DISOLO YA KULONGUKA 14
Keti Nge Ke Salaka Mbote Kisalu ya Kusamuna?
“Landa kuzabisa nsangu ya mbote, lungisa mbote-mbote kisalu na nge.”—2 TIM. 4:5, noti na nsi ya lutiti.
NKUNGA 57 Kusamuna na Bantu ya Mitindu Yonso
MAMBU YINA DISOLO YAI KE TUBILA *
Yezu kutanaka ti balongoki na yandi na nima ya lufutumuku mpi pesaka bo ntuma yai “beno kwenda mpi beno kumisa bantu . . . balongoki” (Tala paragrafe 1)
1. Inki bansadi yonso ya Nzambi fwete sala mpi sambu na nki? (Tala kifwanisu ya lutiti ya zulu.)
YEZU KRISTU songaka balongoki na yandi nde: “Beno kwenda mpi beno kumisa bantu ya makanda yonso balongoki.” (Mat. 28:19) Bansadi yonso ya kwikama ya Nzambi fwete zaba mutindu bo lenda “lungisa mbote-mbote” kisalu yai ya bo me pesaka bo. (2 Tim. 4:5) Kisalu yai kele mfunu, mbalu mpi yo fwete salama nswalu kuluta konso kisalu yina. Ata mpidina, yo lenda vanda mpasi na kusamuna mingi mutindu beto ke zola.
2. Inki bampasi ke kangaka beto nzila ya kusala mbote kisalu na beto?
2 Bisalu ya nkaka ya mfunu ke lombaka ntangu mpi kikesa. Beto lenda lutisa ntangu mingi na kisalu ya kinsuni sambu na kulungisa bampusa na beto mosi mpi ya dibuta na beto. Beto fwete nwana ti bampasi, mu mbandu kulungisa mikumba ya nkaka ya dibuta, maladi, kuniokwama na mabanza, bampasi ya nkaka mpi kinunu. Inki mutindu beto lenda sala mbote kisalu na beto ata beto ke kutana ti bampasi yai?
3. Mambu yina Yezu tubaka na Matayo 13:23 ke monisa nki?
3 Kana mambu ya luzingu ke pesa beto ve nzila ya kusala mingi na kisalu ya Yehowa, beto fwete lemba ve nitu. Yezu zabaka nde beto yonso ta buta ve mbuma ya Kimfumu kiteso mosi. (Tanga Matayo 13:23.) Yehowa ke bakaka na mbalu mambu yonso ya beto ke salaka na kisalu na yandi kana beto ke sala yo na luzolo yonso. (Baeb. 6:10-12) Ata mpidina, beto lenda mona nde mambu ya luzingu ke pesa beto nzila na kusala mingi. Na disolo yai beto ta tadila mutindu beto lenda tula kisalu ya kusamuna na kisika ya ntete, kuvanda ti luzingu ya kukonda mindondo mpi kuyedisa mayele na beto na kisalu ya kusamuna mpi ya kulonga. Beto tadila ntete, kusala mbote kisalu ya kusamuna ke tendula nki?
4. Kusala mbote kisalu ya kusamuna ke tendula nki?
4 Sambu na kusamuna mpi kulonga mbote, beto fwete kudipesa mingi na kisalu ya kusamuna mpi ya kulonga. Kansi, yo ke lombaka mambu mingi kuluta ntangu yina beto ke lutisaka na kisalu yango. Yehowa ke bakaka na mbalu bikuma yina ke pusaka beto na kusamuna. Zola sambu na Yehowa mpi sambu na bantu ke pusaka beto na kusamuna * na ntima ya mvimba. (Mar. 12:30, 31; Bakol. 3:23) Kusadila Nzambi na ntima ya mvimba ke tendula kudipesa mpi kusadila ngolo na beto na kisalu na yandi. Kana beto ke baka na mbalu kisalu ya kusamuna, beto ta longa bantu mingi nsangu ya mbote.
5-6. Monisa mutindu muntu yina kele ti ntangu fioti lenda tula kisalu ya kusamuna na kisika ya ntete.
5 Yindula toko mosi ya bakala yina ke zolaka kubula gitare. Yandi ke sepelaka kubula miziki konso ntangu yina yandi me zola. Nsuka-nsuka, yandi me zwa kisalu ya kubula gitare na restora na Mposo mpi Lumingu. Kansi, mbongo yina bo vandaka kufuta yandi vandaka fioti. Yo yina, yandi kumaka kusala kisalu banda Kintete tii Kitanu na kisika yina bo ke bumbaka mbongo na magazini. Ata yandi ke lutisaka ntangu mingi na magazini, ntima na yandi ke vandaka kaka na miziki. Yandi ke vandaka ti nzala ya ngolo ya kuyedisa mayele na yandi mpi kukuma mizisie ya nene. Ata mpidina, yandi ke vandaka na kiese ya kubula miziki na konso dibaku ata yandi ke vandaka ti ntangu fioti.
