1. Inki beto yonso ke zolaka sambu na bantu ya dibuta na beto?

PAULINE * ke tuba nde “banda mono zabaka kieleka, mono zolaka nde bantu yonso ya dibuta na beto kukota ti mono na Paladisu, mingi-mingi bakala na mono, Wayne ti mwana na beto ya bakala kusadila Yehowa.” Keti bantu yonso ya dibuta na beno me zabaka Yehowa mpi ke zolaka yandi? Ziku nge ke kudiwaka mutindu Pauline kudiwaka sambu na bantu ya dibuta na bo.

2. Inki bangiufula beto ta tadila na disolo yai?

² Beto lenda pusa ve bantu ya dibuta na beto na kundima nsangu ya mbote kansi beto lenda sadisa bo na kundima nsangu. (2 Tim. 3:14, 15) Sambu na nki beto fwete longa bantu ya mabuta na beto? Sambu na nki beto fwete kuditula na kisika na bo? Inki beto fwete sala sambu na kusadisa bantu ya dibuta na beto na kuzola Yehowa bonso beto? Inki mutindu bampangi yonso na dibundu lenda sadisa?

3. Na kutadila 2 Piere 3:9, sambu na nki beto fwete longa bantu ya dibuta na beto?

³ Ntama mingi ve Yehowa ta fwa nsi-ntoto yai. Kaka bayina kele “ti nkadilu ya mbote sambu na kubaka luzingu ya mvula na mvula” ta guluka. (Bis. 13:48) Beto ke salaka bikesa mingi sambu na kulonga bantu ya beto me zaba ve, keti beto fwete sala mpi ve bikesa sambu bantu ya dibuta na beto kusadila Yehowa bonso beto? Tata na beto ya zola Yehowa, “ke zola ve nde ata muntu mosi kufwa, kansi yandi ke zola nde bantu yonso kubalula ntima.”—Tanga 2 Piere 3:9.

4. Inki kifu beto lenda sala ntangu beto ke longa bantu ya dibuta na beto?

 ⁴ Beto fwete vila ve nde beto lenda samuna nsangu ya luguluku na mutindu ya mbote to ya mbi. Beto lenda vanda mawete ntangu beto ke longa muntu yina beto me zaba ve kansi beto lenda konda luzitu ntangu beto ke longa bantu ya dibuta na beto.

5. Inki beto fwete vila ve ntangu beto ke longa bantu ya dibuta na beto?

⁵ Bampangi mingi lenda kudiyangisa sambu na kikalulu yina bo monisaka na mbala ya ntete yina bo longaka bantu ya dibuta na bo, bo lenda mona nde yo lombaka nde bo sala mambu na mutindu ya nkaka. Ntumwa Polo longisila Bakristu nde: “Mambu ya beno ke tuba kuvanda ntangu yonso ya mbote mpi ya bo me kumisa ntomo ti mungwa, ebuna beno ta zaba mutindu beno fwete pesa konso muntu mvutu.” (Bakol. 4:5, 6) Yo kele mbote na kuyibuka ndongisila yai ntangu beto ke solula ti bantu ya dibuta. Kana ve beto ta lwadisa bo na kisika ya kundimisa bo.

6-7. Pesa mbandu ya ke monisa mutindu ya kuditula na kisika ya nkwelani yina kele ve Mbangi ya Yehowa?

⁶ Kuditula na kisika na bo. Pauline, yina beto me tubila na luyantiku ke tuba nde: “Na luyantiku, mono vandaka kutubila kaka mambu ya kimpeve ti bakala na mono. Beto vandaka ve kutubila masolo ‘ya nkaka.’” Kansi Wayne, bakala ya Pauline zabaka mambu mingi ve sambu na Biblia mpi vandaka kubakisa ve mambu yina Pauline vandaka kutubila. Wayne vandaka kumona nde Pauline vandaka kutuba kaka mambu ya dibundu na bo. Yandi vandaka kudiyangisa nde nkento na yandi me kota na kadibundu ya mbi yina vandaka kukusa yandi.

