Keti nge tangaka na dikebi yonso banimero ya Nzozulu ya Nkengi ya me katuka kubasika? Meka kupesa mvutu na bangiufula yai:

Ntangu bibuti ya kele na bansi ya nzenza ke longa bana na bo kieleka, sambu na nki yo kele mfunu nde bo tula dikebi na ndinga?

Ntembe kele ve nde bana ta longuka ndinga ya insi ya nzenza na nzo-nkanda mpi na bantu ya nkaka. Yo kele mbote nde mwana kuzaba bandinga mingi. Bibuti fwete tala mbote-mbote dibundu ya ndinga yina bo fwete kwenda sambu bana kuyela mbote na kimpeve, mu mbandu bibuti lenda pona kukwenda na dibundu ya ndinga ya bwala na bo to ya insi yina bo kele. Bibuti yina kele Bambangi ya Yehowa ke tulaka kimpeve ya bana na bo na kisika ya ntete kuluta mambu yina bo ke zolaka.—w17.05, balut. 9-11.

Inki Yezu zolaka kutuba ntangu yandi yulaka Piere nde: “Keti nge ke zolaka mono kuluta yai?” (Yoa. 21:15)

Yo ke monana nde Yezu zolaka kuzaba kana Piere ke zolaka yandi kuluta bambisi yina vandaka pana to mpi kisalu na yandi ya kuloba. Na nima ya lufwa ya Yezu, Piere vutukaka na kisalu na yandi ya kuloba. Bakristu fwete tadila mbote mutindu bo ke tadilaka kisalu na bo ya kinsuni.—w17.05, balut. 22-23.

Sambu na nki Abrahami songaka nkento na yandi na kutuba nde yandi kele mpangi na yandi? (Kuy. 12:10-13)

Na masonga yonso, Sara ti Abrahami vandaka bana ya tata mosi. Kana Sara tubaka nde yandi kele nkento ya Abrahmi, mbala ya nkaka bantu zolaka kufwa Abrahami mpi Abrahami zolaka ve kubuta mwana yina Nzambi silaka yandi.—wp17.3, balut. 14-15.

Inki mayele Elias Hutter sadilaka sambu na kusadisa bantu yina vandaka na mfunu ya kulonguka Kiebreo?

Yandi sadisaka bantu ya ke longuka Kiebreo na kubakisa na Biblia bangogo ya kele kibeni ya Kiebreo mpi bangogo ya nkaka yina bo me yika na luyantiku to na nsuka ya bangogo ya Kiebreo. Sambu bantu kubakisa yo mbote, yandi niemaka bangogo yina kele kibeni ya Kiebreo ti mukubu ya mingi kuluta bayina bo vandaka kuyika na lweka ya bangogo ya Kiebreo. Mbalula ya Nsi-Ntoto ya Mpa (Bible avec notes et références) me sadilaka mpi mayele yai na banoti na nsi ya lutiti.—wp17.4, balut. 11-12.

Inki minsiku lenda sadisa Mukristu na kuvanda ve ti munduki sambu na kuditanina?

Mu mbandu, kuzaba nde sambu na Nzambi, luzingu kele santu. Yezu siamisaka ve balongoki na yandi na kuvanda ti bambele sambu na kuditanina. (Luka 22:36, 38) Beto fwete kumisa bambele na beto bansengo ya kusadila bisalu. Luzingu kele na mbalu mingi kuluta bima. Diaka, beto ke zolaka kuzitisa kansansa ya bantu ya nkaka mpi kupesa mbandu ya mbote. (2 Bak. 4:2)—w17.07, balut. 31-32.

Sambu na nki mambu ya lubutuku mpi kileke ya Yezu yina Matayo sonikaka me swaswana ti ya Luka?

Matayo tubilaka mingi-mingi luzingu ya Yozefi, mu mbandu mutindu Yozefi kudiwaka ntangu yandi zabaka nde Maria me baka divumu, nsangu ya Nzambi ya kutina na Ezipte mpi kuvutuka na bilumbu ke kwisa. Luka tubilaka mingi-mingi Maria; mu mbandu ntangu Maria kwendaka kutala Elizabeti mpi mutindu Maria kudiwaka ntangu Yezu bikalaka na tempelo.—w17.08, lut. 32.

Biblia me nungaka nki mambu ya mpasi?

Bantendula ya bangogo ya nkaka ya ntama yina bo sadilaka na Biblia me sobaka na nima ya bamvula. Mambu ya politiki me yelaka mpi yo me sobaka mutindu ya bantu ya kutuba. Bantu vandaka kubangika bantu yina vandaka kubalula Biblia na bandinga yina bantu mingi ke tubaka.—w17.09, balut. 19-21.

Keti nge kele ti wanzio yina ke taninaka nge?

Ve. Yezu tubaka nde bawanzio ya balongoki na yandi ke talaka ntangu yonso luse ya Nzambi. (Matt. 18:10) Yandi zolaka kutuba nde bawanzio ke tudilaka balongoki dikebi, kansi ve nde konso longoki kele ti wanzio yina ke taninaka yandi.—wp17.5, lut. 5.

Inki kele zola ya kuluta mbote?

Yo kele zola yina me simbama na bansiku ya Biblia, bo ke bingaka yo agapê. Yo ke pusaka muntu na kuzola mingi bampangi. Yo ke sadisaka mpi muntu na kumonisa bikalulu ya mbote, mu mbandu kutula bampusa ya bantu ya nkaka na ntwala ya bampusa na beto.—w17.10, lut. 7.