DISOLO YA KULONGUKA 26
“Beno Vutukila Mono”
“Beno vutukila mono, ebuna mono ta vutukila beno.”—MAL. 3:7.
NKUNGA 102 ‘Sadisa Bayina Me Lemba’
MAMBU YINA DISOLO YAI KE TUBILA *
1. Inki mutindu Yehowa ke waka ntangu dimeme na yandi me vutukila yandi?
MUTINDU beto monaka yo na disolo yina me luta, Yehowa ke kudifwanisaka ti ngungudi ya ke kebaka mbote dimeme mosi-mosi. Yandi ke sosaka konso dimeme yina ke vila. Yehowa zabisaka bantu ya Izraele yina yambulaka kusadila yandi nde: “Beno vutukila mono, ebuna mono ta vutukila beno.” Beto ke zaba nde tii bubu yai Yehowa ke vandaka kaka ti mabanza ya mutindu yina sambu yandi ke tuba nde: “Mono ke sobaka ve.” (Mal. 3:6, 7) Yezu tubaka nde Yehowa ti bawanzio ke waka kiese mingi kana nsadi mosi yina vilaka me vutukila Yehowa.—Luka 15:10, 32.
2. Inki beto ta longuka na disolo yai?
2 Beto tadila bingana tatu ya Yezu yina ke tubila mingi bantu yina me bwaka madidi na kimpeve. Beto ta tubila bikalulu ya mfunu yina ta sadisa beto na kusadisa bampangi ya mutindu yai na kuvutukila Yehowa. Beto ta tubila mpi sambu na nki yo kele mfunu na kusadisa bampangi yina me lembaka na kimpeve.
YANDI SOSAKA MBONGO YA BIBENDE YINA VILAKA
3-4. Sambu na nki nkento yina bo me tubila na Luka 15:8-10 sosaka na dikebi yonso mbongo na yandi yina vilaka?
3 Beto fwete sala bikesa sambu na kuzwa bampangi yina ke zola kuvutukila Yehowa. Kingana ya Yezu yina kele na mukanda ya Luka ke tubila nkento mosi yina vandaka kusosa kima na yandi ya ntalu yina vilaka, mbongo ya bibende ya drakime mosi. Kima ke benda dikebi na beto mingi na kikanga yai kele mutindu nkento yina sosaka mbongo yina vilaka.—Tanga Luka 15:8-10.
4 Yezu tubilaka kiese ya mingi yina nkento yina waka ntangu yandi monaka mbongo yina vilaka. Na bilumbu ya Yezu, yo ke monana nde bankento ya nkaka ya Bayuda vandaka kupesa bana na bo ya bankento yina ke kwela mbongo kumi ya bibende na kilumbu ya makwela na bo. Mbala ya nkaka, mbongo yina nkento yina vidisaka vandaka na kati ya mbongo yina mama na yandi pesaka yandi na kilumbu ya makwela na yandi mpi yandi vandaka kubaka yo na mbalu mingi. Nkento yango yindulaka nde mbongo yina bwaka na ntoto na nzo, yo yina yandi pedisaka mwinda mpi sosaka yo kansi yandi monaka yo ve. Mbala ya nkaka mwinda na yandi ya mafutu vandaka ve kupesa nsemo ya me fwana sambu yandi mona mbongo yina ya kibende ya fioti. Nsuka-nsuka yandi kombaka na dikebi yonso nzo ya mvimba. Na bamvindu yina yandi vukisaka, yandi monaka mbongo na yandi ya mbalu mingi, ke sema na nsemo ya mwinda. Yandi waka kiese mingi yo yina yandi bingaka banduku na yandi mpi bantu ya pene-pene sambu na kusonga bo nsangu yina ya kiese.
