DISOLO YA KULONGUKA 25
“Mono Ta Sosa Mameme na Mono Mono Mosi”
“Mono ta sosa mameme na mono mono mosi, mpi mono ta keba bo.”—EZEK. 34:11.
NKUNGA 105 Zola ya Kwikama ya Nzambi
MAMBU YINA DISOLO YAI KE TUBILA *
1. Inki mutindu Yehowa kele bonso mama yina ke nwisa mwana?
“KETI nkento lenda vila mwana na yandi ya ke nwa mabele?” Yehowa yulaka ngiufula yai na bilumbu ya profete Yezaya. Yehowa songaka bansadi na yandi nde: “Ata bankento yai kuvila, mono ta vila nge ve ata fioti.” (Yez. 49:15) Yandi ke tubaka ve mbala mingi na Biblia nde yandi kele bonso mama. Kansi na dibaku yai, yandi tubaka yo. Yehowa zolaka kumonisa nde mutindu mama ke zolaka mingi mwana na yandi, yandi mpi ke zolaka mingi bansadi na yandi. Bamama mingi ta bakisa mambu yai ya mpangi Jasmin tubaka: “Kana nge ke nwisa mwana, kinduku na nge ti mwana yina ta kuma ngolo mpi yo ta vanda sambu na luzingu na beno ya mvimba.”
2. Inki mutindu Yehowa ke waka kana nsadi na yandi mosi ke kwenda diaka ve na balukutakanu mpi ke samuna diaka ve?
2 Yehowa ke zabaka ata ntangu nsadi na yandi mosi me yambula kukwenda na balukutakanu mpi ke samuna diaka ve. Yehowa ke waka mpasi mingi ntangu yandi ke monaka konso mvula bansadi na yandi mingi ke samuna diaka ve. *
3. Inki Yehowa ke zolaka?
3 Bampangi mingi yina ke yambulaka kukwenda na balukutakanu ke kumaka diaka kukwisa na balukutakanu mpi mbala mingi bampangi ke yambaka bo na kiese yonso. Yehowa ke zolaka nde bo vutukila bikesa na bo, beto mpi ke zolaka mpidina. (1 Pie. 2:25) Inki mutindu beto lenda sadisa bo? Na ntwala ya kupesa mvutu na ngiufula yai, yo kele mfunu nde beto zaba ntete bikuma yina ke salaka nde bo kwisa diaka ve na balukutakanu mpi bo samuna diaka ve.
SAMBU NA NKI BAMPANGI YA NKAKA KE YAMBULA KUSADILA YEHOWA?
4. Inki me kuminaka bampangi ya nkaka yina me kudipesaka mingi na kisalu na bo ya kinsuni?
4 Kisalu ya kinsuni ke bakaka bampangi ya nkaka ntangu mingi. Mpangi Hung, * na sud-est ya Azia ke tuba nde: “Mono vandaka kusala kisalu bangunga mingi kuluta mpi yo vandaka kulomba mono bikesa mingi, mono vandaka kudikusa nde kana mono me kuma na mbongo mingi, mono ta sadila Yehowa mbote. Yo yina mono vandaka kusala mingi. Mono yantikaka kutina balukutakanu mbala na mbala mpi nsuka-nsuka, mono yambulaka kukwenda na balukutakanu. Satana ke sadilaka bima ya nsi-ntoto sambu na kupusa bantu malembe-malembe na kuyambula kusadila Yehowa.”
5. Inki bampasi mpangi-nkento mosi kutanaka na yo?
5 Bampangi ya nkaka ke kutana ti bampasi mingi. Mpangi Anne na Angleterre kele ti bana tanu. Yandi ke tuba nde: “Mwana na mono mosi butukaka ti maladi ya ngolo, na nima bo basisaka mwana na mono ya nkento na dibundu mpi mwana na mono ya bakala kumaka kubela maladi ya ntu, mono kumaka kudiyangisa mingi yo yina mono yambulaka kukwenda na balulukutakanu mpi na kisalu ya kusamuna, nsuka-nsuka mono vandaka kusamuna diaka ve.” Bampasi ya dibuta ya mpangi Anne ke pesa beto mawa, beto ke wila mpi bampangi ya nkaka yina ke kutana ti bampasi ya mutindu yai mawa.
6. Inki mutindu mpangi lenda yambula kukwenda na balukutakanu kana yandi ke sadila ve ndongisila ya Bakolosai 3:13?
6 Tanga Bakolosai 3:13. Bampangi ya nkaka me waka makasi sambu na mambu yina mpangi mosi salaka. Ntumwa Polo ndimaka nde bantangu ya nkaka beto lenda vanda ti “makambu” ti mpangi mosi. Nkutu mpangi mosi lenda sadila beto mambu ya mbi. Kana beto keba ve, beto lenda bumbila yandi makasi na ntima. Makasi ya mutindu yina lenda sala nde beto yambula kukwenda na balukutakanu. Beto tubila mbandu ya mpangi Pablo na Amerique du Sud. Bo kusilaka yandi nde yandi salaka diambu mosi ya mbi, yo yina bo katulaka yandi mikumba yina yandi vandaka ti yo na dibundu. Inki yandi salaka? Mpangi Pablo ke tuba nde: “Mono waka makasi, malembe-malembe mono yambulaka kukwenda na balukutakanu.”
