DISOLO YA KULONGUKA 4
“Mpeve Yo Mosi Ke Taka Kimbangi”
“Mpeve yo mosi ke taka kimbangi ti mpeve na beto nde beto kele bana ya Nzambi.”—BAR. 8:16.
NKUNGA 25 Kima ya Nzambi
MAMBU YINA DISOLO YAI KE TUBILA *
Na mutindu ya kuyituka, Yehowa tiamunaka mpeve santu na Bakristu kiteso ya 120 yina vukanaka na Pantekoti (Tala baparagrafe 1-2)
1-2. Inki diambu ya kuyituka salamaka na Pantekoti ya mvu 33 ya ntangu na beto?
NA SUKA ya Lumingu ya Pantekoti na mvu 33 ya ntangu na beto na Yeruzalemi, balongoki kiteso ya 120 vukanaka na shambre mosi ya zulu. (Bis. 1:13-15; 2:1) Bilumbu fioti na ntwala, Yezu songaka bo na kubikala na Yeruzalemi sambu bo ta baka dikabu mosi ya mfunu mingi. (Bis. 1:4, 5) Inki salamaka na nima?
2 “Na mbala mosi makelele katukaka na zulu, bonso makelele ya mupepe yina ke bula ngolo mpi yo fulukaka na nzo ya mvimba.” Na nima “baludimi bonso ya tiya” kulumukaka na ba-ntu ya balongoki, “ebuna bo yonso fulukaka ti mpeve santu.” (Bis. 2:2-4) Yehowa pesaka balongoki yai mpeve santu na mutindu ya kuyituka. (Bis. 1:8) Balongoki yai kumaka Bakristu ya ntete yina bo me tulaka mafuta na mpeve santu * yina bakaka dibaku ya kuyala na zulu ti Yezu.
INKI KE SALAMAKA KANA BO ME TULA MUNTU MAFUTA?
3. Sambu na nki Bakristu yina vukanaka na Pantekoti bakisaka pwelele nde Nzambi tulaka bo mafuta na mpeve santu?
3 Kana nge vandaka ti balongoki yina vukanaka na shambre ya zulu na Pantekoti, nge zolaka kuvila yo ve ata fioti. Kima mosi bonso ludimi ya tiya zolaka kukulumuka na ntu na nge mpi nge zolaka kutuba ndinga ya nzenza. (Bis. 2:5-12) Nge zolaka kubakisa pwelele nde Nzambi me tula nge mafuta na mpeve santu. Keti Bakristu yonso yina bo ke tulaka mafuta na mpeve santu ke monaka bidimbu ya kuyituka mpi bo ke tulaka bo yonso mafuta na mutindu mosi? Ve. Inki mutindu beto me zaba yo?
4. Na mvu-nkama ya ntete, keti Nzambi tulaka Bakristu yonso mafuta na mpeve na ntangu mosi na luzingu na bo? Tendula.
4 Beto tubila ntangu yina Nzambi lenda tula muntu mafuta. Na Pantekoti ya mvu 33 ya ntangu na beto, Nzambi tulaka ve kaka Bakristu kiteso ya 120 yina vukanaka na shambre yina ya zulu mafuta na mpeve santu. Kaka na kilumbu yina na nima, Nzambi tulaka mpi Bakristu ya nkaka kiteso ya 3 000 mafuta na mpeve santu. Yandi tulaka bo mafuta ntangu bo bakaka mbotika. (Bis. 2:37, 38, 41) Kansi na bamvula yina landaka, Nzambi vandaka ve kutula Bakristu yonso mafuta kaka na ntangu ya mbotika. Mu mbandu, Nzambi tulaka bantu ya Samaria mafuta ntangu fioti na nima ya kubaka mbotika. (Bis. 8:14-17) Nzambi tulaka Korneye mpi bantu ya nzo na yandi mafuta na mutindu mosi ya me swaswana, Nzambi tulaka bo mafuta na ntwala nde bo baka mbotika.—Bis. 10:44-48.