5. Sambu na nki yo lenda vanda mpasi na kuzaba bampangi yina ke kwendaka diaka ve na balukutakanu?
5 Mutindu kingana ya Yezu me monisa yo, yo ke vandaka mpasi na kuzwa kima yina me vila. Mutindu mosi, yo lenda lomba beto bikesa mingi sambu na kuzwa bampangi yina ke kwisaka diaka ve na balukutakanu. Ziku bamvula mingi me luta, bo ke kwisaka diaka ve na balukutakanu. Bankaka nkutu me kwendaka kuzinga na bisika ya nkaka mpi bampangi na bisika yina ke zabaka bo ve. Kansi na ntangu yai, bampangi ya nkaka yina me lembaka na kimpeve kele na nzala ya ngolo ya kuvutukila Yehowa. Bo kele na nzala ya kuvukana diaka ti bansadi ya Yehowa sambu na kusadila Yehowa, yo yina bo kele na mfunu nde beto sadisa bo.
6. Inki mutindu bampangi yonso na dibundu lenda kudipesa na kusosa bampangi yina ke kwisaka diaka ve na balukutakanu mpi ke samunaka diaka ve?
6 Banani fwete sosa bampangi yina ke kwisaka diaka ve na balukutakanu? Beto yonso, yo vanda bankuluntu, bapasudi-nzila, bantu ya dibuta mpi bansamuni yonso. Keti nduku to muntu ya dibuta na beno me lembaka na kimpeve? Keti na kisalu ya nzo na nzo to ntangu nge ke samuna na bisika yina bantu kele mingi nge me kutanaka ti mpangi yina ke kwendaka diaka ve na balukutakanu mpi ke samunaka diaka ve? Songa yandi nde kana yandi me zola, nge ta pesa nimero na yandi ya telefone to adresi na yandi na bankuluntu ya dibundu na beno.
7. Mambu yina mpangi Toma me tuba ke longa beto nki?
7 Inki mutindu bankuluntu ke zwaka bampangi yina kele na mfunu ya kuvutukila Yehowa? Beto tadila mambu yina mpangi Toma, * yina kele nkuluntu na Espagne tubaka. Yandi me sadisaka bampangi kuluta 40 yina lembaka na kimpeve na kuvutukila Yehowa. Yandi ke tuba nde: “Mono ke yulaka ntete bampangi kana bo lenda zaba kisika bampangi yina me lembaka na kimpeve ke zingaka. Bantangu ya nkaka mono ke yulaka bansamuni kana bo lenda zaba mpangi mosi yina ke kwisaka diaka ve na balukutakanu. Bampangi mingi ke sepelaka na kusadisa mono sambu bo ke monaka nde bo me baka dibaku ya kuvukana ti bankuluntu sambu na kusosa mameme yina me vila. Na nima, ntangu mono ke kwendaka kutala bampangi yina me lemba, mono ke yulaka bo kana bana mpi bantu ya dibuta na bo kele mbote. Bampangi ya nkaka yina me lembaka vandaka ntete kunata bana na bo na balukutakanu, bana ya nkaka na kati na bo kumaka nkutu bansamuna. Beto lenda sadisa mpi bana yai na kuvutukila Yehowa.”
SADISA BANA YA YEHOWA YINA ME VILAKA NA KUVUTUKA NA DIBUNDU
8. Na kingana ya mwana yina vilaka, yina kele na Luka 15:17-24, inki mambu tata sadilaka mwana yina balulaka ntima?
8 Inki bikalulu ta sadisa beto na kusadisa bampangi yina kele na mfunu ya kuvutikila Yehowa? Tala malongi yina beto lenda baka na kingana ya Yezu ya mwana yina vilaka. (Tanga Luka 15:17-24.) Yezu tendulaka mutindu mwana yina kumaka diaka ti mabanza ya mbote mpi bakaka lukanu ya kuvutuka na nzo na bo. Tata na yandi kwendaka ntinu kuyamba mwana na yandi sambu na kumonisa nde yandi ke zolaka mwana na yandi. Mwana bakisaka mbi yina yandi salaka yo yina yandi monaka nde yandi me fwana diaka ve na kuvanda mwana ya dituba yina. Mwana yina zabisaka tata na yandi mambu yina vandaka na ntima na yandi mpi tata wilaka yandi mawa. Na nima, tata salaka mambu yina ndimisaka mwana nde bo me ndima kibeni kuyamba yandi diaka na dibuta, ve bonso muntu ya kisalu kansi bonso mwana yina bo ke zolaka mingi. Tata sadilaka yandi feti mpi pesaka yandi bilele ya ntalu sambu yandi balulaka ntima.