7. Inki lenda kumina mpangi yina kansansa ke yangisa sambu na disumu yina yandi salaka?
7 Muntu yina kansansa ke yangisa yandi sambu yandi fwaka nsiku ya Nzambi, lenda yindula nde Nzambi ta zola yandi diaka ve. Ata yandi balulaka ntima mpi bo wilaka yandi mawa, yandi lenda mona nde yandi me fwana diaka ve na kuvanda nsadi ya Nzambi. Mpangi Francisco yina kumaka kudiwa mutindu yina ke tuba nde: “Bo pesaka mono ndola sambu mono salaka pite, na luyantiku mono vandaka kukwenda na balukutakanu kansi mono kumaka kudiyangisa mingi mpi kumona nde na kati ya bansadi ya Yehowa mono kele mvindu. Kansansa kumaka kuyangisa mono mpi mono kumaka kuyindula nde Yehowa me lolulaka mono ve. Na nima, mono yambulaka kukwenda na balukutakanu.” Inki mutindu nge ke tadilaka bampangi yina ke kutana ti mambu ya mutindu yai? Keti nge ke kuditulaka na kisika na bo? Diambu ya mfunu kele nde, nki mutindu Yehowa ke waka sambu na bo?
YEHOWA KE ZOLAKA MAMEME NA YANDI
Ngungu mosi ya Izraele ke monisila dimeme yina vilaka zola mingi (Tala baparagrafe 8-9) *
8. Keti Yehowa ke vilaka bantu yina sadilaka yandi? Tendula.
8 Yehowa ke vilaka ve bantu yina sadilaka yandi kansi bo me yambulaka kusadila yandi na ntangu mosi buna. Yandi ke vilaka mpi ve kisalu yina bo sadilaka yandi. (Baeb. 6:10) Profete Yezaya sonikaka mbandu mosi ya kitoko ya ke monisa mutindu Yehowa ke taninaka bansadi na yandi. “Bonso ngungudi, yandi ta keba mameme na yandi. Ti diboko na yandi, yandi ta vukisa bana-mameme, mpi yandi ta nata bo na ntulu na yandi.” (Yez. 40:11) Inki mutindu Yehowa, Ngungudi ya Nene ke waka ntangu dimeme na yandi mosi ke yambulaka kusadila yandi? Yezu monisaka mutindu Yehowa ke kudiwaka ntangu yandi yulaka balongoki na yandi nde: “Inki beno ke yindula? Kana muntu mosi kele ti mameme 100 ebuna dimeme mosi me vila, keti yandi ta bikisa ve mameme 99 na zulu ya bangumba sambu na kukwenda kusosa dimeme yina me vila? Ebuna kana yandi mona yo, mono ke tubila beno ya kieleka nde yandi ta wa kiese mingi sambu na yo kuluta sambu na mameme 99 yina vilaka ve.”—Mat. 18:12, 13.
9. Inki mutindu ngungudi ya mbote ya ntangu ya ntama vandaka kutanina mameme na yandi? (Tala kifwanisu ya lutiti ya zulu.)
9 Sambu na nki Yehowa ke kudifwanisaka ti ngungudi ya mameme? Sambu na ntangu ya ntama, ngungudi ya mbote vandaka kutanina na dikebi yonso mameme na yandi. Mu mbandu, Davidi fwaka ntambu mpi urse sambu na kutanina mameme na yandi. (1 Sam. 17:34, 35) Kana dimeme ata mosi me vila, ngungudi ya mbote ke zabaka. (Yoa. 10:3, 14) Yandi ta yambula mameme 99 na lupangu to ta lomba ngungudi ya nkaka na kutanina bo sambu yandi kwenda kusosa dimeme yina me vila. Yezu sadilaka mbandu yina sambu na kulonga dilongi mosi ya mfunu: “Yo kele ve diambu ya mbote nde ata muntu mosi na kati ya bantu yai ya kukonda mfunu kufwa.”—Mat. 18:14.
