1-2. Inki wanzio songaka bankento yina kwendaka na maziamu ya Yezu mpi Yezu yandi mosi tubilaka bo nki?

NA SUKA ya Nisani 16 ya mvu 33 ya ntangu na beto, bankento yina vandaka na mawa, bayina vandaka kuzola Nzambi kwendaka na maziamu yina bo zikaka mfumu Yezu Kristu. Bilumbu zole lutaka dezia banda bo zikaka yandi. Bo kwendaka sambu na kutula bima ya nsudi ya kitoko mpi mafuta ya nsudi ya kitoko na mvumbi ya Yezu. Kansi ntangu bo kumaka, bo yitukaka ntangu bo kutaka maziamu ya mpamba. Wanzio mosi songaka bo nde Yezu me futumuka mpi yandi yikaka nde: “Yandi ke kwenda na ntwala na beno na Galilea. Beno ta mona yandi kuna.”—Mat. 28:1-7; Luka 23:56; 24:10.

² Ntangu bankento yina kwendaka na maziamu vandaka kuvutuka, bo kutanaka ti Yezu mpi yandi songaka bo nde: “Beno kwenda kupesa nsangu yai na bampangi na mono sambu bo kwenda na Galilea, mpi bo ta mona mono kuna.” (Mat. 28:10) Yo fwete vanda nde Yezu vandaka ti mambu ya mfumu mingi ya kusonga balongoki na yandi, yo yina na nima ya lufutumuku na yandi, yandi yidikaka mambu nswalu sambu na kusala lukutakanu ti balongoki na yandi.

3-4. Inki ke ndimisa beto nde Yezu pesaka ve ntuma yina kele na Matayo 28:19, 20 kaka na bantumwa? (Tala kifwanisu ya lutiti ya zulu.)

³ Tanga Matayo 28:16-20. Na lukutakanu yina Yezu salaka ti balongoki, yandi tubilaka kisalu ya mfunu yina balongoki na yandi salaka na mvu-nkama ya ntete mpi yina beto ke sala bubu yai. Yandi tubaka nde: “Yo yina, beno kwenda mpi beno kumisa bantu ya makanda yonso balongoki, . . . beno longa bo na kuzitisa mambu yonso ya mono songaka beno.”

 ⁴ Yezu ke zolaka nde balongoki na yandi yonso kusamuna. Yo yina, yandi pesaka ve ntuma ya kukumisa bantu balongoki kaka na bantumwa 11. Beto ke ndima nde yo kele mpidina sambu ntangu yandi pesaka ntuma yai bantumwa mpamba ve bantu vandaka pana. Inki mutindu beto me zaba yo? Yibuka nde wanzio songaka bankento yina nde: “Beno ta mona yandi kuna [na Galilea].” Yo ke monisa nde bankento yina ya kwikama vandaka mpi na lukutakanu yina. Kima ya nkaka ya ke ndimisa beto kele mambu yina Ntumwa Polo tubaka nde, Yezu “monikaka na bampangi kuluta 500 na mbala mosi.” (1 Bak. 15:6) Na wapi?

5. Inki ke ndimisa beto nde 1 Bakorinto 15:6 ke tubila lukutakanu yina salamaka na Galilea?

⁵ Beto kele ti bikuma ya mbote ya kundima nde Polo vandaka kutubila lukutakanu yina Yezu salaka na Galilea, yina Biblia ke tubila na Kapu 28 ya Matayo. Sambu na nki beto ke ndima yo? Diambu ya ntete ya ke ndimisa beto kele yai, balongoki mingi ya Yezu vandaka bantu ya Galilea. Yo yina, ngumba ya Galilea vandaka kisika ya mbote ya kuvukisa bantu mingi na kisika ya kuvukisa bo na nzo mosi na Yeruzalemi. Ya zole, na nima ya lufutumuku, Yezu kutanaka dezia ti bantumwa 11 na nzo mosi na Yeruzalemi. Kana Yezu vandaka ti mfunu ya kupesa ntuma ya kulonga mpi kukumisa bantu balongoki kaka na bantumwa na yandi, yandi zolaka kuzabisa bo yo na Yeruzalemi na kisika ya kusonga bo ti bankento ya nkaka na kukwenda kukutana ti yandi na Galilea.—Luka 24:33, 36.