6 Mutindu mosi, nge mpi lenda vanda ti ntangu fioti ya kusamuna. Kansi nge ke zolaka kusamuna. Nge ke salaka ngolo na kuyedisa mayele na nge na kisalu ya kusamuna sambu na kusimba bantima ya bantu. Sambu nge kele ti bisalu mingi, nge lenda kudiyula mutindu nge lenda tula kisalu ya kusamuna na kisika ya ntete.
TULA KISALU YA KUSAMUNA NA KISIKA YA NTETE
7-8. Inki mutindu beto lenda landa mbandu ya Yezu na kisalu ya kusamuna?
7 Yezu pesaka mbandu ya kuluta mbote sambu na kisalu ya kusamuna. Kusamuna nsangu ya Kimfumu ya Nzambi vandaka diambu ya mfunu na luzingu na yandi. (Yoa. 4:34, 35) Yandi tambulaka mingi sambu na kulonga bantu. Yandi sadilaka mabaku mingi sambu na kulonga bisika yina bantu vandaka mingi mpi na banzo na bo. Yezu tulaka kisalu ya kusamuna na kisika ya ntete.
8 Beto lenda landa mbandu ya Kristu kana beto ke sadila mabaku yonso sambu na kulonga nsangu ya mbote konso ntangu mpi konso kisika yina kana mpila kele. Beto ke kuditambikaka sambu na kisalu ya kusamuna. (Mar. 6:31-34; 1 Pie. 2:21) Bampangi ya nkaka ke salaka kisalu ya kimupasudi-nzila nsadisi, ya ntangu yonso to ya nene. Bampangi ya nkaka ke longukaka ndinga ya nkaka to ke kwendaka kisika yina mpusa kele mingi. Kansi, bansamuni ya kikesa ke salaka mingi kisalu ya kusamuna. Ata mpidina, Yehowa ke lombaka beto ve mambu yina beto ta kuka ve kusala. Yandi ke zolaka nde beto yonso kusepela ti kisalu ya santu ntangu beto ke longa “nsangu ya mbote ya nkembo ya Nzambi ya kiese.”—1 Tim. 1:11; Kul. 30:11.
9. (a) Inki mutindu Polo tulaka kisalu ya kusamuna na kisika ya ntete ata yandi vandaka kusala kisalu ya kinsuni? (b) Na kutadila Bisalu 28:16, 30, 31, nki mutindu Polo vandaka kutadila kisalu ya kusamuna?
9 Ntumwa Polo pesaka mbandu ya mbote ya kutula kisalu ya kusamuna na kisika ya ntete na luzingu na yandi. Ntangu yandi vandaka na Korinto na nzietelo na yandi ya zole, yandi vandaka kulutisa mwa ntangu na kutunga batenta sambu yandi zwa mbongo. Ata mpidina, yo bakaka ve kisika ya ntete na luzingu na yandi. Yandi salaka kisalu yai sambu na kulungisa bampusa na yandi ya kinsuni na mpila nde yandi longa nsangu ya mbote na bantu ya Korinto “kukonda kulomba [bo] mbongo.” (2 Bak. 11:7) Ata Polo vandaka kusala kisalu ya kinsuni, yandi landaka kutula kisalu ya kusamuna na kisika ya ntete mpi vandaka kulonga konso Kisabatu. Ntangu mambu ya luzingu na yandi sobaka, Polo tulaka dikebi mingi na kisalu ya kusamuna. Yandi “yantikaka kudipesa ya mvimba na kuzabisa ndinga, yandi vandaka kuta kimbangi na Bayuda sambu na kumonisa nde Yezu kele Kristu.” (Bis. 18:3-5; 2 Bak. 11:9) Na nima, ntangu yandi vandaka na boloko na Roma bamvula zole, Polo taka kimbangi na bantu yina vandaka kutala yandi mpi vandaka kusonika mikanda. (Tanga Bisalu 28:16, 30, 31.) Polo pesaka ve nzila nde ata kima mosi kukatula dikebi na yandi na kisalu ya kusamuna. Yandi sonikaka nde: “Sambu beto kele ti kisalu yai . . . , beto ke yambula ve.” (2 Bak. 4:1) Bonso Polo, ata beto ke lutisa ntangu mingi na kisalu ya kinsuni, beto fwete tula kisalu ya Kimfumu na kisika ya ntete.
Beto kele ti mitindu mingi ya kusala mbote kisalu ya kusamuna (Tala baparagrafe 10-11)
10-11. Inki mutindu beto lenda sala mbote kisalu ya kusamuna ata beto ke bela?
