1-2. (a) Inki ke sadisaka beto na kulanda kukanga ntima na bampasi? Tendula. (b) Inki beto ta longuka na disolo yai?

KETI nge me yibukaka dezia diambu mosi ya mpasi ya nge kutanaka ti yo mpi nge tuba nde: “Mono kangaka ve ntima na mpasi yina na ngolo na mono mosi.” Bantu mingi mpi ke tubaka mutindu yai. Ziku nge tubaka mambu yai na nima ya kuyindula mutindu nge kangaka ntima na maladi mosi ya ngolo to na lufwa ya muntu mosi yina nge vandaka kuzola mingi. Kana nge yindula diambu yina, nge ke bakisaka nde nge kangaka ntima na mpasi yango sambu mpeve santu ya Yehowa pesaka nge “ngolo yina me luta ngolo ya bantu.”—2 Bak. 4:7-9.

² Beto ke vandaka mpi na mfunu ya mpeve santu sambu yo sadisa beto na kununga bupusi ya nsi-ntoto yai ya mbi. (1 Yoa. 5:19) Beto ke vandaka diaka ti mfunu ya mpeve santu sambu yo pesa beto ngolo ya kunwana ti “bampeve ya mbi.” (Baef. 6:12) Na disolo yai beto ta tubila mitindu zole yina mpeve santu ke sadisaka beto na kununga bampasi yai yonso. Na nima beto ta tubila mambu yina beto fwete sala sambu mpeve santu kusadisa beto.

3. Inki mutindu Yehowa ke sadisaka beto na kukanga ntima na bampasi?

³ Mpeve santu ya Yehowa ke sadisaka beto na kulungisa mikumba na beto ata beto ke kutana ti bampasi. Ata ntumwa Polo vandaka kukutana ti bampasi, yandi landaka kusadila Yehowa sambu yandi tulaka ntima na “ngolo ya Kristu.” (2 Bak. 12:9) Na nzietelo na yandi ya zole ya kimisionere, Polo vandaka kusamuna mingi mpi kusala kisalu ya kinsuni sambu na kulungisa bampusa na yandi. Na Korinto, Polo vandaka na nzo ya Akilasi ti Prisila. Bo vandaka kutunga batenta. Sambu Polo vandaka kutunga mpi batenta, bilumbu ya nkaka yandi vandaka kusala ti bo.  (Bis. 18:1-4) Mpeve santu pesaka Polo ngolo ya kusala kisalu ya kinsuni mpi ya kusamuna.

4. Mutindu 2 Bakorinto 12:7b-9 ke monisa yo, nki diambu Polo vandaka kunwana ti yo?

⁴ Tanga 2 Bakorinto 12:7b-9. Na verse yai, inki Polo zolaka kutuba ntangu yandi tubaka nde yandi vandaka kunwana ti “nsende na nsuni”? Nsende ke salaka mpasi mingi kibeni kana yo me kota muntu. Polo zolaka kutuba nde yandi vandaka kukutana ti mpasi mosi ya ngolo yina yandi fwanisaka ti mpasi yina muntu ke waka kana nsende me kota yandi. Yandi tubaka nde mpasi yina vandaka bonso nde ‘wanzio ya Satana landaka kubula’ yandi. Mbala ya nkaka mpasi ya Polo yina yandi bingaka nde nsende na nitu katukaka ve na Satana mpi bademo na yandi. Kansi ntangu bampeve yina ya mbi monaka “nsende” ya Polo, ziku bo sosaka mpila ya kukotisa yo diaka ngolo na nitu sambu Polo kuwa mpasi mingi. Inki Polo salaka?

5. Inki mutindu Yehowa pesaka mvutu na bisambu ya Polo?

⁵ Ntete, Polo zolaka nde Yehowa kukatula “nsende” yina. Yandi tubaka nde: “Mono bondilaka Mfumu [Yehowa] mbala tatu . . . sambu yo katuka na mono.” Ata Polo sambaka mingi, nsende yina katukaka ve. Keti Yehowa pesaka mvutu na bisambu na yandi? Ee. Yandi pesaka mvutu. Yehowa katulaka ve mpasi yina kansi yandi pesaka Polo ngolo sambu yandi kanga ntima na mpasi yango. Yehowa zabisaka yandi nde: “Ngolo na mono ke kuma ya kukuka ntangu nge kele ya kulemba.” (2 Bak. 12:8, 9) Nzambi sadisaka Polo na kulanda kuvanda na kiese mpi yandi zwaka ngemba ya kati.—Bafil. 4:4-7.

