bampangi yina bo ke ponaka na nsadisa ya mpeve santu ke lungisaka mikumba mingi na dibundu. Kaka mutindu nitu ke vandaka ti bitini mingi, mu mbandu, maboko mpi makulu mpi bitini yango ke salaka sambu na mambote ya nitu ya mvimba; mutindu mosi mpi bampangi yina bo ke ponaka na nsadisa ya mpeve santu ke salaka ngolo sambu na mambote ya dibundu ya mvimba. Bo ke sosaka ve nde bantu ya nkaka kupesa bo lukumu. Kansi, bo ke salaka ngolo sambu na kupesa bampangi kikesa. (Tanga 1 Batesalonika 2:6-8.) Beto ke pesa Yehowa mersi sambu na bampangi yai ya kimpeve ya ke sosaka ntete mambote ya bantu ya nkaka.

7. Inki mambote bampangi yina ke salaka kisalu ya ntangu yonso ke bakaka?

⁷ Bo lenda pona bampangi ya nkaka na dibundu sambu na kuvanda bamisionere, bapasudi-nzila ya nene to bapasudi-nzila ya ntangu yonso. Ya kieleka, bampangi yai na ntoto ya mvimba ke samunaka mpi ke kumisaka bantu balongoki mpi bo me kumisaka yo kisalu ya luzingu na bo ya mvimba. Yo me sadisaka bo na kusadisa bantu mingi na kukuma balongoki ya Yezu Kristu. Ata bampangi yai ya ke samunaka ntangu yonso ke vandaka ve ti bima mingi ya kinsuni, Yehowa me pesaka bo bima mingi ya mbote. (Mar. 10:29, 30) Beto ke zolaka bampangi yai mingi kibeni mpi beto ke sepelaka sambu bo kele na dibundu!

8. Sambu na nki bansamuni yonso ya nsangu ya mbote kele mfunu na meso ya Yehowa?

⁸ Keti yo kele kaka bampangi yina bo me ponaka mpi bayina ke salaka kisalu ya ntangu yonso bantu kele mfunu na dibundu? Ve. Bansamuni yonso ya nsangu ya mbote kele mfunu na meso ya Yehowa mpi na dibundu. (Bar. 10:15; 1 Bak. 3:6-9) Kukumisa bantu balongoki ya Mfumu na beto Yezu Kristu kele na kati ya mambu ya kuluta mfunu yina dibundu ke salaka. (Mat. 28:19, 20; 1 Tim. 2:4) Bansamuni yonso yina kele na dibundu, yo vanda bayina me bakaka mbotika to bayina me bakaka ntete ve mbotika, bo yonso ke salaka yonso sambu na kutula kisalu ya kusamuna na kisika ya ntete na luzingu na bo.—Mat. 24:14.

9. Sambu na nki beto ke zolaka bampangi na beto ya bankento?

 ⁹ Yehowa me pesaka bampangi-bankento mukumba ya nene na dibundu, sambu na kumonisa nde yandi ke pesaka bo lukumu. Bankento yina me kwelaka, bamama, mifwidi mpi bampangi-bankento yina me kwelaka ve bayina ke sadilaka Yehowa na kwikama yonso, kele mfunu na meso na yandi. Mbala mingi Biblia ke sikisaka bo sambu na bambandu ya mbote yina bo ke pesaka na yina me tala mayele, lukwikilu, ngolo, kikalulu ya kukaba mpi bisalu ya mbote. (Luka 8:2, 3; Bis. 16:14, 15; Bar. 16:3, 6; Bafil. 4:3; Baeb. 11:11, 31, 35) Beto ke pesa Yehowa mersi mingi sambu na bampangi-bankento yina beto kele na bo na mabundu, bayina kele mpi ti bikalulu yai ya mbote.