6. Inki mutindu Matayo 28:20 ke monisa nde bubu yai Bakristu kele ti mukumba ya kukumisa bantu balongoki mpi nki ke monisa nde bo ke zitisaka yo?

⁶ Beto tadila kikuma ya tatu ya mfunu. Ntuma ya Yezu ya kukumisa bantu balongoki vandaka kaka ve sambu na Bakristu ya mvu-nkama ya ntete. Inki mutindu beto me zaba yo? Na nima ya kupesa bantuma yina, Yezu tubaka nde: “Mono kele ti beno bilumbu yonso tii na nsukilu ya ngidika ya bima.” (Mat. 28:20) Kaka mutindu Yezu tubaka, bubu yai bantu mingi ke salaka kisalu ya kukumisa bantu balongoki. Yo kele kiese na kuzaba nde konso mvula kiteso ya bantu 300 000 ke bakaka mbotika sambu na kukuma Bambangi ya Yehowa mpi balongoki ya Yezu Kristu.

7. Inki beto ta tubila na disolo yai mpi sambu na nki?

⁷ Bantu mingi yina ke longuka Biblia ke yela na kimpeve mpi ke baka mbotika. Kansi, bantu ya nkaka yina beto ke longukaka ti bo Biblia ke waka boma ya kukuma balongoki ya Yezu. Bo ke sepelaka kulonguka kansi bo ke yelaka ve na kimpeve mpi ke bakaka ve mbotika. Ntangu beto ke longukaka Biblia ti bantu, beto ke sadisaka bo na kusadila mambu yina bo ke longuka mpi bo kuma balongoki ya Kristu. Disolo yai ta tubila mutindu beto lenda sadisa balongoki ya Biblia na kuzola Yehowa mpi na kuyela na kimpeve. Sambu na nki? Sambu bantangu ya nkaka yo ta lomba nde beto baka lukanu ya kulanda to ya kuyambula kulonguka Biblia ti muntu.

8. Sambu na nki yo lenda vanda mpasi na kusadisa balongoki ya nkaka ya Biblia na kuzola Yehowa?

⁸ Yehowa ke zolaka nde bantu kusambila yandi sambu bo ke zolaka yandi. Yo yina, lukanu na beto kele ya kusadisa balongoki ya Biblia na kubakisa nde Yehowa ke tudilaka konso longoki dikebi mpi ke zolaka bo mingi. Beto ke sadisaka bo na kubakisa nde Yehowa kele “Tata ya bana ya me konda batata mpi muntu ya ke taninaka mifwidi ya bankento.” (Nk. 68:5) Kana balongoki ya Biblia me bakisa nde Nzambi ke zolaka bo, ntembe kele ve nde yo ta simba bantima na bo mpi bo ta kuma kuzola Nzambi mingi. Yo lenda vanda mpasi sambu balongoki ya nkaka kundima nde Yehowa kele Tata ya zola sambu batata na bo mosi ke monisilaka bo ve zola. (2 Tim. 3:1, 3) Yo yina ntangu beto ke longuka Biblia ti bo, beto fwete benda dikebi na bo na  bikalulu ya kitoko ya Yehowa. Beto fwete sadisa bo na kubakisa nde Nzambi kele zola mpi yandi ke zola nde bo baka luzingu ya mvula na mvula mpi yandi ta sadisa bo na kubaka yo. Inki kima ya nkaka beto lenda sala?

9-10. Inki mikanda beto fwete sadila sambu na kulonguka Biblia ti bantu mpi sambu na nki?

⁹ Beto sadila mikanda “Inki Biblia Ke Longa Beto?” mpi “Mutindu ya Kubikala na Zola ya Nzambi.” Bo basisaka mikanda yai sambu na kusadisa balongoki ya Biblia na kuzola Yehowa. Mu mbandu kapu 1 ya mukanda Inki Biblia Ke Longa Beto? ke pesa bamvutu na bangiufula yai: Keti Nzambi ke kudiyangisaka sambu na beto to yandi kele ntima-mbi?, Inki mutindu Nzambi ke waka ntangu bantu ke niokwamaka? mpi Keti nge lenda kuma nduku ya Yehowa? Mukanda Bikala na Zola ya Nzambi ke sadisaka balongoki ya Biblia na kubakisa mutindu kusadila minsiku ya Biblia lenda sadisa bo na kusoba mpi bo kuma banduku ya Yehowa. Ata nge me longukaka dezia mikanda yai ti bantu ya nkaka, vanda ti kikalulu ya kudibongisa mbote na ntwala nde nge longuka ti muntu mpi sosa kuzaba bampusa na yandi.

