1. Inki Yehowa ke zolaka sambu na bansadi na yandi yonso ya kwikama?

YEHOWA ke zolaka nde bansadi na yandi yonso ya kwikama kuvanda mfunu na dibundu na yandi. Ata beto yonso ke salaka ve kisalu ya kiteso mosi, beto kele mfunu mpi beto yonso ke vandaka ti mfunu ya bampangi ya nkaka. Ntumwa Polo ke sadisa beto na kubakisa mbote dilongi yai ya mfunu. Inki mutindu?

2. Mutindu Baefezo 4:16 ke monisa yo, sambu na nki beto fwete mona mfunu ya bampangi ya nkaka mpi kusala ti bo na bumosi?

² Mutindu verse ya ntu-diambu ya disolo yai ke monisa yo, ntumwa Polo monisaka pwelele nde ata muntu mosi ve lenda songa muntu ya nkaka nde: “Mono kele na mfunu na nge ve.” (1 Bak. 12:21) Kana beto ke zola nde ngemba kuvanda na dibundu, beto fwete mona mfunu ya bampangi ya nkaka mpi kusala ti bo na bumosi. (Tanga Baefezo 4:16.) Kana beto ke sala ti bampangi na bumosi, konso muntu ta bakisa nde bo ke zolaka yandi mpi bampangi yonso na dibundu ta baka kikesa.

3. Inki mambu beto ta tadila na disolo yai?

³ Na nki mambu beto lenda monisa nde beto ke zitisaka bampangi na dibundu? Na disolo yai beto ta tadila mutindu bankuluntu lenda monisa nde bo ke zitisaka bankuluntu ya nkaka. Diaka, beto ta tadila mutindu beto yonso lenda monisa nde beto ke zitisaka mpi ke monaka mfunu ya bampangi yina me kwelaka ve. Na nima, beto ta tadila mutindu beto lenda monisa nde beto ke zitisaka bampangi yina ke tubaka ve mbote ndinga na beto.

4. Inki ndongisila ya Polo ya kele na Baroma 12:10 bankuluntu fwete sadila?

⁴ Bo ke ponaka bankuluntu yonso na dibundu na nzila ya mpeve santu ya Yehowa. Kansi, konso nkuluntu kele na dikabu na yandi. (1 Bak. 12:17, 18) Yo lenda vanda nde bankaka me kuma bankuluntu ntama mingi ve mpi bo ke zaba ve mambu mingi. Bankaka lenda kuka ve kusala mambu mingi, sambu bo me kuma minunu to sambu bo ke belaka. Ata mpidina, nkuluntu mosi ve fwete songa nkuluntu ya nkaka nde: “Mono kele na mfunu na nge ve.” Bankuluntu yonso fwete sadila ndongisila ya Polo ya kele na Baroma 12:10.—Tanga.

5. Inki mutindu bankuluntu lenda monisa nde bo ke zitisaka bankuluntu ya nkaka mpi sambu na nki yo kele mfunu nde bo sala mutindu yina?

⁵ Bankuluntu ke monisaka nde bo ke zitisaka bankuluntu ya nkaka ntangu bo ke widikilaka bo na dikebi yonso. Yo kele mfunu mingi-mingi ntangu bo ke sala lukutakanu sambu na kutubila mambu ya mfunu. Sambu na nki? Nzozulu ya Nkengi ya Kingelesi ya Oktobri 1, 1988, ke tuba nde: “Bankuluntu fwete bakisa nde Kristu lenda sadila mpeve santu sambu na kutwadisa mabanza ya konso nkuluntu yina na kimvuka ya bankuluntu sambu na kutubila munsiku mosi ya Biblia ya ke wakana ti diambu mosi to sambu na kubaka lukanu ya mfunu. (Bis. 15:6-15) Mpeve santu ke sadisaka kaka ve nkuluntu mosi kansi bankuluntu yonso.”

