1. Mutindu Matayo 7:13, 14 ke monisa yo, sambu na nki beto lenda tuba nde beto kele na nzietelo?

BETO yonso kele na nzietelo. Beto ke kwenda na nsi-ntoto ya mpa yina ta vanda na nsi ya luyalu ya Yehowa. Konso kilumbu, beto ke salaka bikesa ya kulanda kutambula na nzila yina ke nata na luzingu. Kansi mutindu Yezu tubaka, nzila yango kele ya kukangama mpi bantangu ya nkaka, yo ke vandaka mpasi na kutambula na nzila yango. (Tanga Matayo 7:13, 14.) Sambu beto kele bantu ya kukonda kukuka, beto lenda yambula nzila yango kukonda mpasi.—Bag. 6:1.

2. Inki beto ta tadila na disolo yai? (Tala mpi lupangu “ Kudikulumusa Ke Sadisaka Beto na Kusoba Mambu ya Nkaka.”)

² Kana beto ke zola kubikala na nzila ya kukangama yina ke nata na luzingu, beto fwete ndima kusoba mabanza na beto, bikalulu mpi mambu yina beto ke sala. Ntumwa Polo siamisaka Bakristu ya Korinto na kulanda kundima nde ‘bo sungika bo.’ (2 Bak. 13:11) Ndongisila yai ke tadila beto mpi. Na disolo yai, beto ta tubila mutindu Biblia lenda sadisa beto na kusoba mambu ya nkaka na luzingu na beto mpi mutindu banduku na beto ya kuyela na kimpeve lenda sadisa beto na kubikala na nzila ya luzingu. Beto ta mona mpi mambu yina beto lenda sala kana beto ke kuka ve kulanda lutwadisu yina dibundu ya Yehowa ke pesa. Beto ta mona diaka mutindu kudikulumusa ta sadisa beto na kusala bansoba mpi na kulanda kusadila Yehowa na kiese yonso.

3. Inki mutindu Ndinga ya Nzambi ke sadisaka beto?

³ Yo ke vandaka ve pete na kutadila mbote-mbote bangindu mpi mawi na beto sambu ntima ke kusaka beto. Yo yina, yo ke vandaka mpasi sambu na kuzaba mambu yina ntima na beto lenda pusa beto na kusala. (Yer. 17:9) Yo ke vandaka ve mpasi sambu beto kudikusa ti “bangindu ya luvunu.” (Yak. 1:22) Yo yina, beto fwete tangaka mingi Ndinga ya Nzambi sambu yo sadisa beto  na kuditadila mbote-mbote. Ndinga ya Nzambi ke sadisaka beto na kuzaba “mabanza mpi bangindu” ya ntima na beto ya kati kibeni. (Baeb. 4:12, 13) Ndinga ya Nzambi ke sadisaka beto na kumona mambu yina kele na ntima na beto mutindu apareyi ke sadisaka minganga na kumona maladi yina ke monana ve na meso. Kansi beto fwete vanda ti kikalulu ya kudikulumusa kana beto ke zola kubaka mambote ya bandongisila ya Biblia to ya bantu yina Nzambi ke sadila sambu na kutwadisa bansadi na yandi.

4. Inki ke monisa nde ntotila Saule kumaka lulendo?

⁴ Mbandu ya ntotila Saule ke monisa mambu yina lenda salama kana beto kele ve ti kikalulu ya kudikulumusa. Saule kumaka lulendo mingi yo yina yandi buyaka kusoba mabanza na yandi mpi mambu yina yandi vandaka kusala. (Nk. 36:1, 2; Hab. 2:4) Yo monanaka pwelele ntangu Yehowa songaka Saule mambu yina yandi fwete sala na nima ya kufwa bantu ya Amaleki. Saule lemfukilaka ve Yehowa. Ntangu profete Samuele songaka yandi mbi yina yandi salaka, Saule ndimaka ve kifu na yandi. Yandi sosaka kudinungisa mpi kumona mpamba mbi yina yandi salaka mpi yandi pesaka foti na bantu ya nkaka. (1 Sam. 15:13-24) Saule salaka dezia diambu ya mutindu yai. (1 Sam. 13:10-14) Diambu ya mawa kele nde yandi bikaka nde ntima na yandi kukuma lulendo. Yandi sobaka ve mabanza na yandi yo yina Yehowa nganinaka yandi mpi buyaka yandi.