10. Sambu na nki bampangi ya minunu kele mfunu sambu na beto?

¹⁰ Beto kele mpi na kiese sambu beto kele ti bampangi mingi ya minunu na mabundu na beto. Mabundu ya nkaka kele ti bampangi ya babakala mpi ya bankento yina me kumaka minunu yina ke sadilaka Yehowa luzingu na bo ya mvimba mpi na kwikama yonso. Bampangi ya nkaka ya minunu me longuka kieleka ntama mingi ve. Ata mpidina, bampangi mingi ya minunu ke belaka sambu bo me kuma bambuta. Maladi yina lenda kanga bo nzila ya kusala mingi na dibundu mpi na kisalu ya kusamuna. Ata mpidina, bampangi yai ke salaka yonso yina bo lenda sala na kisalu ya kusamuna mpi bo ke sadilaka ngolo na bo sambu na kupesa bampangi ya nkaka kikesa mpi formasio. Beto ke bakaka mambote mingi na mambu yina bo ke zabaka mpi yina bo me kutanaka ti yo. Bo kele mfunu mingi sambu na Yehowa mpi sambu na beto.—Bing. 16:31.

11-12. Inki mutindu baleke yina kele na dibundu na beno ke pesaka nge kikesa?

¹¹ Beto kele mpi ti baleke na mabundu. Bo ke kutana ti mambu mingi ya mpasi na nsi-ntoto yai ya Satana Diabulu ke yala mpi ya me fuluka ti bangindu na yandi ya mbi. (1 Yoa. 5:19) Ata mpidina, beto ke bakaka kikesa ntangu baleke yai ke pesaka bamvutu na balukutakanu, ntangu bo ke samunaka mpi ntangu bo ke tubilaka balukwikilu na bo na kikesa yonso. Ya kieleka, baleke kele kibeni mfunu na dibundu ya Yehowa!—Nk. 8:2.

 ¹² Kansi bampangi ya nkaka ke ndimaka ve nde bo kele mfunu na dibundu. Inki lenda sadisa beto na kundima nde konso muntu na kati na beto kele mfunu na dibundu? Beto tala mambu yina lenda sadisa beto na kundima nde konso muntu kele mfunu.

13-14. Sambu na nki bampangi ya nkaka ke monaka nde bo kele ve mfunu na dibundu?

¹³ Beto tadila dilongi ya zole yina beto lenda baka na mbandu ya Polo. Yandi ke benda dikebi na diambu yina ke yangisaka bampangi mingi bubu yai; bo ke ndimaka ve nde bo kele mfunu na dibundu. Polo sonikaka nde: “Kana dikulu kutuba nde, ‘Sambu mono kele ve diboko, mono kele ve kitini ya nitu,’ yo ke sala ve nde yo vanda ve kitini ya nitu. Mpi kana dikutu kutuba nde, ‘Sambu mono kele ve disu, mono kele ve kitini ya nitu,’ yo ke sala ve nde yo vanda ve kitini ya nitu.” (1 Bak. 12:15, 16) Inki Polo zolaka kutuba?

¹⁴ Kana nge ke kudifwanisa ti bampangi ya nkaka na dibundu, nge lenda mona nde nge kele ve mfunu na dibundu. Bampangi ya nkaka na dibundu kele balongi ya mbote, ke yidikaka mambu mbote to ke vandaka bangungudi ya mbote. Mbala ya nkaka nge ke monaka nde nge ta kuka ve kusala mambu mbote bonso bo. Yo ke monisa nde nge kele muntu ya kudikulumusa mpi nge ke zaba bandilu na nge. (Bafil. 2:3) Kansi keba. Kana nge kele ti kikalulu ya kudifwanisa ti bampangi yina, nge ta lemba nitu. Nkutu, nge ta mona nde nge kele ve mfunu na dibundu mutindu Polo monisaka yo. Inki lenda sadisa nge na kukatula bangindu yai?

15. Mutindu 1 Bakorinto 12:4-11 ke monisa yo, nki beto fwete zaba na yina me tala konso dikabu yina beto lenda vanda na yo?