6. (a) Inki mutindu Yehowa lenda pesa mvutu na bisambu na beto? (b) Inki mutindu mambu yina kele na baverse ya kele na paragrafe yai ke pesa nge ngolo?

⁶ Bonso Polo, keti nge me lombaka dezia Yehowa na kukatula mpasi mosi yina nge kutanaka ti yo? Ziku nge sambaka mingi kansi mpasi yango manaka ve mpi nkutu yo kumaka ngolo. Keti yo pusaka nge na kuyindula nde Yehowa wilaka nge makasi? Kana yo kele mutindu yina, yibuka mbandu ya Polo. Mutindu Yehowa pesaka mvutu na bisambu na yandi, yo ke monisa nde Yehowa ta pesa kibeni mvutu na bisambu na nge! Ziku Yehowa ta katula ve mpasi yango. Kansi yandi ta pesa nge mpeve santu sambu yo pesa nge ngolo ya kukanga ntima na mpasi yina. (Nk. 61:3, 4) Bo lenda ‘losa nge na ntoto’ kansi Yehowa ta yambula nge ve.—2 Bak. 4:8, 9; Bafil. 4:13.

7-8. (a) Na nki mutindu mpeve santu kele bonso mupepe? (b) Inki mutindu Piere tubilaka mutindu mpeve santu ke salaka?

⁷ Inki mutindu mpeve santu ke sadisaka beto diaka? Beto lenda fwanisa mpeve santu ti mupepe. Maswa ke landaka mupepe yina ke bula na nzila ya mbote sambu na kukuma mbote kisika yo ke kwenda ata nzadi ke nikana ngolo. Mutindu mosi mpi mpeve santu ke sadisaka beto na kulanda kusadila Yehowa ata beto ke kutana ti bampasi tii ntangu beto ta kota na nsi-ntoto ya mpa yina Nzambi me silaka beto.

⁸ Sambu ntumwa Piere vandaka mulobi-mbisi, yandi zabaka mambu mingi ya me tala maswa. Yo yina, ntangu yandi tubilaka mutindu mpeve santu ke salaka, yo ke monana nde yandi sadilaka ngogo mosi ya ke wakana ti mutindu maswa ke tambulaka. Yandi tubaka nde: “Mbikudulu me kwisaka ve ata mbala mosi na luzolo ya muntu, kansi bantu tubaka mambu yina me katuka na Nzambi mutindu mpeve santu vandaka kutwadisa bo.” Na kisina, ngogo ya Kigreki yina bo me balula na ngogo “kutwadisa” ke tendula “kunata.”—2 Pie. 1:21; noti na nsi ya lutiti.

9. Piere zolaka nde bantu kuyindula nki ntangu yandi sonikaka nde mpeve santu vandaka “kutwadisa” bantu?

⁹ Inki ngogo ya kifwani Piere sadilaka sambu na ngogo “kunata”? Luka, yina sonikaka mukanda ya Bisalu sadilaka mpi ngogo yai ya Kigreki ya mutindu mosi sambu na kutubila maswa yina mupepe ‘nataka.’ (Bis. 27:15) Muntu mosi ya  mayele tubaka nde ntangu Piere sonikaka nde mpeve santu vandaka “kutwadisa” bantu yina sonikaka Biblia, yandi sadilaka ngogo yina ta pusa bantu na kuyindula mutindu maswa ke tambulaka. Piere tubaka nde mutindu mupepe ke sadisaka maswa na kukuma kisika yina yo ke kwenda, mpeve santu twadisaka baprofete ti bantu yina sonikaka Biblia na kusala mbote kisalu na bo. Muntu yina ya mayele tubaka diaka nde: “Bantu yina sonikaka Biblia vandaka bonso bamaswa yina kangulaka bilele na yo.” Bo vandaka ya kuyilama sambu na kusala kisalu yina mpeve santu twadisaka bo. Yehowa salaka mambu yina yo lombaka nde yandi sala; yandi pesaka bo “mupepe” to mpeve santu. Bantu yina sonikaka Biblia lungisaka mukumba na bo. Bo landaka lutwadisu ya mpeve santu.

10-11. Inki kele mambu zole yina beto fwete sala sambu mpeve santu kutwadisa beto? Pesa mbandu.

¹⁰ Ya kieleka, bubu yai Yehowa ke sadilaka diaka ve mpeve santu na yandi sambu na kusadisa bantu na kusonika Biblia. Kansi, yandi ke landaka kusadila yo sambu na kutwadisa bansadi na yandi. Yehowa ke landaka kusala mambu yina yo ke lomba nde yandi sala. Inki beto fwete sala sambu mpeve santu ya Nzambi kusadisa beto? Beto fwete landa kusala mambu yina yo ke lomba nde beto sala. Inki mutindu beto lenda sala yo?