6. Inki mutindu bankuluntu lenda sala na bumosi mpi nki mambote dibundu ta baka kana bo sala mutindu yina?

⁶ Nkuluntu yina ke zitisaka bankuluntu ya nkaka ke sosaka ve kutuba ntangu yonso muntu ya ntete na lukutakanu ya bankuluntu. Yandi ke tubaka ve mingi kuluta bankuluntu ya nkaka mpi yandi ke yindulaka ve nde mabanza na yandi ke vandaka ntangu yonso ya mbote. Kansi, yandi ke tubilaka bangindu na yandi na kudikulumusa yonso. Yandi ke widikilaka na dikebi yonso ntangu bankuluntu ya nkaka ke tuba. Kima ya kuluta mfunu kele nde, yandi ke vandaka ya kuyilama na kutubila minsiku ya Biblia mpi kulanda lutwadisu ya “mpika ya kwikama mpi ya mayele.” (Mat. 24:45-47) Kana bankuluntu ke tubila mambu na zola mpi na  luzitu yonso, mpeve santu ya Nzambi ta vanda ti bo mpi yo ta twadisa bo na kubaka balukanu yina ta pesa dibundu kikesa.—Yak. 3:17, 18.

7. Inki mutindu Yezu Kristu vandaka kutadila bantu yina me kwelaka ve?

⁷ Bubu yai na dibundu, beto kele na bantu yina me kwelaka mpi mabuta. Kansi, beto kele mpi ti bampangi mingi ya babakala mpi ya bankento yina me kwelaka ve. Inki mutindu beto fwete tadila bampangi yina me kwelaka ve? Beto tala mutindu Yezu vandaka kutadila bo. Ntangu Yezu vandaka awa na ntoto yandi kwelaka ve mpi yandi kudipesaka mingi na kisalu ya kusamuna. Yezu Kristu longaka ve nde Mukristu fwete kwela to ve. Kansi, yandi tubaka nde Bakristu ya nkaka ta baka lukanu ya kukwela ve. (Mat. 19:11, 12) Yezu Kristu vandaka kuzitisa Bakristu yina me kwelaka ve. Yandi yindulaka ve nde bantu yina me kwelaka kele mfunu mingi kuluta bayina me kwelaka ve to bayina me kwelaka ve me konda kima mosi ya mfunu.

8. Mutindu 1 Bakorinto 7:7-9 ke monisa yo, Polo siamisaka Bakristu na kusala nki?

⁸ Bonso Yezu, ntumwa Polo kwelaka ve ntangu yandi vandaka kusala kisalu ya kusamuna. Polo longaka ve ata fioti nde yo kele mbi na kukwela. Yandi zabaka nde yo kele lukanu ya muntu yandi mosi. Kansi, Polo siamisaka Bakristu na kutala kana bo lenda kwela ve sambu na kudipesa mingi na kisalu ya Yehowa. (Tanga 1 Bakorinto 7:7-9.) Kansi Polo vandaka kuyindula ve nde Bakristu yina me kwelaka ve kele mfunu ve. Nkutu, yandi ponaka leke Timoteo yina kwelaka ve sambu na kusala mambu ya mfunu na kisalu ya Yehowa. * (Bafil. 2:19-22) Ya kieleka, yo ta vanda mbi na kuyindula nde mpangi mosi me fwana to me fwana ve na kulungisa mukumba mosi buna kaka sambu yandi me kwelaka to ve.—1 Bak. 7:32-35, 38.

9. Inki beto lenda tuba sambu na bampangi yina me kwelaka to bayina me kwelaka ve?

⁹ Yezu mpi Polo longaka ve nde Bakristu fwete kwela to ve. Ebuna, nki beto lenda tuba sambu na bampangi yina me kwelaka mpi bayina me kwelaka ve? Nzozulu ya Nkengi ya Kifalansa ya Oktobri 1, 2012, ke pesa mvutu ya mbote na ngiufula yai, yo ke tuba nde: “Ya kieleka, makwela mpi kimpumpa kele makabu ya me katuka na Nzambi. . . . Yehowa ke yindulaka ve nde bampangi yina me kwelaka ve fwete wa nsoni to kuvanda na mawa sambu bo me kwelaka ve.” Yo yina, beto fwete zitisa bampangi yina me kwelaka ve.