9. Inki bikalulu beto fwete vanda ti yo sambu na kusadisa bampangi yina me lembaka na kimpeve na kuvutukila Yehowa? (Tala lupangu “ Mutindu ya Kusadisa Bampangi Yina Ke Zola Kuvutukila Yehowa.”)
9 Yehowa kele bonso tata yina bo me tubila na kingana yina. Yandi ke zolaka bampangi yina me lembaka na kimpeve mpi ke zolaka nde bo vutukilaka yandi. Kana beto ke landa mbandu ya Yehowa, beto ta sadisa bo na kuvutuka na dibundu. Yo ke lombaka kuvanda ntima-nda, kuwila bo mawa mpi kuvanda na zola. Sambu na nki kumonisa bikalulu yai yonso na mambu ya mutindu yai mpi nki mutindu beto lenda monisa yo?
10. Inki mutindu ntima-nda lenda sadisa beto ntangu beto ke sadisa mpangi mosi na kuvutukila bikesa na yandi na kimpeve?
10 Yo ke lombaka ntangu sambu muntu yina me lemba kuvutukila bikesa na yandi, yo yina beto fwete vanda ntima-nda. Bampangi mingi yina lembaka na kimpeve ke ndima nde bo bakaka bikesa sambu bankuluntu mpi bampangi ya nkaka na dibundu vandaka kutala bo mbala na mbala. Mpangi-nkento Nancy na sud-est ya Azia sonikaka nde: “Nduku mosi ya ngolo na dibundu sadisaka mono mingi, ata yandi vandaka leke, yandi vandaka kuzola mono mingi. Yandi vandaka kuyibusa mono bantangu ya kiese yina beto lutisaka ti yandi. Yandi vandaka kuwidikila mono na dikebi yonso mpi mono vandaka kuzabisa yandi mawi na mono, yandi vandaka kupesa mono bandongisila. Yandi vandaka kibeni nduku ya mbote yina vandaka kusadisa mono konso ntangu.”
11. Sambu na nki kuditula na kisika ya mpangi yina waka makasi ta lembika yandi?
11 Kana muntu me sepela ve ti diambu mosi yina bo sadilaka yandi, yo ke pesaka mpasi na ntima bonso mputa. Yo yina kuditula na kisika na yandi ta lembika yandi mutindu nkisi ke lembikaka mputa mpi ke yumisaka yo. Bampangi ya nkaka me lembaka sambu mpangi mosi salaka diambu yina pesaka bo makasi mpi bo ke landa kunwana ti mawi yina ya mpasi bamvula mingi mpi kuwa diaka ve nzala ya kusadila Yehowa. Bankaka lenda yindula nde bo sadilaka bo mambu na nku. Bo lenda vanda ti mfunu ya muntu yina ta widikila bo na dikebi yonso. (Yak. 1:19) María, yina lembaka na kimpeve na nsungi mosi buna, ke tuba nde: “Mono vandaka ti mfunu ya muntu yina ta widikila mono mbote, ta pesa mono kikesa, ta pesa mono bandongisila ya mbote mpi ta sadisa mono.”
