1. Kuwa Nzambi boma ke tendula nki mpi sambu na nki bantu yina ke zolaka Yehowa fwete wa yandi boma?

BAMBANGI ya Yehowa ke zolaka Nzambi mpi bo ke waka yandi boma. Bantu ya nkaka lenda kudiyula nde nki mutindu bantu lenda zola muntu mpi kuwa yandi diaka boma? Beto ke tubila ve boma ya mutindu ya mbi. Beto ke tubila boma mosi ya mutindu ya mbote. Bantu ya ke waka Nzambi boma ke zitisaka yandi mingi. Bo ke zolaka ve kusala kima mosi yina ta sepedisa ve Tata na bo ya zulu sambu bo ke zolaka ve kubebisa kinduku na bo ti yandi.—Nk. 111:10; Bing. 8:13.

2. Inki mambu zole beto ta tubila na kisambu ya ntotila Davidi na Nkunga 86:11?

² Tanga Nkunga 86:11. Kana nge ke yindula bangogo ya verse yai, nge ta ndima nde Davidi, ntotila ya kwikama bakisaka nde yo kele mfunu na kuwa Nzambi boma. Beto tadila mutindu beto lenda sadila mambu yai ya Davidi sonikaka na ngolo ya mpeve santu. Beto ta tadila ntete bikuma yina ke pusaka beto na kuwa zina ya Nzambi boma. Na nima, beto ta tubila mutindu beto lenda monisa konso kilumbu nde beto ke waka zina ya Nzambi boma.

3. Ziku nki sadisaka Moize na kulanda kuwa boma ya zina ya Nzambi?

³ Yindula mutindu Moize kudiwaka ntangu yandi vandaka na dibulu mosi ya matadi mpi monaka na mbona-meso nkembo ya Yehowa ke luta. Mukanda Étude perspicace des Écritures ke tuba nde, “ziku yandi kele muntu ya ntete yina waka boma ya mingi  kuluta bantu yonso yina zingaka na ntwala nde Yezu kubutaka awa na ntoto.” Moize waka bangogo yai, ziku yina wanzio mosi tubaka nde: “Yehowa, Yehowa, Nzambi yina ke wilaka bantu mawa mpi ke fwilaka bo nkenda, yandi ke waka makasi nswalu ve mpi kele ya kufuluka na zola ya kwikama mpi kieleka, yandi ke monisilaka mafunda ya bantu zola ya kwikama, yandi ke lolulaka kifu, mambu ya mbi, mpi disumu.” (Kub. 33:17-23; 34:5-7) Ziku Moize vandaka kuyibuka mambu yai ntangu yandi vandaka kusadila zina ya Yehowa. Beto lenda yituka ve na mutindu Moize longisilaka bantu ya Izraele na ‘kuwa boma ya zina yai ya nkembo mpi ya ke pesa boma.’—Kul. 28:58.

4. Inki bikalulu ya Yehowa beto lenda yindula mingi sambu beto kuma kuwa yandi boma?

⁴ Ntangu beto ke yindulaka zina yai Yehowa, beto fwete yindula mingi munkwa-zina yango. Beto fwete yindula bikalulu na yandi, mu mbandu ngolo, mayele, lunungu mpi zola. Kuyindula mingi bikalulu na yandi yai mpi bikalulu ya nkaka lenda pusa beto na kukuma kuwa yandi boma.—Nk. 77:11-15.

5-6. (a) Zina ya Nzambi ke tendula nki? (b) Mutindu Kubasika 3:13, 14; Yezaya 64:8 ke monisa yo, nki mutindu Yehowa lenda sala nde mambu yina yandi ke zola kusalama?

⁵ Zina ya Nzambi ke tendula nki? Bantu mingi ya mayele ke ndima nde zina yai Yehowa ke tendula “Yandi Ke Kumaka.” Ntendula yai ke yibusa beto nde kima mosi ve lenda kanga Yehowa nzila ya kulungisa luzolo na yandi mpi yandi lenda sala nde mambu yina yandi ke zola kusalama. Inki mutindu?

⁶ Yehowa lenda sala nde mambu kusalama mpi yandi ke kumaka yonso yina yandi me zola sambu na kulungisa luzolo na yandi. (Tanga Kubasika 3:13, 14.) Mikanda na beto ke siamisaka beto na kuyindula mingi na diambu yai ya kuyituka ya kimuntu ya Nzambi. Diaka, Yehowa lenda sala na mpila nde bansadi na yandi ya kukonda kukuka kukuma yonso yina yandi me zola sambu na kusadila yandi mpi kulungisa lukanu na yandi. (Tanga Yezaya 64:8.) Mpidina, Yehowa ke lungisaka luzolo na yandi. Kima mosi ve landa kanga Yehowa nzila ya kulungisa luzolo na yandi.—Yez. 46:10, 11.