5. Mbandu ya Saule ke longa beto nki?

⁵ Sambu na kubaka malongi na mbandu ya Saule, beto fwete kudiyula bangiufula yai: ‘Ntangu mono ke tangaka bandongisila yina kele na Ndinga ya Nzambi, keti mono ke sosaka kupesa bikuma sambu na kusadila yo ve? Keti mono ke yindulaka nde diambu ya mbi yina mono me sala kele kibeni mbi ve? Kana mono me sala mbi, keti mono ke pesaka foti na bantu ya nkaka?’ Kana mvutu kele ee ata na ngiufula mosi, beto fwete soba mabanza mpi bikalulu na beto. Kana ve, ntima na beto ta fuluka ti lulendo mpi Yehowa ta buya beto.—Yak. 4:6.

6. Sambu na nki ntotila Davidi vandaka ve bonso ntotila Saule?

⁶ Davidi yina kumaka ntotila na nima ya ntotila Saule vandaka ve bonso Saule sambu ntotila Davidi vandaka kuzola “nsiku ya Yehowa.” (Nk. 1:1-3) Yandi zabaka nde Yehowa ke taninaka bantu ya kudikulumusa kansi yandi ke mengaka bantu ya lulendo. (2 Sam. 22:28) Yo yina Davidi bikaka nde nsiku ya Nzambi kusungika mabanza na yandi. Yandi sonikaka nde: “Mono ta kumisa Yehowa, yina me pesa mono ndongisila. Ata na mpimpa, bangindu na mono ya kati kibeni ke sungika mono.”—Nk. 16:7.

7. Inki beto ta sala kana beto kele bantu ya kudikulumusa?

⁷ Kana beto kele ti kikalulu ya kudikulumusa, beto ta bika nde Ndinga ya Nzambi kusungika mabanza na beto ya mbi na ntwala nde yo pusa beto na kusala mambu ya mbi. Ndinga ya Nzambi ta songa beto nde: “Nzila yo yai. Beno landa yo.” Yo ta kebisa beto kana beto ke zola kusala diambu mosi ya mbi. (Yez. 30:21) Kana beto ke lemfukila Yehowa, beto ta baka mambote mingi. (Yez. 48:17) Mu mbandu, beto ta wa ve mbi kana muntu ya nkaka me sungika beto. Beto ta kuma banduku ya Yehowa sambu beto ke zaba nde yandi ke kebaka beto bonso tata ya zola ke kebaka bana na yandi.—Baeb. 12:7.

8. Mutindu Yakobo 1:22-25 ke monisa yo, nki mutindu beto lenda sadila Ndinga ya Nzambi bonso tala-tala?

⁸ Ndinga ya Nzambi kele bonso tala-tala. (Tanga Yakobo 1:22-25.) Bantu mingi ke kuditalaka na tala-tala konso suka na ntwala ya kubasika. Yo ke sadisaka beto na kutala kisika yina beto lenda yidika na ntwala nde bantu ya nkaka kumona beto. Mutindu mosi kana beto ke tanga Biblia konso kilumbu, beto ta mona nde kele ti bisika yina yo ke lomba nde beto soba mabanza mpi bikalulu na beto. Bampangi mingi ke tangaka mukapu ya kilumbu konso suka na ntwala ya kubasika. Yo ke sadisaka bo na kuvanda ti mabanza ya mbote. Kilumbu ya mvimba, bo ke sosaka mutindu ya kusadila bandongisila ya Ndinga ya Nzambi. Diaka,  beto fwete longuka Ndinga ya Nzambi mpi kuyindula mingi mambu yina beto ke tanga konso kilumbu. Beto fwete vila ve nde yai kele mpi mambu ya kuluta mfunu yina beto fwete sala sambu na kubikala na nzila ya kukangama yina ke nata na luzingu.