10 Kana beto ke kuka diaka ve kusamuna nzo na nzo sambu beto me kuma minunu to ke bela, beto lenda sepela ti mitindu ya nkaka ya kisalu ya kusamuna. Bansamuni ya mvu-nkama ya ntete vandaka kusamuna bisika yonso yina bantu vandaka. Bo vandaka kusadila mabaku yonso sambu na kulonga kieleka, nzo na nzo, bisika bantu vandaka mingi, na dibaku ya mbote mpi konso kisika yina ‘bantu vandaka.’ (Bis. 17:17; 20:20) Kana beto ke kuka ve kutambula, beto lenda vanda kisika yina bantu ke lutaka mingi sambu na kuta kimbangi na bantu yina ke luta. Beto lenda longa mpi na dibaku ya mbote, na nzila ya mikanda to ya telefone. Bansamuni yina ke kuka ve kusamuna nzo na nzo sambu na maladi to na mambu ya nkaka lenda sepela ti mitindu ya nkaka ya kusamuna.
11 Ata nge ke belaka, nge lenda sala mbote kisalu na nge. Tadila diaka mbandu ya ntumwa Polo. Yandi ke tuba nde: “Sambu na mambu yonso, mono kele ti ngolo na nzila ya muntu yina ke pesaka mono ngolo.” (Bafil. 4:13) Polo vandaka ti mfunu ya ngolo yai ntangu yandi belaka na nzietelo na yandi ya kimisionere. Yandi songaka bampangi ya Galatia nde: “Kima pesaka mono dibaku ya ntete ya kuzabisa beno nsangu ya mbote vandaka maladi.” (Bag. 4:13) Mutindu mosi, ata nge ke bela, nge lenda zwa dibaku ya kulonga nsangu ya mbote na bantu ya nkaka, mu mbandu minganga mpi bantu yina ke kebaka bambefo. Mbala mingi bantu yai ke vandaka na kisalu ntangu bansamuni ke lutaka na banzo na bo.
VANDA TI LUZINGU YA KUKONDA MINDONDO
12. Kuvanda ti luzingu ya kukonda mindondo ke tendula nki?
12 Yezu tubaka nde: “Mwinda ya nitu kele disu. Yo yina, kana disu na nge ke tala kima mosi mpamba [to “kele kukonda mindondo,” noti na nsi ya lutiti], nitu na nge ya mvimba ta vanda na nsemo.” (Mat. 6:22) Inki Yezu zolaka kutuba? Yandi zolaka kutuba nde beto fwete vanda ti luzingu ya kukonda mindondo to kutula dikebi na lukanu mosi mpamba kansi ve na mambu yina lenda katula beto dikebi. Yezu pesaka mbandu sambu yandi tulaka kisalu ya kusamuna na kisika ya ntete mpi longaka balongoki na yandi na kutula dikebi kaka na kusadila Yehowa mpi Kimfumu na yandi. Beto ke landaka mbandu ya Yezu kana beto ke tula kisalu ya kusamuna na kisika ya ntete, disongidila ‘kulanda kusosa ntete Kimfumu ti lunungu ya Nzambi.’—Mat. 6:33.
13. Inki lenda sadisa beto na kudipesa na kisalu ya kusamuna?
13 Mutindu ya mbote ya kudipesa na kisalu ya kusamuna kele kuvanda ti luzingu ya kukonda mindondo sambu beto zwa ntangu ya kusadisa bantu ya nkaka na kuzaba mpi kuzola Yehowa. * Mu mbandu, keti beto lenda yidika manaka ya kisalu na beto ya kinsuni sambu beto samuna mingi konso mposo? Keti beto lenda fiotuna bansaka yina ke bakaka beto ntangu mingi?
14. Inki bansoba mpangi mosi ti nkento na yandi salaka sambu na kusamuna mingi?
14 Mpangi Elias ti nkento na yandi salaka diambu yai. Yandi ke tuba nde: “Na ntangu yina beto vandaka ve bapasudi-nzila kansi yo lombaka nde beto yantika. Beto bakaka bangidika ya fioti-fioti sambu beto samuna mingi. Mu mbandu, beto vandaka kusumba ve bima mpamba-mpamba, beto fiotunaka ntangu ya kusala bansaka mpi lombaka nswa na mfumu ya kisalu sambu beto vanda ti manaka ya mbote. Yo me sadisaka beto na kusamuna na nkokila, kulonguka Biblia ti bantu mingi mpi kuvukana na lukutakanu ya kisalu ya kusamuna yina ke salamaka mbala zole na kati-kati ya mposo konso ngonda. Yo ke pesaka beto kiese mingi kibeni!”
