Bangiufula ya Batangi
Biblia ke tuba nde yo ke lomba bambangi kiteso ya zole sambu na kundimisa diambu mosi. (Kut. 35:30; Kul. 17:6; 19:15; Mat. 18:16; 1 Tim. 5:19) Kansi Nsiku ya Moize vandaka kutuba nde kana bakala me vukisa nitu ti mwana-nkento yina bo me silaka makwela “na mfinda” mpi mwana-nkento yina me boka; yandi me sala ve bizumba kansi muntu ya me sala bizumba kele bakala yina. Ebuna kana bantu ya nkaka ya kuta kimbangi sambu na diambu yango kele ve; nki ta ndimisa nde kaka bakala yina muntu salaka bizumba kansi mwana-nkento ve?
▪ Disolo ya kele na Kulonga 22:25-27 ke tubila ve ntete-ntete mambu ya ke ndimisa kibeni nde bakala yina salaka bizumba sambu na disolo yai bantu zabaka dezia nde bakala yina salaka bizumba. Baverse yai ke tubila mingi-mingi mambu yina ke ndimisa nde mwana-nkento yina salaka ve bizumba. Beto tadila baverse ya kele na ntwala ya disolo yango.
Baverse ya kele na ntwala ya disolo yai ke tubila bakala yina vukisaka nitu “na mbanza” ti mwana-nkento mosi ya bo me silaka makwela. Bakala yina salaka bizumba, sambu Nsiku vandaka kutadila mwana-nkento yina ya bo silaka makwela bonso nkento ya makwela. Ebuna nkento yina? “Yandi bokaka ve na mbanza.” Kana yandi bokaka, ntembe kele ve nde bantu ya nkaka zolaka kuwa yandi mpi bo zolaka kusadisa yandi. Kansi yandi bokaka ve. Yo yina, bo zole bakaka ndola sambu mwana-nkento yina ndimaka mpi nde bo sala bizumba.—Kul. 22:23, 24.
Nsiku ya ke landa ke tubila diambu ya nkaka ya me swaswana ti yina beto me katuka kutubila. Yo ke tuba nde: “Kansi, kana bakala yango kutanaka ti mwana-nkento yina bo me sila na makwela, na mfinda, ebuna bakala yina kangaka yandi na kingolo-ngolo mpi lalaka ti yandi, bakala yina mpamba lalaka ti yandi muntu fwete fwa, mpi nge fwete sala mwana-nkento yina ata kima mosi ve. Mwana-nkento yina me sala ve disumu yina ke lomba nde yandi fwa. Yo kele kiteso mosi ti muntu yina me nwanisa nkweno na yandi mpi me fwa yandi. Sambu bakala yina kutanaka ti mwana-nkento yina na mfinda, ebuna mwana-nkento yina ya bo silaka na makwela bokaka, kansi muntu ya kusadisa yandi vandaka ve.”—Kul. 22:25-27.
Na diambu yai, bazuzi ndimaka mambu yina mwana-nkento tubaka. Sambu na nki? Sambu yo monanaka nde yandi “bokaka, kansi muntu ya kusadisa yandi vandaka ve.” Sambu bo kangaka yandi na kingolo-ngolo, bo lenda tadila yo ve bonso nde yandi salaka bizumba. Kansi bakala yina salaka bizumba sambu yandi ‘kangaka mwana-nkento yina bo silaka makwela na kingolo-ngolo mpi lalaka ti yandi.’
Ata Nsiku yai tubilaka banzikisa ya ke monisa nde mwana-nkento yina salaka ve bizumba, disolo yina ke monisa pwelele nde bakala yina muntu salaka bizumba. Beto ke ndima nde bazuzi ‘zikisaka diambu yina mbote-mbote’ mpi bo bakaka lukanu yina wakanaka ti bansiku ya Nzambi yina yandi tendulaka pwelele mpi vutukilaka yo mbala na mbala.—Kul. 13:14; 17:4; Kub. 20:14.
Nge Lenda Sepela Mpi Ti
NZOZULU YA NKENGI—NIMERO YA KULONGUKA
Bangiufula ya Batangi—Juillet 2022
NZOZULU YA NKENGI—NIMERO YA KULONGUKA
Bangiufula ya Batangi-Avril 2022
Inki Biblia ke tubaka na yina me tala kudia ndefi?
NZOZULU YA NKENGI—NIMERO YA KULONGUKA
Bangiufula ya Batangi-Avril 2022
Kana Mukristu me fwa makwela ti nkento na yandi sambu na bikuma yina Biblia ke pesaka ve nswa ya kufwa makwela mpi yandi me kwela nkento ya nkaka, nki mutindu dibundu ta tadila makwela yina ya ntete mpi yina ya mpa?
NZOZULU YA NKENGI—NIMERO YA KULONGUKA
Bangiufula ya Batangi—Mars 2022
NZOZULU YA NKENGI—NIMERO YA KULONGUKA
Bangiufula ya Batangi—Desembri 2021
NZOZULU YA NKENGI—NIMERO YA KULONGUKA
