1. Inki lusilu Yezu pesaka bantu na Matayo 11:28-30?

YEZU pesaka kimvuka mosi ya bantu yina vandaka kuwidikila yandi lusilu mosi ya kitoko. Yandi tubaka nde: “Beno kwisa na mono, . . . ebuna mono ta pesa beno kikesa.” (Tanga Matayo 11:28-30.) Yo vandaka lusilu ya kieleka. Mu mbandu, yindula diambu yina yandi sadilaka nkento yina vandaka kubela ngolo.

2. Inki Yezu salaka sambu na nkento yina vandaka kubela?

² Nkento yina vandaka mpenza na mfunu ya kubeluka. Yandi kwendaka na minganga mingi sambu na kubeluka kansi na nima ya bamvula 12, yandi belukaka kaka ve. Na kutadila Nsiku, yandi vandaka mvindu. (Levi 15:25) Na nima yandi waka nde Yezu ke belula maladi yonso, yo yina yandi kwendaka na Yezu. Ntangu yandi monaka Yezu, yandi simbaka lele ya zulu ya Yezu mpi na mbala mosi yandi belukaka. Yezu sukaka ve kaka na kubelula nkento yina kansi Yezu vutulaka diaka lukumu na yandi. Mu mbandu, ntangu bo vandaka kusolula, Yezu bingaka yandi: “Mwana na mono.” Yo pesaka nkento yina ngolo mpi kikesa kibeni!—Luka 8:43-48.

3. Inki bangiufula beto ta tadila na disolo yai?

³ Simba nde nkento yina muntu salaka bikesa sambu na kukwenda na Yezu. Bubu yai, beto mpi fwete sala bikesa sambu na kukwenda na Yezu. Yezu ta sala ve kimangu sambu na kubelula bambefo yina ke kwenda na yandi. Kansi yandi ke lomba beto nde: “Beno kwisa na mono, . . . ebuna mono ta pesa  beno kikesa.” Disolo yai ta pesa mvutu na bangiufula yai tanu: Inki mutindu beto lenda kwenda na Yezu? Yezu zolaka kutuba nki ntangu yandi tubaka nde: “Beno baka vangu na mono na mapeka na beno”? Mbandu ya Yezu ke longa beto nki? Sambu na nki kisalu yina Yezu me pesaka beto ke pesaka kikesa? Inki mutindu beto lenda landa kubaka kikesa na nsi ya vangu ya Yezu?

4-5. Inki mutindu beto lenda kwenda na Yezu?

⁴ Mutindu mosi ya kukwenda na Yezu kele kulonguka mambu yina yandi tubaka mpi salaka. (Luka 1:1-4) Ata muntu mosi ve lenda longuka na kisika na beto, beto fwete sala yo beto mosi. Diaka, beto ke kwendaka na Yezu ntangu beto ke bakaka mbotika sambu na kukuma balongoki na yandi.

⁵ Mutindu ya nkaka ya kukwenda na Yezu kele kusosa lusadisu na bankuluntu. Yezu ke sadilaka “makabu” yai ya bantu sambu na kutanina mameme na yandi. (Baef. 4:7, 8, 11; Yoa. 21:16; 1 Pie. 5:1-3) Beto fwete sala bikesa sambu na kusosa lusadisu na bo. Beto fwete vingila ve nde bankuluntu kuzaba bangindu na beto mpi mambu yina beto kele na yo mfunu. Mpangi Julian ke tuba nde: “Yo lombaka nde mono yambula kisalu ya Betele sambu mono vandaka kubela. Nduku mosi songaka mono na kulomba lusadisu na bankuluntu. Ntete, mono yindulaka nde yo kele mfunu ve. Kansi ntangu mono solulaka ti bo, bo pesaka mono lusadisu ya kuluta mbote.” Bankuluntu, bonso bayina zole ya sadisaka Julian lenda sadisa beto na kuzaba “mabanza ya Kristu” disongidila kubakisa mpi kukuma ti mabanza mpi bikalulu ya Kristu. (1 Bak. 2:16; 1 Pie. 2:21) Bankuluntu ke pesaka beto lusadisu ya kuluta mbote.

