BIBLIA kele ti bangogo ya masonga ya bantu yina vandaka “ti mawi bonso ya beto.” (Yak. 5:17) Mu mbandu, beto lenda bakisa mbote mambu yina Polo zolaka kutuba na Baroma 7:21-24 nde: “Ntangu mono ke zola kusala mambu ya mbote, mambu ya mbi kele na mono. . . . Mono kele muntu ya mawa kibeni!” Kutuba yai ya masonga ke siamisaka beto ntangu beto ke salaka ngolo sambu na kununga bifu na beto.

Polo basisaka mpi mawi ya nkaka ya masonga. Na Bagalatia 2:20, yandi ndimaka nde Yezu ‘zolaka yandi mpi fwaka kibeni sambu na yandi’! Keti beto mpi ke kudiwaka mutindu yina? Mbala ya nkaka.

Kana beto ke kudimona mpamba sambu na masumu yina beto me salaka, yo lenda vanda mpasi bantangu ya nkaka na kundima nde Yehowa ke zolaka beto, me lolulaka beto mpi nde Yehowa me pesaka kibeni kimenga ya Kristu sambu na beto. Keti Yezu ke zolaka mpenza nde beto tadila kimenga na yandi mutindu yai? Kana mpidina, nki beto fwete sala? Beto tadila bangiufula yai zole.

Ya kieleka, Yezu ke zolaka nde beto tadila kimenga na yandi bonso dikabu sambu na beto. Inki mutindu beto lenda ndima yo? Yindula mambu yina kele na Luka 23:39-43. Muntu mosi kele na nti ya mpasi na lweka ya Yezu. Muntu yango ke ndima nde yandi me salaka masumu. Yo fwete vanda nde mambu yina yandi salaka vandaka mbi kibeni, yo yina bo pesaka yandi ndola yina bo vandaka kupesa bantu ya kuluta mbi. Ata yandi vandaka kuwa mpasi, yandi bondilaka Yezu nde: “Yibuka mono ntangu nge ta kwisa na Kimfumu na nge.”

Yezu tubaka nki? Yindula mpasi yina Yezu vandaka kuwa ntangu yandi ke balula ntu sambu na kutala muntu yina ya mbi. Ata Yezu vandaka kulakana, yandi me mweta mpi me ndimisa muntu yango nde: “Ya kieleka mono ke tubila nge bubu yai nde, nge ta vanda ti mono na Paladisu.” Yezu lendaka kuyibukisa muntu yango nde ‘Mwana ya muntu kwisaka sambu na kupesa luzingu na yandi bonso nkudulu sambu na bantu mingi.’ (Mat. 20:28) Kansi na mawete yonso, Yezu monisaka nde kimenga na yandi vandaka mpi sambu na muntu yina. Yandi tubaka na mawete ntangu yandi sadilaka ngogo “nge” ti “mono.” Yandi songaka muntu yina nde yandi ta zinga na paladisu ya ntoto.

Ntembe kele ve nde Yezu zolaka nde muntu yina kundima kimenga na yandi bonso dikabu. Kana Yezu kudiwaka mutindu yai sambu na muntu ya mbi yina zwaka ve dibaku ya kusadila Nzambi, ntembe kele ve nde yandi ta kudiwa mutindu mosi sambu na Mukristu yina me bakaka mbotika mpi ke sadila Nzambi. Inki lenda sadisa beto na kundima nde kimenga ya Yezu ta natila beto mambote ata beto me salaka masumu?

Kisalu ya kusamuna vandaka ti bupusi na mutindu Polo vandaka kutadila kimenga ya  Yezu. Inki mutindu? Yandi ke tuba nde: “Mono ke pesa ntonda na Kristu Yezu Mfumu na beto, yina pesaka mono ngolo, sambu yandi monaka mono ya kwikama na mutindu yandi pesaka mono kisalu, ata mono vandaka ntete muntu ya ke vwezaka, ya ke monisaka bantu mpasi mpi ya kukonda luzitu.” (1 Tim. 1:12-14) Kisalu yina Yezu pesaka Polo ndimisaka yandi nde Yezu wilaka yandi mawa, vandaka kuzola yandi mpi tudilaka yandi ntima. Mutindu mosi mpi Yezu me pesaka beto kisalu ya kusamuna. (Mat. 28:19, 20) Keti yo ke ndimisaka beto mpi nde Yezu fwaka kibeni sambu na beto?

Albert salaka bamvula 34 na nganda ya dibundu mpi yandi me vutuka ntama ve. Yandi ke tuba nde: “Disumu na mono kele ntangu yonso na ntwala na mono. Kansi, ntangu mono ke samunaka mono ke monaka nde Yezu me pesaka mono kisalu bonso ntumwa Polo. Yo ke pesaka mono kikesa mpi kiese sambu na luzingu ya bubu mpi ya bilumbu ke kwisa.”—Nk. 51:3.

Allan vandaka kusala mambu ya mbi mpi ya nku na ntwala ya kulonguka kieleka, yandi ke tuba nde: “Tii bubu mono ke yindulaka mambu yonso ya mbi yina mono vandaka kusala bantu. Bantangu ya nkaka yo ke yangisaka mono. Kansi mono ke pesaka Yehowa matondo mutindu yandi me pesaka muntu ya masumu bonso mono nzila ya kulonga bantu ya nkaka nsangu ya mbote. Ntangu mono ke monaka bantu ke ndima nsangu ya mbote, yo ke yibukisaka mono nde Yehowa kele mbote mpi zola. Mono ke monaka nde yandi ke sadilaka mono sambu na kusadisa bantu yina ke sala ngolo na kuyambula mambu ya mbi bonso mono.”

Kisalu na beto ya kusamuna ke sadisaka beto na kusala mambu ya mbote mpi kuvanda ti mabanza ya mbote. Yo ke ndimisaka beto nde Yezu ke wilaka beto mawa, ke zolaka beto mpi ke tudilaka beto ntima.

Ntima na beto lenda landa kuyangisa beto sambu na masumu yina beto me salaka tii ntangu bo ta fwa nsi-ntoto ya Satana. Inki ta sadisa beto na kununga mabanza yai?

Jean ke kudiyangisaka sambu na luzingu ya mbi yina yandi vandaka na yo ntangu yandi vandaka toko, yandi ke tuba nde: “Mono ke zolaka verse yai mingi: ‘Nzambi kele nene kuluta bantima na beto.’” (1 Yoa. 3:19, 20) Beto mpi lenda baka kikesa na kuzaba nde Yehowa ti Yezu ke bakisaka nde beto kele bantu ya masumu. Yibuka nde bo me pesaka ve kimenga sambu na bantu ya kukuka kansi sambu na bantu ya masumu yina ke balula ntima.—1 Tim. 1:15.

Ntangu beto ke sambaka mpi ke yindulaka mingi mutindu Yezu ke sadilaka bantu ya masumu mambu mpi ntangu beto ke salaka ngolo sambu na kusala kisalu ya kusamuna yina yandi me pesaka beto, beto ke ndimaka nde kimenga ya Yezu kele sambu na beto. Kana nge sala mutindu yai, nge lenda tuba bonso Polo nde: Yezu “zolaka mono mpi fwaka sambu na mono.”