¹⁵ Beto tadila diambu yai: Yehowa pesaka Bakristu ya nkaka ya mvu-nkama ya ntete makabu ya kusala bimangu na nsadisa ya mpeve santu kansi yandi pesaka ve bo yonso makabu ya mutindu mosi. (Tanga 1 Bakorinto 12:4-11.) Ata mpidina, bo yonso vandaka mfunu na meso ya Yehowa. Bubu yai, Yehowa me pesaka beto ve makabu ya kusala bimangu na nsadisa ya mpeve santu. Beto yonso lenda sala ve mambu mutindu mosi. Kansi beto yonso kele mfunu na meso na yandi.

16. Inki ndongisila ya ntumwa Polo beto fwete sadila?

 ¹⁶ Na kisika ya kudifwanisa ti bampangi ya nkaka, beto fwete sadila ndongisila yina ntumwa Polo pesaka na nsadisa ya mpeve santu. Yandi tubaka nde: “Konso muntu fwete tadila mambu yina yandi mosi ke sala, ebuna yandi ta vanda ti kikuma ya kuwa kiese sambu na yandi mosi, kansi ve na kudifwanisa ti muntu ya nkaka.”—Bag. 6:4.

17. Inki mambote beto ta baka kana beto sadila ndongisila ya ntumwa Polo?

¹⁷ Kana beto sadila ndongisila ya ntumwa Polo yina yandi pesaka na nsadisa ya mpeve santu mpi ke tadila mambu yina beto mosi ke sala, beto ta bakisa nde beto kele ti makabu yina bantu ya nkaka kele ve ti yo. Mu mbandu, yo lenda vanda nde nkuluntu mosi ke salaka ve badiskure mbote kansi yandi ke salaka mbote kisalu ya kukumisa bantu balongoki. To yandi ke yidikaka ve mambu mbote bonso bankuluntu ya nkaka ya dibundu na bo kansi yandi ke vandaka ngungudi ya zola yina bansamuni ke sosaka sambu yandi pesa bo bandongisila yina ke pesa kikesa ya me katuka na Biblia. To yandi ke vandaka ti kikalulu ya kuyamba banzenza. (Baeb. 13:2, 16) Kana beto tala mbote-mbote ngolo mpi makabu na beto, beto ta sepela ti mambu yina beto lenda sala na dibundu mpi beto ta lula ve bampangi yina kele ti makabu yina beto kele ve ti yo.

18. Inki mutindu beto lenda yedisa mayele na beto?

¹⁸ Yo vanda beto kele ti nki mukumba na dibundu, beto yonso fwete sosa mutindu ya kusala diaka mbote kisalu na beto mpi kuyedisa mayele na beto. Sambu na kusadisa beto, Yehowa ke pesaka beto formasio mosi ya mbote na nzila ya dibundu na yandi. Mu mbandu, na lukutakanu ya kati-kati ya mposo, beto ke bakaka formasio yina ke sadisaka beto na kulonga mbote na kisalu ya kusamuna. Keti nge ke sadilaka formasio yina nge ke bakaka na lukutakanu yina?

19. Inki mutindu nge lenda lungisa lukanu ya kukota Nzo-Nkanda ya Bansamuni ya Kimfumu?

¹⁹ Nzo-Nkanda ya Bansamuni ya Kimfumu ke pesaka mpi formasio ya nkaka ya mbote. Bampangi ya babakala mpi bankento yina kele na kisalu ya ntangu yonso mpi kele ti bamvula banda na 23 tii na 65 lenda kota nzo-nkanda yai. Nge lenda yindula nde nge ta kuka ve kukota nzo-nkanda yango. Kansi na kisika ya kusonika bikuma yina ke sala nde nge kuka ve kukota Nzo-Nkanda yai, sonika bikuma yina ke pusa nge na kukota yo. Na nima, sala yonso sambu na kulungisa mambu yina bo ke lombaka sambu na kukota nzo-nkanda yango. Ti lusadisu ya Yehowa mpi bikesa na nge mosi, nge lenda sala mambu yina nge vandaka kuyindula nde nge ta kuka ve kusala.

