1, 2. (a) Sambu na nki bantu mingi vandaka kutubila kimpika mpi kimpwanza na bilumbu ya ntumwa Polo? (b) Nani kele Nto ya kimpwanza ya kieleka yina Polo tubilaka?

BAKRISTU ya ntete zingaka na nsi ya luyalu ya Roma, na ntangu yina bantu vandaka kusepela ti bansiku, mutindu ya kusambisa mambu mpi kimpwanza yina bo vandaka na yo. Kansi luyalu yina vandaka kusadila bampika sambu bo sala bisalu mingi ya mpasi. Na ntangu mosi buna, bantu mingi vandaka bampika. Ya kieleka, bantu mingi, yo vanda Bakristu, vandaka kutubila kimpika mpi kimpwanza.

² Ntumwa Polo tubilaka mingi kimpwanza na mikanda na yandi. Kansi yandi sosaka ve kuyidika mambu ya nsi-ntoto, diambu yina bantu mingi sosaka kusala na ntangu yina. Ata mpidina, Polo ti Bakristu ya nkaka salaka bikesa sambu na kulonga bantu nsangu ya mbote ya Kimfumu ya Nzambi mpi kusadisa bo na kubakisa mfunu ya kimenga ya Yezu Kristu. Polo zabisaka Bakristu Nto ya kimpwanza ya kieleka. Yandi tubaka nde: “Yehowa kele Mpeve, ebuna kisika mpeve ya Yehowa kele, kimpwanza kele pana.”—2 Bakorinto 3:17.

3, 4. (a) Inki mambu Polo tubilaka na baverse yina kele na ntwala ya 2 Bakorinto 3:17? (b) Inki beto fwete sala sambu na kuzwa kimpwanza yina Yehowa ke pesaka?

 ³ Na mukanda ya zole yina Polo sonikilaka bampangi ya Korinto, yandi tubilaka mambu yina kuminaka Moize ntangu yandi katukaka na Ngumba ya Sinai na nima ya kusolula ti wanzio mosi ya Yehowa. Luse ya Moize kumaka kusema. Ntangu bantu ya Izraele monaka Moize, bo waka boma, yo yina Moize fikaka lele na luse na yandi. (Kubasika 34:29, 30, 33; 2 Bakorinto 3:7, 13) Polo tubaka nde: “Kansi kana muntu kuvutuka na Yehowa, lele yina ke katukaka.” (2 Bakorinto 3:16) Inki Polo zolaka kutuba?

⁴ Disolo yina me luta monisaka nde kaka Yehowa, Ngangi ya bima yonso, ke vandaka ti kimpwanza na mambu yonso. Yo ke sadisa beto na kubakisa nde Yehowa muntu ke pesaka kimpwanza mpi kimpwanza ke vandaka “kisika mpeve ya Yehowa kele.” Polo tubaka nde kana beto ke zola kuvanda ti kimpwanza yai, beto fwete kwenda na Yehowa. Yo ke tendula nde beto fwete sala kinduku ya ngolo ti yandi. Ntangu bantu ya Izraele vandaka na ntoto ya zelo na zelo, bo vandaka ve kutadila mambu bonso Yehowa. Yo vandaka bonso nde lele mosi me fika mabanza mpi bantima na bo. Bo sepelaka kusadila kimpwanza na bo sambu na kulungisa banzala na bo mosi.—Baebreo 3:8-10.

5. (a) Kimpwanza ya nki mutindu mpeve ya Yehowa ke pesaka? (b) Inki ke ndimisa beto nde muntu lenda vanda ti kimpwanza yina Yehowa ke pesaka ata yandi kele mpika to na boloko? (c) Inki bangiufula beto ta tadila?

⁵ Kimpwanza yina mpeve ya Yehowa ke pesaka me luta kimpwanza yina bantu ke kumaka na yo kana bo katuka na kimpika. Mpeve yai ke pesaka kimpwanza mingi kuluta kimpwanza yina bantu lenda pesa. Yo ke katulaka beto na kimpika ya disumu, ya lufwa mpi ya lusambu ya luvunu ti mambu na yo. (Baroma 6:23; 8:2) Kimpwanza yai ke yitukisa mpenza! Ata muntu yina kele mpika to na boloko lenda vanda ti kimpwanza yai. (Kuyantika 39:20-23) Mpangi Nancy Yuen mpi Harold King salaka bamvula mingi na boloko sambu na lukwikilu na bo, kansi bo vandaka kaka ti kimpwanza yai. Beto lenda tala mambu yina bo kutanaka ti yo na JW Télédiffusion. (Bweta na INTERVIEWS ET TÉMOIGNAGES, > L’ENDURANCE DANS L’ÉPREUVE.) Bika beto tadila bangiufula yai zole. Inki mutindu beto lenda monisa nde beto ke bakaka kimpwanza na beto na mbalu mingi? Inki mutindu beto lenda sadila mbote kimpwanza na beto?