 ¹⁰ Inki nge fwete sala kana longoki ya Biblia me sepela ti disolo mosi ya kele na mukanda yina kele ve na Bisadilu Sambu na Kulonga Bantu? Siamisa yandi na kutanga mukanda yango yandi mosi sambu beno landa kulonguka ti yandi na mukanda Inki Biblia Ke Longa Beto? to Mutindu ya Kubikala na Zola ya Nzambi.

11. Inki ntangu beto fwete yantika kusala kisambu na luyantiku mpi na nsuka ya kulonguka ti muntu mpi nki mutindu beto lenda sadisa longoki na kubakisa mfunu ya kisambu?

¹¹ Beto samba na ntwala ya kulonguka ti muntu. Yo kele mbote na kusamba na luyantiku mpi na nsuka ya kulonguka ti muntu. Beto fwete sala yo kukonda kusukinina kana mpila kele ntangu beto me yantika kibeni kulonguka Biblia ti muntu. Beto fwete sadisa longoki na kubakisa nde mpeve santu ya Nzambi ke sadisaka beto na kubakisa Biblia. Sambu na kusadisa balongoki na kubakisa mfunu ya kisambu, bansamuni ya nkaka ke tangilaka bo Yakobo 1:5, ya ke tuba nde: “Kana muntu mosi na kati na beno me konda mayele, bika yandi landa kulomba na Nzambi.” Na nima, nsamuni lenda yula longoki nde: “Inki mutindu beto lenda lomba Nzambi mayele?” Ntembe kele ve nde longoki ta tuba nde beto fwete samba.

12. Inki mutindu nge lenda sadila Nkunga 139:2-4 sambu na kusadisa longoki na kutomisa mutindu na yandi ya kusamba?

¹² Beto longa balongoki ya Biblia mutindu ya kusamba. Beto fwete ndimisa bo nde Yehowa ke waka bisambu ya bantu ya ntima-masonga. Beto songa bo nde ntangu bo ke samba, bo fwete songa Yehowa mambu yina kele na ntima na bo, ata mambu yina bo ke zola ve kusonga muntu ya nkaka. Beto monisa bo mpi nde Yehowa ke zabaka dezia bangindu na beto na ntwala nde beto tuba yo. (Tanga Nkunga 139:2-4.) Beto lenda songa balongoki na beto na kusamba Nzambi sambu yandi sadisa bo na kusoba bangindu mpi bikalulu na bo ya mbi. Mu mbandu, beto lenda sadisa longoki mosi ya Biblia ya me longuka mwa mingi kansi yandi ke landa kaka kusepela ti bafeti ya nkaka ya mimpani. Yandi ke zaba nde yo kele mbi kansi yandi ke sepela ti mambu ya nkaka ya bafeti yango. Beto lenda songa yandi na kusonga Yehowa bangindu na yandi sambu na bafeti yina mpi kulomba Yehowa na kusadisa yandi na kuzola kaka mambu yina Yehowa ke zolaka.—Nk. 97:10.

13. (a) Sambu na nki beto fwete bingisa balongoki na balukutakanu kukonda kusukinina? (b) Inki beto lenda sala sambu na kusadisa longoki na kudiwa ve yandi mosi na Nzo ya Kimfumu?

¹³ Beto bingisa balongoki ya Biblia na balukutakanu kukonda kusukinina. Sambu mambu yina bo ta wa mpi ta mona na balukutakanu lenda simba bantima na bo mpi kusadisa bo na kuyela na kimpeve. Songa longoki video Inki Ke Salamaka na Nzo ya Kimfumu? mpi bingisa yandi na lukutakanu. Kana mpila kele nge lenda pesa yandi mbongo ya transpore. Ntangu nge ke kwenda kulonguka ti yandi, yo kele mpi mbote na kukwenda ti bansamuni ya kuswaswana sambu yandi zabana ti bo. Kana nge sala mutindu yina, longoki na nge ta vanda ti banduku na dibundu mpi yo ta sadisa yandi na kudiwa ve yandi mosi na balukutakanu.