 ⁷ Pauline ke ndima nde na ntangu mosi buna yandi kumaka kulutisa ntangu mingi kaka ti bampangi ya dibundu, na bankokila, na bawikendi, na balukutakanu, na kisalu ya kusamuna mpi na mabaku ya nkaka. Pauline ke tuba nde: “Bantangu ya nkaka Wayne vandaka kukuta ve muntu na nzo mpi vandaka kudiwa yandi mosi.” Ya masonga, Wayne vandaka na mfunu ya nkento mpi mwana na yandi. Yandi zabaka ve bantu yina vandaka ti nkento na yandi mpi yo monanaka nde banduku ya mpa ya Pauline kumaka mfunu mingi kuluta yandi. Yo yina, Wayne sosaka kufwa makwela. Keti nge ke mona mutindu Pauline vandaka ve kuditula na kisika ya bakala na yandi?

8. Mukanda ya 1 Piere 3:1, 2 ke monisa nki mutindu ya kuluta mbote ya kulonga bantu ya dibuta na beto?

⁸ Vanda ti bikalulu ya mbote. Mbala mingi, bikalulu na beto ke longaka mingi kuluta mambu yina beto ke tubaka. (Tanga 1 Piere 3:1, 2.) Pauline bakisaka kieleka yai. Yandi ke tuba nde: “Mono zabaka nde Wayne vandaka kuzola beto mpi vandaka mpenza ve ti lukanu ya kufwa makwela, yo yina mono salaka mambu mutindu Yehowa ke zolaka. Na kisika ya kutuba mingi, mono monisaka bikalulu ya mbote.” Pauline yambulaka kulonga Wayne mambu ya Biblia na kingolo-ngolo mpi yandi kumaka kusolula ti Wayne mambu ya nkaka ya luzingu. Wayne bakisaka nde nkento na yandi kumaka muntu ya ngemba mpi mwana na bo kumaka ti bikalulu ya mbote. (Bing. 31:18, 27, 28) Ntangu Wayne monaka mutindu malongi ya Biblia sobaka luzingu ya dibuta na yandi, yo simbaka ntima mpi mabanza na yandi mpi yandi ndimaka malongi ya Ndinga ya Nzambi.—1 Bak. 7:12-14, 16.

9. Sambu na nki beto fwete landa na kusadisa bantu ya dibuta na beto?

 ⁹ Landa na kusadisa bantu ya dibuta na beno. Yehowa kele mbandu ya mbote na diambu yai. “Mbala na mbala,” yandi ke pesaka bantu dibaku ya kuwa nsangu ya mbote mpi ya kubaka luzingu. (Yer. 44:4) Ntumwa Polo songaka Timoteo na kulanda kusadisa bantu ya nkaka. Sambu na nki? Sambu yandi kudigulusa mpi kugulusa bantu yina ke widikila yandi. (1 Tim. 4:16) Beto ke zolaka bantu ya dibuta na beto, yo yina beto ke zolaka nde bo zaba kieleka ya Ndinga ya Nzambi. Nsuka-nsuka, bikalulu ya Pauline sadisaka bantu ya dibuta na yandi. Bubu yai, yandi kele na kiese ya kusadila Yehowa ti bakala na yandi. Bo zole kele bapasudi-nzila, nkutu Wayne kele nkuluntu.