6. Inki mutindu bantu ya Izraele monisaka ve ntonda na Yehowa sambu na kimpwanza yina yandi pesaka bo?

⁶ Kana muntu me kabila beto kima mosi ya mbalu, beto ke tondaka yandi mingi. Kansi bantu ya Izraele monisaka ve ntonda na Yehowa sambu na kimpwanza yina yandi pesaka bo. Bilumbu fioti mpamba na nima ya kubasika na Ezipte, bo kumaka kuyibuka mingi madia mpi masa yina bo vandaka na yo na Ezipte. Bo vandaka kubokuta sambu na mana yina Yehowa vandaka kupesa bo. Nkutu, bo zolaka kuvutuka na Ezipte. Sambu na bo ‘mbisi ya masa, bakonkombre, bapasteki, bapwaro, matungulu, mpi ayi’ vandaka mfunu mingi kuluta kimpwanza yina Yehowa pesaka bo sambu na kusambila yandi. Yo ke yitukisa beto ve mutindu Yehowa wilaka bo makasi. (Kutanga 11:5, 6, 10; 14:3, 4) Mambu yai ke longa beto dilongi mosi ya mfunu mingi.

7. Inki mutindu Polo sadilaka ndongisila yina kele na 2 Bakorinto 6:1 mpi nki mutindu beto lenda sadila yo?

⁷ Polo siamisaka Bakristu yonso na  kulanda kumonisa ntonda sambu na kimpwanza yina Yehowa me pesaka beto na nzila ya Mwana na yandi, Yezu Kristu. (Tanga 2 Bakorinto 6:1.) Polo vandaka muntu ya kukonda kukuka, mpika ya disumu ti ya lufwa mpi yo vandaka kupesa yandi mpasi mingi. Ata mpidina, yandi tubaka nde: “Mono ke tonda Nzambi na nzila ya Mfumu na beto Yezu Kristu!” Sambu na nki yandi tubaka mutindu yina? Polo songaka Bakristu nde: “Sambu nsiku ya mpeve yina ke pesaka luzingu na bumosi ti Kristu Yezu me katulaka nge na kimpika ya nsiku ya disumu mpi ya lufwa.” (Baroma 7:24, 25; 8:2) Bonso Polo, beto fwete vila ve nde Yehowa me katulaka beto na kimpika ya disumu mpi ya lufwa. Kimenga ya Yezu me sadisaka beto na kusadila Nzambi ti kansansa ya bunkete mpi beto me kumaka na kiese ya kieleka.—Nkunga 40:8.

8, 9. (a) Inki ndongisila ntumwa Piere pesaka na mutindu beto fwete sadila kimpwanza na beto? (b) Inki mutindu muntu lenda sadila kimpwanza na yandi na mutindu ya mbi?

⁸ Beto fwete monisa ntonda na Yehowa mpi beto fwete keba na kusadila ve kimpwanza na beto na mutindu ya mbi. Mu mbandu, ntumwa Piere ke longisila beto na kusadila ve kimpwanza na beto sambu na kusala mambu ya mbi. (Tanga 1 Piere 2:16.) Ndongisila yai ke yibusa beto mambu yina kuminaka bantu ya Izraele na ntoto ya zelo na zelo. Yo ke tadila beto mpi, nkutu yo ke mfunu mingi sambu na beto. Satana ti nsi-ntoto na yandi ke basisaka bima mingi ya kitoko na yina me tala kulwata, kudia, kunwa mpi bansaka. Bantu yina me yedisaka mayele na bapiblisite ke sadilaka bantu ya kitoko sambu na kupusa beto na kusumba bima yina beto kele mpenza ve na mfunu na yo. Kana beto keba ve, nsi-ntoto lenda pusa beto na kusadila kimpwanza na beto na mutindu ya mbi.

⁹ Beto lenda sadila mpi ndongisila ya Piere na mambu mingi yina beto ke zola kusala na luzingu, mu mbandu, banzo-nkanda, kisalu to kisalu yina beto ke pona na luzingu. Bubu yai, bantu ke pusaka baleke na kusala ngolo na nzo-nkanda sambu bo ndima bo na ba iniversite ya kuluta mbote. Bantu mingi ke songaka bo nde kana bo sala banzo-nkanda ya nda bo ta zwa bisalu ya mbote, ta kuma ti mbongo mingi mpi bantu ta zitisaka bo. Bantu yango lenda songa bo mambu yina ke monisa nde bantu yina me salaka banzo-nkanda ya nda ke zwaka mbongo mingi kuluta bantu yina me tangaka mingi ve. Ntangu baleke ke baka balukanu yina ke tadila luzingu na bo, bo lenda yindula nde yo kele mbote na kusala banzo-nkanda ya nda. Kansi nki mambu baleke mpi bibuti fwete vila ve?