¹¹ Beto baka mbandu ya muntu yina ke nata maswa. Kana yandi ke zola nde mupepe kutwadisa yandi, yandi fwete sala mambu zole. Ya ntete, yandi fwete nata maswa na nzila yina mupepe ke bula. Kana yandi me nata ve maswa na nzila yina mupepe ke bula, maswa ta kwenda ve. Ya zole, yandi fwete telemisa mpi kukangula kibeni bilele ya maswa. Ya kieleka, ata mupepe ke bula, maswa ta kwenda kaka kana mupepe me fuluka na bilele na yo. Kiteso mosi, beto ta landa kusadila Yehowa kana mpeve santu ke sadisa beto. Sambu mpeve santu kusadisa beto, beto fwete sala mambu zole. Ya ntete, beto fwete sala mambu yina mpeve santu ya Nzambi ke lombaka bansadi na yandi na kusala. Ya zole,  beto fwete “kangula kibeni bilele na beto,” disongidila beto fwete sadila Yehowa na ngolo na beto yonso. (Nk. 119:32) Kana beto sala mambu yai, mpeve santu ta sadisa beto na kununga mbangika mpi na kukanga ntima na bampasi; yo ta sadisa beto mpi na kulanda kusadila Yehowa na kwikama yonso tii na nsi-ntoto ya mpa.

12. Inki beto ta tadila ntangu yai?

¹² Beto me tubila mitindu zole yina mpeve santu ke sadisaka beto. Mpeve santu ke pesaka beto ngolo mpi ke sadisaka beto na kubikala ya kwikama ntangu beto ke kutana ti bampasi. Diaka, mpeve santu ke sadisaka beto na kulanda kusadila Yehowa mpi na kubikala na nzila yina ke nataka na luzingu ya mvula na mvula. Ntangu yai beto ta tadila mambu iya yina beto fwete sala sambu mpeve santu kusadisa beto.

13. Mutindu 2 Timoteo 3:16, 17 ke monisa yo, nki mutindu Biblia lenda sadisa beto mpi nki beto fwete sala?

¹³ Ya ntete, beto fwete longuka Ndinga ya Nzambi. (Tanga 2 Timoteo 3:16, 17.) Nzambi sadilaka mpeve na yandi sambu na kutula bangindu na yandi na mabanza ya bantu yina sonikaka Biblia. Kana beto ke tanga Biblia mpi ke yindulula mambu yina beto ke tanga, bansiku ya Nzambi ta kota na mabanza mpi na ntima na beto. Bangindu ya Yehowa yina kele na Biblia ke pusaka beto na kusala luzolo na yandi. (Baeb. 4:12) Kansi sambu mpeve santu kusadisa beto, beto fwete baka ntangu ya kulonguka Biblia mbala na mbala mpi kuyindula mbote-mbote mambu yina beto ke tanga. Kana beto sala mutindu yina, Ndinga ya Nzambi ta sadisa beto na mambu yonso ya beto ke tuba mpi ke sala.

14. (a) Sambu na nki beto ke tuba nde balukutakanu kele bonso “mupepe yina ke bula”? (b) Inki mutindu beto lenda kwenda na balukutakanu bonso “maswa yina bilele na yo kele ya kukanguka”?

¹⁴ Ya zole, beto fwete sambila Nzambi kumosi. (Nk. 22:22) Balukutakanu na beto ya Bukristu kele bonso “mupepe yina ke bula.” Mpeve ya Yehowa ke vandaka na balukutakanu. (Kus. 2:29) Sambu na nki beto ke tuba mutindu yina? Sambu ntangu beto ke vukanaka sambu na kusambila Yehowa ti bampangi, beto ke sambaka Yehowa sambu na kulomba yandi mpeve santu, beto ke yimbaka bankunga ya Kimfumu yina me katuka na Biblia mpi beto ke landaka bansiku ya Biblia na nzila ya masolo yina bampangi ke salaka na ngolo ya mpeve santu. Mpeve santu yina ke sadisaka mpi bampangi-bankento na kudibongisa mpi na kusala masolo. Kansi sambu mpeve santu kusadisa beto kibeni, beto fwete kudibongisa sambu na kupesa bamvutu na balukutakanu. Kana beto sala mutindu yina, ntangu beto ta kwenda na lukutakanu, beto ta vanda ya kuyilama sambu mpeve santu kusadisa beto bonso “maswa yina bilele na yo kele ya kukanguka.”