7. Inki mutindu beto lenda monisila Tata na beto ya zulu ntonda?

 ⁷ Beto lenda monisila Tata na beto ya zulu ntonda kana beto ke yindula mambu yina yandi me salaka sambu na beto mpi yina yandi me sadisaka beto na kusala. Mu mbandu, ntangu beto ke yindula mingi bima ya kitoko yina yandi me salaka, yo ke yitukisaka beto. (Nk. 8:3, 4) Diaka, ntangu beto ke yindulaka mutindu ya bantu yina Yehowa me kumisaka beto sambu beto sala luzolo na yandi, beto ke kumaka kuzitisa yandi diaka mingi. Ya kieleka, zina Yehowa ke pesa kibeni boma. Yo ke tadila mpi mambu yonso yina Tata na beto me salaka mpi yina yandi ta sala.—Nk. 89:7, 8.

8. Inki Yehowa ke zolaka sambu na zina na yandi mutindu Kulonga 32:2, 3 ke monisa yo?

⁸ Ntangu bantu ya Izraele kumaka pene-pene ya Ntoto ya Lusilu, Yehowa longaka Moize nkunga mosi. (Kul. 31:19) Na nima, Moize longaka bantu nkunga yango. (Tanga Kulonga 32:2, 3.) Ntangu beto ke yindula mambu yina kele na verse 2 mpi 3, beto ke bakisa nde Yehowa ke zolaka ve nde bantu kubumba zina na yandi mpi yandi ke buyisaka ve bantu na kusadila yo ata yo kele santu. Yandi ke zolaka nde bantu yonso kuzaba zina na yandi. Bantu ya Izraele vandaka ti dibaku ya mbote mutindu Moize longaka bo mambu ya me tala Yehowa mpi zina na yandi ya nkembo. Mambu yina Moize longaka bo natilaka bo mambote mpi pesaka bo kikesa, mutindu mvula ke pesaka matiti ngolo mpi ke yedisaka yo. Inki lenda sadisa beto na kuzaba nde malongi na beto ke natilaka mpi bantu mambote ya mutindu yina?

9. Inki mutindu beto lenda santisa zina ya Yehowa?

⁹ Ntangu beto ke samuna nzo na nzo to na kisika yina bantu kele mingi, beto lenda songa bantu zina ya Nzambi na Biblia. Beto lenda pesa bo mikanda, bavideo mpi kusonga bo mambu yina kele na site Internet na beto yina ke kumisaka Yehowa. Na kisika ya kisalu, na nzo-nkanda to ntangu beto ke sala nzietelo, beto lenda zwa mabaku ya kuzabisa bantu mambu ya Nzambi na beto ya zola mpi bikalulu na yandi. Kana beto ke zabisa bantu ya nkaka lukanu ya kitoko ya Yehowa sambu na bantu mpi sambu na ntoto, bo lenda yituka na kuwa na mbala ya ntete mambu ya mutindu yina mpi kukuma kutadila Yehowa na mutindu ya nkaka. Kuzabisa bantu kieleka ya me tala Tata na beto ya zola ke sadisaka na kulanda kusantisa zina ya Nzambi. Beto ke zabisaka bantu nde mambu yina bo tubaka sambu na zina ya Yehowa kele luvunu. Mambu ya Biblia yina beto ke longaka bo ke pesaka bo kikesa mpi ke sadisaka bo mingi.—Yez. 65:13, 14.

10. Ntangu beto ke longuka Biblia ti bantu, sambu na nki beto fwete suka ve kaka na kulonga bo bansiku ya Nzambi?

¹⁰ Ntangu beto ke longuka Biblia ti bantu, beto ke sadisaka bo na kuzaba mpi kusadila zina ya Yehowa. Diaka, beto ke sadisaka bo na kuzaba Yehowa mbote-mbote. Keti beto lenda sadisa bo na kubakisa mambu yai kana beto ke suka kaka na kutendudila bo malongi mpi bansiku ya Nzambi? Longoki ya mbote lenda longuka bansiku ya Nzambi mpi kusepela ti yo. Keti yandi ta lemfukila Yehowa sambu yandi ke zolaka yandi? Kuvila ve nde Eva zabaka bansiku ya Nzambi kansi yandi vandaka kuzola ve na ntima ya mvimba Nzambi yina pesaka bansiku yina, kiteso mosi mpi ti Adami. (Kuy. 3:1-6) Yo yina beto fwete suka ve kaka na kulonga bantu bansiku ya Yehowa.