6. Inki Yezu zolaka kutuba ntangu yandi tubaka nde: “Beno baka vangu na mono na mapeka na beno”?

⁶ Ntangu Yezu tubaka nde: “Beno baka vangu na mono na mapeka na beno,” ziku yandi zolaka kutuba nde “beno ndima kiyeka na mono.” Yandi zolaka kutuba mpi nde “beno kota ti mono na nsi ya vangu kumosi beto sadila Yehowa.” Na kutuba ya nkaka, kubaka vangu ke tendula kusala kisalu.

7. Inki kisalu Matayo 28:18-20 ke tubila, yina Nzambi me pesaka beto mpi nki beto fwete ndima?

⁷ Beto ke kwendaka na Yezu ntangu beto ke kudipesaka na Yehowa mpi ke bakaka mbotika. Yezu ke binga bantu yonso mpi yandi ta buya ve ata muntu mosi yina ke zola kusadila Nzambi na masonga. (Yoa. 6:37, 38) Yehowa me pesaka balongoki yonso ya Yezu dibaku ya nene ya kusala kisalu yina yandi pesaka Yezu. Beto fwete ndima nde Yezu ta vanda ntangu yonso ti beto mpi ta sadisa beto na kusala kisalu yango.—Tanga Matayo 28:18-20.

8-9. Sambu na nki bantu ya kudikulumusa ke kwendaka na Yezu mpi nki bangiufula beto fwete kudiyula?

⁸ Bantu ya kudikulumusa ke kwendaka na Yezu. (Mat. 19:13, 14; Luka 7:37, 38) Sambu na nki? Sambu Yezu vandaka ve bonso Bafarize. Bamfumu yina ya mabundu vandaka ve kuzola bantu mpi vandaka lulendo. (Mat. 12:9-14) Yezu vandaka kuzola bantu mpi vandaka muntu ya kudikulumusa. Bafarize vandaka kudikumisa mpi kudimona mfunu mingi sambu na kiyeka na bo. Yezu monisaka nde lulendo kele mbi mpi yandi longaka balongoki na yandi na kudikulumusa mpi kusadila bantu ya nkaka. (Mat. 23:2, 6-11) Bafarize vandaka kuyala bantu na ngolo mpi kupesa bo boma. (Yoa. 9:13, 22) Yezu pesaka  bantu kikesa ntangu yandi sadilaka bo mambu ya mbote mpi vandaka kutuba na mawete.

⁹ Keti nge me baka malongi na mbandu ya Yezu? Kudiyula nde: ‘Keti bantu ke monaka nde mono kele muntu ya mawete mpi ya kudikulumusa? Keti mono ke salaka bisalu yina ke monanaka mfunu ve sambu na kusadisa bantu ya nkaka? Keti mono ke vandaka mawete?’

12-14. Sambu na nki kisalu yina Yezu me pesaka beto ke pesaka kikesa?

¹² Sambu na nki kisalu yina Yezu me pesaka beto ke pesaka kikesa? Bikuma kele mingi, kansi beto tadila mwa ndambu.

¹³ Beto kele ti bankengi ya kuluta mbote. Yehowa kele Nkengi ya Kuluta Nene, yandi ke tondaka bansadi na yandi mpi kele ve mfumu ya nku. Yandi ke sepelaka ti kisalu na beto. (Baeb. 6:10) Yandi ke pesaka beto ngolo yina beto kele na yo mfunu sambu na kusala kisalu ya nene yina yandi me pesaka beto. (2 Bak. 4:7; Bag. 6:5) Yezu, Ntotila na beto ke pesaka mbandu ya kuluta mbote na mutindu ya kusadila bantu mambu. (Yoa. 13:15) Bankuluntu yina ke taninaka beto ke salaka ngolo na kulanda mbandu ya Yezu, “ngungudi ya nene.” (Baeb. 13:20; 1 Pie. 5:2) Bankuluntu ke salaka bikesa na kuvanda mawete, na kupesa beto kikesa mpi ke monisaka kikesa ntangu bo ke longaka mpi ke taninaka beto.

