▪ Yo ke monana nde yo kele ve mpidina. Diabulu songaka ve Eva nde kana yandi dia mbuma ya nti yina Nzambi buyisaka, yo ta monana bonso nde yandi me fwa kansi kitini ya nitu na yandi yina ke monanaka ve (yina bantu ya nkaka ke bingaka nde moyo yina ke fwaka ve) ta landa kuzinga kisika ya nkaka. Na nzila ya nioka, Satana songaka Eva nde kana yandi dia mbuma ya nti yina ‘yandi ta fwa ve ata fioti.’ Yandi monisaka nde Eva ta landa kuzinga mbote na ntoto kukonda lutwadisu ya Nzambi.—Kuy. 2:17; 3:3-5.

Kana dilongi ya luvunu yina ke tubaka nde moyo ke fwaka ve katukaka ve na Edeni, yo katukaka wapi? Beto me zaba mpenza ve. Beto me zaba nde lusambu yonso ya luvunu sukaka ntangu Mvula ya Ngolo nokaka na bilumbu ya Noa. Kaka Noa ti dibuta na yandi bantu gulukaka na mvula ya ngolo mpi bo yonso vandaka kusambila Yehowa, ata muntu mosi ve vandaka kulonga malongi ya luvunu.

Yo fwete vanda nde mabanza ya bantu kele na yo bubu sambu na dilongi ya ke tubaka nde moyo ke fwaka ve basikaka na nima ya Mvula ya Ngolo. Na nima, ntangu Nzambi sobaka bandinga na Babele, bantu panzanaka “na nsi-ntoto ya mvimba,” ntembe kele ve nde bo nataka dilongi yina ke tubaka nde muntu ke vandaka ti moyo yina ke fwaka ve. (Kuy. 11:8, 9) Yo vanda mpidina to ve, beto me zaba nde Satana Diabulu “tata ya luvunu,” vandaka na kisina ya dilongi yai mpi waka kiese mutindu yo mwanganaka na ntoto ya mvimba.—Yoa. 8:44.