9. Inki ntangu nduku mosi lenda sungika nge?

⁹ Keti nge zolaka kusala diambu mosi ya mbi yina zolaka kubebisa kinduku na nge ti Yehowa? (Nk. 73:2, 3) Kana nduku mosi ya kuyela na kimpeve bakaka kikesa ya kusungika nge, keti nge wilaka yandi mpi nge sadilaka ndongisila na yandi? Kana mpidina, yo kele diambu ya mbote mpi ntembe kele ve nde nge pesaka nduku yina matondo sambu yandi kebisaka nge.—Bing. 1:5.

10. Inki nge fwete sala kana nduku mosi me sungika nge?

¹⁰ Ndinga ya Nzambi ke yibusa beto nde: “Bamputa yina nduku me lwadisa nge ke vandaka ya kwikama.” (Bing. 27:6) Inki ke monisa nde bangogo yai kele kieleka? Beto baka mbandu. Yindula nde nge ke zola kusabuka na nzila yina bakamio ke lutaka mingi mpi nge me tula dikebi na nge yonso na telefone. Nge me yantika kusabuka kansi nge ke tula ve dikebi na bakamio. Mbala mosi, nduku mosi me benda nge ngolo na diboko mpi me vutula nge na nima. Yandi me benda nge ngolo kibeni mpi nge me wa diboko mpasi kansi diambu yina yandi me sala nswalu me gulusa nge na kisika nde kamio kuniata nge. Ata nge ta wa mpasi yina na diboko bilumbu mingi, keti nge ta wila nduku na nge makasi sambu yandi bendaka nge? Ve. Nkutu, nge ta pesa yandi mersi mingi mutindu yandi me gulusa nge. Mutindu mosi, kana nduku mosi me songa nge nde mambu yina nge ke tuba to ke sala ke wakana ve ti minsiku ya lunungu ya Nzambi, yo lenda sala nge mpasi. Kansi, kuwila yandi ve makasi sambu yandi me pesa nge ndongisila. Kana nge wila yandi makasi, yo ta vanda buzoba. (Lon. 7:9) Na kisika ya kuwa makasi, pesa yandi mersi sambu na kikesa yina yandi me monisa sambu na kusungika nge.

11. Inki lenda sala nde muntu kubuya ndongisila yina nduku me pesa yandi?

¹¹ Inki lenda sala nde muntu kubuya ndongisila ya mbote yina nduku me pesa yandi? Lulendo. Bantu ya lulendo ke zolaka nde “bo zabisa bo mambu yina bo ke zola kuwa.” Bo ‘ke zolaka ve kuwa kieleka.’ (2 Tim. 4:3, 4) Bo ke yindulaka nde bo kele ve ti mfunu ya ndongisila sambu bo ke monaka nde bo kele mayele mingi kuluta bantu ya nkaka. Kansi ntumwa Polo sonikaka nde: “Kana muntu ke yindula nde yandi kele mfunu na ntangu yandi kele mfunu ve, yandi ke kudikusa.” (Bag. 6:3) Ntotila Salomo tendulaka mbote diambu yango. Yandi sonikaka nde: “Mwana yina kele nsukami kansi mayele kele mbote kuluta ntotila yina kele mununu kansi zoba, yina kele diaka ve ti mayele ya kutula dikebi na ndongisila.”—Lon. 4:13.