¹⁴ Beto kele ti banduku ya kuluta mbote. Kele ve ti kimvuka ya bantu yina kele ti kisalu mpi banduku ya zola bonso beto. Yindula diambu yai: Beto kele ti dibaku ya kusala ti bantu yina kele ti bikalulu ya mbote ata mpidina, bo ke yindulaka ve nde bo me luta bampangi na bo. Bo kele mayele kansi bo ke kudikumisaka ve mpi ke monaka nde bampangi ya nkaka me luta bo. Bo ke bakaka beto kaka ve bonso banduku ya kisalu kansi bonso banduku na bo kibeni. Sambu bo ke zolaka beto mingi, bo lenda pesa luzingu na bo sambu na beto.

15. Inki mutindu beto ke kudiwaka sambu na kisalu yina beto ke salaka?

¹⁵ Beto kele ti kisalu ya kuluta mbote. Beto ke longaka bantu kieleka ya Yehowa mpi ke monisaka pwelele luvunu ya Diabulu. (Yoa. 8:44) Satana ke pesaka bantu bizitu yina bo lenda kuka ve kunata. Mu mbandu, yandi ke sosaka kundimisa beto nde Yehowa ta lolula ve masumu na beto mpi nde yandi ke zolaka beto ve. Yai kele kizitu ya nene mpi yo kele mpenza luvunu! Ntangu beto ke kwendaka na Kristu, Nzambi ke lolulaka masumu na beto. Kieleka kele nde Yehowa ke zolaka beto mingi kuluta. (Bar. 8:32, 38, 39) Beto ke waka kiese mingi ntangu beto ke sadisaka bantu na  kutudila Yehowa ntima mpi ke monaka mutindu luzingu na bo ke toma!

16. Inki mutindu kizitu yina Yezu ke lomba beto na kunata me swaswana ti bizitu ya nkaka?

¹⁶ Kizitu yina Yezu ke lomba beto na kunata me swaswana ti bizitu ya nkaka. Mu mbandu, na nima ya kusala kisalu, bantu mingi ke lembaka mpi ke vandaka ve na kiese. Kansi na nima ya kusadila Yehowa mpi Kristu, beto ke waka kiese mingi. Ata beto me lemba na kilumbu, beto ke vandaka kaka ti mpusa ya ngolo ya kukwenda na lukutakanu. Nkutu mbala mingi beto ke vandaka ngolo mpi kikesa ntangu beto ke vutukaka na nzo. Yo kele mutindu mosi ntangu beto ke salaka bikesa ya kusamuna mpi kulonguka Biblia ti bantu. Mambote yina beto ke bakaka me luta ngolo yina beto ke basisaka.

17. Sambu na nki beto fwete bakisa bandilu na beto mpi kuvanda mayele?

¹⁷ Beto fwete bakisa bandilu na beto mpi kundima nde beto yonso ve kele ngolo kiteso mosi. Yo yina, beto fwete nata kizitu yina me fwana ti ngolo na beto. Mu mbandu, beto lenda bebisa ngolo na beto na kusosa bima ya kinsuni. Simba mambu yina Yezu songaka leke mosi ya mvwama yina yulaka yandi nde: “Inki mono fwete sala sambu na kubaka luzingu ya mvula na mvula?” Leke yango vandaka kuzitisa Nsiku. Yo fwete vanda nde yandi vandaka muntu ya mbote sambu Evanzile ya Marko ke monisa pwelele nde Yezu “zolaka yandi.” Yezu songaka yandi nde: “Kwenda, teka bima na nge . . . na nima kwisa kulanda mono.” Leke yango waka mawa sambu yandi zolaka ve kubika “bima mingi” yina yandi vandaka na yo. (Mar. 10:17-22) Yo yina, yandi buyaka vangu yina Yezu pesaka yandi mpi landaka kuvanda mpika ya “Kimvwama.” (Mat. 6:24) Kana yo vandaka nge, nki nge zolaka kusala?

