Baverse yai ke tubila bikalulu uvwa ya mbote: Bikalulu ya “mbuma ya mpeve kele zola, kiese, ngemba, ntima ya nda, ntima ya mbote, bumbote, lukwikilu, mawete, kudiyala.” Kansi beto fwete yindula ve nde mpeve santu lenda sadisa beto na yedisa kaka bikalulu yai ya baverse yai ke tubila.

Tala mambu yina ntumwa Polo tubaka na baverse yina kele na ntwala: “Bisalu ya nitu . . . kele pite, mambu ya mvindu, kusala mambu ya mbi kukonda nsoni, lusambu ya biteki, bisalu ya bampeve ya mbi, kimbeni, kuswana, kimpala, nganzi, kukonda kuwakana, kukabwana, kusala tu-mabundu, kulula, kulawuka malafu, bankinsi yina bantu ke salaka mambu ya kisaka-saka, mpi mambu ya me fwanana ti yai.” (Bag. 5:19-21) Yo kele pwelele nde katula mambu yina Polo tangaka, kele ti mambu ya nkaka yina kele mpi “bisalu ya nitu” mu mbandu yina bo me tubila na Bakolosai 3:5. Na nima ya kutanga bikalulu uvwa yina ya mbote, yandi tubaka nde: “Ata nsiku mosi ve ke buyisaka mambu yai.” Yo ke monana nde Polo tangaka ve bikalulu yonso ya mbote yina mpeve santu lenda sadisa beto na kuyedisa.

Mambu yina Polo sonikaka ke wakana ti yina yandi sonikilaka dibundu ya Efezo: “Mbuma ya nsemo kele mitindu yonso ya bumbote mpi ya lunungu mpi ya kieleka.” (Baef. 5:8, 9) Ya kieleka, “bumbote,” lunungu mpi kieleka kele bikalulu ya “mbuma ya nsemo.” Yo kele mpi bikalulu ya “mbuma ya mpeve.”

Yo yina Polo siamisaka Timoteo na kulanda bikalulu sambanu ya mbote: “Lunungu, kukangama na Nzambi, lukwikilu, zola, kukanga-ntima, mpi mawete.” (1 Tim. 6:11) Bikalulu tatu mpamba na kati ya bikalulu yango kele na bikalulu ya “mbuma ya mpeve” yina Bagalatia 5:22, 23 ke tubila. Kansi Timoteo vandaka mpi ti mfunu ya lusadisu ya mpeve santu sambu yandi yedisa bikalulu yai ya nkaka: Lunungu, kukangama na Nzambi, mpi kukanga-ntima.—Fwanisa ti Bakolosai 3:12; 2 Piere 1:5-7.

Yo yina, Bagalatia 5:22, 23 ke tanga ve bikalulu yonso ya mbote yina me fwana sambu na Bakristu. Mpeve santu ya Nzambi lenda sadisa beto na kuyedisa bikalulu nana yina Biblia ke binga bikalulu ya “mbuma ya mpeve.” Kansi kele ti bikalulu mingi ya nkaka yina beto fwete yedisa sambu na kuyela na kimpeve mpi kulwata “kimuntu ya mpa yina bo gangaka na kuwakana ti luzolo ya Nzambi na lunungu mpi na kwikama ya kieleka.”—Baefezo 4:24.