14. Inki lenda sadisa longoki na kuyela na kimpeve?

¹⁴ Lukanu na beto kele ya kusadisa balongoki ya Biblia na kuyela na kimpeve. (Baef. 4:13) Kana muntu me ndima kulonguka Biblia ti beto, yandi ke tulaka dikebi mingi na mambote yina yandi ta baka. Ntangu zola na yandi sambu na Yehowa ke kuma mingi, ntembe kele ve nde yandi ta yantika kusosa mpila ya kusadisa bantu ya nkaka mpi bampangi ya dibundu. (Mat. 22:37-39) Na ntangu ya me fwana, nge lenda songa yandi nde yandi lenda pesa mbongo ya makabu sambu na kupesa maboko na kisalu ya Kimfumu.

15. Inki mutindu beto lenda sadisa longoki ya Biblia na kuzaba mambu yina yandi lenda sala kana yandi me kutana ti diambu ya mpasi?

 ¹⁵ Beto longa balongoki ya Biblia mambu yina bo lenda sala kana bo me kutana ti mambu ya mpasi. Mu mbandu, yindula nde longoki na nge ya Biblia yina me kuma nsamuni ya me bakaka ntete ve mbotika me songa nge nde mpangi mosi na dibundu me tuba to me sala mambu yina me pesa yandi mpasi. Na kisika ya kukotila longoki to mpangi yina, monisa longoki mambu yina Biblia ke tuba sambu na diambu yango. Yandi lenda lolula mpangi yina mpi kuvila diambu yango, to yandi lenda kwenda kusolula ti mpangi yina na mawete mpi na zola yonso sambu na ‘kuvutula mpangi na nzila ya mbote.’ (Fwanisa ti Matayo 18:15.) Sadisa longoki na kuyidika na ntwala mambu yina yandi ta tuba. Songa yandi mutindu ya kusadila application JW Library, Mukanda ya Bansosa Sambu na Bambangi ya Yehowa mpi jw.org^® sambu na kuzaba mutindu ya mbote ya kuyidika diambu yina. Kana yandi ke zaba mutindu ya kuyidika mambu ti bantu ya nkaka na ntwala ya kubaka mbotika, yo ta sadisa yandi na kuzinga mbote ti bampangi na dibundu ntangu yandi ta baka mbotika.

16. Sambu na nki yo kele mbote na kunata bansamuni ya kuswaswana na kulonguka ti balongoki na nge ya Biblia?

¹⁶ Beto nata bansamuni ya kuswaswana ntangu beto ke kwenda kulonguka ti longoki na beto ya Biblia. Beto lenda nata mpi nkengi ya nziunga ntangu yandi me kwisa kutala dibundu na beto. Sambu nki? Katula bikuma yina beto me tubila, bansamuni ya nkaka lenda sadisa longoki na beto na mambu ya nkaka yina beto lenda kuka ve. Mu mbandu, yo lenda vanda nde longoki ya Biblia me salaka yonso sambu na kuyambula kunwa makaya kansi yandi ke vutukilaka yo bantangu ya nkaka. Nge lenda kwenda ti mpangi yina vandaka kunwa makaya na ntwala ya kukuma nsamuni. Yandi salaka bikesa ya kuyambula kansi bantangu ya nkaka yandi vandaka kuvutukila yo mpi nsuka-nsuka yandi yambulaka. Nsamuni yina lenda songa longoki mambu ya mfunu yina lenda sadisa yandi. Kana nge ke kukaka ve kulonguka Biblia ti longoki na ntwala ya mpangi yina kele ya kuyela na kimpeve, nge lenda lomba mpangi yina na kulonguka ti longoki na nge kilumbu yina. Kana nge ke nata bansamuni ya kuswaswana na kulonguka ti balongoki na nge, yo ta sadisa bo na kuzaba mambu mingi. Kuvila ve nde lukanu na beto kele ya kusadisa balongoki ya Biblia na kuyela na kimpeve.

17-18. Inki mambu nge fwete tadila ntangu nge ke zola kuyambula kulonguka Biblia ti muntu?