10. Inki beto fwete vila ve ntangu beto ke baka balukanu na mambu na beto mosi?

¹⁰ Bantu ya nkaka ke yindulaka nde sambu balukanu ya bo ke zola kubaka ke tadila bo mosi, bo fwete pona mambu yina bo ke zola kana yo ke yangisa ve kansansa na bo. Bo lenda kuma ti bangindu bonso yai: “Sambu na nki kansansa ya muntu ya nkaka fwete sambisa kimpwanza na mono?” (1 Bakorinto 10:29) Ata beto kele ti kimpwanza ya kupona kisalu to ya kusala banzo-nkanda, beto fwete vila ve nde kimpwanza na beto ke vandaka ti bandilu mpi balukanu na beto yonso lenda natila beto mambote to bampasi. Yo yina, Polo tubaka nde: “Bo me pesaka nzila na mambu yonso, kansi mambu yonso ve ke nataka mambote. Bo me pesaka nzila na mambu yonso, kansi mambu yonso ve ke tungaka.” (1 Bakorinto 10:23) Ata beto kele ti nswa ya kubaka balukanu na mambu na beto mosi, mambu ya beto ke zolaka ke vandaka ve mambu ya kuluta mfunu.

11. Sambu na nki Yehowa me katulaka beto na kimpika?

¹¹ Ntangu Piere pesaka ndongisila ya kusadila ve kimpwanza na beto na mutindu ya mbi, yandi tubaka nde mutindu ya mbote ya kusadila yo kele kusala “bonso bampika ya Nzambi.” Yo yina Yehowa pesaka Yezu sambu na kukatula beto na kimpika ya disumu mpi ya lufwa sambu beto sadila yandi luzingu na beto ya mvimba.

12. Inki dilongi beto ke baka na mbandu ya Noa ti dibuta na yandi?

¹² Mutindu ya mbote ya kusadila kimpwanza na beto kele kusadila mingi ngolo mpi ntangu na beto sambu na Yehowa. Kusala mutindu yai ta sadisa beto na kubika ve nde mambu ya nsi-ntoto mpi banzala na beto kubaka kisika ya ntete na luzingu. (Bagalatia 5:16) Yindula mambu yina Noa mpi dibuta na yandi salaka. Bo zingaka ti bantu ya nku mpi ya mansoni. Kansi bo landaka ve balukanu mpi bikalulu ya bantu yina. Bo kudipesaka na kisalu yina Yehowa pesaka bo. Bo tungaka maswa, bumbaka madia na bo ti ya bambisi mpi longaka bantu ya nkaka na yina me tala Mvula ya Ngolo. Biblia ke tuba nde “Noa salaka mambu yonso kaka mutindu Nzambi songaka yandi. Yandi salaka kaka mutindu yina.” (Kuyantika 6:22) Yo yina, Noa ti dibuta na yandi gulukaka ntangu Nzambi fwaka nsi-ntoto.—Baebreo 11:7.

13. Inki Yehowa ke lombaka beto bubu yai?

¹³ Bubu yai, nki Yehowa ke lombaka beto? Nzambi ke lombaka beto, balongoki ya Yezu na kusamuna. (Tanga Luka 4:18, 19.) Satana ke kusaka bantu mingi bubu yai, yo yina bo ke bakisaka ve nde bo kele bampika ya mabundu ya luvunu, ya bima ya kinsuni mpi ya mambu ya politiki. (2 Bakorinto 4:4) Bonso Yezu, beto kele ti dibaku ya kusadisa bantu na kuzaba mpi kusambila Yehowa, Nzambi yina ke pesaka kimpwanza. (Matayo 28:19, 20) Kulonga bantu ya nkaka ke vandaka ve pete. Na bisika ya nkaka, bantu ke tulaka ve dikebi na mambu ya Nzambi, nkutu bankaka ke waka makasi kana beto ke longa bo. Sambu Yehowa ke lombaka beto na kusamuna, beto fwete kudiyula nde,  ‘Keti mono ke sadilaka kimpwanza na mono sambu na kusala mingi na kisalu ya Yehowa?’