12. Inki dilongi beto ke baka na mbandu ya ntumwa Piere yina kele na Bagalatia 2:11-14?

¹² Kikalulu yina ntumwa Piere monisaka ntangu ntumwa Polo sungikaka yandi na meso ya bantu, kele mbandu ya mbote sambu na beto. (Tanga Bagalatia 2:11-14.) Piere lendaka kuwila Polo makasi sambu na mambu yina Polo tubaka, kutula dikebi na mutindu yandi tubaka yo mpi kisika yina yandi tubaka yo. Kansi Piere vandaka mayele. Yandi ndimaka ndongisila mpi kangilaka ve Polo kimbeni. Nkutu na nima, yandi bingaka Polo ‘mpangi na beto ya beto ke zolaka mingi.’—2 Pie. 3:15.

13. Inki mambu beto fwete vila ve ntangu beto ke pesa muntu ndongisila?

¹³ Kana nge ke zola kupesa nduku na nge ndongisila, nki mambu nge fwete vila ve? Na ntwala ya kusolula ti yandi, kudiyula nde: ‘Keti yo ta monisa nde mono kele “muntu ya mayele kuluta ndilu”?’ (Lon. 7:16) Muntu ya mayele kuluta ndilu ke sadilaka bansiku na yandi mosi sambu na kusambisa bantu ya nkaka na kisika ya kusadila bansiku ya Yehowa mpi mbala mingi, yandi ke wilaka ve bantu mawa. Na nima ya kuditadila  mbote-mbote, kana nge me mona nde yo ke lomba kaka nde nge solula ti nduku na nge, tubila diambu yango na pwelele yonso mpi yula yandi bangiufula yina ta sadisa yandi na kutuba bangindu na yandi sambu na kusadisa nduku na nge na kubakisa diambu ya mbi yina yandi me sala. Kuvila ve nde nduku na nge kele mfunu mingi na meso ya Yehowa yo yina, mambu yina nge ta tuba fwete katuka na Biblia. (Bar. 14:10) Sadila mayele yina kele na Ndinga ya Nzambi mpi ntangu nge ke pesa muntu ndongisila, landa mbandu ya Yezu ya kuwila bantu mawa. (Bing. 3:5; Mat. 12:20) Sambu na nki? Sambu Yehowa ta sadila beto mambu mutindu beto ke sadilaka bantu ya nkaka.—Yak. 2:13.

14. Inki dibundu ya Yehowa ke pesaka beto?

¹⁴ Yehowa ke twadisa beto na nzila yina ke nata na luzingu na nsadisa ya kitini ya organizasio na yandi ya ntoto. Organizasio yango ke basisa bavideo, mikanda mpi ke yidika balukutakanu yina ke sadisa beto na kusadila bandongisila ya Ndinga ya Nzambi. Malongi yonso yina dibundu ya Yehowa ke longaka, ke katukaka na Biblia. Bampangi ya Nto-Kimvuka ke landaka lutwadisu ya mpeve santu ntangu bo ke bakaka balukanu ya mbote na mutindu kisalu ya kusamuna fwete salama. Ata mpidina, bampangi ya Nto-Kimvuka ke tadilaka diaka mbala na mbala balukanu yina bo ke bakaka sambu na kutala kana yo ke lomba nde bo soba yo. Sambu na nki? Sambu “mambu ya ke salama na nsi-ntoto kele na kusoba” mpi dibundu ya Yehowa fwete baka balukanu yina ke wakana ti mambu yina ke salama.—1 Bak. 7:31.

