Ngogo ya Kiebreo ya bo sadilaka na verse yai ke wakana ti bangogo yina kele na mbalula ya ntama ti ya mpa. Kansi bo me soba yo na mbalula ya mpa sambu na bikuma yai:

1. Ngogo ya bo me sadila na mbalula yai ya mpa ke wakana ti gramere mpi mutindu ya kuyidika bangogo. Ntendula ya ngogo ya ntete ya bo me sadila na verse 12, ngogo asher na Kiebreo, ke wakanisa Nkunga 144:12-15 ti baverse yina kele na ntwala na yo. Bo lenda balula ngogo asher na mitindu mingi. Mu mbandu, yo lenda tendula “yina” mutindu bo sadilaka yo na mbalula ya ntama na bandinga ya nkaka. Kubalula yo mutindu yina pusaka bantu na kuyindula nde mambote yina kele na verse 12 tii na 14 vandaka kutadila bantu ya mbi yina bo tubilaka na baverse yina kele na ntwala na yo. Kansi ngogo asher lenda tendula mpi “yo yina,” “mpidina” to “ebuna,” sambu na kumonisa mambote to bampasi yina lenda kumina kima mosi to bantu. Mbalula ya 2013 mpi bambalula ya nkaka me sadila ngogo “ebuna.”

2. Ngogo ya mbalula ya mpa me sadila ke wakana mbote ti baverse ya nkaka ya kapu yai. Ngogo “ebuna” ya bo me sadila na verse 12 ke monisa nde mambote yina verse 12 tii na 14 ke tubila ke tadila bantu ya mbote, disongidila bantu yina ke lomba nde bo ‘gulusa bo mpi bo katula bo’ na maboko ya bambeni (verse 11). Ngogo yai ya bo me sadila ke wakana mpi ti verse 15, kisika bo me vutukila ngogo “kiese” mbala zole, yo me wakana mbote ti verse 12. Yo yina na bisika yina zole kiese ke tadila bantu ya mutindu mosi, disongidila “bantu yina Yehowa kele Nzambi na bo!” Beto fwete vila mpi ve nde Kiebreo ya kisina vandaka ve ti bidimbu ya kupema, mu mbandu bidimbu ya ke songa kisina ya bangogo. Yo yina bambaludi fwete bakisa mbote ntendula ya bangogo ya kisina, kutadila mbote-mbote mutindu Kiebreo ke sadilaka bangogo ya nkunga, kutadila bangindu ya kele na ntwala mpi na nima ya baverse mpi baverse ya Biblia ya ke wakana ti yo.

3. Ngogo ya mbalula ya mpa me sadila ke wakana ti baverse ya nkaka yina ke monisa balusakumunu yina bansadi ya kwikama ya Nzambi ta baka. Mutindu bo me balula ngogo asher na mbalula yai ya mpa ke sala nde kapu yai ya mukanda ya Bankunga kumonisa kivuvu ya kitoko yina Davidi vandaka na yo nde ntangu Nzambi ta gulusa dikanda ya Izraele na maboko ya bambeni na bo, bansadi ya Nzambi ta vanda na kiese mpi ti bima mingi. (Levi 26:9, 10; Kul. 7:13; Nk. 128:1-6) Mu mbandu, Kulonga 28:4 ke tuba nde: “Bana na nge, mbuma ya ntoto na nge, bana ya bitwisi na nge, mpi bana ya bangombe ti ya mameme na nge ta baka lusakumunu.” Ya kieleka, na luyalu ya Salomo, mwana ya Davidi, dikanda ya Izraele vandaka kibeni na kiese mpi ti bima mingi. Luyalu ya Salomo monisaka mambu ya nene yina ta salama na luyalu ya Mesia.—1 Bant. 4:20, 21; Nk. 72:1-20.

Yo yina, ngogo yina mbalula ya mpa me soba na Nkunga 144 me soba ve mutindu na beto ya kubakisa malongi ya Biblia. Kansi yo me sala nde kapu yai kumonisa pwelele kivuvu yina bansadi ya Yehowa kele na yo, disongidila lufwa ya bantu ya mbi, ngemba ya mvula na mvula ya bantu ya mbote mpi mambote ya mingi yina bo ta baka.—Nk. 37:10, 11.