12. Pesa mbandu ya ke monisa mutindu Yehowa ke bendaka bampangi yina me lemba sambu bo vutukila yandi?
12 Biblia ke monisa nde zola ya Yehowa sambu na bansadi na yandi kele bonso nsinga. Inki mutindu zola ya Yehowa me fwanana ti nsinga? Beto tadila mbandu yai: Yindula nde nge me dinda na nzadi mosi ya nene mpi ya madidi mingi, ebuna muntu mosi me losila nge lele yina ke sadisaka bantu na kudinda ve. Nge ta sepela mingi ti lusadisu yina sambu yo ta sadisa nge na kudinda ve. Kansi lele yina mpamba me fwana ve na kugulusa nge. Sambu masa kele madidi mingi, nge ta guluka kaka kana muntu me kwisa kubaka nge na bwatu. Yo ta lomba nde muntu kulosila nge nsinga sambu na kubenda nge na bwatu. Yehowa tubaka sambu na bantu ya Izraele yina yambulaka yandi nde: ‘Mono landaka kubenda bo ti bansinga ya zola.’ (Ozea 11:4) Bubu yai, Nzambi ke landaka kusala mutindu mosi sambu na bampangi yina me yambulaka kusadila yandi mpi bayina ke kutana ti bampasi mpi kele ti basusi. Yandi ke zolaka nde bo bakisa nde yandi kele na nzala ya ngolo ya kubenda bo na yandi. Yehowa lenda sadila nge sambu nge monisila bampangi yina me lemba zola na yandi.
13. Inki mutindu mbandu ya Pablo ke monisa nde zola na beto lenda sadisa bankaka na kuvutukila Yehowa?
13 Yo kele mfunu na kundimisa bampangi yina me lemba nde Yehowa ke zolaka bo mpi nde beto ke zolaka bo mingi. Mpangi Pablo yina beto tubilaka na disolo ya me luta vandaka kusamuna diaka ve bamvula kuluta 30. Yandi ke tuba nde: “Kilumbu mosi na suka, mono kutanaka ti mpangi-nkento mosi ya mbuta, yandi tubilaka mono mambu ti zola yonso. Mono dilaka bonso mwana-fioti. Mono songaka yandi nde mono ke mona nde Yehowa muntu me tinda nge na kusolula ti mono. Kaka na ntangu yina, mono bakaka lukanu ya kuvutukila Yehowa.”
PESA BO LUSADISU NA ZOLA YONSO
14. Kingana ya Yezu na Luka 15:4, 5 ke monisa nde ngungudi salaka nki ntangu yandi monaka dimeme yina vilaka?
14 Ntangu beto me kutana ti bampangi yina me lemba na kimpeve, beto fwete landa kusadisa bo mpi kupesa bo kikesa. Bo lenda kuma kudiyangisa bantangu mingi bonso mwana yina vilaka, yina Yezu tubilaka na kingana na yandi. Diaka, bo kele diaka ve ngolo na kimpeve sambu na mambu ya mpasi yina bo ke kutana ti yo na nsi-ntoto yai ya Satana. Beto fwete sadisa bo na kukumisa diaka lukwikilu na bo ngolo. Na kingana ya Yezu ya dimeme yina vilaka, Yezu monisaka mutindu ngungudi tulaka dimeme na mapeka sambu na kuvutula yo na kimvuka na bo. Ngungudi lembaka mingi mpi salaka bikesa ya ngolo sambu na kuzwa dimeme yina vilaka. Ata mpidina, ngungudi bakisaka nde yandi fwete nangula yo sambu yo ta kuka ve kutambula yo mosi.—Tanga Luka 15:4, 5.
15. Inki mutindu beto lenda sadisa bampangi yina me lemba na kimpeve yina ke zola kuvutukila Yehowa? (Tala lupangu “ Kisadilu ya Mbalu Mingi.”)