14, 15. Inki lukanu bansadi mingi ya Yehowa ke bakaka? (Tala kifwanisu ya luyantiku ya disolo.)

¹⁴ Beto kele na kiese ya kuzaba nde bansadi ya Yehowa mingi me bakisaka nde nsuka ya nsi-ntoto yai me finama, bo me bakaka lukanu ya kuzinga kukonda mindondo mpi ke salaka kisalu ya kimupasudi-nzila. (1 Bakorinto 9:19, 23) Bapasudi-nzila ya nkaka ke samunaka na bisika ya bo ke zingaka, bankaka ke kwendaka kusadisa mabundu ya nkaka. Na bamvula tanu ya me luta, bansamuni kuluta 250 000 kumaka bapasudi-nzila mpi bubu yai bapasudi-nzila ya ntangu yonso kele kiteso ya 1 100 000. Yo kele kiese kibeni na kumona bantu mingi ke sadila kimpwanza na bo sambu na kusadila Yehowa mutindu yai!—Nkunga 110:3.

¹⁵ Inki sadisaka bo na kusadila mbote kimpwanza na bo? Beto tadila mbandu ya John ti Judith, yina me salaka na bansi mingi bamvula 30 me luta. Bo ke tuba nde ntangu Nzo-Nkanda ya Bapasudi-Nzila yantikaka na 1977, bo siamisaka bana ya nzo-nkanda na kukwenda kusamuna na bisika yina mpusa kele mingi. Yo lombaka nde John ti Judith kuzinga kukonda mindondo sambu na kukwenda kisika yina mpusa kele mingi. Yo yina, mbala mingi John vandaka kusoba kisalu na yandi. Nsuka-nsuka, bo kwendaka kusamuna na insi ya nzenza. Inki sadisaka bo na kununga bampasi bonso, kulonguka ndinga ya nkaka mpi kuyikana ti mutindu ya kuzinga ya insi yina? Bo sambaka Yehowa mpi bo tulaka ntima nde yandi ta sadisa bo. Inki mutindu bo ke kudiwaka na bamvula yonso yina bo ke sadilaka Yehowa? John ke tuba nde: “Mono kudipesaka ya mvimba na kisalu ya kuluta mbote yina mono zabaka ve mpi me salaka ntete ve. Mono me kumaka kundima nde Yehowa kele mpi yandi ke monisilaka beto zola kuluta zola yina tata lenda monisila bana na yandi. Ntangu yai mono me bakisaka mbote mambu yina Yakobo 4:8 ke tubaka: ‘Beno kwenda pene-pene na Nzambi, ebuna yandi ta kwisa pene-pene na beno.’ Mono me bakisaka nde luzingu na mono me kumaka ya mbote, diambu yina mono vandaka kusosa.”

16. Inki mutindu bampangi mingi sadilaka mbote kimpwanza na bo?

¹⁶ Bonso John ti Judith, bampangi ya nkaka lenda sala kisalu ya kimupasudi-nzila bamvula mingi. Luzingu ya bampangi ya nkaka lenda pesa bo nzila ya kusala kisalu yai kaka sambu na mwa ntangu. Bampangi ya nkaka ke kudipesaka na kutunga Banzo ya Kimfumu. Mu mbandu, bampangi kiteso ya 27 000 kwendaka kupesa maboko na kisalu ya kutunga babiro ya ke twadisaka kisalu na beto na ntoto ya mvimba na Warwick, na New York. Bampangi ya nkaka salaka bamposo zole, bankaka mwa bangonda mpi bankaka diaka salaka mvula mosi to bamvula mingi. Bampangi mingi salaka bibansa sambu na kusala na Warwick. Bo kele bambandu ya mbote sambu bo sadilaka kimpwanza na bo sambu na kukumisa Yehowa, Nzambi yina ke pesaka kimpwanza!

17. Inki mambote beto ta baka kana beto ke sadila mbote kimpwanza na beto?

¹⁷ Beto ke tonda Yehowa mutindu beto me zabaka yandi mpi me kumaka ti kimpwanza sambu beto ke sambilaka yandi. Bika balukanu na beto kumonisa nde beto ke bakaka kimpwanza yai na mbalu. Na kisika ya kusadila kimpwanza na beto na mutindu ya mbi, beto fwete sadila yo sambu na kusadila mingi Yehowa. Ebuna beto ta baka balusakumunu yina Yehowa me silaka ntangu mbikudulu yai ta lungana: “Lugangu yo mosi mpi ta katuka na kimpika ya disumu mpi ya lufwa mpi ta baka kimpwanza ya nkembo ya bana ya Nzambi.”—Baroma 8:21.