15. Inki mambu ya mpasi bansamuni ya nkaka ke kutana ti yo?

¹⁵ Ntembe kele ve nde, ntangu dibundu ya Yehowa ke pesaka beto ntendula ya mpa ya dilongi mosi ya Biblia to ke pesaka beto lutwadisu na mambu ya me tala bikalulu ya mbote, beto ke ndimaka yo na kiese yonso mpi ke sadilaka yo. Kansi nki beto ke salaka kana dibundu ya Yehowa me sala nsoba yina me tala mambu ya nkaka ya luzingu na beto? Mu mbandu, na bamvula me luta kisalu ya kutunga banzo ya lusambu mpi kutanina yo, kumaka kulomba mbongo mingi kibeni. Yo yina Nto-Kimvuka bakaka lukanu nde mabundu mingi kusadila Nzo ya Kimfumu mosi. Yo me salaka nde bo vukisa mabundu mingi mpi bo teka Banzo ya Kimfumu ya nkaka. Bo ke sadila mbongo yina sambu na kutunga Banzo ya Kimfumu na bisika yina mfunu ya Banzo ya Kimfumu kele mingi. Kana nge ke zingaka kisika yina bo me teka Banzo ya Kimfumu mpi bo me vukisa mabundu, yo lenda vanda mpasi sambu nge yikama ti bansoba yai.  Ntangu yai, bansamuni ya nkaka fwete sala bakilometre mingi sambu na kukwenda na balukutakanu. Bampangi ya nkaka yina salaka ngolo sambu na kutunga to kutanina Nzo ya Kimfumu lenda kudiyula sambu na nki bo me teka nzo yango. Bo lenda yindula nde ntangu mpi bikesa yonso yina bo salaka me kwenda mpamba. Ata mpidina, bo ke ndima bansoba yai mpi beto ke sikisa bo.

16. Inki mutindu ndongisila yina kele na Bakolosai 3:23, 24 ke sadisa beto na kutanina kiese?

¹⁶ Beto ta tanina kiese na beto kana beto ke yibuka nde kisalu yonso yina beto ke salaka kele sambu na Yehowa mpi yandi ke twadisa dibundu na yandi. (Tanga Bakolosai 3:23, 24.) Ntotila Davidi pesaka mbandu ya mbote ntangu yandi pesaka mbongo sambu na kutunga tempelo. Yandi tubaka nde: “Mono kele nani mpi bantu na mono kele banani, sambu beto pesa nge makabu ya luzolo ya mbote bonso yai? Sambu bima yonso ke katukaka na nge, mpi beto me pesa nge bima yina me katuka na diboko na nge mosi.” (1 Bans. 29:14) Ntangu beto ke pesaka makabu, beto mpi ke pesaka Yehowa bima yina yandi pesaka beto. Ata mpidina, Yehowa ke sepelaka ti ntangu, ngolo mpi bima yina beto ke pesaka sambu kisalu na yandi kukwenda na ntwala.—2 Bak. 9:7.

17. Sambu na nki nge fwete lemba ve nitu kana yo ke lomba nde nge soba mambu ya nkaka na luzingu na nge?

¹⁷ Sambu na kulanda kutambula na nzila ya kukangama yina ke nata na luzingu, beto yonso fwete landa mbandu ya Yezu mbote-mbote. (1 Pie. 2:21) Kana nge me bakisa nde nge fwete soba mambu ya nkaka na luzingu na nge, kulemba ve nitu. Sambu yo lenda vanda kidimbu ya mbote ya ke monisa nde nge ke landa lutwadisu ya Yehowa. Kuvila ve nde Yehowa ke zaba nde beto kele bantu ya kukonda kukuka yo yina yandi ke lombaka beto ve na kulanda mbandu ya Yezu na mutindu ya kukuka.

18. Inki beto fwete sala sambu na kubaka luzingu ya mvula na mvula?

¹⁸ Beto yonso fwete vanda ti lukanu ya kubaka luzingu ya mvula na mvula yo yina beto fwete soba mabanza, bikalulu mpi mambu yina beto ke sala. (Bing. 4:25; Luka 9:62) Beto fwete vanda bantu ya kudikulumusa, beto ‘landa kuvanda na kiese, mpi beto bika nde bo sungika beto.’ (2 Bak. 13:11) Kana beto sala mutindu yina, “Nzambi ya zola mpi ya ngemba ta vanda ti [beto].” Yandi ta sadisa beto na kuvanda na kiese bubu yai mpi yandi ta pesa beto luzingu ya mvula na mvula na nsi-ntoto ya mpa.