15 Yo ke lombaka ntangu mingi mpi bikesa sambu na kusadisa bampangi yina me lemba na kimpeve. Ata mpidina, mpeve ya Yehowa, Ndinga na yandi mpi mikanda na beto lenda sadisa bo na kuvutukila bikesa na bo. (Bar. 15:1) Inki mutindu beto lenda sala yo? Nkuluntu mosi ya me zaba mbote kisalu ya kugungula ke tuba nde: “Yo ke vandaka mfunu na kulonguka diaka Biblia ti bampangi mingi yina lembaka na kimpeve, yina me baka lukanu ya kuvutukila Yehowa.” * Yo yina, kana bo me lomba nge na kulonguka ti mpangi mosi yina me lembaka na kimpeve, ndima kusala yo na kiese yonso. Nkuluntu yango ke yika nde: “Nsamuni ya ke longuka ti mpangi ya me lemba fwete vanda nduku ya mbote, muntu yina mpangi ya me lemba lenda tudila ntima, yina yandi lenda songa mambu yonso yina kele na ntima na yandi.”
KIESE NA ZULU MPI NA NTOTO
16. Inki ke ndimisa nde bawanzio ke sadisaka beto?
16 Bambandu mingi ke ndimisa nde bawanzio ke salaka ti beto sambu na kusosa bampangi yina me lembaka na kimpeve sambu bo vutukila Yehowa. (Kus. 14:6) Mu mbandu, mpangi Silvio na Équateur sambaka na ntima ya mvimba sambu Yehowa kusadisa yandi na kuvutuka na dibundu. Ntangu yandi vandaka kusamba, bankuluntu zole kokulaka na kielo na yandi. Na dibaku yina, bo vandaka na kiese ya kusadisa yandi na kuvutukila Yehowa.
17. Inki mambote beto ke bakaka kana beto ke sadisa bampangi yina me lemba na kimpeve?
17 Kusadisa bampangi yina me lemba na kuvutukila Yehowa ke pesaka kiese mingi. Mpangi Salvador, mupasudi-nzila yina ke tudilaka bampangi ya me lemba na kimpeve dikebi mingi ke tuba nde: “Bantangu ya nkaka, mono ke kukaka ve kukanga mansanga ya kiese. Mono ke sepelaka mingi ntangu mono ke monaka mutindu Yehowa me benda diaka dimeme na yandi mosi yina kwendaka na nsi-ntoto ya Satana mpi mutindu yandi me sadila mono sambu na kuvutula dimeme yango.”—Bis. 20:35.
18. Kana nge me lembaka na kimpeve, nki nge fwete vila ve?
18 Kana nge me yambulaka kukwenda na balukutakanu, zaba nde Yehowa ke landaka kaka kuzola nge. Yandi ke zolaka kaka nde nge vutukila yandi. Kele ti mambu yina nge fwete sala sambu na kuvutukila yandi. Bonso tata yina Yezu tubilaka na kingana, Yehowa ke vingila ti mpusa ya ngolo nde nge vutukila yandi mpi yandi ta yamba nge na kiese yonso na dibundu na yandi.
NKUNGA 103 Bangungudi Ke Makabu ya Bantu
^ par. 5 Yehowa ke zolaka nde bampangi yina ke kwisaka diaka ve na balukutakanu kuvutukila bikesa na bo sambu bo landa kusadila yandi. Beto lenda sala bikesa sambu na kusadisa bampangi ya mutindu yai na kusala mambu yai ya Yehowa ke lomba bo: “Beno vutukila mono.” Disolo yai ta tubila mutindu beto lenda sadisa bampangi yai.
^ par. 7 Beto me soba bazina ya nkaka.
^ par. 15 Bampangi ya nkaka yina lembaka lenda longuka bakapu ya nkaka ya mukanda Mutindu ya Kubikala na Zola ya Nzambi, kansi bankaka lenda longuka diaka mukanda Kwenda Pene-Pene na Yehowa. Komite ya Kisalu ya Dibundu ta pona mpangi yina me fwana na kutwadisa kulonguka yina.
^ par. 68 NTENDULA YA BIFWANISU: Bampangi tatu ke sadisa mpangi mosi yina kele na mfunu ya kuvutikila Yehowa. Bo ke solulaka ti yandi mingi sambu na kumonisa yandi nde bo ke zolaka yandi mpi kana yandi ke tuba, bo ke widikilaka yandi na dikebi yonso.