10. Inki mutindu beto lenda zitisa bampangi yina me kwelaka ve?

 ¹⁰ Inki mutindu beto lenda zitisa, mawi mpi mambu ya luzingu ya bampangi yina me kwelaka ve? Beto fwete vila ve nde Bakristu ya nkaka me kwelaka ve sambu bo mosi me bakaka lukanu ya kukwela ve. Bankaka ke vandaka na mfunu ya kukwela kansi bo me zwaka ntete ve muntu yina me fwana sambu na bo. Bankaka diaka, me fwisaka bankwelani na bo. Yo yina, yo ta vanda ve mbote nde bampangi na dibundu kuyula bampangi yina me kwelaka ve nde sambu na nki bo ke kwelaka ve to kusonga bo nde bo ke zola kusadisa bo na kuzwa nkwelani. Ya kieleka, bampangi ya nkaka yina me kwelaka ve lenda lomba lusadisu. Kansi kana bo me lomba ve lusadisu, nki mutindu bampangi yai ta kudiwa kana bampangi kusonga bo nde bo ke sosila bo nkwelani? (1 Bate. 4:11; 1 Tim. 5:13) Beto tala mambu yina, bampangi ya kwikama yina me kwelaka ve ke tuba.

11-12. Inki mutindu beto lenda sala nde bampangi yina me kwelaka ve kulemba nitu?

¹¹ Nkengi mosi ya nziunga yina ke salaka kisalu na yandi mbote, ke bakaka mambote mingi sambu yandi me kwelaka ve. Kansi, yandi ke tuba nde bantangu ya nkaka yandi lenda lemba nitu, kana bampangi ke sosa kusadisa yandi mpi ke yula yandi nde: “Sambu na nki nge ke kwelaka ve?” Mpangi mosi yina ke salaka na Betele ke tuba nde: “Bantangu ya nkaka bampangi ke yindulaka nde bo fwete wila bampangi yina me kwelaka ve mawa. Kusala mutindu yina lenda monisa nde kukwela ve kele kizitu kansi ve dikabu.”

¹² Mpangi-nkento mosi yina ke salaka na Betele ke tuba nde: “Bampangi ya nkaka ke yindulaka nde bantu yonso yina me kwelaka ve ke sosaka nkwelani mpi nde kana bo kele kisika yina bantu kele mingi, bo ke monaka yo dibaku ya mbote ya kusosa nkwelani. Kilumbu mosi mono kwendaka na bwala mosi, sambu na kisalu na mono ya Betele mpi ntangu mono kumaka, mono kwendaka na lukutakanu na nkokila ya kilumbu yina. Mpangi-nkento yina yambaka mono na nzo na yandi songaka mono nde na dibundu na bo, kele ti bampangi zole ya babakala yina me kwelaka ve mpi bo kele mvula mosi ti mono. Yandi songaka mono nde yandi ke pusa mono ve na kukwela kansi ntangu beto kotaka na Nzo ya Kimfumu, yandi nataka mono kisika bampangi yina zole vandaka sambu mono kutana ti bo. Ya kieleka, diambu yina pesaka mono mpi bampangi yina nsoni.”

13. Inki bambandu me pesaka mpangi mosi ya nkento yina me kwelaka ve kikesa?

¹³ Mpangi-nkento ya nkaka ya me kwelaka ve yina ke salaka na Betele, ke tuba nde: “Mono ke zaba bapasudi-nzila ya bambuta yina me kwelaka ve kansi bo ke salaka kisalu na bo mbote, ke kudipesaka na kisalu yango, ke kuditambikaka sambu na bampangi, ke vandaka na kiese na kisalu na bo mpi bo ke sadisaka dibundu mingi. Bo ke vandaka ti mabanza ya mbote, ata bo me kwelaka ve. Bo ke yindulaka ve nde bo me luta bampangi ya nkaka, sambu bo me kwelaka ve mpi bo ke vandaka ve na mawa sambu bo me kwelaka ve to sambu bo kele ve ti bana.” Yo ke vandaka mbote kibeni na kuvanda na dibundu yina bo ke zitisaka bampangi yonso mpi bo ke monaka mfunu na bo. Sambu nge ke zaba nde bampangi ke wila nge ve mawa mpi bo ke lula nge ve. Kansi, bo ke tudila nge dikebi mpi nge ke yindula ve nde nge me luta bo. Nge ke bakisa kibeni nde bo ke zolaka nge.