10. Sambu na nki beto fwete vanda ntima-nda?

¹⁰ Vanda ntima-nda. Ntangu beto ke zitisa minsiku ya Nzambi, beto ke salaka bansoba na luzingu na beto, yo yina bantu ya dibuta lenda mona nde balukwikilu mpi luzingu yina beto me kuma ti yo kele mpasi. Mbala mingi, bo ke bakisaka nswalu nde beto ke vukana diaka ve ti bo na bafeti ya mabundu mpi ke kota diaka ve na mambu ya politiki. Na luyantiku, bantu ya nkaka ya dibuta lenda wila beto makasi. (Mat. 10:35, 36) Kansi, beto fwete yindula ve nde bo ta soba ve. Kana beto yambula kusadisa bo na kubakisa balukwikilu na beto, yo ta monana nde beto ke mona nde bo me fwana ve na kubaka luzingu ya mvula na mvula. Yehowa me pesaka beto ve nswa ya kusambisa bantu, yandi me pesaka yo kaka na Yezu. (Yoa. 5:22) Kana beto kele ntima-nda, yo ta pusa bantu ya dibuta na beto na kuwa nsangu ya mbote.—Tala lupangu “ Sadila Site Internet na Beto Sambu na Kulonga.”

11-13. Bikalulu yina Alice monisilaka bibuti na yandi ke longa nge nki?

¹¹ Tuba mambu pwelele kansi vanda mawete. (Bing. 15:2) Beto baka mbandu ya mpangi-nkento Alice. Yandi longukaka Biblia ntangu yandi vandaka kuzinga ntama ti bibuti na yandi yina vandaka kukwikila ve na Nzambi mpi vandaka kuzola mambu ya politiki. Yandi bakisaka nde yandi fwete longa bo nsangu ya mbote. Yandi ke tuba nde: “Kana nge songa ve nswalu bantu ya dibuta na nge balukwikilu na nge ya mpa, yo ta sala bo mpasi mingi.” Alice vandaka kusonikila bibuti na yandi, yandi vandaka kutendudila bo malongi ya Biblia yina lendaka kusepedisa bo, mu mbandu zola mpi yandi vandaka kuyula ngindu na bo na malongi yina yandi me tubila. (1 Bak. 13:1-13) Yandi tondaka bo na mutindu bo sansaka yandi mpi bo vandaka kutudila yandi dikebi, yo yina yandi tindilaka bo dikabu. Ntangu yandi kwendaka kutala bibuti na yandi, yandi sadisaka mama na yandi mingi na bisalu ya nzo. Na luyantiku, bibuti na yandi sepelaka ve ntangu yandi vandaka kutubila balukwikilu na yandi ya mpa.

¹² Ntangu yandi vutukaka na nzo na bo, yandi landaka kutanga Biblia. Alice ke tuba nde: “Yo sadisaka mama na kumona mutindu mono vandaka kubaka Biblia na mbalu.” Na ntangu yina, papa na yandi bakaka lukanu ya kulonguka mwa mambu ya Biblia sambu na kuzaba kikuma yina mwana na yandi me soba mpi kusosa bifu na Biblia. Alice ke tuba diaka nde: “Mono pesaka papa Biblia mpi mono sonikaka mwa mambu na lweka.” Inki mambote yo nataka? Na kisika ya kusosa bifu, papa na yandi sepelaka ti mambu yina yandi tangaka.

¹³ Beto fwete tuba mambu pwelele kansi na mawete ata ntangu beto ke kutana ti bampasi.  (1 Bak. 4:12b) Alice kangaka ntima ntangu mama na yandi vandaka kutelemina yandi. Yandi ke tuba nde: “Ntangu mono bakaka mbotika mama bingaka mono ‘mwana ya mbi.’” Inki Alice salaka? Yandi ke tuba nde: “Na kisika ya kuyambula, mono vandaka kutuba na mawete yonso nde mono me baka lukanu ya kukuma Mbangi ya Yehowa mpi mono ta yambula ve lukanu na mono. Mono ndimisaka mama nde mono ke zolaka yandi, beto zole dilaka mpi mono lambilaka yandi madia yina yandi ke zolaka mingi. Banda ntangu yina, mama bakisaka nde Biblia me kumisaka mono muntu ya mbote.”