5. Mutindu 2 Bakorinto 1:21, 22 ke monisa yo, nki ke salamaka kana Nzambi me tula muntu mafuta na mpeve santu?
5 Beto tubila mpi diambu yina ke salamaka kana Nzambi me tula muntu mafuta na mpeve santu. Na luyantiku, Bakristu ya nkaka yina Nzambi ke tulaka mafuta lenda ndima na mpasi nde Nzambi me tula bo mafuta na mpeve santu. Bo lenda kudiyula nde, ‘Sambu na nki Nzambi me pona kaka mono?’ Bakristu ya nkaka lenda ndima kukonda mpasi nde Nzambi me tula bo mafuta. Ata mpidina, ntumwa Polo tendulaka diambu yina ke kuminaka bantu yonso yina Nzambi ke tulaka mafuta, yandi tubaka nde: “Ntangu beno kwikilaka, bo tulaka beno kidimbu * na nzila na yandi ti mpeve santu yina Nzambi silaka. Mpeve santu kele kipiku yina yandi me pesaka na ntwala ya ke monisa nde beto ta baka dikabu na beto.” (Baef. 1:13, 14; noti na nsi ya lutiti.) Yehowa ke sadilaka mpeve santu na yandi sambu yo sadisa Bakristu yina yandi me tula mafuta na kubakisa kibeni pwelele nde yandi me pona bo. Na mutindu yina, mpeve santu kele “kidimbu [kima yina bo me simbisa to lusilu]” sambu na kundimisa Bakristu yina bo me tulaka mafuta nde bo ta zinga mvula na mvula na zulu kansi na ntoto ve.—Tanga 2 Bakorinto 1:21, 22.
6. Inki Mukristu yina bo me tula mafuta fwete sala sambu na kubaka lufutu na zulu?
6 Keti Mukristu yina bo me tula mafuta ke bakaka mbala mosi lufutu na yandi na zulu? Ve. Yandi ke zabaka kaka nde Nzambi me pona yandi na kuzinga na zulu. Kansi yandi fwete vila ve ndongisila yai: “Bampangi, beno sala ngolo kibeni sambu na kuzikisa beno mosi nde kubinga yina bo me bingaka beno mpi kusola yina bo me solaka beno kele ya kieleka, sambu kana beno ke landa kusala mambu yai, beno ta bwa ve ata fioti.” (2 Pie. 1:10) Ata Nzambi me pona Mukristu mosi yina yandi me tula mafuta, disongidila me binga yandi na kukwenda na zulu, Mukristu yina ta baka lufutu na yandi kaka kana yandi bikala ya kwikama tii na nsuka.—Bafil. 3:12-14; Baeb. 3:1; Kus. 2:10.
INKI MUTINDU MUKRISTU KE ZABAKA NDE NZAMBI ME TULA YANDI MAFUTA?
7. Inki mutindu Bakristu yina bo me tulaka mafuta ke zabaka nde Nzambi me binga bo na kukwenda na zulu?
7 Inki mutindu Mukristu ke zabaka nde Nzambi me binga yandi na kukwenda na zulu? Mvutu kele pwelele na mambu yina Polo songaka Bakristu ya Roma “yina bo me bingaka sambu na kuvanda basantu.” Yandi songaka bo nde: “Beno bakaka ve mpeve ya kimpika yina ke pesa beno diaka boma, kansi beno bakaka mpeve yina Nzambi ke pesaka sambu na kundima beno bonso bana na yandi, na nzila ya mpeve yina beto ke tubaka na ndinga ya ngolo nde: ‘Aba, Tata!’ Mpeve yo mosi ke taka kimbangi ti mpeve na beto nde beto kele bana ya Nzambi.” (Bar. 1:7; 8:15, 16) Nzambi ke sadilaka mpeve santu na yandi sambu na kusadisa Bakristu yina yandi me tula mafuta na kubakisa pwelele nde yandi me binga bo na kukwenda na zulu.—1 Bate. 2:12.
8. Inki mutindu 1 Yoane 2:20, 27 ke monisa nde Bakristu yina bo me tulaka mafuta ke vandaka ve na mfunu nde muntu ya nkaka kusonga bo nde Nzambi me pona bo?