Ngungudi mosi na Izraele ya ntama ke tanina mbote dimeme yina vilaka (Tala paragrafe 9)
YEHOWA KE SOSAKA MAMEME NA YANDI
10. Inki Yehowa silaka na Ezekiele 34:11-16 sambu na mameme na yandi yina me vila?
10 Yehowa ke zolaka konso muntu na kati na beto, yo vanda mameme na yandi ya “kukonda mfunu” yina me yambulaka lupangu. Na nzila ya profete Ezekiele, yandi silaka nde yandi ta sosa mameme na yandi yina me vilaka mpi ta belula bo na kimpeve. Yandi monisaka mambu yina yandi ta sala sambu na kubelula bo, yo ke wakana ti mambu yina bangungudi ya ntangu ya ntama vandaka kusala sambu na mameme na bo yina vandaka kuvila. (Tanga Ezekiele 34:11-16.) Ntete, ngungudi vandaka kusosa dimeme, mpi yo vandaka kulomba bikesa mpi ntangu mingi. Na nima, kana yandi me mona yo, yandi vandaka kuvutula yo na kimvuka ya mameme. Kana dimeme yina lwalaka to me konda sambu na nzala, ngungudi yina ya zola ta sadisa dimeme yina, ta sansa bamputa to ta pesa yo madia. Bankuluntu, bangungudi ya “mameme ya Nzambi,” fwete sala mpi mutindu yina sambu na kusadisa bampangi yina me yambula dibundu. (1 Pie. 5:2, 3) Bankulutu fwete sosa bo, kusadisa bo na kuvutuka na dibundu mpi kumonisila bo zola ntangu bo ke sadisa bo na kuvutukila kinduku na bo ti Yehowa. *
11. Inki ngungudi ya mbote vandaka kuzaba?
11 Ngungudi ya mbote vandaka kuzaba nde mameme ya nkaka lenda vila. Yo yina kana dimeme me vila, yandi vandaka ve kubula yo. Beto tadila mbandu yina Yehowa pesaka ntangu yandi sadisaka bansadi na yandi yina yambulaka kusadila yandi sambu na mwa ntangu.
12. Inki mutindu Yehowa sadilaka Yonasi mambu?
12 Profete Yonasi tinaka ntangu Yehowa pesaka yandi kisalu mosi. Ata mpidina, Yehowa bakaka ve nswalu lukanu ya kuyambula Yonasi. Sambu Yehowa kele Ngungudi ya mbote, yandi sadisaka Yonasi na kubaka diaka kikesa sambu na kusala mbote kisalu yina yandi pesaka Yonasi. (Yon. 2:7; 3:1, 2) Na nima, Nzambi sadilaka mwa-nti sambu na kusadisa Yonasi na kubakisa nde Nzambi ke bakaka konso muntu na valere. (Yon. 4:10, 11) Inki dilongi beto ke baka? Bankuluntu fwete baka ve lukanu nswalu sambu na bampangi yina ke vukanaka diaka ve na balukutakanu. Kansi, bo ta sala bikesa sambu na kubakisa bikuma yina me kumisa dimeme madidi na kimpeve. Ntangu dimeme ke vutukila Yehowa, bankuluntu ta landa kumonisila yandi zola mpi kutudila yandi dikebi.
13. Mambu yina Yehowa sadilaka nsoniki ya Nkunga 73 ke longa beto nki?
13 Nsoniki ya Nkunga 73 lembaka na kimpeve ntangu yandi vandaka kumona luzingu ya bantu ya mbi ke landa kutoma. Yandi vandaka kudiyula kana yo kele kibeni mfunu na kulanda kusadila Yehowa. (Nk. 73:12, 13, 16) Inki Yehowa salaka? Yehowa monaka yandi mbi ve. Na nima, muyimbi-bankunga yai bakisaka nde kuvanda nduku ya Yehowa kele diambu ya kuluta mfunu. (Nk. 73:23, 24, 26, 28) Inki dilongi beto ke baka? Bankuluntu fwete mona ve mbi nswalu kana bampangi ya nkaka me kuma kudiyangisa mpi kudiyula kana yo kele kibeni mfunu na kusadila Yehowa. Kansi bankuluntu fwete sosa kubakisa bikuma yina ke pusa bampangi yina na kutuba to kusala mambu mutindu yina. Na nima, bo lenda tanga ti bo baverse yina ta pesa bo kikesa.
14. Inki lusadisu Eliya vandaka na yo mfunu mpi nki mutindu Yehowa sadisaka yandi?
14 Profete Eliya tinaka ntotila-nkento Yezabele. (1 Bant. 19:1-3) Yandi yindulaka nde na baprofete yonso ya Yehowa, yandi mpamba me bikalaka mpi nde kisalu na yandi vandaka ve mfunu. Eliya lembaka nitu mpi vandaka diaka ve ti mfunu ya luzingu. (1 Bant. 19:4, 10) Na kisika ya kumona Eliya mbi, Yehowa ndimisaka yandi nde yandi vandaka ve yandi mosi, sadisaka Eliya na kubakisa nde yandi fwete tula ntima na ngolo ya Nzambi mpi nde Eliya kele kaka ti kisalu mingi. Yehowa bakisaka Eliya na mawete yonso mpi yandi pesaka yandi mikumba ya mpa. (1 Bant. 19:11-16, 18) Inki dilongi beto ke baka? Beto yonso, mingi-mingi bankuluntu fwete sadila bansadi ya Yehowa mambu ti mawete. Kana mpangi mosi ke tuba mambu na makasi to ke tuba nde yandi ke mona nde Yehowa ta lolula yandi ve, bankuluntu fwete widikila na dikebi ntangu yandi ke songa bo mawi na yandi. Mpidina bo ta ndimisa dimeme nde Yehowa ke zoloka yandi mingi.