18. Inki beto fwete sala mbala na mbala mpi sambu na nki?

¹⁸ Beto fwete yindula mbala na mbala mambu yina beto ke tulaka na kisika ya ntete na luzingu. Sambu na nki? Sambu beto sadila ngolo na beto na mayele yonso. Mark, toko mosi ke tuba nde: “Bamvula mingi, mono yindulaka nde mono vandaka ti luzingu ya kukonda mindondo. Mono vandaka mupasudi-nzila, ata mpidina mono vandaka kuyindula kaka mutindu ya kuzwa mbongo mpi kuvanda ti luzingu ya mbote. Mono sosaka kuzaba kikuma yina luzingu na mono kumaka mpasi. Mono bakisaka nde mbala mingi mono vandaka kusosa mambote na mono mpi kupesa Yehowa ntangu ti ngolo fioti yina vandaka kubikala.” Mark sobaka mabanza ti luzingu na yandi mpi kumaka diaka kusala mingi na kisalu ya Yehowa. Yandi ke yika nde: “Bantangu ya nkaka mono vandaka kudiyangisa mingi kansi Yehowa mpi Yezu sadisaka mono na kununga bampasi.”

19. Sambu na nki kuvanda ti mabanza ya mbote kele mfunu?

¹⁹ Nge ta landa kubaka kikesa na nsi ya vangu ya Yezu kana nge ke sala mambu yai tatu. Ya ntete, landa kuvanda ti mabanza ya mbote. Beto fwete sala kisalu ya Yehowa mutindu yandi ke zola sambu Yehowa kele Mfumu mpi beto kele bansadi. (Luka 17:10) Kana beto ke sala kisalu ya Yehowa na mutindu na beto, vangu ya Yezu ta vanda kilo. Ata ngombe ya kele ngolo mingi lenda lwala to kulemba nswalu kana yandi ke kwenda na ndambu ya yandi me zola mpi ke landa ve lutwadisu ya mfumu na yandi. Beto lenda sala mambu ya kuyituka mpi kununga bampasi kana beto ke landa lutwadisu ya Yehowa. Kuvila ve nde ata muntu  mosi ve lenda kanga Yehowa nzila ya kulungisa luzolo na yandi.—Bar. 8:31; 1 Yoa. 4:4.

20. Beto fwete nata vangu ya Yezu ti bikuma ya nki mutindu?

²⁰ Ya zole, bangindu ya ke pusa nge na kusala mambu fwete vanda ya mbote. Lukanu na beto kele ya kupesa Yehowa, Tata na beto ya zola lukumu. Bakristu ya mvu-nkama ya ntete yina sosaka mambote na bo mosi vandaka diaka ve na kiese mpi buyaka vangu ya Yezu. (Yoa. 6:25-27, 51, 60, 66; Bafil. 3:18, 19) Kansi bayina zolaka Nzambi mingi mpi zolaka bampangi na bo nataka vangu na kiese yonso ti kivuvu ya kukwenda kusala ti Kristu na zulu. Bonso Bakristu ya mvu-nkama ya ntete, beto ta vanda na kiese kana beto ke nata vangu ya Yezu ti bikuma ya mbote.

21. Na kutadila Matayo 6:31-33, beto fwete ndima nde Yehowa ta sala nki?

²¹ Ya tatu, vanda ti bivuvu ya mbote. Beto ke vandaka ti mpeve ya kuditambika mpi ke salaka kisalu ya ngolo. Yezu tubaka nde bo ta bangika beto. Kansi beto fwete ndima nde Yehowa ta pesa beto ngolo ya kununga bampasi. Kana beto ke kanga ntima, beto ta kuma ngolo. (Yak. 1:2-4) Beto fwete ndima mpi nde Yehowa ta sadisa beto, Yezu ta twadisa beto mpi bampangi ta pesa beto kikesa. (Tanga Matayo 6:31-33; Yoa. 10:14; 1 Bate. 5:11) Mambu yai yonso ta sadisa beto na kukanga ntima na bampasi.

22. Na nki mambu beto fwete monisa ntonda?

²² Nkento yina Yezu belulaka bakaka kikesa banda kilumbu yina yandi belukaka. Kansi sambu na kubaka kikesa ya kimakulu, yo lombaka nde yandi kuma longoki ya Kristu. Inki nge ke yindula, keti yandi salaka yo? Kana yandi bakaka vangu ya Yezu, yandi bakaka mambote ya kusala ti Yezu na zulu. Konso kibansa yina yandi salaka sambu na kulanda Kristu fwanaka ve ti mambote yina yandi bakaka. Yo vanda beto ta zinga na zulu to na ntoto, beto ta monisa ntonda na bangogo yai ya Yezu: “Beno kwisa na mono!”