14. Inki mutindu beto lenda monisa nde beto ke zitisaka bampangi yina me kwelaka ve?

¹⁴ Bampangi yina me kwelaka ve ta sepela mingi kana beto ke tula dikebi na bikalulu na bo ya mbote sambu na kumona nde bo kele mfunu mpi kana beto ke wila bo ve mawa sambu bo me kwelaka ve. Na kisika ya kuwila bo mawa,  beto fwete sepela ti kwikama na bo. Kana beto sala mpidina, bampangi yina me kwelaka ve ta yindula ve nde beto ke songa bo nde: “Mono kele na mfunu na beno ve.” (1 Bak. 12:21) Kansi, bo ta bakisa nde beto ke zitisaka bo mpi beto ke monaka nde bo kele mfunu na dibundu.

15. Inki bansoba bansamuni ya nkaka ke salaka sambu na kusala mingi na kisalu ya kusamuna?

¹⁵ Bubu yai, bansamuni mingi me bakaka lukanu ya kulonguka ndinga ya mpa sambu na kusala diaka mingi na kisalu ya kusamuna. Sambu na kusala mutindu yina yo ke lombaka nde bo soba mambu mingi na luzingu na bo. Bampangi yai, ke yambulaka dibundu na bo, kisika bo ke tubaka ndinga na bo sambu na kukwenda na dibundu ya ndinga ya nkaka mpi kisika yina mpusa ya bansamuni ya Kimfumu kele mingi. (Bis. 16:9) Bakristu yina ke bakaka lukanu yai bo mosi sambu na kusala diaka mingi na kisalu ya Yehowa. Ata yo lenda baka bamvula mingi sambu na kutuba mbote ndinga ya mpa, bo ke sadisaka dibundu na mitindu mingi. Bikalulu na bo ya mbote mpi mambu yina bo me zaba ke pesaka bampangi ya dibundu kikesa. Beto ke sepelaka ti bampangi yai sambu na kikalulu na bo ya kuditambika.

16. Inki bankuluntu fwete tadila kana bo ke pesa bampangi mukumba ya kinkuluntu to ya nsadi ya kisalu?

¹⁶ Bankuluntu fwete buya ve na kupesa mpangi mosi mukumba ya kinkuluntu to ya nsadi ya kisalu kaka sambu yandi ke tubaka ve mbote ndinga ya dibundu. Bankuluntu fwete tadila mambu yina Biblia ke tubaka sambu na bampangi yina ke bakaka mikumba ya kinkuluntu mpi ya nsadi ya kisalu kansi bo fwete tala ve kana mpangi yina ke tubaka ve mbote ndinga ya dibundu.—1 Tim. 3:1-10, 12, 13; Tito 1:5-9.

17. Inki balukanu bibuti fwete baka ntangu bo ke kwenda na nsi ya nkaka?

¹⁷ Mabuta ya nkaka ya Bambangi ya Yehowa ke kwendaka na bansi ya nkaka sambu na kutina mpasi na nsi na bo to sambu na kusosa kisalu. Kana bo me kwenda na nsi ya nkaka, yo lenda lomba nde bana na bo kutanga na nzo-nkanda yina bo ke longaka na ndinga ya nsi yina. Bibuti mpi fwete longuka ndinga ya nsi yina sambu na kuzwa kisalu. Inki bo ta sala kana na nsi yina, dibundu to kimvuka yina ke salaka balukutakanu na ndinga na bo kele? Bo ta kwenda na nki dibundu? Keti bo ta kwenda na dibundu yina ke salaka balukutakanu na ndinga ya nsi yina to na dibundu yina ke salaka lukutakanu na ndinga na bo?