8 Bakristu yina Yehowa me bingaka na kukwenda na zulu ke vandaka ve ti badute ata fioti nde Yehowa me tulaka bo mafuta. (Tanga 1 Yoane 2:20, 27.) Ya kieleka, Bakristu yina bo me tulaka mafuta fwete landa malongi ya Yehowa na dibundu bonso Bakristu yonso. Kansi bo ke vandaka ve na mfunu nde muntu mosi kusonga bo nde Nzambi me pona bo. Yehowa ke sadilaka ngolo na yandi ya me luta bangolo yonso na zulu mpi na ntoto, disongidila mpeve santu na yandi sambu yo sadisa Bakristu yina yandi me tulaka mafuta na kubakisa pwelele nde yandi me pona bo.
BO KE ‘BUTUKAKA MBALA ZOLE’
9. Inki ke sobaka na Mukristu yina Nzambi me tula mafuta mutindu Baefezo 1:18 ke monisa yo?
9 Bubu yai, bansadi mingi ya Nzambi lenda bakisa mpenza ve diambu yina ke salamaka ntangu Nzambi me tula Mukristu mosi mafuta. Sambu na nki? Sambu bo kele ve Bakristu yina bo me tulaka mafuta. Nzambi gangaka bantu sambu bo zinga mvula na mvula na ntoto kansi na zulu ve. (Kuy. 1:28; Nk. 37:29) Kansi Yehowa me ponaka kaka bantu fioti sambu na kuzinga na zulu. Yo yina, ntangu yandi ke tulaka bo mafuta, yandi ke sobaka kibeni kivuvu mpi mabanza na bo sambu bo kuma kuyindula mingi luzingu na zulu.—Tanga Baefezo 1:18.
10. ‘Kubutuka mbala zole’ ke tendula nki? (Tala mpi noti na nsi ya lutiti.)
10 Ntangu Nzambi ke tulaka Bakristu mafuta na mpeve santu, bo ‘ke butukaka mbala zole’ to ‘ke butukaka na zulu.’ * Yezu monisaka mpi nde muntu yina kele ve Mukristu ya bo me tulaka mafuta lenda bakisa ve mbote-mbote mutindu bo ‘ke butukaka mbala zole’ to ‘ke butukaka na mpeve.’—Yoane 3:3-8; noti na nsi ya lutiti.
11. Tendula mutindu mabanza ya Bakristu yina bo me tulaka mafuta ke sobaka.
11 Inki nsoba ke salamaka na mabanza ya Bakristu yina bo me tula mafuta? Na ntwala nde Yehowa kutula bo mafuta, bo vandaka ti kivuvu ya kuzinga mvula na mvula na ntoto. Bo vandaka kuvingila na kiese yonso ntangu yina Yehowa ta katula mambu yonso ya mbi na ntoto mpi ta kumisa ntoto Paladisu. Ziku bo vandaka kuyindula mutindu bo ta yamba mpangi to nduku na bo yina me fwaka. Ntangu Nzambi tulaka bo mafuta, mabanza na bo sobaka. Inki bo kumaka kuyindula? Yo ke tendula ve nde bo vandaka diaka ve kusepela ti kivuvu ya kuzinga mvula na mvula na ntoto. Bo sobaka ve mabanza na bo sambu bo kumaka kuniokwama na mabanza mpi na mawi. Bo kumaka ve kuyindula mbala mosi nde kuzinga mvula na mvula na ntoto ta vanda ve kitoko. Kansi Yehowa ke sadilaka mpeve santu na yandi sambu na kusoba mutindu na bo ya kuyindula mpi kivuvu yina bo vandaka kuzola.
12. Mutindu 1 Piere 1:3, 4 ke monisa yo, nki mutindu Bakristu yina bo me tulaka mafuta ke waka sambu na kivuvu na bo?
12 Mukristu yina bo me tula mafuta lenda yindula nde yandi me fwana ve na kubaka dikabu yina ya mfunu mingi. Ata mpidina, yandi ke vandaka ve ti badute ata fioti nde Yehowa me pona yandi. Yandi ke vandaka na kiese mpi ntonda ntangu yandi ke yindulaka kivuvu na yandi ya kuzinga na zulu.—Tanga 1 Piere 1:3, 4.
