Keti nge lenda sadila Banzozulu ya Nkengi ya 2019 sambu na kupesa bamvutu na bangiufula yai?

Inki kele ntendula ya lusilu yai ya Nzambi: “Ata kinwaninu mosi ve ya bo ta sadila sambu na kunwanisa nge ta nunga”? (Yez. 54:17)

Beto ke tula ntima nde Nzambi ta tanina beto na “mupepe ya bamfumu ya nku.” (Yez. 25:4, 5) Bambeni ta kuka ve kuniokula beto kimakulu.—w19.01, lut. 6-7.

Inki mutindu mambu yina Nzambi sadilaka bantu ya Kanana ti ya Izraele monisaka lunungu na yandi?

Nzambi pesaka ndola na bantu yina vandaka kusala bizumba mpi bayina vandaka kuniokula bankento mpi bana. Yandi sakumunaka bantu yina vandaka kulemfukila yandi mpi bantu yina vandaka kusadila bantu ya nkaka mambu ya mbote.—w19.02, lut. 22-23.

Inki beto fwete sala kana muntu yina ke sambilaka ve Yehowa ke sala kisambu mpi beto kele pana?

Beto fwete vanda luzitu mpi pima kansi beto fwete ndima ve “amen” to kusimba muntu ya nkaka na diboko ntangu bo ke samba. Beto lenda sala mpi kisambu na beto mosi na nsi ya ntima.—w19.03, lut. 31.

Sambu na nki kuvukisa nitu ti mwana kele diambu mosi ya mbi kibeni?

Muntu yina me vukisa nitu ti mwana me sala disumu na meso ya Nzambi, na dibundu, na bamfumu ya leta mpi na mwana yandi mosi. Bankuluntu fwete lemfuka na nsiku ya kufunda muntu yina me vukisa nitu ti mwana.—w19.05, lut. 9-10.

Inki mutindu nge lenda soba to kutomisa ngolo yina ke twadisaka mabanza na nge?

Mambu ya mfunu ya kusala kele: Samba Yehowa. Yindulula mpi kuditadila mbote. Pona banduku ya mbote.—w19.06, lut. 11.

Inki beto fwete sala banda bubu sambu na kudibongisa sambu na mbangika?

Beto fwete kumisa ngolo kinduku na beto ti Yehowa. Beto fwete ndima nde yandi ke zolaka beto mpi nde yandi ta yambula beto ve ata fioti. Beto fwete tanga Biblia konso kilumbu mpi kusamba mbala na mbala. Beto fwete ndima nde balusakumunu ya Kimfumu ya Nzambi ta lungana. Beto fwete kanga na ntu baverse yina beto ke zolaka mpi bankunga yina ke kumisaka Yehowa.—w19.07, lut. 2-4.

Inki beto lenda sala sambu na kusadisa bampangi na beto ya dibuta na kuguluka?

Yo kele mfunu nde beto kuditula na kisika na bo, kusala nde bikalulu na beto ya mbote kuta kimbangi, beto fwete vanda ntima-nda mpi mayele.—w19.08, lut. 15-17.

Inki mutindu beto ke bakaka kikesa mutindu Yezu tubaka na Matayo 11:28?

Beto kele ti bampangi-Bakristu yina kele bankengi yina ke zolaka beto, banduku ya kuluta mbote mpi kisalu ya kuluta mbote.—w19.09, lut. 23.

Inki mutindu Nzambi ke pesaka beto nzala mpi ngolo ya kusala mambu? (Bafil. 2:13)

Ntangu beto ke tangaka Ndinga ya Nzambi mpi ke yindululaka yo, yandi ke pesaka beto ngolo, nzala ya kusala luzolo na yandi mpi ngolo ya kusala mambu. Mpeve na yandi ke tomisaka mayele na beto.—w19.10, lut. 21.

Inki mambu beto fwete sala na ntwala ya kubaka lukanu ya mfunu?

Mambu tanu yina beto fwete sala: Beto fwete sala bansosa. Beto fwete samba sambu na kuzwa mayele. Beto fwete tadila mbote bikuma yina ke pusa beto na kubaka lukanu. Beto fwete vanda ti balukanu ya siki-siki. Beto fwete vanda bukati-kati.—w19.11, lut. 27-29.

Ntangu Satana solulaka ti Eva, keti yandi zolaka kumonisa Eva dilongi yina ke tubaka nde moyo ke fwaka ve?

Yo ke monana nde yo kele ve mpidina. Satana songaka Eva nde yandi ta fwa kansi yandi songaka ve Eva nde yo ta monana bonso nde yandi me fwa. Malongi yonso ya luvunu sukaka ntangu Mvula ya Ngolo nokaka. Ntembe kele ve nde dilongi ya ke tubaka nde moyo ke fwaka ve, yantikaka ntangu Nzambi panzaka bantu yina vandaka kutunga nzozulu ya Babele.—w19.12, lut. 15.