YEDISA MAYELE YA KULONGA MPI YA KUSAMUNA
Kana beto ke sadila malongi ya lukutakanu ya kati-kati ya mposo yo ta sadisa beto na kusala mbote kisalu ya kusamuna (Tala baparagrafe 15-16) *
15-16. Na kutadila 1 Timoteo 4:13, 15 nki mutindu beto lenda yedisa mayele na kisalu ya kusamuna? (Tala mpi lupangu “ Mambu Yina Ta Sadisa Mono na Kusamuna Mbote.”)
15 Mutindu ya nkaka ya kusala mbote kisalu ya kusamuna kele kuyedisa mayele na beto na kisalu ya kusamuna. Bisalu ya nkaka ke lombaka kulonguka mpi kubaka formasio sambu na kuyedisa nzayilu ti mayele. Mutindu mosi bansamuni ya Kimfumu fwete landa kulonguka sambu na kuyedisa mayele na kisalu ya kusamuna.—Bing. 1:5; tanga 1 Timoteo 4:13, 15.
16 Inki mutindu beto lenda sala mbote kisalu ya kusamuna? Ntangu beto ke tula dikebi mingi na malongi yina beto ke bakaka konso mposo na Lukutakanu Luzingu mpi Kisalu. Lukutakanu yai ke pesaka formasio yina ke sadisaka beto na kuyedisa mayele na kisalu ya kusamuna. Mu mbandu, ntangu ntwadisi ya lukutakanu ke pesaka bandongisila na bana ya nzo-nkanda yina me sala masolo, beto lenda tula dikebi na bandongisila yina ta sadisa beto na kuyedisa mayele na kisalu ya kusamuna. Beto lenda sadila bandongisila yai ntangu beto ke longa nsangu ya mbote. Beto lenda lomba nkengi ya kimvuka ya kisalu ya kusamuna, nsamuni mosi ya kuyela, mupasudi-nzila to nkengi ya nziunga na kusamuna ti yandi. Kana beto ke sadila mbote konso kisadilu yina kele na Bisadilu Sambu na Kulonga Bantu beto ta longa mpi ta samuna na kiese yonso.
17. Inki mambote nge ta baka kana nge ke sala mbote kisalu ya kusamuna?
17 Kuvanda “banduku ya kisalu” ya Yehowa kele dibaku mosi ya mbote kibeni! (1 Bak. 3:9) Kana nge ke “zikisa mambu ya kuluta mfunu” mpi ke kudipesa na kisalu ya kusamuna, nge ta “sadila Yehowa na kiese.” (Bafil. 1:10; Nk. 100:2) Sambu nge kele nsadi ya Nzambi, nge fwete tula ntima nde yandi ta pesa nge ngolo yina nge kele na yo mfunu sambu na kusala mbote kisalu ya kusamuna, ata nge ke kutana ti bampasi to ke bela. (2 Bak. 4:1, 7; 6:4) Kana mambu ya luzingu ke pesa nge nzila ya kusamuna mingi to fioti, nge lenda “vanda ti kikuma ya kuwa kiese” ntangu nge ke sala yo na ntima ya mvimba. (Bag. 6:4) Kana nge ke sala mbote kisalu ya kusamuna, nge ke monisa zola sambu na Yehowa mpi sambu na bantu ya nkaka. Biblia ke tuba nde: “Kana nge ke sala yo, nge ta kudigulusa mpi nge ta gulusa bantu yina ke widikila nge.”—1 Tim. 4:16.
NKUNGA 58 Kusosa Banduku ya Ngemba
^ par. 5 Beto kele ti mukumba ya kulonga nsangu ya mbote ya Kimfumu mpi ya kukumisa bantu balongoki. Disolo yai ta tubila mutindu beto lenda sala mbote kisalu ya kusamuna ata beto ke kutana ti bampasi. Beto ta longuka mpi mutindu beto lenda buta mbuma na kisalu ya kusamuna mpi nki mambote beto lenda baka.
^ par. 4 NTENDULA YA BANGOGO: Kisalu ya kusamuna ke tadila kulonga mpi kusamuna, kutunga mpi kutanina Banzo ya Kimfumu, Banzo ya Lukutakanu ya Nene, babiro ya Betele, Babiro ya Kubalula Mikanda mpi kusadisa bampangi yina me kutana ti bisumbula.—2 Bak. 5:18, 19; 8:4.
^ par. 13 Tala mambu nsambwadi yina kele na lupangu “Mutindu ya Kuvanda ti Luzingu ya Kukonda Mindondo” na Nzozulu ya Nkengi ya Yuli 2016, lut. 8.
^ par. 62 NTENDULA YA BIFWANISU: Mpangi-nkento mosi ke sala mvutukilu ya mpa na lukutakanu ya kati-kati ya mposo. Ntangu ntwadisi ya lukutakanu ke pesa bandongisila, yandi ke sonika yo na kamukanda Kulonga. Na nima, yandi ke sadila malongi yango na kisalu ya kusamuna na Mposo to na Lumingu.