13. Inki mutindu Bakristu yina bo me tulaka mafuta ke tadilaka luzingu na bo awa na ntoto?
13 Keti yo ke tendula nde Bakristu yina bo me tulaka mafuta ke zolaka kufwa? Ntumwa Polo pesaka mvutu na ngiufula yai. Yandi fwanisaka nitu na bo ya kinsuni ti tenta mpi tubaka nde: “Ya kieleka, beto bantu yina kele na tenta yai, beto ke dila na ntima, beto ke kudiyangisa mingi, sambu beto ke zola ve kukatula nzo yai, kansi beto ke zola kulwata nzo yina ya nkaka, sambu luzingu kumina nitu yina ke fwaka.” (2 Bak. 5:4) Bakristu yai ke zolaka luzingu awa na ntoto mpi ke zolaka ve nde luzingu na bo kusuka nswalu. Bo ke sepelaka kuzinga mpi kusadila Yehowa konso kilumbu ti mabuta mpi banduku na bo. Na luzingu na bo ya mvimba, bo ke yibukaka ntangu yonso kivuvu ya kitoko mingi yina bo kele na yo sambu na bilumbu ke kwisa.—1 Bak. 15:53; 2 Pie. 1:4; 1 Yoa. 3:2, 3; Kus. 20:6.
KETI YEHOWA ME TULAKA NGE MAFUTA?
14. Inki mambu ke monisaka ve nde bo me tula muntu mafuta na mpeve santu?
14 Mbala ya nkaka nge ke kudiyulaka kana Nzambi me tulaka nge mafuta na mpeve santu. Kana mpidina, tadila bangiufula yai ya mfunu: Keti nge ke vandaka na mpusa ya ngolo ya kusala luzolo ya Yehowa? Keti nge kele kikesa mingi mpenza na kisalu ya kusamuna? Keti nge ke longukaka mbote-mbote Ndinga ya Nzambi mpi ke longukaka “mambu ya mudindu ya Nzambi”? (1 Bak. 2:10) Keti mbuma ya mbote yina kisalu na nge ya kusamuna ke butaka ke ndimisaka nge nde Yehowa ke sadisaka nge? Keti nge ke vandaka na mpusa ya ngolo ya kusadisa bantu na kimpeve? Keti nge kele ti banzikisa ya ke ndimisa nge nde Yehowa ke sadisaka nge na mambu mingi na luzingu na nge? Kana mvutu kele ee na bangiufula yai, keti yo ke tendula nde Nzambi me binga nge na kukwenda na zulu? Ve. Sambu na nki? Sambu bansadi yonso ya Nzambi lenda sala mambu yai, yo vanda bayina bo me tulaka mafuta to mameme ya nkaka. Na nsadisa ya mpeve santu, Yehowa lenda pesa bansadi na yandi ngolo ya kusala mambu yai, yo vanda bayina kele ti kivuvu ya kuzinga na zulu to na ntoto. Kana nge ke kudiyula nde keti Nzambi me tulaka nge mafuta na mpeve santu to ve, pana yo ke tendula nde Nzambi me tulaka nge ve mafuta. Bakristu yina Nzambi me tulaka mafuta ke kudiyulaka diaka ve kana Yehowa me tulaka bo mafuta to ve. Bo ke bakisaka yo pwelele.
Yehowa sadilaka mpeve santu na yandi sambu na kupesa Abrahami, Sara, Davidi mpi Yoane Mbotiki ngolo ya kusala mambu ya kuyituka kansi yandi sadilaka yo ve sambu na kupesa bo kivuvu ya kuzinga na zulu (Tala baparagrafe 15-16) *
15. Inki mutindu beto me zaba nde bansadi yonso ve yina bakaka mpeve santu ta kwenda na zulu?
15 Biblia ke tubilaka bambandu mingi ya bansadi ya kwikama ya Nzambi yina bakaka mpeve santu kansi bo vandaka ve ti kivuvu ya kuzinga na zulu. Mpeve santu twadisaka Davidi. (1 Sam. 16:13) Mpeve santu sadisaka yandi na kubakisa mambu ya mudindu ya Yehowa mpi na kusonika mambu ya nkaka na Biblia. (Mar. 12:36) Ata mpidina, ntumwa Piere tubaka nde “Davidi tombukaka ve na zulu.” (Bis. 2:34) Yoane Mbotiki vandaka ya “kufuluka na mpeve santu.” (Luka 1:13-16) Yezu tubaka nde ata muntu mosi ve lutaka Yoane kansi yandi tubaka nde Yoane vandaka ve na kati ya bansadi ya Nzambi yina ta yala na Kimfumu ya zulu. (Mat. 11:10, 11) Yehowa sadilaka mpeve santu na yandi sambu na kupesa bantu yai ngolo ya kusala mambu ya kuyituka kansi ve sambu na kupona bo na kuzinga na zulu. Keti yo ke tendula nde kwikama ya bansadi yai vandaka fioti mpi ya bayina ta yala na zulu kele mingi? Ve. Yo ke tendula kaka nde Yehowa ta futumuna bo sambu bo zinga na ntoto yina ta kuma Paladisu.—Yoa. 5:28, 29; Bis. 24:15.