18. Mutindu Bagalatia 6:5 ke monisa yo, nki mutindu beto lenda monisa nde beto ke zitisa lukanu yina mfumu ya dibuta me baka?

¹⁸ Mfumu ya dibuta ta pona dibundu yina dibuta na yandi ta kwenda. Yandi fwete baka lukanu ya mbote sambu na dibuta na yandi. Sambu yo kele diambu ya ke tadila bo, beto fwete zitisa lukanu yina mfumu ya dibuta me baka. (Tanga Bagalatia 6:5.) Beto fwete ndima konso lukanu yina yandi ta baka. Beto fwete  yamba dibuta yina mpi kumonisila bo zola.—Bar. 15:7.

19. Inki mambu mfumu ya dibuta fwete tadila mbote-mbote mpi kusamba sambu na yo?

¹⁹ Mabuta ya nkaka lenda kwenda na dibundu yina ke salaka balukutakanu na ndinga ya bibuti kansi bana lenda bakisa ve mbote ndinga yango. Kana dibundu yina kele na kisika yina bo ke tubaka ndinga ya nsi yina, yo lenda vanda mpasi sambu bana kubakisa mambu ya bo ke tuba na balukutakanu mpi kuyela na kimpeve. Sambu na nki? Sambu yo lenda vanda nde na nzo-nkanda bana ke longuka na ndinga ya nsi yina kansi na ndinga ya bibuti ve. Yo yina, bamfumu ya mabuta fwete tadila diambu yai mbote-mbote mpi kusamba sambu Yehowa kusadisa bo na kuzaba mambu ya bo fwete sala sambu na kusadisa bana na bo na kupusana pene-pene na yandi mpi na bansadi na yandi. Bibuti lenda sadisa bana na bo na kuzaba ndinga ya bibuti mbote to bo lenda tala kana bo lenda kwenda na dibundu yina ke salaka balukutakanu na ndinga yina bana lenda bakisa mbote. Dibundu yina yandi ta kwenda fwete zitisa konso lukanu yina mfumu ya dibuta me baka. Bampangi ya dibundu yina fwete zitisa mpi bantu ya dibuta yina mpi kumona mfunu na bo.

20. Inki mutindu beto lenda monisa nde beto ke zitisa bampangi yina ke longuka ndinga ya mpa?

²⁰ Sambu na bikuma mingi yina beto me tubila na disolo yai, na mabundu mingi kele ti bampangi yina ke longuka ndinga ya mpa. Mbala ya nkaka, yo lenda vanda mpasi sambu bo tuba mambu yina bo ke yindula. Kansi, kana beto ke tula ve dikebi na bifu yina bo ke sala ntangu bo ke tuba, beto ta mona zola yina bo kele na yo sambu na Yehowa mpi nzala yina bo kele na yo ya kusadila yandi. Kana beto tula dikebi na bikalulu yai ya mbote, yo ta sadisa beto na kumona nde bo kele mfunu mingi mpi na kuzitisa bo. Beto ta songa bo ve nde: “Mono kele na mfunu na beno ve” kaka sambu bo ke tuba ve mbote ndinga na beto.

21-22. Inki dibaku ya mbote beto kele ti yo?

²¹ Yehowa me pesaka beto dibaku mosi ya mbote ya kuvanda na dibundu na yandi. Yo vanda beto me kwelaka to ve, bakala to nkento, leke to mbuta to beto ke tubaka mbote ndinga mosi buna to ve, beto yonso kele mfunu na meso ya Yehowa mpi ya bampangi.—Bar. 12:4, 5; Bakol. 3:10, 11.

²² Yo yina, beto fwete landa kusadila malongi ya mbote yina beto me longuka na mbandu ya Polo, ya nitu ya muntu. Yo ta sadisa beto na kubakisa mambu ya beto fwete sala sambu na kupesa bampangi kikesa. Diaka, yo ta sadisa beto na kulanda kuzola bampangi mpi kuzitisa bo.