11. Ntangu beto ke longa balongoki bansiku ya Nzambi, nki mutindu beto lenda sadisa bo na kuzola Yehowa yina ke pesaka bansiku yango?

¹¹ Bansiku ya Yehowa ke vandaka kitoko mpi yo ke vandaka sambu na mambote na beto. (Nk. 119:97, 111, 112) Kansi balongi ya Biblia lenda bakisa ve mambu mutindu yina mingi-mingi  kana bo ke bakisa ve nde Yehowa tulaka bansiku yina yonso sambu yandi ke zolaka beto. Yo yina, beto lenda yula longoki ya Biblia nde: “Inki nge ke yindula, sambu na nki Nzambi ke lomba bansadi na yandi na kusala diambu yai mpi ke buyisa bo diambu yai? Mambu yai ke longa beto nki sambu na yandi?” Kana beto ke sadisa bo na kuyindula mambu ya Yehowa mpi kuzola yandi na ntima na bo ya mvimba, pana beto ta simba kibeni bantima na bo. Balongoki na beto ya Biblia ta kuma kuzola minsiku ya Yehowa mpi ta zola Yehowa yina tulaka bansiku yango. (Nk. 119:68) Lukwikilu na bo ta kuma ngolo mpi bo ta kuma kukanga ntima na bampasi yina bo ta kutana ti yo.—1 Bak. 3:12-15.

12. Inki mutindu Davidi landaka ve kuvanda ti ntima ya mvimba mpi nki bampasi yo natilaka yandi?

¹² Bangogo ya mfunu ya kele na Nkunga 86:11 kele: “Pesa mono ntima ya kukonda kukabwana.” Mpeve santu sadisaka ntotila Davidi na kusonika mambu yai. Na luzingu na yandi, Davidi bakisaka mbote mambu ya mbi yina beto lenda kutana na yo kana beto bika nde ntima na beto kukabwana. Kilumbu mosi, yandi vandaka na ludi ya nzo na yandi mpi yandi monaka Bat-sheba, nkento ya muntu mosi ke yobila. Keti ntima ya Davidi vandaka ya mvimba na ntangu yina to yo vandaka ya kukabwana? Yandi zabaka nsiku yai ya Yehowa: “Nge fwete yuma ve ntima sambu na nkento ya nkweno na nge.” (Kub. 20:17) Ata mpidina, yandi landaka kutala nkento yina. Ntima na yandi kabwanaka sambu yandi kumaka kuwa mpusa ya Bat-sheba mpi mpusa ya kusepedisa Yehowa. Ata Davidi vandaka kuzola Yehowa banda ntama mpi vandaka kuwa yandi boma, yandi bikaka nde mpusa yina ya mbi kuyala yandi. Mpusa yina kumaka ngolo yo yina Davidi salaka disumu. Yandi fingisaka zina ya Yehowa. Diaka, mambu ya mbi yina yandi salaka natilaka bantu ya nkaka mpi dibuta na yandi bampasi.—2 Sam. 11:1-5, 14-17; 12:7-12.

13. Inki ke ndimisa nde Davidi kumaka diaka ti ntima ya mvimba?

¹³ Yehowa pesaka Davidi ndola mpi na nima Davidi vutukilaka kinduku na yandi ti Yehowa. (2 Sam. 12:13; Nk. 51:2-4, 17) Davidi kumaka kuyibuka mambu ya mpasi yina yandi kutanaka na yo ntangu yandi bikaka nde ntima na yandi kukabwana. Na kutuba ya nkaka, na Nkunga 86:11, Davidi vandaka kulomba Yehowa nde: “Pesa mono ntima yina lenda kabwana ve.” Ya kieleka, na nima Ndinga ya Yehowa ke monisa nde ntima ya Davidi kumaka diaka ya ‘mvimba na Yehowa Nzambi na yandi.’—1 Bant. 11:4; 15:3.

14. Inki ngiufula beto fwete kudiyula mpi sambu na nki?

 ¹⁴ Mbandu ya Davidi ke pesa beto kikesa kansi yo ke pesa beto mpi dilongi. Disumu ya nene yina yandi salaka ke kebisa beto bubu yai. Yo vanda beto me yantika kusadila Yehowa to me sadilaka yandi bamvula mingi, beto fwete kudiyula nde, ‘Keti mono ke telaminaka mitambu ya Satana sambu ntima na mono kukabwana ve?’