16. Inki lufutu bansadi mingi ya Nzambi ya bubu yai ke vingilaka?
16 Bubu yai, bansadi mingi ya Nzambi kele ve ti kivuvu ya kuzinga na zulu. Bonso Abrahami, Sara, Davidi, Yoane Mbotiki mpi bansadi mingi ya nkaka ya Nzambi yina zingaka na ntangu ya ntama, bo ke vingilaka na kiese yonso kuzinga na ntoto na nsi ya luyalu ya Kimfumu ya Nzambi.—Baeb. 11:10.
17. Inki bangiufula beto ta tadila na disolo yina ke landa?
17 Mutindu Bakristu ya nkaka yina bo me tulaka mafuta kele diaka na ntoto tii bubu yai, beto lenda kudiyula mwa bangiufula. (Kus. 12:17) Mu mbandu, nki mutindu bampangi yina bo me tulaka mafuta fwete kuditadila? Kana mpangi mosi me yantika kudia dimpa mpi kunwa vinu na Lusungiminu, nki mutindu nge fwete tadila yandi? Inki nge ta tuba kana ntalu ya Bakristu yina ke tuba nde Nzambi me tula bo mafuta ke kuma kaka mingi? Keti nge fwete kudiyangisa? Disolo yina ke landa ta pesa bamvutu na bangiufula yai.
^ par. 5 Banda na Pantekoti ya mvu 33 ya ntangu na beto, Yehowa me pesaka Bakristu ya nkaka kivuvu mosi ya kitoko mingi, kivuvu ya kuyala na zulu ti Mwana na yandi. Inki mutindu Bakristu yai ke zabaka nde Yehowa me pona bo sambu na kuzinga na zulu? Inki ke salamaka ntangu Yehowa ke ponaka muntu sambu yandi zinga na zulu? Mambu ya kele na disolo yai me katuka na Nzozulu ya Nkengi ya Yanuari 2016. Yo ta pesa bamvutu na bangiufula yina ke yangisaka bantu mingi.
^ par. 2 NTENDULA YA BANGOGO: Kutula mafuta na mpeve santu: Yehowa ke sadilaka mpeve santu sambu na kupona muntu yina ta yala ti Yezu na zulu. Na nsadisa ya mpeve santu na yandi, Yehowa ke pesaka muntu yina lusilu sambu na bilumbu ke kwisa to “kipiku yina yandi [ke] pesaka na ntwala.” (Baef. 1:13, 14) Bakristu yai lenda tuba nde mpeve santu “ke taka kimbangi” to ke monisa pwelele nde bo ta baka dikabu na zulu.—Bar. 8:16.
^ par. 5 NTENDULA YA BANGOGO: Kidimbu. Kidimbu yai ke tendula ve nde muntu yina bo me tula mafuta me baka lufutu, yandi ta baka lufutu kaka kana yandi me bikala ya kwikama ti na lufwa na yandi to na mpasi ya nene.—Baef. 4:30; Kus. 7:2-4; tala “Bangiufula ya Batangi” na Nzozulu ya Nkengi ya Aprili 2016.
^ par. 10 Sambu na kuzaba bantendula ya nkaka ya me tala ‘kubutuka mbala zole,’ tala Nzozulu ya Nkengi ya Mayi 1, 2009, balut. 3-12.
NKUNGA 27 Kumonana ya Bana ya Nzambi
^ par. 57 NTENDULA YA BIFWANISU: Ata beto kele na boloko sambu na lukwikilu na beto to beto kele ti kimpwanza ya kusamuna mpi ya kulonga kieleka, beto lenda vingila na kiese yonso kuzinga na nsi ya luyalu ya Kimfumu ya Nzambi.