14. Sambu na nki beto fwete bika ve nde bangindu ya bantu ya dibuta kusoba lukanu na beto?

¹⁴ Yo ke lombaka ntangu sambu bantu ya dibuta na beto kubakisa kikuma yina beto ke sadilaka Yehowa. Mu mbandu, Alice bakaka lukanu ya kukuma mupasudi-nzila na kisika ya kusala kisalu ya mbongo mingi yina bibuti na yandi poninaka yandi mpi mama na yandi wilaka yandi diaka makasi. Ata mpidina, yandi sobaka ve lukanu na yandi. Alice ke tuba nde: “Kana nge bika nde bangindu ya bantu ya dibuta kusoba lukanu na nge, bo ta kuma kutwadisa nge na mambu yonso. Kansi, kana nge ke mawete mpi ke kangama na balukanu na nge, bantu ya nkaka ya dibuta lenda wila nge.” Alice kutanaka ti mambu yai. Bubu, bibuti na yandi me kumaka bapasudi-nzila mpi papa na yandi kele nkuluntu.

15. Na kutadila Matayo 5:14-16 mpi 1 Piere 2:12, nki mutindu ‘bisalu ya mbote’ ya bampangi ya dibundu lenda sadisa bantu ya dibuta na beto?

¹⁵ Yehowa ke sadilaka ‘bisalu ya mbote’ ya  bansadi na yandi sambu na kubenda bantu na dibundu na yandi. (Tanga Matayo 5:14-16; 1 Piere 2:12.) Kana nkwelani na nge kele ve Mbangi ya Yehowa, keti yandi me zabanaka ti bampangi ya dibundu? Pauline, ya beto tubilaka na luyantiku, vandaka kubinga bampangi ya dibundu na nzo na yandi sambu bakala na yandi Wayne kuzaba bo. Wayne ke yibuka mutindu mpangi mosi sadisaka yandi na kubakisa mbote-mbote Bambangi ya Yehowa. Yandi ke tuba nde: “Mpangi yina bakaka konzie sambu beto tala nsaka ya balo. ‘Mono yitukaka mingi kibeni!’”

16. Sambu na nki beto fwete bingisa bantu ya dibuta na beto na balukutakanu?

¹⁶ Mutindu ya mbote ya kusadisa bantu ya dibuta kele ya kubingisa bo na balukutakanu. (1 Bak. 14:24, 25) Mbala ya ntete yina Wayne kwendaka na lukutakanu vandaka na Lusungiminu, yo vandaka na nima ya kisalu mpi manaka vandaka nkufi. Yandi ke tuba nde: “Mono bakisaka ve mambu yina diskure tubilaka kansi mono ke yibukaka mutindu bampangi yambaka mono. Bo pesaka mono mbote ti kikesa mpi tubaka nde bo me sepela kumona mono. Bo vandaka mpenza bantu ya mbote.” Mpangi-bakala mosi ti nkento na yandi vandaka mawete mingi mpi vandaka kusadisa Pauline ti mwana na yandi na kukwenda na balukutakanu mpi na kisalu ya kusamuna. Yo yina, ntangu Wayne bakaka lukanu ya kuzaba mambu mingi ya me tala lukwikilu ya Pauline, yandi lombaka mpangi-bakala yina na kulonguka Biblia ti yandi.

17. Sambu na nki diambu beto fwete kudiyangisa ve mingi, kansi sambu na nki beto fwete yambula ve kusadisa bantu ya dibuta na beto?

¹⁷ Beto ke tulaka ntima nde kilumbu kele bantu yonso ya dibuta na beto ta kuma Bambangi ya Yehowa. Kansi, ata beto ke sala bikesa na kusadisa bo na kusadila Nzambi, bankaka lenda buya. Kana yo kele mutindu yina, beto lenda kudiyangisa ve mingi sambu na lukanu na bo yina. Sambu beto lenda pusa ve muntu na ngolo na kundima lukwikilu na beto. Kana bantu ya dibuta na beno ke mona mutindu nge kele na kiese sambu nge ke sadilaka Nzambi, yo lenda pusa bo mpi na kusadila yandi. Sambaka sambu na bo, tubilaka bo na mawete mpi landa kusadisa bo. (Bis. 20:20) Tula ntima nde Yehowa ta sakumuna bikesa na nge. Kana bo wila nge, bo ta guluka!