15. Inki mutindu boma ya Nzambi ta tanina beto na kutala ve bifwanisu yina ke tedimisa bampusa ya nitu?

¹⁵ Mu mbandu, kana na Televisio to na Internet nge me mona kizuzi ya ke tedimisa bampusa ya nitu, inki nge ta sala? Bangindu lenda pusa nge na kutuba nde yo kele mpenza mbi ve to nde muntu yango kele ve kinkonga. Keti yo lenda vanda ve mutambu ya Satana sambu na kukabula ntima na nge? (2 Bak. 2:11) Kifwanisu yina kele bonso disoka ya fioti yina muntu lenda sadila sambu na kubwisa to kupasula nti ya nene. Disoka ke kotaka malembe-malembe tii ntangu yo ta pasula to kubwisa nti ya nene. Keti bifwanisu ya ke tedimisa bampusa ya nitu lenda vanda bonso disoka yai? Yo ke yantikaka malembe-malembe bonso nde yo kele ve ti kigonsa kansi yo ke nataka nswalu na kusala masumu yina ta kabula ntima na beto mpi ta bebisa kwikama na beto. Yo yina, beto fwete bika ve nde kima ya mvindu kukota na ntima na beto sambu ntima na beto kuvanda ya mvimba sambu beto landa kuwa Yehowa boma.

16. Inki bangiufula beto fwete kudiyula na ntwala ya mitambu ya Satana?

¹⁶ Katula bifwanisu, Satana ke tudilaka beto mitambu mingi ya nkaka sambu beto sala mambu ya mbi. Inki beto fwete sala? Bangindu na beto lenda pusa beto na kumona nde mambu yango kele kibeni mbi ve. Mu mbandu beto lenda tuba nde: ‘Bo lenda basisa ve muntu na dibundu sambu na diambu yai, disongidila nde yo kele ve mbi, yo kele ve disumu ya nene.’ Bangindu ya mutindu yai kele mbi. Yo kele mbote nde  beto kudiyula bangiufula bonso: ‘Keti yai kele ve mutambu ya Satana sambu na kukabula ntima na mono? Keti kulanda bampusa yai ya mbi ta fingisa ve zina ya Yehowa? Keti diambu yai ta sadisa mono na kukumisa ngolo kinduku na mono ti Nzambi to yo ta bebisa yo?’ Beto fwete yindula na bangiufula yai. Samba sambu Yehowa kupesa nge mayele sambu nge pesa mvutu ya masonga na bangiufula yai kukonda nsoni. (Yak. 1:5) Kana nge sala mutindu yai, nge ta kuditanina. Yo ta sadisa nge na kutelemina ngolo mitambu ya Satana mutindu Yezu salaka yo ntangu yandi tubilaka Satana nde: “Katuka awa, Satana!”—Mat. 4:10.

17. Sambu na nki yo kele mbi na kuvanda ti ntima ya kukabwana? Pesa mbandu.

¹⁷ Yo kele mbote ve na kuvanda ti ntima ya kukabwana. Tadila mbandu yai, nki ta salama kana bantu ya kimvuka mosi ya nsaka ke wakana ve bo na bo? Bankaka ke zola lukumu na bo mosi, bankaka ke zitisa ve bansiku ya nsaka yina mpi bankaka ke zitisa ve muntu yina ke twadisa nsaka yango? Bo ta nunga ve. Kansi kana kimvuka mosi ya nsaka ke sala na bumosi, bo ta nunga. Ntima na nge kele bonso kimvuka ya nsaka yina ta nunga kana bangindu mpi bampusa yina kele na kati kele na kuwakana sambu na kusadila Yehowa. Kuvila ve lukanu ya Satana kele ya kukabula ntima na nge. Yandi ke zola nde bandingu, bampusa mpi mambu ya kele na ntima na nge kuwakana ve ti bansiku ya Yehowa. Yo yina, nge fwete sala bikesa sambu ntima na nge kuvanda ya mvimba sambu nge landa kusadila Yehowa. (Mat. 22:36-38) Kubika ve ata fioti nde Satana kukabula ntima na nge.

18. Inki lukanu Mika 4:5 me sadisa nge na kubaka?

¹⁸ Samba Yehowa bonso Davidi nde, Yehowa: “Pesa mono ntima ya kukonda kukabwana sambu mono wa zina na nge boma.” Baka lukanu ya kusala mambu ya nge me lomba na kisambu na nge. Konso kilumbu, sala ngolo sambu balukanu na nge ya nene to ya fioti kumonisa nde nge ke vandaka na boma mingi sambu na zina ya santu ya Yehowa. Kana nge sala mpidina, nge ta pesa zina ya Yehowa lukumu sambu nge kele Mbangi ya Yehowa. (Bing. 27:11) Ya kieleka, beto yonso ta tuba bonso profete Mika nde: “Beto ta tambula na zina ya Yehowa Nzambi na beto mvula na mvula.”—Mika 4:5.