15. Inki mutindu mpeve santu ke sadisaka beto na kisalu ya kusamuna?

¹⁵ Ya tatu, beto fwete samuna. Ntangu beto ke sadilaka Biblia na kisalu ya kusamuna mpi ya kulonga beto ke bikaka nde mpeve santu kusadisa beto. (Bar. 15:18, 19) Kansi sambu mpeve santu ya Nzambi kusadisa beto kibeni, beto fwete samuna mbala na mbala mpi beto fwete sadila Biblia na mabaku yonso. Beto lenda solula mbote ti bantu na kisalu ya kusamuna kana beto ke sadila bambandu ya kuyantika disolo ti muntu ya kele na Mukanda ya Lukutakanu—Luzingu mpi Kisalu na Beto ya Bukristu.

16. Beto fwete sala nki sambu na kubaka mpeve santu?

¹⁶ Ya iya, beto fwete samba Yehowa. (Mat. 7:7-11; Luka 11:13) Sambu na kubaka mpeve santu, beto fwete samba Yehowa. Ata kima mosi ve lenda sala nde bisambu na beto kukuma ve na Yehowa to kukanga beto nzila ya kubaka mpeve santu ya Nzambi. Mpeve santu lenda sadisa beto ata na boloko mpi Satana lenda kanga beto ve nzila ya kubaka yo (Yak. 1:17) Inki mutindu beto fwete samba sambu mpeve santu kusadisa beto kibeni? Sambu na kubaka mvutu, beto  tadila mambu ya me tala kisambu na mbandu mosi yina kele kaka na Evanzile ya Luka. *

17. Inki dilongi beto ke baka na yina me tala kisambu na kingana ya Yezu ya kele na Luka 11:5-9, 13?

¹⁷ Tanga Luka 11:5-9, 13. Kingana ya Yezu ke monisa mutindu beto fwete samba sambu na kubaka mpeve santu. Na kingana ya Yezu, muntu yina zwaka bima yina yandi vandaka na yo mfunu “sambu na kudindamana na yandi ya ngolo.” Yandi waka ve boma ya kulomba nduku na yandi lusadisu ata yo vandaka na kati-kati ya mpimpa. (Tala noti ya kulongukila ya Luka 11:8.) Inki mutindu Yezu sadilaka kingana yai sambu na kisambu? Yandi tubaka nde: “Beno landa na kulomba, ebuna bo ta pesa beno; beno landa na kusosa ebuna beno ta mona; beno landa na kubula na kielo, ebuna bo ta kangudila beno.” Inki dilongi beto ke baka? Sambu mpeve santu kusadisa beto, beto fwete dindamana na kulomba yo.

18. Na kutadila kingana ya Yezu, sambu na nki beto fwete ndima nde Yehowa ta pesa beto mpeve santu?

¹⁸ Kingana ya Yezu ke sadisa beto mpi na kubakisa sambu na nki Yehowa ta pesa beto mpeve santu. Muntu yina Yezu tubilaka na kingana vandaka na mfunu ya kuyamba mbote munzenza na yandi. Yo lombaka nde yandi pesa munzenza yina kwisaka na kati-kati ya mpimpa madia kansi yandi vandaka ve ti yo. Yezu tubaka nde nduku na yandi pesaka yandi kaka sambu muntu yina dindamanaka na kulomba madia. Inki Yezu zolaka kutuba? Kana muntu ya kukonda kukuka ndimaka kusadisa nduku na yandi yina dindamanaka, yo ke monisa nde Tata ya ntima-mbote yina kele na zulu ta sadisa beto kana beto ke landa kulomba yandi mpeve santu. Yo yina, beto fwete samba mpi kundima nde Yehowa ta pesa beto mpeve santu kana beto ke lomba yandi yo.—Nk. 10:17; 66:19.

19. Sambu na nki beto fwete ndima nde beto ta nunga Satana?

¹⁹ Beto fwete ndima nde beto ta nunga Satana ata yandi ke landa kunwanisa beto. Sambu na nki? Sambu mpeve santu ke sadisaka beto na mitindu zole. Ya ntete, yo ke pesaka beto ngolo yina beto kele na yo mfunu sambu na kukanga ntima na bampasi. Ya zole, yo kele ngolo yina ke “fulusaka bilele na beto ti mupepe,” disongidila yo ke sadisaka beto na kulanda kusadila Yehowa mpi kumona na mabanza mutindu luzingu ta vanda na nsi-ntoto ya mpa yina Nzambi ke sila beto. Yo yina beto fwete bika nde mpeve santu ya Nzambi kusadisa beto.