¹⁷ Kana longoki na nge ya Biblia ke yela ve na kimpeve, nge lenda kudiyula nde: ‘Keti mono fwete yambula kulonguka ti yandi?’ Na ntwala ya kuyambula kulonguka ti yandi, nge fwete tadila yandi ntete. Balongoki ya nkaka ke yelaka nswalu kansi bankaka ke yelaka malembe-malembe mpi yo ke lombaka ntangu mingi. Yo yina, kudiyula nde: ‘Keti longoki na mono ke yela nswalu to malembe-malembe?’ ‘Keti yandi me yantika “kuzitisa” to kusadila mambu yina yandi ke longuka?’ (Mat. 28:20) Longoki lenda  yela malembe-malembe kansi yandi fwete sala bansoba na luzingu na yandi.

¹⁸ Ebuna nki beto fwete sala kana longoki yina me longuka mwa ntangu mingi kansi yandi ke baka ve na mbalu kulonguka na yandi ya Biblia? Beto tadila diambu yai: Longoki na nge me manisa kulonguka mukanda Inki Biblia Ke Longa Beto? ziku yandi me yantika mpi kulonguka mukanda Bikala na Zola ya Nzambi kansi yandi me kwendaka ve ata mbala mosi na lukutakanu to na Lusungiminu. Mbala mingi yandi ke buyaka kulonguka sambu na bikuma ya kukonda mfunu. Kana yo kele mutindu yina, nge fwete solula ti yandi na masonga yonso. *

19. Inki nge lenda zabisa longoki yina nge ke mona nde yandi ke baka ve na mbalu kulongaka na yandi ya Biblia mpi nki diambu nge fwete tadila?

¹⁹ Nge lenda yula yandi ntete ngiufula yai: Inki diambu ya ngolo ke kanga nge nzila na kukuma Mbangi ya Yehowa? Yandi lenda tuba nde: ‘Mono ke zolaka kulonguka Biblia kansi mono ta kuma ve Mbangi ya Yehowa.’ Kana longoki kele ti bangindu ya mutindu yai na nima ya kulonguka bantangu mingi, keti yo kele mpenza mfunu na kulanda kulonguka ti yandi? To yandi lenda zabisa nge diambu yina ke kanga yandi nzila. Mu mbandu, yandi lenda songa nge nde yandi ta kuka ve kusamuna nzo na nzo. Sambu nge me zaba diambu yina ke pesa yandi mpasi, nge lenda sadisa yandi mbote.

20. Inki mutindu Bisalu 13:48 ke sadisa beto na kubakisa kana beto fwete landa kulonguka ti muntu to ve?

²⁰ Yo kele mawa na kumona nde balongoki ya nkaka kele bonso bantu ya Izraele ya bilumbu ya Ezekiele. Yehowa zabisaka Ezekiele sambu na bo nde: “Tala! Sambu na bo nge kele bonso nkunga mosi ya zola, yina bo me yimba na ndinga ya kitoko mpi ya bo me bula mbote-mbote ti kima ya kubudila miziki. Bo ta wa mambu ya nge ta tuba, kansi ata muntu mosi ve ta sadila yo.” (Ezek. 33:32) Yo lenda vanda mpasi na kuzabisa muntu nde beto ta longukaka diaka ve Biblia ti yandi. Kansi beto fwete zaba nde “ntangu ya me bikala kele fioti.” (1 Bak. 7:29) Na kisika ya kubebisa ntangu ti muntu yina ke yela ve na kimpeve, beto fwete sosa muntu yina kele ti “nkadilu ya mbote sambu na kubaka luzingu ya mvula na mvula.”—Tanga Bisalu 13:48.

21. Inki kele mukapu ya mvu 2020 mpi sambu na nki yo kele kibeni mfunu?

²¹ Mukapu ya mvu 2020 ta sadisa beto na kutomisa mutindu na beto ya kusala kisalu ya kukumisa bantu balongoki. Yo kele ti bangogo yina Yezu tubaka na lukutakanu ya mfunu yina yandi salaka na ngumba ya Galilea. Yandi tubaka nde: “Beno kwenda mpi beno kumisa bantu . . . , balongoki, beno botika bo.”—Mat. 28:19.