INKI MUTINDU BETO FWETE TADILA MAMEME YINA ME VILA?
15. Mutindu Yoane 6:39 ke monisa yo, nki mutindu Yezu vandaka kutadila mameme ya Tata na yandi?
15 Inki mutindu Yehowa ke zolaka nde beto tadila mameme na yandi yina me vila? Yezu sadisaka beto na kuzaba mabanza ya Yehowa. Yezu zabaka nde Nzambi ke bakaka mameme na yandi yonso na velere yo yina yandi salaka yonso sambu na kusadisa “mameme ya me vilaka ya nzo ya Izraele,” sambu bo vutukila Yehowa. (Mat. 15:24; Luka 19:9, 10) Yezu ngungudi ya mbote salaka bikesa sambu na kuvidisa ve ata dimeme mosi ya Yehowa.—Tanga Yoane 6:39.
16-17. Inki mutindu bankuluntu fwete sadisa bampangi yina me lemba na kimpeve? (Tala mpi lupangu “ Mawi ya Dimeme Yina Me Vila.”)
16 Ntumwa Polo siamisaka bankuluntu ya Efezo na kulanda mbandu ya Yezu. Yandi tubaka nde: “Beno fwete sala ngolo sambu na kusadisa bantu yina kele ya kulemba, mpi beno fwete yibuka mambu yina Mfumu Yezu yandi mosi tubaka nde: ‘Kiese ke vandaka mingi na kupesa, kansi na kubaka kiese ke vandaka fioti.’” (Bis. 20:17, 35) Yo kele pwelele nde bubu yai bankuluntu kele ti mukumba ya nene na diambu yai. Mpangi Salvador, nkuluntu na Espagne ke tuba nde: “Ntangu mono ke yindulaka mutindu Yehowa ke kebaka mbote mameme na yandi yina me vila, yo ke pusaka mono na kusala yonso sambu na kusadisa bo. Sambu mono kele ngungudi ya kimpeve, mono ke ndima nde Yehowa ke zolaka nde mono keba bo.”
17 Bampangi yonso ya beto me tubila na disolo yai ya lembaka na kimpeve me bakaka lusadisu mpi me kumaka diaka kusadila Yehowa. Bubu yai mpi, bampangi mingi yina me lemba na kimpeve kele na mfunu ya kuvutukila Yehowa. Disolo ya ke landa ta tubila mambu yina beto lenda sala sambu na kusadisa bo.
NKUNGA 139 Kudimona Ntangu Bima Yonso Ta Vanda ya Mpa
^ par. 5 Sambu na nki bampangi ya nkaka yina sadilaka Yehowa na kwikama yonso bamvula mingi ke kwisaka diaka ve na balukutakanu? Inki mutindu Yehowa ke kudiwaka sambu na bo? Disolo yai ta pesa bamvutu na bangiufula yai. Yo ta tubila mpi malongi yina beto lenda baka na mutindu Yehowa sadisaka bantu ya nkaka yina yambulaka kusadila yandi na nsungi mosi buna.
^ par. 2 NTENDULA YA BANGOGO: Nsamuni yina ke samunaka diaka ve kele mpangi yina ke pesa diaka ve bangunga ya kisalu ya kusamuna bangonda sambanu to kuluta. Ata mpidina, bansamuni yina ke samunaka diaka ve kele kaka bampangi na beto mpi beto ke zolaka bo mingi.
^ par. 4 Beto me soba bazina ya nkaka.
^ par. 10 Disolo ya ke landa ta tubila mutindu bankuluntu lenda sala yo.
^ par. 60 NTENDULA YA BIFWANISU: Ngungudi mosi ya Izraele ke kudiyangisa sambu na dimeme yina vilaka, yandi ke sadisa yo na kuvutuka na kimvuka ya mameme. Bubu yai, bangungudi ya kimpeve ke salaka mpi mutindu mosi.
^ par. 64 NTENDULA YA BIFWANISU: Mpangi-nkento mosi yina ke samunaka diaka ve, ke kinga bus, yandi ke tala bampangi zole ya ke samuna na kiese yonso, bo ke ta kimbangi na kisika ya bantu mingi.