20. Inki dilongi beto lenda baka na Baroma 12:6-8?

²⁰ Dilongi ya tatu yina beto lenda baka na mbandu ya ntumwa Polo kele na Baroma 12:6-8. (Tanga.) Awa na verse yai ntumwa Polo ke monisa diaka nde konso muntu na dibundu kele ti dikabu na yandi. Kansi yandi ke monisa pwelele nde beto fwete sadila dikabu yina beto kele na yo sambu na kusadisa dibundu mpi kupesa bampangi kikesa.

21-22. Inki dilongi beto lenda baka na mbandu ya mpangi Robert mpi Felice?

²¹ Beto tadila mbandu ya mpangi Robert. * Na nima ya kusala na insi ya nzenza, bo tindaka yandi na Betele ya insi na yandi. Bampangi pesaka yandi kikesa mpi tendudilaka yandi nde yo ke tendula ve nde bo me soba yandi kisalu sambu yandi vandaka kusala ve mbote. Ata mpidina, yandi tubaka nde: “Mono vandaka ve na kiese bangonda mingi sambu mono vandaka kuyindula nde mono salaka ve mbote kisalu  yina bo pesaka mono. Bantangu ya nkaka mono vandaka kuwa nzala ya kubasika na Betele.” Inki sadisaka mpangi yai na kuvutukila kiese na yandi? Nkuluntu mosi yibusaka yandi nde Yehowa ke pesaka beto formasio na kisalu yina beto vandaka kusala ntete sambu na kusala diaka mbote kisalu yina yandi me pesa beto ntangu yai. Robert bakisaka nde yandi fwete yindula diaka ve mambu yina me luta mpi kutula dikebi na mambu yina yandi ke sala ntangu yai.

²² Mpangi Felice Episcopo kutanaka mpi ti diambu ya kiteso mosi. Yandi ti nkento na yandi kotaka Nzo-Nkanda ya Gileadi na 1956 mpi yandi kumaka nkengi ya nziunga na Bolivie. Na 1964 bo butaka. Mpangi Felice ke tuba nde: “Yo vandilaka beto mpasi na kuyambula kisalu yina beto vandaka kuzola mingi. Na nsungi ya mvula kiteso ya mosi, mono vandaka na mawa. Kansi Yehowa sadisaka mono na kusoba mabanza na mono mpi na kundima mukumba na mono ya kusansa mwana.” Keti nge ke kudiwaka mpi bonso mpangi Robert mpi Felice? Keti nge me lembaka nitu sambu bubu yai nge ke salaka diaka ve kisalu yina nge vandaka kusala ntete? Kana yo kele mpidina, nge ta vanda na kiese kana nge soba mabanza na nge mpi nge tula dikebi na kisalu ya nge ke sala ntangu yai sambu na Yehowa mpi sambu na bampangi na nge. Sala mingi mpi sadila mayele na nge sambu na kusadisa bampangi mpi nge ta vanda na kiese ya kusadisa dibundu.

23. Beto fwete baka ntangu ya kusala nki mpi nki beto ta tadila na disolo yina ke landa?

²³ Beto yonso kele mfunu na meso ya Yehowa. Yandi ke zolaka nde beto vanda na dibuta na yandi. Kana beto baka ntangu ya kuyindulula mambu yina lenda pesa bampangi ya nkaka kikesa mpi kusala yo, beto ta yindula ve nde beto kele ve mfunu na dibundu. Kansi nki mutindu beto ke tadilaka bampangi ya nkaka na dibundu? Inki mutindu beto lenda monisa nde beto ke zitisaka bo mpi ke zolaka bo? Beto ta tubila yo na disolo yina ke landa.